للي سألتني هل أستفدت من برنامج قواعد المفاهيم؟ << هذا جوابي :)

[اختكم بالله]

السعر خيالي

 

[ما كو اسم]

السعر اكيد خيالي على دورة مكتوبه

 

[Aisha92]

بهالسعر اروح اسافر دول اوربا و امريكا و اقعدلي جم شهر و اتكم احسن منه بعد,,,, الطمع مو زيين والله ... الله يهدييه

 

[ليت الهم ينساني]

هههههههههههههههههههههههه

السعر خيالي اذا على كتب اذا ابي اتعلم واحد يعلمني باقل من هذا السعر بوايد يعني اخذ لي دورة باحسسن المعاهد

ويعلموني كل شي ومن غير لا اتعب نفسي وانا بروحي

مو بهذا السعر صراحه ((طماع ))

 

[وة بس]

يابنات اللي يكلموني عالخاص ترى مااقدر أرد عليكم لأن مشاركاتي قليل
بحاول ازيدهم وارد عليكم اول مااقدر
واعذروني تراي هالايام مشغولة بأختبارات .. السمووووحة

 

[الشايعية]

اووووووووفر صار أمر تعجيزي بحت !!!!!

المفروض يساعد مو يستغل حاجة الناس لتعليم .....

لنا الله :\

 

[أغلى الأثمان]

اختي اشلون طريقة استخدامه لأني بسراحة من شريته بطلته اول اسبوع شرح قواعد بس ولم استفيد أنا عندي برنامج المفاهيم ....بس والله لم استفيد مقطوط بالكبت ......اشلون أدرسة لأني أنا ماعندي الكلمات بس قواعد .....؟أنا الحين عندي مدرس الانجليزي اهو يعلمني من البداية

 

[وة بس]

ياقلبي ولية المدرس والبرنامج عندك حسافة بصرراحة طريقتة تجنن بالشرح
بس اذا ماعندك رصيد كلمات راح يصعب الموضوع عليك شوي لازم لازم تحفضين مفردات عشان تستفيدين من البرنامج وتتعلمين اللغة
لان هو قال اللغة الانجليزية اصلها (مفردات + قواعد ) بدونهم ماراح تتعلمين اللغة

انا بالنسبة لي ارسلي قائمة كلمات مع البرنامج وانا الحين اشتغل عالقائمة الثانية حقتي انا مسويتها وكل مافضيت اشتغل عليها
وانتي امشي عالتعليمات اللي قالها لك وخلاص
واذا عندك اي استفسار راسلية عالايميل وهو يرد عليك
انا دايما اذا توهقت بشغلة ارسلة وهو يرد علي خلال 24 ساعة
مثلا اخر سؤال قلتلة: هل عادي انسخ الكلمات واسمعهم بنفس الوقت ؟ وهو رد علي باللي لازم اسوية كذا يعني
والله يااختي قهر عندك البرنامج وماتستفيدين منة
ترى انا بالبداية اول محاضرتين حضرتهم تقريبا 3 مرات وبعدين كملت وبعدما كملت فهمت وش كان يقصد
وطبعا لاتكتبين معة بالمحاضرات انتبهي
انتي بس احضري المحاضرات بس يعني اسمعيهم فقط وتقدرين تعيدين المحاضرة اكثر من مرة وبعدها تكملين بس مثل ماقلتلك اهم شي المفردات ثم المفردات ثم المفردااااااااات بدونها ماراح تمشين باللغة ابدااا

اتمنى اكون افدتك
وماعليش اذا تأخرت بالرد بس انا مسوية اشتراك بالموضوع ووصلني بالايميل انك رديتي بس كنت مشغولة بصراحة وماقدرت ادخل ارد عليك الا الحين

وبالتوووفيق للجميع

 

[الأمل]

السلام عليكم ورحمة الله وبركاته.

أما بعد:-​

حبيت أني أكتب رد على موضوع برنامج قواعد المفاهيم للأستاذ المحترم / أحمد بهبهاني.​

أنا أول مرة أشارك وأكتب , بس عشان أقول تجربتي مع البرنامج بصدق وشفافية.


كانت معاناتي مع اللغة الانجليزية معانااااة, ماخليت معهد مادخلته حتى لما كنت احس اني اطور اشوي لكن ماكو فايدة


في الثانوية العامة ماخذة امتياز في مادة الانجليزي


لكن المصيبة بينت وانكشفت اني فاشلة لما قدمت امتحان التوفل وشفت انه مستواي جدا ضعيف.​

شفت لقاء مع الاستاذ أحمد بهبهاني على تلفزيون الكويت وقررت أشتري البرنامج


خليته عندي سنتين واتكيسلت اني اتدرب عليه. المسألة ان صار عندي خوف من اللغة الانجليزية وتعقدت حتى الكلام كان صعب يطلع من الساني .


يوم قررت اني ادرس بالجامعة اطلبوا مني التوفل أو الآيلتس, وضاقت قي الدنيا كنت متحطمة نفسيا


فكنت أدور في النت أحد جرب البرنامج عشان أتشجع ,وأبلش أتدرب عليه . لكن للأسف كل اللي كاتبين عن نفس الموضوع مو حاطين تجربتهم عقب ماقدموا الإمتحان !


بصراااحة إستغربت وكنت وايد محتاجة وحدة تقول تجربتها بالكامل.


بالنسبة للفلوس أنا ياما قطيت على كورسات في المعاهد لكن ماكو فايدة, وترى الفلوس اللي تنقط على العلم مو حرام أو خسارة أو حسافة لأن الرسول عليه الصلاة والسلام قال اطلبوا العلم ولو في الصين يعني الأجر لنا موجود بإذن الله. والتابعين كانوا يبيعون بيتهم ويسافرون على اريولهم عشان بس يتعلمون حديث واحد عن الرسول عليه السلام. فالقصد اني ما اتحسف لما أحط افلوسي على علم. ما إحنا يوميا بأرقى المطاعم وماتحسفنا وأي شي ماركة نشوفه ويعجبنا نشتريه وما نتحسف ماهو تالي آخرته مصيره تكرمون النفايات, لكن العلم غير يرفع الإنسان ومصيره في الراس. والاستفادة يشوفها الواحد في حياته.


المهم.


لأن ماعندي وقت الا تقريبا ثلاث اشهور قررت أبلش بالبرنامج لأني شارية البرنامج من قبل سنتين فطبعا ما اشتغل على اللابتوب الجديد فاتصلت على مركز قواعد المفاهيم وكلمت الأستاذ أحمد بهبهاني ورحب فيني وما قصر معاي وبدلت السيديات بفلاشات مع الشفرة وابتديت أتدرب خلصت البرنامج النظري ودخلت بالبرنامج العملي والتطبيقات وكل ما أتصل على الأستاذ كان الترحيب والشرح الوافي لإستفساراتي حتى تخيلوا مرة كان مريض في المستشفى هم بعد بعث مسج واعتذر واول ما طلع من المستشفى اتصل واستمر بصبره وباله الطويل ماشاء الله.


صارت عندي ظروف وماقدرت أكمل البرنامج العملي الا نصه تقريبا وطبعا لاني ماكملت التمارين الصوتية اللي المفروض أسمعها ولا كتابة المواضيع.وخلاص صار ماكو مفر من تقديم الامتحان.


قدمت امتحان ibt وكانت نتيجتي 37 والجامعة كانت طالبة 61


لضيق الوقت سافرت الامارات وقدمت الامتحان عندهم بالجامعة نفسها التوفل الأكاديمي وكانوا يبون 500


وبدون أي دراسة أو مراجعة خذت 450 انصحتني مدرسة في القبول والتسجيل إني أقدمه مرة ثانية فحطيت موعد وكنت أشوف في الجامعة بعض الطالبات اللي يدرسون كورس لغة عشان يجتازون أختبار التوفل وانصدمت من بعضهم يقول ما قدروا يجتازونه الا بعد خامس مرة يعني اطلعت اعيونهم واللي تدرس سنه ونص لغة وبعدين ما تجتاز التوفل يقولون لها باي باي.


قدمت في المرة الثانية وقلت اللي يصير يصير وقلت في نفسي أبي أطبق كل اللي قدرت أتعلمه من البرنامج


والله إني كنت أختار الإجابات بدون ما أقرا السؤال ولا أفهم اهو عن شنو قاعد يتكلم بس كنت أطبق الطرق اللي تعلمتها من البرنامج حتى لما طلعت من الامتحان سألني المراقب شنو سويتي قلت ما أدري حليت وما أدري اشلون قاعد أحل وبدون لا أفهم المعنى . وبعد كم يوم اتصلوا علي وكانت المفاجئة اني نجحت وجبت فوق ال500 بشوي.


اتصلت على الأستاذ أحمد وقلت له الموضوع صار معاي شذيه وقال هذي المرحلة اللي أبي أوصلكم لها ان عقلكم الباطن اهو اللي يحل ومع تطبيق الطرق اللي علمتكم اياها في البرنامج. ولو أنتي امكمله القسم العملي كله كان قدرتي تجتازين حتى التوفل ibt وقال ان في طالبة ادرست في امريكا كورس انجليزي لمدة سنه ومسكينه ردت الكويت لأنها ماقدرت تنجح في التوفل والحين اهي ماخذة البرنامج واوصلت تقريببا أكثر مني في القسم العملي لكن وايد مستواها تقدم لأنها قاعد تتدرب على التمارين والتدريبات.​

فهذا اللي حبيت اشارك فيه ولعل يكون في فايدة حق غيري وفيه معلومة أخيرة أحب أذكرها اللي تبي تاخذ البرنامج وتعطيه من وقتها وتلتزم في التطبيقات صدقوني راح تنصدم من النتيجة سواء في السمع أو المحادثة أو الكتابة للأمانة البرنامج موشغل طبيعي فعلاَ برنامج متعوب عليه بصدق وأمانة ويستاهل.


أما اللي تبي تاخذة وما تعطي من وقتها وتقول ماكو فايدة فأعتقد هذي أمانة الواحد لازم يكون صادق مع نفسه ومع ربه.


طيب لما نسجل في المعاهد الوحدة منا تقوم وتتكشخ ووقت ضايع بالروحة والجية وياريت الكل مستفيد. أنا قلت اللي يريح ضميري ويمكن في غيري محتاجين يسمعون تجارب غيرهم بصدق بالبرنامج وما لقوا الجواب عشان شذيه كتبت تجربتي ,


وتمنياتي للجميع بالتوفيق.:yaaaaaarb:​

 

[Řōѕē ρâŕỉѕ]

طيب يابنـــاات كم سعــــــــرة بالريــال السعــــــودي لأني ماأفهـــــــم بالفلــووس الكـــويتية ..

أمووت باللغـــة الأنجليزية وأبغى أتعلمهـــاا بالبيــــت أفضل ..

 

[ابوره الحلوه]

بصراحه ودي أشتريه بس جم صار سعره حاليا ومن وين اطلبه

 

[كويتية222]

1850 علشان برنامج !!
الله يهدي هالدكتور عباله مليونيرية الكويتيات !!

 

[ya al3rosa]

انزين ابى رقمة لو سمحتى

 

[عنيّد]

انا دخلت هالموضوع قبل سنه وكان سعر البرنامج 650 وماعجبني


اليوم موقعهم راسليلي ايميل ، تذكرتهم عاد قلت خلادخل اشوف سعره

سعره اليوم

1650

وبعد ثلاث اشهر بيصير

1850 دك


ورب الكعبه عيب

اتعب وانا اقول اشكثر متحمسه لهالبرنامج
ولكن مو جذي الواحد يستغل العلم والمعرفه !!

الي يعرفه خليوصله كلامنا
آمنا بالله انت بذلت مجهود واخذ وقت وايام من عمرك ، ولكن مو معنى هذا ان تضرب الناس بهالاسعار

لو من البدايه حاط سعر عالي وتام عليه ، ولكن شنو تبرير ارتفاع الاسعار اليوم
زاد سعر الكوبي بيست بالسوق ؟؟ تراه مو ورق نشتريه او حبر عشان يرتفع سعره
هو اللهم نسخة ينسخها على الفلاشات

بدا البرنامج بسعر 250 دينار واليوم 1850 !

اعوذ بالله
​

 

[الغلا*]

الله المستعاااان
الصراحة ودي اشتريييه بس وصل هالسعر
مااقدر اجااازف بصراااحة موامية او متين ١٨٥٠ &#55357;&#56854;

 

[الغلا*]

الله المستعاااان
الصراحة ودي اشتريييه بس وصل هالسعر
مااقدر اجااازف بصراااحة موامية او متين 1850 ?

 

[عنيّد]

طبعا هالسعر مجازفه بصراحه

لكن الغريب مو السعر ، الغريب ليش البنات الي فتحوا مواضيع عنه ماقالوا لنا نتيجته !!
اقصى شي قالوه انهم استفادوا ، طيب طبقتوا بالامتحان شالناتج ؟؟؟؟؟؟؟؟؟؟؟؟

 

[love love]

كنت ناويه عليه بس السعر خيالي يعني الواحد ياخذ قرض مثلا؟؟؟؟ ورانا يهال ومسؤوليه!!!!


وليش البنات بس يخلصون من البرنامج يختفون؟؟؟؟

 

[e7sas5a9]

انا قبل فتررره شاريته والصراحه سعره فييييه والحمدلله قدمت علي امتحان التوفل ونجحت فيه d: والحين صار لي سنه بالجامعه وصارت القواعد نفسسس اممممم اللعبه


وقبل كنت نااويه ابيعه بسسس جزها الله خيرر يووه بسس قالت لي انه حرام ومادري ايش وبعدين استفيد

والصراحه اقتنعت بكلامهااا قبل اخذته بنت خالتي ونجحت بالامتحان بسس موب من اول مره يمكن مرتين :$ والحين اخوووي

يدررس منه وصار الفلاش شي متوارث بسس
اللي انصحه فيه الكل يبيله مجابل يبيله وقت مستمرر

يعني 4 ساعات باليوم ساعتين علي السيدي وساعه تكتبين الكللمات وساعه تسمعين الكلمات عشان جذي اتوقع الكل ما كتب تجربته لانه لازم تستمرين شهر وانتي هيك وإذا طوفتي يوم ترجعين يومين وراء وهكذا

عااد تعرفوون مشاغلنا وبسسس :$ انا بصراحه مو كل اهلي قدرت اعطيهم وعشان هيك بنت عمي راحت وشرت 1400 بعد اللي شافته بس هي حااطت في بالها انه لاما تدرس وتخلص راح تعبيه بسعره لانه سعره مو ثابت تستفيد وتفيد خلق الله

يعني شريتيه وفاادج وخلصتي منه بيعيه وانتي الربحانه وغيرج ربحاااان d:

 

[عنيّد]

انا قبل فتررره شاريته والصراحه سعره فييييه والحمدلله قدمت علي امتحان التوفل ونجحت فيه d: والحين صار لي سنه بالجامعه وصارت القواعد نفسسس اممممم اللعبه


وقبل كنت نااويه ابيعه بسسس جزها الله خيرر يووه بسس قالت لي انه حرام ومادري ايش وبعدين استفيد

والصراحه اقتنعت بكلامهااا قبل اخذته بنت خالتي ونجحت بالامتحان بسس موب من اول مره يمكن مرتين :$ والحين اخوووي

يدررس منه وصار الفلاش شي متوارث بسس
اللي انصحه فيه الكل يبيله مجابل يبيله وقت مستمرر

يعني 4 ساعات باليوم ساعتين علي السيدي وساعه تكتبين الكللمات وساعه تسمعين الكلمات عشان جذي اتوقع الكل ما كتب تجربته لانه لازم تستمرين شهر وانتي هيك وإذا طوفتي يوم ترجعين يومين وراء وهكذا

عااد تعرفوون مشاغلنا وبسسس :$ انا بصراحه مو كل اهلي قدرت اعطيهم وعشان هيك بنت عمي راحت وشرت 1400 بعد اللي شافته بس هي حااطت في بالها انه لاما تدرس وتخلص راح تعبيه بسعره لانه سعره مو ثابت تستفيد وتفيد خلق الله

يعني شريتيه وفاادج وخلصتي منه بيعيه وانتي الربحانه وغيرج ربحاااان d:

رحم الله والديج ماقصرتي والله
صحيح ياخذ وقت ولكن اشدعوه يحطون لنا نتيجة هالشي الي نشروه ورفعوه لما سابع سما ، وخلونا بالنص

طيب ماعليج امر تحمليني شوي لانه ارجع واقول المبلغ مو هيّن الحين صار 1650 دك

عطيني تجربتج الشخصيه مع البرنامج ، اذا ممكن بالتفصيل يعني اشكثر خصصتي له وقت وجم طلعتي بالتوفل ؟
طلبت هالطلب منج لسبب واحد ، ان الاستاذ احمد قبل لما يبيع البرنامج كان يعطي وقت مفتوح لأسئلة الطلبه
اما اليوم فهو محدد شهرين فقط من تاريخ الشراء للأسئلة والتصحيح ، بعد هالشهرين مايقدر يساعدج بشي ! .... هالشي وايد خوفني لأنه الواحد مايدري شيصير معاه او بمعنى اصح مادري اذا بحتاج اكثر !!!

ارجع واقول اتمنى توسعين صدرج مع أسئلتي واكون شاكره لج بجميع الاحوال :eh_s(17):


* على فكره ، بخصوص بيع او تأجير البرنامج ، اذا كان الدكتور مو موقعكم على هالشي فماعتقد اكو مشكله .... لأنه هو يسمح ان الواحد يتناقل البرنامج ، اما الربح من ورا البرنامج فمادري والله ولكن اذا موموجود بالعقد فهالشي مايعتبر مخالفه والله اعلم