لهوم الحريم السنعات النجديات.. هديه لكم..

[زوزونوفا]

هلا حياكم الله حبيباتي:68_asmilies-com:
ان شاء الله مبسوطين ومرتاحين
تعالو معي اعطيكم اللهوم حق النجديات
الحريم السنعات
ولا عليكم قصور ياخواتي الكويتيات
بس نفيد بعض ونتبادل الخبرات:gathering:
بس ها !!
الله الله تدعون لصاحبة اللهوم وهي مداويه شعبيه
بدوام الصحه والعافيه
ويجعله بميزان حسناتها يارب
وينفع به جميع المسلمات



لهوم العشرين يوم الاولى من النفاس ولهوم الخوى والخراب :
المقادير:
نص كاسه حبه سوداء غير مطحونه
ملعقه كبيره فلفل اسود مطحون
3 كاسات سكر مطحون
4 ملاعق كبيره رزنه مطحونه
4 ملاعق كبيره كركم حب انتي تطحنينه
اكاس مطحون من كل من:
شمر -يانسون- نونخه- كمون- عرق ظهر
2 كاس مطحون من كل من:
حلبه - ماش اخضر- ماش ابيض -عدس

تخلطينهم كلهم سوا بعد الطحن وتحطيها بعلبه جافه
وتستخدم مرتين باليوم ملعقه كبيره


طبعا الكميه بتكون مره كبيره
فانتي سويها ووزعي على جيرانك
وخواتك وبنات عمانك وبنات خيلانك:klhfl:
واحتسبي الاجر
وكلها اشياء بسيطه ما تكلف
وسلامتكم:tek:

 

[غير كل الناس]

الله يجزاكي وياها خير

 

[زوزونوفا]

هلا
نورتي صفحتي

ربي يشفي مريوم ان شاء الله ويخفف عليها

 

[&& أم أحمد &&]

مشكورة

 

[Wa6an Elnahar]

مشكوووره حبيبتي .. بس عندي سؤال ملعقه كبيره مع ماي مغلي و اشربها ؟ وتنفع حق الدوره ؟

 

[شيهانه]

رزنه

عرق ظهر

الباجي اعرفهم بس هذيلي ؟؟ ما مروا علي ؟؟ موجودين بالكويت ولا بس بالسعوديه ؟؟

 

[شيهانه]

وطبعا جزاك الله كل خير يارب .. وجزا من علمت كل خير يااارب .. بارك الله فيكم

 

[زوزونوفا]

الرزنه حبيبتي عند العطار
وهي اللي تعطي اللهوم الللون الاخضر
اسألي العطار ولا اعرف لا اسم ثاني
والعرق بعد هذا اسمه انا يوم اخذها من العطار بالرياض بنفس الاسم هذا
اتوقع متوفره بكل العطارين
عندنا مرررره دارجة الاستخدام

واكيد تنفع حق الدوره
والبنات الخاويات ياخذون هذا اللهوم
وطعمه مره حلو
وبامكانك تتحكمي بكميات السكر
بس طريقة اكله
ملعقه كبيره على كوب حليب دافي
ولا مع حنيني مفروك اي شئ بر يعني
اقصد الطحين الاسمر يعني

 

[زيـטּ عَبْس]

جزاج الله خير ياارب

والله يجعله في ميزان حسناتج وحسنات المداوية الشعبية صاحبة الوصفه

 

[زوزونوفا]

يسلمووو ابله خلووووود

 

[أبوي تاج راسي]

جزاك الله خير بس ابي اسأل يصير البنات ياكلونه

 

[زوزونوفا]

اكيد حبيبتي ياكلونه البنات من يوم تبلغ

 

[منوله كويتيه]

مشكووووووووووووووووووووره ياقلبي والله يبارك لك انتي وصاحبة الوصفه

 

[[]نهاوند[]]

الله يجزاج الجنه يالغاليه
ماقصرتي ​

 

[ii DareeN ii]

شكرا اختي بعد عفوا يعني شنو البنات الخاويات ؟؟؟؟؟


وحيالله اهل نجد ومن وين في نجد هالمداوية

 

[زوزونوفا]

هلا حياك الله مشرفتنا
نورتي صفحتي بمرورك الكريم
البنات الخاويات
يعني اللي تعاني من الخوى
والخوى مرض الله يكفينا شره
ممكن يجي البطن وممكن يجي الراس وممكن يجي الرحم
والخربانات يجيهم في كل ما سبق
تحس الوحد اذانها تعورها وراسها وامتبي تسمع صوت عالي
او مهما اكلت تظل جوعانه وتحس بحرقان
او تنسد الشهيه مره وحده
غير اصوااااااات الهواء
هذا الخوى حبيبتي

وهاذي المداويه في الرياض
ما شاء الله عليها الحريم عليها من كل صوب وصوب
واللهوم حقها انا استخدمه شخصيا
وهو نفس اللي مكتوب بالتمام بدون اي اضافات

وسلامتك يالغاليه

 

[* ورود *]

مشكورة على النقل

هذا الموضوع قريته من 10 أيام تقريبا بمنتدى عالم حواء قسم الحمل والولادة

ثااااااااااااانكيوووووووووووو

 

[& دانتيلا &]

تسلمين ما قصرتى

 

[زوزونوفا]

مشكورة على النقل

هذا الموضوع قريته من 10 أيام تقريبا بمنتدى عالم حواء قسم الحمل والولادة

ثااااااااااااانكيوووووووووووو

هذا مو نقل حبيبتي
ولازم تتاكدي قبل تحكمي
اذا كان على منتدى عالم حواء
الحمل والولاده فهذا معرفي
باسم الدانه11
انا ما انقل ابدا
اكتب بنفسي
وكله شئ مجرب واستخدام شخصي
وانا صاحبة الموضوع هنا وهناك

 

[* ورود *]

هذا مو نقل حبيبتي
ولازم تتاكدي قبل تحكمي
اذا كان على منتدى عالم حواء
الحمل والولاده فهذا معرفي
باسم الدانه11
انا ما انقل ابدا
اكتب بنفسي
وكله شئ مجرب واستخدام شخصي
وانا صاحبة الموضوع هنا وهناك

أوكي مدام جذيه حطي لنا البرنامج الكامل اللي كاتبته الدانه 11 (أقصد انتي)
علشان نستفيد