ماعرف أحاجي الخدامة .. بصير معزبة مو قادرة !!!

[بشه المنفشه]

برونزية تسلمين حبيبتي إي رحت شفت الموضوع بس ما قريته .. بخليه بعدين أقعد عليه قعدة عدله

عهود الحب لا تشيشيني يتني البجية من ردج لأن صج يبتيها على الجرح ههههههههه اهي اتخورة وايد بالحجي وعلى قولتج تستعبط بس أخاف ريلي يشخلها من قلب وإحنا أكلنا بيدها
قاعدة أحاول والله وصار ما عندي شغل غيرها حتى وقت النوم أفكر فيها !!! بس بخلي الزفة حل أخير لأني أخاف من سوالف الخدم ما تدرين شسوون من وراج

مشكورة بعد قلبي

 

[بشه المنفشه]

بما إني بزوارة أهلي الحين فكرت أناديها بغرفتي بروحنا ونقعد قعدة صريحة .. حشى الإتجاه المعاكس

بس أمي ما رضت تقول لا تفتحين على روحج بيبان .. صبري عليها شوي وخليها اتعلم خطوة خطوة ولما تجذب أو تسوي شغله غلط خل اتعيدها مرة ثانية مثل ما قلتولي ومع الوقت بتعرف طريقتي وأسلوبي

حتى خدمنا إهني كلمتهم قلتلهم علموها وسولفوا معاها خل اتعرف السنع بس بشكل غير مباشر لأن حتى اهمه ناقدين عليها شلون باردة ولا تساعد

والله كريم

 

[عهود الحب]

شحقه تدخلين الخدم بسالفتها
لاتكلمينهم عنها
عيارين ترى يعلمون بعض سوالفنا عنهم
ومهما كان يفزعون لبعضهم
بالنسبة لج دام انتي بزوارة اهلج ريحي بالج واستانسي
ولي رديتي بيتج استفردي فيها وشغليها وانتي فوق راسها
علميها طريقتج شوي شوي
الي غلط ترد تعيده ثاني مرة


انا خدامة اختي سنتين عندها وهم عوووووووووووووجه تستعبط
قلت لها سوي اوتي لملابس بنت اختي كنت عندهم
راحت ردت البدلة معفسة مثلها مثل اول
قلت تعالي شنو هذا
ردي سوي اوتي ثاني مرة زين

ردت مرة ومرتين اليييييييييين ضبط الاوتي
عصبت بغت تطلع جنونها علي وعالبنت
بس عقب تسنعت
شوفي ترى كلهم يستعبطون منو مايبي الراحة


لاتحسسينها انه الي تسويه بيطوف عليج وهم لاتخلينها اكبر همج

لما تطلبين شي تابعيها واهي تسويه
وخلاص
لما تشوفج مفتحة عيونج بتحاتي
وبس

انتي شنو شغل عندج ؟ اتوقع لاطباخ ولاشي
غسيل واوتي وخم صح ؟

 

[بشه المنفشه]

امبله قاعدين انعلمها الطبخ وعندها تنظيف وغسيل حيل حيل خفيف وجان زين كله تسويه بيوم واحد !! تقريبا مو قاعدة اتسوي شي .. الظاهر شافت ماكو شغل فابردت زود فوق ماهي باردة

وحركة أخليها اتعيد شغلها هم زينة .. بجرب وأشوف تاليتها

مضايقتني هالخدامة ما توقعت الخدم جذي استغفرالله .. أشوف الكل يشتكي بس توقعت الحريم يبالغون !!!

 

[حناينq8]

ذكرتيني بأول ما تزوجت
خدامتي كانت اكبر من امي
اهم شي انها تخاف من احد بالبيت
يعني اذ انتي طيبه معاها خلي ريلج بالصوره

 

[برونزية رشيقة]

اي أنا أقولها سوي ونظفي بس لي الحين مو قادرة أمشيها على اللي أبيه واهي ما تعطي من روحها .. يعني كل شغلة لازم أنا أقول

مليت منها وماقدر أقول مابيها لأن أدري الغلط فيني أنا ! يبيلي أشد حيلي عليها شوي .. اهني المشكلة

مثل ما قلتي في ملاحظات صعب تقولينها وأقعد آكل بعمري .. عسى ما أنبط بويها على يوم مع إني بس أشوفها أخق ماعرف أتكلم !!!

هذي لا يكون أندونيسية .. خوفج مسقيتج شي .. خالطة لج شي بالماي وإلا الشاي وإلا العصير .. وإلا عندها (( حجاب )) يصك حلجج من تشوفينها ؟؟؟؟؟؟ قريت ردودج تقولين لسانج ينربط من نشوفينها !!!

ارقي نفسج .. وخلليها تزور بيت أمج على يوم وإنتي ردي سيييييييييييدة على غرفتها وفتشي الكبت بين ملابسها .. وشنطتها والفراش وبين الكنابل.. وتحت الإسفنج .. وداخل ويه المخدة .. ويرارات مطبخج .. حتى بعض الجناسي الثانية عندهم سحر مو بس الأندونيسيات !!!

 

[بشه المنفشه]

حناين يمكن لو اهي كبيرة جان عذرتها بس هذي صغيرة .. تنرفز

برونزية لا حبيبتي مو جذي قصدي .. اهي سيلانية ومشكلتي إني طيبة زيادة عن اللزوم <<< تمدح عمرها
ماعرف أدقر ولا أزف وبيني وبينج ماعرف حتى أواجه يعني حتى بحياتي العادية أستصعب هالشي لكن هالطبع ما يفيد مع الخدم لأنهم يشوف الوحدة لما تكون طيبة معاهم جنه شخصيتها ضعيفة ويبون يستغلونها وأنا يبيلي أشد شوي عشان ما توصل هالصورة لها ..

ومشكورة بعد قلبي

 

[برونزية رشيقة]

يبيلج جدول تمشي عليه موجود في فهرس مواضيع الخدم .. وحاسبيها عالجدول أول بأول ..
ودشي موضوع شتعلمين خدامتج عليه أول ما توصل ؟؟؟؟؟؟؟

 

[بشه المنفشه]

برونزية تسلمين على الفهرس اتصدقين ما شفته إلا لما نبهتيني
يبيلي فرة على أغلب المواضيع اللي فيه صج مفيد