لولي والفراكسل خطوة بخطوة

[sunshine22]

يوووووووووه

من 18-11
الى 30-1

مو جنه طول هالفراكسل

والا الجلسات شهريه!!!!؟؟؟؟

انزين انا سويت تقشير كيميائي عند قنال قبل قبل ايام الغزو اسميها بس ما كملت ما شفت نتيجه بس وجه مورم انتفخ ورجع وراها الوضع لما كان عليه!!واسوا بعد


( ماكنت اروح لشقتي عشان مااخرع زوجي يبيله سفره طويله عشا ن اسوي الفراكسل
مااقدر احط مكياج ولا اسوي ليالي حمرا وزرقا)

شصار وياكم بنات تكملون حياتكم طبيعي ورا الفراكسل والا تظلون تنطرون النتايج)


المهم ابي اسوي الفراكسل الجيل الثاني اللي عند عادل قطينه مدري انا عاجبني هالدكتور مسوي عمليه لاختي بائت بالنجااااااااااااح اليومي من ثاني يوم ولا كانها مسويه عمليه مااشلله عليه وكله ينكت ومبتسم

المهم
انا الكيميائي سويته بدون تخدير عند قنال بس كنت ادمع حييييييييييييييل
وبشرتي بيضه مو سمره
تعتقدين بيمشي وياي الفراكسل ومن غير تخدير!!!..؟


لان الاثار عقدتني ابي بشرتي صافيه
يختج الزين ما يكمل انا فدعه خشف بس الاثار قطيعه

<<<اقول اسكتي الناس ياخذون فكره اني هيفا وهبي

 

[أحاسيس دافئه]

اشلونكم بنات وشاخباركم طبعا هدا الموضوع اللي راح اكتبه لكم راح يكون آخر موضوع يهمكم بالفراكسل لأن الدكتور قال لي خلاص كفايه جديهوصلنا لنتيجه لولا الفراكسل ما كنا راح نوصل لها
قبل ما أبدأ موضوعي أحب أقدم شكري الخاص لدكتوري محمد فتحي في مركز الزهير الطبي لأنه اشتغل على بشرتي بدمه بدليل ان اغلب البنات اللي يسوون فراكسل استغربو اشلون الويه يتم امورم واحمر اربع ايم واهوا بس يومين تقريبا واشلون بعدها يسود ويقشر لمدة عشر ايام ما اقدر اطلع من البيت كأني امسويه تقشير كيميائي واهما بعد اربع او خمس ايام عادي يروحون الدوام هدا دليل على شغله الصح
وثاني شي احب اشكره انه قال خلاص نوقف الجلسات لأنه واحد ثاني من هالدكاتره راح يقول انكمل ويسكت بس علشان ينهبنا بالفلوس بس دكتوري الحمدلله ثقه واحترمه حيل والله يوفجه في حياته العمليه ومهنته
المهم يا بنات راح ابدأ الموضوع واقرو عدل
طبعا انا لون بشرتي اسمر مثل لون الممثله شيماء سبت ولمياء طارق
حفر بالبشره بجميع انواعها
مسام بجميع انواعها
خطوط دقيقه
عدم تزحد بلون البشره
دهن بشكل مو طبيعي
طبعا عارفين انه اول جلسه كانت لي في مركز كوزمسيرج بسعر 225 في رويال حياة وكانت فاشله أما الجلسات الثلاث الباقيه سويتهم في مركز الزهير الطبي عند الدكتور محمد فتحيبسعر
الجلسات بين كل جلسه والثانيه ضروري ولازم ما يتعدى شهر بينهم
النتايج على البشره ما راح تشوفونها الا بعد الجلسه الثالثه
النتايج على البشره السمرا ابطأ بكثير من البشره البيضاء


ألحين عاد اقولكم النتايج اللي شفتها على بشرتي شنو البشره السمراء
الخطوط الدقيقه كلها راحت أما الخطوط اللي من الخشم ونازله على الفم واللي يسمونها خطوط الضحك ما تروح ولازم تنحقن بالفلرز كل سنه وخطوط الجبهه ما تروح لازم حقن بوتكس

السواد اللي عند الحنك راح وخف بنسبة سبعين بالأميه
توحد لون البشره بنسبة سبعين بالأميه

الدهون ما زالت موجوده وبكثافه بعد يعني الفراكسل ما يسوي توازن للدهون
كان عندي كلف على جانب الخدين خف بنسبة اربعين بالأميه

البشره اتصير فيها نضاره ومرتاحه على الرغم من المصايب المتنوعه اللي فيها

نجي للأهم واهوا المسام الصغيره راحت
المسام المتوسطة الحجم صارت صغيره
المساااااااااااام الكبيره خفت بنسبة عشره بالأميه
وسألت الدكتور ما راح تعطيني شي يوخر هالمسام قال لألألأ لأن الفراكسل ادا ما وخر المسام ما في كريمات راح اتوخرهم وحتى لو وخرتهم مؤقت وراح ترجع

نجي للأهم والأهم واللي راح تنصدمون فيه واهو الحفر
الحفر الصغيره خفت بنسبة عشرين بالأميه
أما الحفر المتوسطه والكبيره ارتفعت نسبيا بس ماكو احد لاحظ هالشي على بشرتي غيري لأني انا بس اللي عارفه قياس كل حفره بويهي

ادن الحين وبالمختصر المفيد اللي لون بشرتها مثل لمياء طارق واغمق وتبي نضاره وتوحيد لون وازلة خطوط دقيقه ومسام صغيره راح تلقى نتايج مرضيه بنسبة 80 بالأميه

واللي لون بشرتها مثل لمياء طارق واغمق وتبي تزيل المسام الكبيره والحفر العميقه والمتوسطه والصغيرهراح تلقى نتايج بعد الجلسة الثالثه بنسبة اربعين بالأميه

ولكن هناك شيء مهم مو معنى اني خلصت الفراكسل يعني خلاص ما كو نتايج النتايج راح ننتظرها طوال هالسنه وانشوف التغيرات اللي تصير على البشره اول باول
وهدا مو كلامي كلام كدا دكتور اتصلت عليهم امس وأكدولي هدا الشي منهم عادل القطينه وخالد مصطفى

من جديه يا بنات خليت موضوعي خطوه بخطوه علشان اللي لونها لون بشرتي اتعرف شنو نتايج الفراكسل عليهاراضيه بالنتايج وتبي اتسوي الله يوفجها وما انصحها الا بدكتوري
مو راضيه بالنتايج اللي قرتها تحمد ربها انها ما قطت فلوسها على الفاضي وتدعيلي وتدعي لزوجي وعيالي انه ري يبعد عني انا وياهم عين الحاسدين
وبالنسبه للبشره البيضه عندنا خير دليل رهووف وموضوعها بشرتي صارت مرمر بسبب الفراكسل واشلون كان الفراكسل نتايجه سريعه معاها بس اقرو موضوعها عدل انه المسام ارجعت لبشرتها وبعدين رهوووف ما فيها حفر عميقه مثلي

اتمنى اكون افدتكم يا بنات بموضوعي الواقعي وأي استفسار انا حاضره بس اتمنى استفساراتكم اتكون اهنيه عالعام مو عالخاص علشان الكل يستفيد

واحب افيدكم اني حطيت موعد عند دكتوري علشان الفليرز احقن خطوط الضحك اللي نازله من الخشم الى الفم
بتاريخ 12/ 2
اشكركم جميعا على متابعتكم لموضوعي وأي استفسار انا حاضره

 

[sunshine22]

يعطيج العافيه والله يعطيج على قد نيتج الصافيه

صراحه نادر نشوف ناس تنفع غيرها بالهازمن لو وحده ثانيه سوت واسكتت

لكن مثل ماقال نبينا بالحديث فعلا(( خير الناس أنفعهم للناس ))

صراحه نفعتينا


بس انا ناويه عليه

لأن عندي آثــــــــار بوجهي جنه محفر بس خفيفه وتروح مع كفردريم ومكياج العروس

بس انا ابي بشرتي ع الطبيعه بعد صافيه

وتركيز الحفر بنص الخدود والباقي صاااافي



الله يقدرني واسويه واعلمكم بالنتايج

 

[رهوف]

الله يوفقج حبيبتي لولي

بصراحة استانست لج وضاق خلقي بنفس الوقت لأن حسااااااااااافة ما لقيتي نفس نتيجتي بس مادري انا كذا مره اقرا لناس بشراتهم سمرا وافريقية بعد ولقوا نتيجة بس من بعد 5 جلسات

انتي اعتقد الدكتور استعيل بقراره ان يوقف ... وانا ادري فيج الظاهر مليتي بعد وتبين الفكه

انا بصراحة بالنسبة لي كل يوم قاعده تفرق علي بشرتي ... وان شاء الله بتمر عليج ايام تقومين الصبح من النوم تقولين الله شحلاة بشرتي وهالكلام انا متأكده منه مليوووووووون بالمية

الله يوفقج يارب ومشكورة على طرح تجربتج للبنات والله يخلي لج ريلج وعيالج ويبعد عنكم الحسد وعيال الحرام

 

[كويتية صغيرة]

جزاكي الله خير حبيبتى و ماقصرتى

بس الخلاصة
انه جاب معاك نتيجة ملحوة للنضارة و توحيد لون البشرة

اما الحفر بشكل عام..... فنسبة التحسن بسيطة نوعا ما

انا بس حبيت افيد البنات لانى وايد قريت عن الموضوع
نسبة التحسن تختلف من بشرة لبشرة ...... في ناس تحسن مايتعدى 20% و في ناس لاحظوا تحسن 70% حتى البشرة السمرة في ناس تحسنت بشرتهم و ناس لا.

بس اللي اعرفة ان لأي شخص بغض النظر عن الحالة يجب على الأقل عمل 4 جلسات لان في كل جلسة يتم بناء 20-25% من البشرة .

يعطيك العافية على صبرك

 

[loora3003]

ya36eech alf 3afya o enshalla doom t36eenah akhbar zainah o raby yib3ed 3anech o ahalech 3yoon el 7esad ameeeeeeeeeeeeeeen

 

[عنود الحب]

اختي لولي

يعطيج العافيه الصراحه .. والله يبعد عنج وعن ريلج وعيالج عيون الحاسدين

وان شاءالله تشوفين التحسن على بشرتج باستمرااااااااااار

انا بشرتي بيضه .. لي للحين خايفه بتريا لين عقب وبقرر ان شاءالله

بروح اشوف موضوع رهوف ..

وان شاءالله خير

ومشكووووووووره اختي ويزاج الله خير لانج قلتيلنا كل شي بالتفصيل كان يصير معاج

 

[أحاسيس دافئه]

اشلونكم بنات وشاخباركم ولهت عليكم
راح ارد على سؤال الكل يسأل عنه الفرق بين جهاز الفراكسل القديم والجديد شنو؟ الفرق انه هدا ابصبغه وهدا بدون صبغه أي بمعنى القديم بصبغه زرقاء على البشره والجديد من غير صبغه على البشره القديم يعور والجديد أقل ألم واللي يقول غير جديه انه اقوى وا ادري شنو جدااااااااااب لأني اتصلت يمكن على كل دكاترة الكويت اللي عندهم الجهاز واللي ما عندهم وقالولي نفس الشي وكله يرجع على شطارة الدكتور ومدى تقبل البشره للجهاز بس طبعا اللي عنده الجهاز الجديد راح يتفلسف ويقول احسن

واحب ابينلكم نصب بعض الدكاتره اللي عندهم الجهاز الجديد بالكويت ومن غير دكر اسماء انه يمدح ابجهازه ابشكل مو طبيعي والمعروف انه الحين ما اقدر اعيد الجلسات الا بعد ستة شهور لأنه مو زين على البشره ولو تقرون بالسايت اللي خاص بالفراكسل انه يقول نفس كلام دكتوري واغلب الدكاتره انه ما يصير اعيد الا بعد ستة اشهر حتى مركز كوزمسيرج الخايس قال لي نفس الحجي
ولكن الدكتور النصاب وبمعنى اصح السكرتيرات اللي عنده لما اتصلت اسألهم عن المسام انها ما راحت من بشرتي وانا توني امخلصه جلساتي قالولي لالالالالا احنا عندنا احسن جهاز الجيل الجديد وراح تلقين نتيجه عندنا احسن بس انا توني امخلصه جلساتي اشلون ؟؟؟؟؟؟
شفتو اشلون دمتهم ويمكن من كلامي راح اتعرفون منو اقصد ولا أحد يسألني منو اعتقد الكل عارف منو
بس ما اقول الا الحمد لله انه ربي قطني بدطتور عنده دمه وضمير اللي في مركز لزهير الطبي
واحب ابشركم يا بنات انه المسام عندي بدت تتسكر ويوم عن يوم قاعده احس بفرق بالبشره وبعض الحفر الكبيره بدت ترتفع وراح اوافيكم بالنتايج
وحاليا ستخدم منتجات اتوازن الدهون واتسكر المسام اكثر من روعه بس ما راح اكتب فيهم موضوعي الا بعد شهر ونص علشان اتاكد من نتايج هالكريمات لأنها جدا غاليه ول كريم فيهم سعره لا تتوقعون يكون اقل من عشرين دينار بس قمممممممممممممة الروعه
وانتظروني بموضع ان شا الله يكون خاص بهالكريمات
وموضوع راح اكتبه لكم بعد الكريمات خاص بزيبا رفيق لأني رحت لها وما شا الله اكثر من روعه وطبعا انا رحت العياده هيلث كير كلينيك وشافت الكريمات اللي استخدمها وقالت انه موادها نفس الكريمات اللي اهيا تصرفهم للبنات وامدحت كريماتي حيييييييل وراح اتكون لي تجربه معاها بعد شهرين ونفس الشي راح اتكون خطوه بخطوه تابعوني

 

[*مــــســــك*]

جزاج الله كل خير


اختي سوت 3جلسات وللاسف ماكملتهم هم دكتور خالد مصطفى الشعب مع انه الحين اهي قاعدة بالبيت وماعندها شي

الجلسه الوحده 150 وتقعد تشد بشرتها وتشد وتتورم وتتقشر خلال اسبوع وياليت اذا احد جرب الجديد يعطينا خبر

 

[loora3003]

lully ana ma 3raft ay dictor tag9edeen bel 3aks feedeenah alla yertha 3aleech etha na9abeen 3ashan la neroo7 lehom o mashkoora 7abooba o enshalla raby yeb3ed 3anech o ahalech 3yoon el 7esad ameeeeeeeeeeeeeeen

 

[أحاسيس دافئه]

آنا ما ابي اقول اسم الدكتور لأني ما ابي اظلمه لأني ما كلمته شخصيا انما كلمت السكرتيرات اللي عنده واهما اللي قالولي تعالي اخدي استشاره عند الأخصائية اللي عندنا وان شا الله تفرقين على ويهج بالجهاز الحديد
قلت لهم اشلون انا توني امخلصة جلساتي اسكتت السكرتيره وقالت انتي تعالي وما راح يصير الا الخير من اهنيه فهمت موضوع النصب عموما اللي عندهم جهاز الفركسل الجيل الثاني ينعدون على الاصابع

 

[جوودي]

طيب اقدر اسوي الفراكسل بالانف لوحده؟؟لان فيه اثر جرح؟والا لازم كل الوجه؟

 

[جوودي]

????????????????????

 

[أحاسيس دافئه]

الله حبوبتي ما ادري انا اللي سويته الويه كامل بس بامكانج تتصلين على مركز الزهير ويعطونج الاجابه

 

[غصون]

ودية اسوية وخايفة

انا فيني حفر بسيطة ندبات حب الشباب واثارة

تتوقعين يفيدني الفراكسل

انا قالي الدكتور في فيصل التخصصي بسوي لج بس فية جهاز يديد راح يوصل بعد اسبوع وهو الاول في الشرق الاوسط

ومادري خايفه

قالي ابيج تهئين بشرتج للعلاج

قالي استعملي في النهار الدوكين وبعدها بربع ساعه حطي الحماية وكل ساعتين حطي حماية

وبليل خلطي الدوكين مع الرتن اية


والله خاااااااااااااااايفة

بشرتي اللي يشوفها يقول مافيها شي بس اللي يقرب مني يشوف حفر بسيطة

خايفه اسويها وخايفه اندم

 

[عزاه ياقلبي]

مرحبا لولي انا مسويه الفراكسل من يومين وطبعا حصل معي الي حصلكم وهدا طمني مره بس اليوم انصدمت لما قالتلي رهوف انو لازم تستخدمين قبل وبعد الجلسه كريمات لانو دكتور ي عطاني لوشن وكريم حمايه فقط وقالي هادي بعد الجلسه مباشره وانا بشرتي حنطيه تقريبا مثل لميا طارق تكفين لحقي علي وعلميني هل ضروري الكريمات قبل الجلسه وكريمات التفتيح بعد الجلسه وهل فيه فرصه لي الحق على نفسي وانا لما سالته عن كريم ميبو قالي لا لاتستخدمينه لنو احنا نبي البشره ترمم نفسها ربي يوفقتج تردين علي باسرع وقت

 

[عزاه ياقلبي]

ندا لكل البنات الي عملو فراكسل ولونهم حنطي هل الكربمات ضروريه قبل الجلسه وكريم التفتيح وميبو بعد الجلسه لاني ما استخدم الى اللوشن وكريم الحمايه

 

[أحاسيس دافئه]

أسفه تأخرت عليج بالرد بس والله غصبن عني مشغوله حيل مع بنتي الصغيره وقلبي معاها ونفسيتي حيل تعبانه لأنه راح انسوي لها عمليه ثانيه للكلى من جديه ما ادش النت نهائيا اسمحولي يا بنات وادعولها ربي يخليها لي مو قلت لكم الحسد لي ولعيالي ولزوجي ماكو فجه عنه مو امخلينا الناس ابحالنا كلش
المهم يالغاليه اللي بشرتهم حنطيه لازم يستخدمون كري لتفتيح البشره قبل الجلسه وبعدها علشان اول شي البشره يفتح لونها ويقدر يزيد لج بقوة الفراكسل وثاني شي علشات اتحافظين على بشرتج طول فترة الجلسات من التصبغات والكلف لأنج تدرين بهالفتره البشره حساسه وتتأثر بكل شي
عيدي النظر بدكتورج
واسمحولي بنات ادا تاخرت عليكم بالرد اظن عرفتوا ظروفي الحين
الشكوى للهأفرح يوم يا بنات ويضيق خلقي شهر

 

[عزاه ياقلبي]

الله يشفي بنتك يارب بس شنو الكريمات الي الي استخدمها الحين شنو اسمها وهل في فرصه اني الحق على بشرتي

 

[عزاه ياقلبي]

وميبو شنو طريقة استخدامه