مبتعثة لـ بريطانيـا - لـندن

[Sweet Angle]

السلام عليكم ورحمة الله وبركاته

هلا وغلا خواتي شلونكم عساكم بخير ؟؟

عساكم دااااااايم بخير وصحة وسلامة يارب :eh_s(7):

خواتي شوروا علي

ان شاء الله جريب راح اصير مبتعثة لبريطانيا
واكمل دراستي الجامعية هناك

اهو يا اني راح اروح بروحي .. وهناك راح الاقي بنت خالتي ..

او يا اني راح اسافر من هني مع رفيجتي لانها بعد راح تدرس هناك ...

وحدة من الحالتين

اول مرة اتغرب عن هلي و دراسة 4 سنين برى ماشوفهم الا بالاجازات

خايفة واااااااااااااااايد و متوترة طول الوقت وماني قادرة افكر عدل :eh_s(2):

واهلي بروحهم متوترين معااي

اهو الخوف مو مني الخوف من الناس اللي هناك ...

اانا متحجبة والبس عباية .. عادي هناك اكو بنات لابسين عبايات ...عدل ؟؟ ولا احد راح يتعرض لي ؟

مادري شلون الوضع بيكون هناك ؟؟



شوروا علي ... هل لكم تجربة ... ؟؟ و شنو نصايحكم لي ...

 

[Sweet Angle]

اي بنات ترى اول الأيام بيكون معاي ابوي و اخوي الله يحفظهم علشان يطمنون علي وعلى وضعي هناك تالي بيردون الديرة ..

 

[Mako Meni]

عادي تقدرين تلبسين اللي تبينه .. بالتوفيق انشالله

 

[الشوق يجيبك؟؟]

عادي حبيبتي أنا عشت بلندن ومنقبة وكنت اروح كل مكان وقطارات وباصات الوضع اسهل مما تصورين حتى بالجامعه بتلاقين متحجبات وفيه قليل منقبات وعادي​

 

[Sweet Angle]

ماقصرتوا شكرا خواتي ...

 

[Miss Cherry]

عادي حبيبتي لندن سهالات

بس نصيحة خلي ملابسج ملونه يعني البسي مثل المانتوه وسيع وملون مو اسود عشان ما تلفتين الانتباه

انا كنت بنقابي بلندن وعباتي سوده بعد بس كنت رايحه علاج وواجد العرب هناك

 

[لندنية]

اول شي حياج الله اختي في لندن وان شاء الله الموفقية في حياتج العلمية والعملية
انا عايشة ومستقره بلندن ... لاتحاتين موضوع اللبس في لندن بالعكس راح تشوفين منقبات ومحجبات وايد ومافي اي احد يتعرض لهم ابدااااااا
يمكن اول ايام راح تحسين بالغربه خاصة بعد مايردون اهلج للكويت بعدين راح تتأقلمين بسرعة .. اتوقع انتي بتسكنين بلندن نفسها ؟
واي سؤال حابة تسالين انا بالخدمة

تقبلي تحياتي

 

[الشيخه فطامي]

حبيبتي انا درست هناك

عادي تلبسين اللي تبينه

بس انتي وين انجلترا ولا اسكتلندا

بس من البرد او الهوا او المطر راح تلبسين بالطو او جاكيت طويل لانه العبايه راح طير او تلزق بالجسم او تصير كلها ماي

انا كانو معاي بنات يلبسون عبي بس هناك يفصخونهم لانه الجو مايساعد بس لبسج ساتر لانه بالطو طويل او حجاب

الله يسهل عليج امورج يارب

 

[انثى عربية]

الله يوفقج يارب ويسهل كل امورج

انا من رايي دامج مطوله هناك تحجبي ولبسي بالطوات بدون عباه وخلي حجاباتج ملونه بعد

ولا تحاتين ولاتخلين الاذكار ودام رفيجتج معاج الحمد لله ولندن امنه والامور سهالات باذن الله

 

[دلع الشمال]

حبيبتي في سواق عرب واكثرهم من الكويت اذا تبين رقمهم يساعدونج

 

[ENG.NuNu]

الله يسر لج اختي ويسهل عليج غربتج

بنات بغيت أسألكم تعرفون عرب يشتغلون في مكاتب عقاريه ؟؟

ابي احد يساعدني ألقى شقه للتاجير