لكل البنات اللى جربو برنامج مذهله لشعر جنه باروكه..تعالو ابيكم..

[سما الكويت]

السلام عليكم ورحمة الله وبركاته..










مثل ما انتم عارفين الاخت مذهله عسى الله يجزاها خير وين ماراحت نزلت قبل سنه وشي تقريبا برنامج ومشت عليه اهى وبنات كثير معاها...وكانت نتايجه مذهله..

وبعدين ارجعت ونزلت البرنامج حق البنات اللى يبونه..هنيه..

وبما انها غايبه صارلها فتره عن المنتدى..عسى الله يردها لنا سالمه..

وانا اشوف بنات كثير يسألون اسأله تتعلق بالبرنامج..ومحد يرد عليهم..:cxxxp:

قلت انزل موضوع نساعد فيه البنات اللى عاجبهم البرنامج ويبون يجربونه خصوصا العضوات الجدد اللى ماكانو معانا من قبل وماقرو الموضوع القديم..

نداء..

لكل وحده جربت البرنامج وعندها خلفيه عنه تجى وتكتب لنا تجربتها بكل امانه وتجاوب على استفسارات البنات..

وانا اول وحده ..انا ماجربته بس اختى كانت معاهم وكنت كاتبه ملاحظات لانى بمشي على البرنامج عقب ما اولد..وراحت الايام وماسويت شي..بس اختى كانت نتايجها رووعه..

تابعونى..

 

[سما الكويت]

لحد يضحك على ملاحظاتي..

انا بكتبها لكم بكل امانه...يمكن اللى انا اشوفه عادى ومو مهم وحده يكون عندها مهم ومستحيه تسأل عنه!!!

 

[سما الكويت]

الطلبات..مثل ما جمعتها لنا مذهله عسى الله يجزاها كل خير..

ثوم كويتي..(ومو لازم كويتى المهم انه لما ينعصر يطلع منه ماى)

مسمار..

زيت زيتون..

جرجير..

نعناع..

مايونيز..

بيض..

عسل..

روب..

خل ابيض..

لبن..

حنه..

سدر..

زيت خروع..

زيت سمسم..

زيت صبار..

زيت جوز الهند..

حمام زيت كابلي من نسايم لتجهيزات الصالونات بالسالميه..

حبوب فيفسكال للشعر روعه..

كاب للشعر..

جهاز بخار..

تقدرون تجهزون الاغراض اللى من العطار وغيره..علشان تصير روحتكم وحده...والباقي اللى من الجمعيه كل اسبوع تجيبين لوازمج..

 

[سما الكويت]

يالله نبتدى كل وحده تدور جوابها في الملاحظات اللى انقلها لكم من النوت بوك مالي..

الزيت اجهزه قبل الاستخدام بكم يوم علشان ينقع عدل..

صبغة الامونيا تنغسل بس بماي ولما احطها يكون شعري جاف..

كريم كابلي من النسايم ب 4 دنانير ويكون من داخل ابيض..

المسمار للزيت تقريبا نص قلاص..

علبة الزيت كامله والثوم 4 فصوص او راس كامل..(كيفج )..

جهاز البخار من جريدة الوسيط ب15 او 20 ..حاجه كدا..

اذا خشن الشعر فهو من نوع الزيت..اغيره..

علشان الريحه ماتطلع ممكن احط شوى ريحان على الشعر مبلول 10 دقايق واغسله..

مقادير الحنه..5 ملاعق حنه..5 ملاعق سدر..3 ملاعق مايونيز..بيضه..ملعقه وحده عسل..قوطى روب..فص ثوم يبشر ثم يدق بالهاون ويخلط مع 3 ملاعق زيت زيتون ويترك ناقع يومين ثم يضاف للحنه..وما اضيف للخلطه ماى..

تونيك سوسير موجود بالصيدليات سعره 9,800 فلس...واستخدامه يومي مافيه راحه..

لما احط التونيك ما اغسله ..ثانى يوم احط الزيت عليه واكمل البرنامج عادي..

فيتامين الشعر بكل الصيدليات وسعرهم 20 دينار..

عقب الكورس 3 شهور..يصير الزيت مرتين بالاسبوع..والحنه مره كل اسبوعين..

بعد ما اغسل الحنه وبعد ما اغسل خلطة الجرجير احط حمام زيت..

بطل باراشوت احط القياس اللى ابي..واللى تبي تستخدم الحل البنفسجى عادى..

هذى الملاحظات اللى لقيتها عندى..وانا جمعتها من اجابات مذهله على البنات اللى كانو معاها بالبرنامج وكانو يسألونها..وان شاء الله تستفيدون...ومابي منكم غير دعوه حلوه لي وللاخت مذهله...

ويالله ناطره تفاعل البنات اللى شاركو بالحمله...



حياكم...

 

[supermarket]

يحليلها مذهلة الله يذكرها بالخير

ويسهل دربها وين ماكانت

وانا اذكر البرامج وكان ودي اشارك بس العيز يختج :jumpon:

وكان برنامجها عليه اقبال كبير ويستاهل التذكير

مشكووورة على تجديد الموضوع

 

[الجووورى]

الله يجزاك كل خير سما
انا والامانه مشيت عليه بالبدايه وصج بنات شعرى صار كثيف وفيه لمعه
والله قبل كان شعرتين من الحمل والولاده واهملت شعرى صراحه فتره
لكن بس رديت على هالخلطه رد شعرى بعافيته وخلصت الثلاث اشهر بس ما رجعت سويته ثانى
شكلى بردله
ابى شعرى يطول ياناس كلش مايتحرق شسوى
واى سؤال عيونى لكم

 

[عسولة ودلوعة]

للرفع

 

[الجووورى]

للرفع فديتكم

 

[سما الكويت]

يحليلها مذهلة الله يذكرها بالخير

ويسهل دربها وين ماكانت

وانا اذكر البرامج وكان ودي اشارك بس العيز يختج :jumpon:

وكان برنامجها عليه اقبال كبير ويستاهل التذكير

مشكووورة على تجديد الموضوع

حياج الله حبيبتي..

 

[سما الكويت]

الله يجزاك كل خير سما
انا والامانه مشيت عليه بالبدايه وصج بنات شعرى صار كثيف وفيه لمعه
والله قبل كان شعرتين من الحمل والولاده واهملت شعرى صراحه فتره
لكن بس رديت على هالخلطه رد شعرى بعافيته وخلصت الثلاث اشهر بس ما رجعت سويته ثانى
شكلى بردله
ابى شعرى يطول ياناس كلش مايتحرق شسوى
واى سؤال عيونى لكم

جزاج الله خير يا قلبي على طرح تجربتج ..وصاجه البرنامج روووووووعه وانا شفت نتايجه على اختى بس ماسويته لانى كنت وقتها حامل ومالي مزاج..

ويعطيج الف الف عافيه حياتي..

 

[سما الكويت]

للرفع

جزاج الله خير حبيبتي..

 

[سما الكويت]

للرفع فديتكم

رفع الله قدرج وشانج ياقلبي..

 

[كويتيه رزتها ملكيه]

مشكوورين بنات على هالموضووع الرووووعه

بس بليز حطوا الرابط لموضوع مذهله

والنتايج حق الى جربوا متى بلشت تشوفونها

 

[الجووورى]

الله يسلمك سما وانا واياك يالغلا امين
كويتيه الحين برفه موضوع مذهله ودشى عليه لانى ما اعرف احط الرابط<<< امبيه
اما بالنسبه للنتايج بتشوفينها بعد اول شهر او ثلاث اسابيع بالظبط بلشت اشوف بيبى هير وصج صج رووووعه
وكافى ان فيها ايات تقولينها بروحها اكيد بيجى من وراها الفايده والخير

 

[Nice Lips]

مشكوووووووووورين بنات ماقصرتوا
زين سويتي فتحتوا هالموضوع
+
انا بسوي هالبرنامج ومو عارفه شنو يعني مسمار اهوا مال الاكل
+
سورسير ابتدي فيه من اول اسبوع ولا من وين
+
هالبرنامج بس للي شعرهم مصبوغ ولا لكل الشعووور

 

[الجووورى]

هلا قلبى حياك الله
اى المسمار مال الاكل ياقلبى
وتطحنينه بعد احسن


والسورسير من اول يوم تبتدين ياقلبى يعنى بس تبدين البرنامج
تحطين الزيت مثلا الصبح والتونك بالليل فهمتى قلبى
ومناسب لكل الشعور بس بالنسبه للمصبوغ مدرى
ننطر سما انشالله ماتقصر

 

[حواء الكون]

اي صج وين مذهله وينها والله قمت احاتيها احس فيها شي بعد الشر ليش هالغياب الطويل اهي كاتبه ان غيابها لظروف الله يردها سالمه لنا عالاقل تسلم وتروح بس

بجد شي محزن

 

[جوك احلى جو]

للرفع

 

[سما الكويت]

مشكوورين بنات على هالموضووع الرووووعه

بس بليز حطوا الرابط لموضوع مذهله

والنتايج حق الى جربوا متى بلشت تشوفونها

رابط البرنامج موجود فوق بالرد الاول...بس موضوع اليوميات والنتايج ممسوح..وعلشان جذيه حطينا هالتجمع علشان البنات يحطون تجاربهم والكل يستفيد..

وحياج الله تابعينا..

 

[سما الكويت]

الله يسلمك سما وانا واياك يالغلا امين
كويتيه الحين برفه موضوع مذهله ودشى عليه لانى ما اعرف احط الرابط<<< امبيه
اما بالنسبه للنتايج بتشوفينها بعد اول شهر او ثلاث اسابيع بالظبط بلشت اشوف بيبى هير وصج صج رووووعه
وكافى ان فيها ايات تقولينها بروحها اكيد بيجى من وراها الفايده والخير

جزاج الله خير يا قلبي بس الرابط انا حاطته فوق تحت كلمة (((هنيه)))...