كرت إعاقة لبنتي.. ساعدوني( أم حزينة )

[sweet_lulu]

السلام عليكم ورحمة الله وبركاته

إلى كل من تستطيع افادتي في هذ1 الموضوع اقولها من البداية جزاك الله خير وانشالله يكون في ميزان حسناتج..

بقولكم سالفة بنتي واللي تقدر تفيدني بكون شاكرة لها..

انا ولدت بنتي في الصباح وسحبوها من ايدها واقطعولها عصبين بالايد .. ويوم صار عمرها 6 شهور سويت لها عملية تركيب اعصاب .. يعني خذوا من ريلوها عصبين وركبوهم حق الايد ..

وقبل سنتين موديتها فرنسا على حسابي .. والسنة اللي فاتت سوت عملية نقل عضلة حق كتفها لأن كتفها مدني لي جدام .. يعني العضلة القوية جدام قاعده تسحب الضعيفه .. فبالعملية بدلهم مكانهم

العملية الثانية كانت هالسنة وهم كانت عبارة عن نقل عضلة بس في كف الايد .. لأن ماكانت تفتح ايدها عدل ولا اصابعها..
وانا من يوم ولدتها لي هاليوم وانا كل علاج طبيعي في مستشفى الطب الطبيعي ومتابعات مع الرازي .. وبالرازي صنفوا بنتي من الحالات النادرة وصار كلما ايي دكتور زائر كانت بنتي تنعرض عليه أول حالة ...

للحين بنتي عندها مشاكل في الحركة وانا للحين مستمرة بالعلاج الطبيعي لها ..

صادفت وحدة بمشغل فانتبهت على ايد بنتي وشافت اثار العملية وسألتني شفيها وقتلها السالفه .. فسألتني رفعتي على الدكتور قضية ؟؟ طلعتيلها كرت اعاقة ؟؟ قتلها لأ .. جان تقولي روحي طلعي اهيا يحقلها وتاخذ حقوقها بأثر رجعي وهم في فايده لج ولزوجج من حيث التقاعد المبكر والراتب التقاعدي الكامل ..

فالمطلوب من بعد قرايتكم لسالفة بنتي اني بطلعلها كرت اعاقة وماني عارفة شلون الطريقه لأن كل ما ادق على المجلس الأعلى للمعاقين مايردون ..

ياريت تفيدوني بأسرع وقت واكون شاكرتلكم

 

[فالنسيا الكويت]

هلا حبووبة....
اول شي الحمدلله على سلامة بنيتج ....

ثاني شي بقوولج اللي اعرفــه...

اول شي لازم يكون معاج تقاارير كاملة عن الحالة من المستشفــى

بعديــن

تروحيــن للمجلس الاعلى((مو تدقين عليهم لانهم ماراح يردون عليج))

وبعدين

راح يعطوونج اوراق تروحين فيهم للطب التطوري*مستشفى الاطفال* ((اللي داخل منطقة الصباح الطبيــة))

وبعدين

راح يعطوونج موعد لجنــة ((تقريبا من شهر الى شهرين )) هذا اذا ربج يحبج


وبعدين

لما تطلع نتيجة اللجنــة تراجعين المجلس الاعلــى ويعطوونج شهادة اعاقــة ... وهويــة معــاق


وعلى اساس الشهادة والهويــة ,,,,, راح يصير عندج ملف بالمجلس وتقدرين بعدها تستفيدين من الامتيازات والحقوق لبنتج


والسمووحــة على التقصيــر .. وإن شاء الله استفدتــي​

 

[لولو-الصغيره]

ما تشوفين شر حبيبتي
انا مع اختي فالنسيا
اهم شي التقارير علشان يستندون عليها ولا تفكرين تدقين عليهم بالتليفوون ماراح يعطونج ولا شي وتعبين عمرج
بس نصيحه مني لاختي ام السعيده مو الحزينه اذا بغيتي تروحين خلي ريال يروح معااج والله ولا يعبرونج انا مجربه وعارفه طريقتهم والله انا ريلي يدخل بخشومهم يالله يمشي الشغل ويبيلج زن زن زن علي رووسهم علشاان تخلصين
بس الله يعينج علي ما تروحين مركز الوراثه ومواعيد لازم تتحملين وتصبرين بعديييييييين ترتااحين وأللحين مشددين علي اصدار شهادات الاعاااقه بس اهم شي اهم شي التقاااااااارير


وفي شغله حبيبتي انه ما يعطونج اثر رجعي نهاائيااا لانه هذا يعتبر الغلط منج انتي لازم تكونين مقدمه اوراقها من الولاده بس راح يعطونج من بداية فتح الملف في المجلس الاعلي وبداية اللجنه بالمواافقه عااد نطري شهر شهرين وثلاثه
وما تشوفييين شر ان شاء الله ويشااافى بنيتج يارب
ولا يضيق خلقج حبيبتي عسى ربي يفرجها عليييج وسخر لج عياااال الحلال تخلصين شغلج كله ​

 

[الصابرة المحتسبة]

رد : رد: كرت إعاقة لبنتي.. ساعدوني( أم حزينة )

هلا وغلا باختنا

وجزاج الله خير يافالنسيا ولولو

المستندات المطلوبة للحصول على المساعدة الإجتماعية لمن هم أقل من 18 سنة:
ملاحظه هامه: يرجى التكرم بإبلاغ الباحثة الإجتماعية عن وجود ملف سابق تم فتحه في قسم خدمة المعاقين باسم المعاق أو أحد من أخوانه من عدمه.
1- صورة من شهادة إثبات الإعاقة للابن المعاق.
2- صورة من البطاقة المدنية للمعاق والأب والأم .
3- صورة من شهادة ميلاد الطفل المعاق.
4- شهادة تفصيل راتب للأب إذا كان على رأس عمله.
5- شهادة لمن يهمه الأمر من المؤسسة العامة للتأمينات الإجتماعية إذا كان الأب متقاعدا.
6- شهادة لمن يهمه الأمر من المؤسسة العامة للتأمينات الإجتماعية باسم الطفل المعاق.
7- شهادة لمن يهمه الأمر من وزارة التجارة والصناعة تفيد عدم تملك رخص تجارية باسم الأب والطفل المعاق.
8- شهادة لمن يهمه الأمر من وزارة العدل - ادارة التسجيل العقاري والتوثيق - تفيد عدم تملك أي عقار استثماري باسم الأب والطفل المعاق.
9- شهادة لمن يهمه الأمر من دور الرعاية الإجتماعية تفيد بان المعاق ليس نزيل في دور الرعاية الإجتماعية.
10- تحويل راتب من البنك باسم المعاق.

 

[الصابرة المحتسبة]

رد : رد: كرت إعاقة لبنتي.. ساعدوني( أم حزينة )

 الدور الاول: (( السكرتارية الطبيه)) 1- استخراج شهادة اثبات اعاقه لأول مره – (المستندات المطلوبه: تقرير طبي + البطاقة المدنية للمعاق و الاب والام + شهادة ميلاد المعاق)
2- طباعة لمن يهمه الامر لجهه حكومية معينه + خط ايزي مع رصيد 10د.ك من شركة زين + تخفيف العمل للأم أو الأب وليس للاثنين معا ومع ملاحظة خصم من راتب طالب التخفيف على هذا التخفيف.
3- تقديم طلب الكوبونات للحفاظات لأول مره – العمر من 4سنوات و أقل من 60 سنه.

 الدور الثاني:
1- (( القسم المالي والاداري)) حبيبه العبيد - الاستلام الشهري لكوبونات الحفاظات للمعاق.
2- ((قسم مكتب العلاقات العامه)) فواز الحصبان

 الدور الثالث: (( التامينات الاجتماعية والاسكان والمرافق العامه)) عنود الوزان
1- معاش المعاق لسن 18 سنه وما فوق ( شرط نسبة العجز فوق 50% وغير موظف)
2- تقديم طلب القرض الاسكاني لبنك التسليف والادخار.
3- تقديم طلب للوحه المرور للوقوف في مواقف المعاقين.

 الدور الرابع: ((خدمة المعاقين)) منيره المطيري
1- استخراج هوية اعاقه ( صوره من شهادة الاعاقه + 2 صور شخصية + البطاقه المدنية + صورة جواز السفر)

 الدور الخامس:
(( قسم التعليم)) محمد المطيري
1- التسجيل لمدارس والحضانه الخاصة بالمعاقين + البعثات + كتاب التشغيل لديوان الخدمه المدنية.
(( قسم الأجهزة التعويضية ))
1- التقديم لطب الكرسي المتحرك للمعاقين+السمعاعت+جهاز كمبيوتر المكفوفين.

 الدور السادس:
1-(( مكتب المدير العام)) نجاة القلاف
2- ((مكتب مساعد المدير)) عصام حيدر

العنوان الشعب البحري قطعه 8 - خلف ديوان الشيخ دعيج الصباح
التليفون: 22620951 - 22620934
فاكس: 22663769

 

[sweet_lulu]

مشكووووووووووووورين والله يعطيكم العافية ولا تشوفون مكروه بحبايبكم ويجعله يارب بميزان حسناتكم ...

بس انا اللي فهمته الموضوع في وايد لويه ونطرة وطلبات..

انزين سؤال ؟ اهيا من انولدت واهيا تراجع بالرازي وكل عملياتها هناك .. ولما طلبت تقرير من الرازي قبل لا اسافر فرنسا عطوني تقرير مايبرد الجبد حيييييييييييييل مختصر وحتى ماعجب الدكتور اللي بفرنسا .. حبيت اعرف راح ياخذون بتقرير الرازي والا لأ ؟؟ والا شنو اقول حق قسم التقارير بالرازي لما أبي اطلبه ؟؟؟

ومشكورين وايد

 

[فالنسيا الكويت]

مشكووووووووووووورين والله يعطيكم العافية ولا تشوفون مكروه بحبايبكم ويجعله يارب بميزان حسناتكم ...

بس انا اللي فهمته الموضوع في وايد لويه ونطرة وطلبات..

انزين سؤال ؟ اهيا من انولدت واهيا تراجع بالرازي وكل عملياتها هناك .. ولما طلبت تقرير من الرازي قبل لا اسافر فرنسا عطوني تقرير مايبرد الجبد حيييييييييييييل مختصر وحتى ماعجب الدكتور اللي بفرنسا .. حبيت اعرف راح ياخذون بتقرير الرازي والا لأ ؟؟ والا شنو اقول حق قسم التقارير بالرازي لما أبي اطلبه ؟؟؟

ومشكورين وايد

يزاااااااااج الله خير

وبخصوص سؤالج:
لازم تطلبين من قسم الاطفال تقرير
ومن قسم الجراحــة تقرير
((مع اني متأكدة اني قسم الاطفال فيه كل تقارير لانهم يحطوونهم مع بعض))

ولازم تطلبين منهم التقرير يكون باللغة الانجليزية ومفصل​

 

[Miss Cherry]

حبيبتي ماتشوف شر بنتج

انتي قدمي كل التقارير اللي عندج بما فيها تقارير فرنسا .. وصح كلام البنات ماينزل شي باثر رجعي

وحسب علمي عن الخطأ الطبي لانه سألت وأخذت رأي قانوني قالي يسمى إصابة بالخطأ وبعد 6 أشهر يسقط حقج .. انا حاسه فيج لانه عندي معاق بسبة خطأ طبي وأخفوا ملفه بمستشفى مبارك اقول بهالشهر الفضيل الله لا يحللهم وعساني اشوف فيهم يوم هم وعيالهم

بس انتي ليش تأخرتي جذي .. حقج وحق بنتج لا تسكتين عنه على الأقل ينزلون لج تعويض عن هالبهذله والمراكض بالمستشفيات حسبي الله عليهم

 

[الباحثات عن الجمال]

أسأل الله العظيم رب العرش العظيم أن يشفيها.
أسأل الله العظيم رب العرش العظيم أن يشفيها.
أسأل الله العظيم رب العرش العظيم أن يشفيها.
أسأل الله العظيم رب العرش العظيم أن يشفيها.
أسأل الله العظيم رب العرش العظيم أن يشفيها.
أسأل الله العظيم رب العرش العظيم أن يشفيها.
أسأل الله العظيم رب العرش العظيم أن يشفيها.

 

[غير كل الناس]

عسي ربي ياجرج وكل الامهات اللي مثلج يارب

 

[فوشيه عجيبه]

الله ياجرج انشالله

 

[الصابرة المحتسبة]

رفع