لو ريلك معجب ضمنيا بصديقة لك

[همس الافكار]

مرحبا يا بنات . اليوم ودي اطرح موضوع عليكم وارجو من الكل المشاركة . مادا لو ريلك معجب ضمنيا بصديقة لك علما بأن هي الصديقة متزوجة واخلاقها عالية جدا ومؤدبة الى اقصى حد وتحب عائلتها جدا.والصديقة جميلة ما شاء الله طول وشعر اسود طويل وشخصية جد طيبة. ولكن ما العمل بالغيرة ! فهل تقطعي صداقتك فيها ام تستمري معها ؟

 

[فجر الغلا]

عشان اتحافظ على بيتها لازم لازم اتخفف تواصها معاها لين تقطع علاقتها فيها هذا من راييي

 

[shaikhat elbnat]

خففي منها على الاقل جدام زوجج .. وانتي بينج و بينها لا اتغيرين العلاقه لانه ما بدر منها اي خطأ
و اذا كنتي انتي دايما تمدحينها جدام زوجج و اتكلمين عن مزاياها و شخصيتها و نقاط القوه فيها فتعلمي درس .. يجب على الزوجه انها ما تكثر بالمديح عند زوجها عن اي امرأه عشان ما اتفتح عينه

و نصيحه لا تهتز ثقتج في نفسج

 

[همس الافكار]

شكرا على تواصلكم ومشاركتكم . القضية انها نعم الصديقة طيبة وادب واخلاق وانا اعتز بصداقتها لانها بالفعل صديقة مميزة واحيانا اشعر بالدنب لانني افكر بالابتعاد عنها من غير سبب

 

[mshmsha555]

موشرط تقطعين علاقتج فيها اذاهي انسانه اخلاقها
عاليه مثل ماتقولين ليش اتركها انا رايي انج ماتسولفين عنها أو ماتجيبين طاريها عند
رجلج إلا لضروره مثلا طالعه معاها أو داقه عليها بهالحاله تقدرين تذكرينها
وهذي وجهة نظري وربي يوفقج

 

[shaikhat elbnat]

حبيبتي لا تقطعين علاقتج فيها !!
بس لا اتخلين تلاقي بينها و بين زوجج
يعني زوجج اشلون عرف مضمونها و انعجب فيها ؟ هل اهيا تزوركم البيت و اتقابل مع زوجج و تدخل في نقاشات معاه و تقعدون مع بعض؟؟ اذا الجواب نعم فلا اتخلين هالقعده اتم من اليوم و رايح .. خلي التلاقي بينج و بينها بس

اما اذا كان انعجابه فيها لسبب انج دايما تمدحينها و اتسولفبن عنها جدامه ؟ فتوقفي و لا اتكلمين عنها الا بالعموميات .. مثلا انا مع فلانه .. انا بطلع مع فلانه و بس لا اكثر

 

[حبييبة عزوز]

انا اقول حبيبيتي اكيد في سبب خلاه يعجب فيها
يمكن انتي تمدحينها وايد جدامه وتصيرين تحلينها بعينه بدون ماتحسين واذا كنتي جذي لاتسولفين عنها جدامه
اما صديقتج حرام مالها ذنب

 

[انا والحب قصة]

الغلط مو من الصديقة من الزوج لو بقطع علاقتي بكل صديقة زوجي بيكون معجب فيها لا سمح الله ما بيصير عندي ولا صديقة فالافضل اعالج هالزوج الخفيف الدم الي ما يحترم مشاعر زوجته وعادي يغيظها باقرب الناس لها

 

[moone GRL]

اهو من الاول ما كان لازم تجيبين طاري رفيجاتج جدام زوجج سواء بالشينه ولا الزينه ولا المفروض يشوفها لانه لو انها عادية البنت بس سبحان الله من كثر ما تسولفين عنها يمكن لو سالفة عادية بتكبر بعينه وتعجبه ليش تحطين نفسج بموقف جذي يقعد يقارن بينج وبينها او يصير بقلبه شي

لا تقطعين علاقتج فيها بس بنفس الوقت لا تجيبين طاريها كلش عند زوجج ولا تخلينه يشوفها وبس دام البنت على كلامج عاقله ومحترمه يعني ماهي من بنات الحرام اللي يخربون بيوت هذا شي زين

 

[catloverq8]

لو مو متزوجة بقول بقلبي حبها و أنا يسعدني أسعده و يمكن يتزوجها ،،، الشرع ما حرم
بس هاذي متزوجة !! يعني زوجي ببساطة قليل أدب و متجاوز للحدود كلها
أعتقد صديقتي مالها ذنب و الذنب ذنب الزوج اللي حتى لو كنت مقصرة معاه فعيب عليه يعجب بوحدة متزوجة
و الحل أطرش زوجي بيت أهله و أقول له تسنع و اللا في أمان الله
رياييل آخر زمن ،،، فعلا ما يستحون على وجههم !! لاحول و لا قوة إلا بالله

 

[كوثر دشتي]

:dddds:مااقطع علاقتى فيها اذا زوجى من داخل مونضيف مثل ماانعجب فيها راح ينعجب ابغيرها وهذى حالتى بقاطع اناس علي شانه واهوه السبب اقاطعه اهوه احسن

 

[shaikhat elbnat]

همس الافكار حبيبتي .. انا غفلت عن شغله .. لازم انعرف شلون عرفتي انه معجب فيها ضمنيا !؟
يعني هل قالها لج بكل و قاحه و قصده يثير غيرتج و يجرحج لا قدر الله ؟!
هل لمحلج و قصده انج تكونين مثلها و اتغيرين اشياء فيج؟!

او احساس قلب الزوجه ؟! وهذا الي اتمناه

 

[dr.elzain]

بعدي عنها جدام ريلج !! ولا تخلينه يواجها ولا يشوفها كلش

وبصراحه .. انا افضل قطع علاقتي فيها ........ الغيره وعمايلها هههههه

 

[q8iLady]

حاسه فيج اختي , فعلا شعور محير !

بس " أهل مكه أدرى باشعابها "
شوفي شلي يصرفلج حياتج و اللي يناسب بيتج .. و ديري بالج من التسرع في اصدار أحكام تحت ضغط الغيره بدون لا تلتبس عليج الأمور.

موفقه

 

[همس الافكار]

يا كبر قلبي بمشاركتكم وصج اللي تقولونه اني انا بطبعي ما احب اتكلم عي احد الا بالزين . وبس اشوف رفيقاتي امدح الاشياء اللي يكونون عليها يعني ادا مثلا رفيقتي حلوة اقول انها حلوة وبكل صراحة وبين هلالين بطيبة قلب . ومعكم حق اني يمكن غلط اني امدح وحدة جدام ريلي ما ادري الافكار ممكن تدور في راسه . اللي فهمتو الحين اني ما اجيب طاريها جدامه وما اقطع علافتي فيها

 

[همس الافكار]

حقولك شلون العائلتين اصدقاء يعني لمن نكون مجتمعين النظرات تفضح المجاملات تفضح والمرا مننا عندها رادار داخلي سبحان الله حاسة سادسة ولا شلون وشكرا يا الغالية على اهتمامك نورتي صفحتي

 

[دراهــم]

اذا اخلاقها زينه .. ليش اقطع علاقتي فيها ..

وين احد يلقى رفيجة جذي

بس ما اخليهم يتلاقون .. ولا اسولف له عنها

 

[shaikhat elbnat]

حبيبتي مدام انج عرفتي اعجابه فيها عن طريق احساسج فهذا اهون من انه يكون وقح و يقارنج فيها او او او
خلاص .. تعلمي درس انه الرجل لازم ما تمدحين مرأه جدامه .. عشام لا اتفتحين عينه على اشيء اهوا غافل عنها .. لانهم خلفه ينجذبون للمرأه الاجنبيه (غير زوجتهم) ..وخففي التلاقي ما بينهم تدريجيا لين ينقطع بس لا تطولين هالتدرج .. و اهم شي لا اتزعزع ثقتج في نفسج و اذا في مضمون صديقتج شي حلو او فيها صفات حلوه اجذبت زوجج فمو عيب انج اتعلمين منها و اي شي حبيبتي احنا عندج

 

[وجدان الكويت]

علشان جذي كايصير تسولفين جدام ريلج عن رفيجاتج او عن اي بنت

الريال مرات يعجب لو بالكلام بدون لايشوف