متضــــــــــــــــــــــــــايقة موب عارفة ارقد..تعالو سولفو وياي اشوي

[أستغفرالله]

السلام عليكم جمعه مباركه عليييييييييج حبيبتي والله يسخره لج بهل يوم الفظيل المبارك حبيبتي والله ادمعت عيني من قلب لما قريت موضوعج الله يهديه اسمحيلي اقولج ان زوجج ايمانه ضعيف وصلاته رديه لان امبين مايخاف الله فيج انتي زوجته وبلمستقبل بتصيرين أم اعياله حبيبتي كل ماتطنز عليج اضحكي وقولي الله يخليك لي ولا يحرمني من غشمرتك وبعدها صلي ركعتين واقري سورة البقره يمكن الي فيكم عين ماصلت ع النبي

أختي الدعوه مستجابه بيوم الجمعه ادعي ربج بعد صلات الجمعه الله يهدي زوجج ويحنن قلبه عليج ويفرج همج ويسهل ولاتج وتقومين بسلامه انشاءالله والله يرزقكم بذريه الصالحه الله يبعد عنكم الشيطان

اسمحيلي طولت عليج من حر مافي قلبي
موفقه حبووووووووووووبه

 

[المرتاحة]

وااااي حرني ريلج

هذا شنو؟ ما يحس؟ قهرني قهرني

شوفي انتي ما عليج منه طنشيه اذا عيب عليج قولي له مالي خلقك
وقومي وروحي غيري مكانج

والكلام الله قلتيه لنا قوليه له

واااي حرني صج

الله يهوون عليج يا رب و يفرج همج يا رب

 

[((shoOoshoOo))]

الله يلين قلب زوجج عليج

عيل 49 متينه

لاتصدقينه ترى والله وزن ريشه .. جم طولج ؟

 

[أزهااار]

حرام عليه الله يهديه
يعني يكفي الحامل نفسيتها زفت
الله يحنن قلبه عليك يااارب

 

[فراشة الرغد]

حبيبات قلبي والله .. كلامكم كله دخل القلب
قبل ماتقراه العين..
انة من كتبت الموضوع وانة اقرا الردود من التلفون..
لي الصبح..
سويت نفسي ولا كان شي صار.. مابي نتهاوش بعد..
اهو قام يعيد لي السالفة.. قمت ارد عليه بكلام حلو
يعني لم يقول لي درام اقول له اصلا جسمي حلو حتى
بالحمل واعجبك..
ومادري شنو قال امج وابوج قلت له انت امي وابوي..
جان يقول لي شوفي..
يا تتسنعين وتصيرين مرة ولا اييب على راسج وحدة ..
كان جاد حسيت هالشي بعينه وكانه غريب وكاني ماعرفه
انة سكت.. دموعي بروحها نزلت احرقت خدي..
جان يقول صحتي ماصحتي هذا اخر كلام.. مافي غير
هالحل.. قلت له هذا الي ببالك؟
قال لي مو هذا الي ببالك الي يفكر بهالشي يعني مو مرتاح
مع زوجته..
بالله انة في شنو مو مريحته؟؟
قلت له اذا الريال يبي هالشي يبتدي يطلع عيوب بزوجته
مو لان زوجته فيها شي لا بس لانه يبي هالشي..
حرق قلبي يا بنااااااااااات

قام متنرفز وراح الغرفة الثانية قعد على الكومبيوتر..
تذكرت كلامكم لي.. والصراحة كلامكم عطاني قوية اشوي..
رحت له اكلمه بجدية قلت له ..
انة في فترة صعبة وفي فترة حمل ووايد حساسة وانت بس تقعد معاي
اول كلامك تتطنز علي وتقارني ببنات.. اشتخسر اذا قلت لي
شي حلو.. كلمة وحدة انت حتى صباح الخير ماتعرف تقول
الحين تقول انة الي مو سنعة.. قلت له اش هالعيشة اي مرة تتحمل
الانسان يحبب نفسه بلسانه ويكره بنفسه بلسانه .. لم الواحد يكون
لسانه حلو الناس ترتاح معاه وتحبه.. واذا انت ببالك الزواج تزوج
بس ودني بيت اهلي قبل.. قال مولان ابي اتزوج وقطعت كلامه
قلت له .. ابيك تفكر ساعة ساعتين او خمس.. اذا انت كارهني وماتبيني
و تبي تعرس.. قول لي خبرني بشيل اغراضي وبروح بيت ابوي مو انة
الي تحطني بهالموقف.. انة ليحين صغيرة وانة بعد يحق لي اشوف حياتي
على فكرة بنات عمري 21 سنة وعندي منه بنت .. عمرها 3 سنين ..
والي سالت عن طولي طولي 155
قال لي انة مابفكر ولا برد عليج ابيج انتي تردين علي بصيرين مرة وبتتسنعين ولا لا
لان اذا ماتسنعتي وماعرست عليج الحين بعرس عقب شهر او سنة واو سنتين
قلت له ابيك انت الي ترد علي وهذا اخر كلام عندي..
ماخلاني امشي سيدة قال تعالي خلاص سامحتج وقعدني في حضنه ..
بنات زهقت ماعارفة اشلون اتعامل معاه..
حسيته جاد بسالفة الزواج ويوم نطق فيها حسيت كانه كلام حابسه من زمان بباله
وطلعه لي.. انة مستحيل اتم معاه واهو في باله يتزوج علي بس..
انة شاللي بالزواج يا ربي ليش تزوجت .. ماياني الا قصر العمر والنكد ..
بالله عليكم بشنو غلطت عليه في شنو مو مرة ومو سنعة .. وشنو الحل معاه

 

[فراشة الرغد]

زهقت بنات ..
دايما مستعد يطق ومستعد يهاوش..
مادري شسوي وياه..
احسه اصلا مو طايقني احسه كارهني
شالسبب ؟؟
دايما يدور لعيوب فيني..
تخيلو وانة قاعدة اطبخ بالمطبخ يعني اقطع
بصل.. يي يقول لي افففف ريحتج بصل؟؟
زين انة في المطبخ مو برع..
اهو طول الوقت ايي يشم ابطي ويشم اماكن
ولا مرة شم مني ريحة موب حلوة ..
دايما روائح حلوة وعطورات ..
بس مادري اشلة يدور الزلات و يدور
لعيوب دوارة..
تععععععععععبت ..

 

[أستغفرالله]

جبيبتي ليش ماتسألينه انا مايقتك بشي ولامزعلتك بشي بسلوب هاااااااادي ومن غير عصبيه او استهزاء ادري هذا الشي يقهر بس ميخالف اضغطي ع نفسد عشان بيتج وعيالج

 

[أستغفرالله]

اقصد امضايقتك بشي صلحت البدليه

 

[أستغفرالله]

ونصيحه من أخت لاختها خلي ع طوووووووووووووووووووول سورة البقره تشتغل بلبيت عشان يبعد عنكم الشيطان

موفقه حبوبه والله يعينج ع مابلاج

 

[فراشة الرغد]

تسلمين يا بعد عمري انتي..
انة اساله بهدوء..
يقول لي مافي منج تتحمليني وكاملة..
ياني الحين يقول لي انتي العزيزة الغالية
ومستحيل اخذ غيرج بس كنت بقهرج..
الحين انة بمشي على كلامكم.. ابدا
ماراح اعطيه مجال يضايقني..
تسلمون حبيبات قلبي ربي يعطيكم الف عافية
ويفرج عليكم كل همومكم.. وكل من قال آمين

 

[جوري 2007]

والله مادري شقولج الا الله يفرج همج ويحنن قلبه عليج

حبوبة خلج واثقة من نفسج غصب طيب واضايقي من كلامه بس مو جدامه ، جدامه خلج قويه وياجبل مايهزك ريح والضحكة شاقة **

 

[زمرد Q8]

الله المستعان

 

[جــــاذبية]

عطيه طاااااااااااااف
الرجال مثل كرة القدم إذا شتيها خفيف تروح وماترجع لج
وإذا شتيها من قلب ورفسة بنت هو هو ترجع لج وبسرعة هاكزا هو الرجل
هع ..

 

[ام شووووق]

الله يعينج

 

[العمر راح وتعدى]

شوفي حبيبتي حسب ما ذكرتي انج وايد احلى منه ... وانج حلوه ... ممكن يكون الريال سامع كلام من بره انكم مو لايقين على بعض او مرتك وايد احلى منك ؟؟ بعض الرياييل تصير عندهم ردة فعل ... ولا شعوريا يحسسج بالنقص وانه احسن منج ! علشان يغطي نقصه اهو!

المفروض يكون عندج ثقه في نفسج وما تتاثرين بكلامه ... يعني حتى لو قالج انتي مو حلوه او عيب عليج .. ردي عليه اصلا انا حلوه واينن .. ولا جان ما سحرتك بجمالي وتزوجتني ... لازم تبينين له انج واثقه بنفسج وان كلامه ما راح ياثر عليح بعدين تقولين وزنج 49 عليج الله هذا وزن وحده حامل؟؟؟؟ حتى الي مو حامل وهذا وزنها يقولون عنها عصله ... والفنانات الي يقولج عنهم .. قوليله انا وزني انا حامل اقل من اوزانهم بدون حمل ! شلون تشوفني متينه؟؟؟ وبعدين اذا انا حامل يعني المفروض بطني يكون يمي؟؟؟؟؟؟؟؟؟؟
شوفي حبيبتي حتى الشينه والي ريلها لايعه جبده منها ومو عاجبته .. اذا شافها واثقه من نفسها والله راح تحلي نفسها بعينه
خلي ثقتج بنفسج قويه وبعد فتره السلاح الي قاعد يحاربج فيه راح يشوف انه فاشل .... لا وراح تحلووين بعيونه
طيعي اخيتج وبتشوفين​

والله اعرف وحده ريلها من خذاها وهو يقول لها غشيتيني لمه شفتج ويهج كله مكياج عبالي حلوه خدعتيني ... وريلها جميل وهي سمره وعاديه ... كان يناديها السيلانيه .... وتحدت نفسها وقالت والله لا اخليه يحبني ... وشاف ان كلامه ما ياثر فيها ( جدامه طبعا) وشوي شوي الحين الريال يموت فيها ويتغزل فيها حتى وهي حاطه حنه على راسها يقول لها انتي حلوه بعيوني بكل اوضاعج حتى وانتي مبهذله تغسلين وتطبخين وريحتج طباخ هم ابيج واحبج
سوي مثلها وتعلمي ... هذي وهي مو حلوه .. عيل انتي شلون؟؟؟؟؟
ماتشوفين بالشارع بنات قمة الجكر ومعاها ريلها قطعه حلو .. ويركض وراها مثل الخروف​

الله يسخره لج حبيبتي ... علميه الثقه شلون قايله​

فديتج كلامج سنع :rerrerek: وانا معاها بالنظريه هاي خلي ثقتج بنفسج قويه :ggdw:ربي يقومج بسلامه ويفرج عليكم اللهم امين ياشعب البحرين:yaaaaaarb:​

 

[حبك بلاني!]

الله يكون بعونج وانشاءالله الله يهدية...!!

 

[ليموناضه]

الله يهديه ويسخره لك*كلام زعنوفه صحيح 100% والله ييسر لك ولادتك

 

[غدووور الكويت]

الخطوه اللي سويتيها وااايد زينه ودايما خليج واااثقه من نفسج وقويه وحسسيه انه اللي يبيعج اتبيعينه والله يفرج همج يارب

 

[A.E]

الله ييسر لك
ويوفقك ويسخر زوجك لك

 

[أحبك أمي]

أولا
الله ينصر أخونا أهله السنه في البحرين قلوبنامعاكم
ثانيا
اختي أنت الغلطانه ليش تسكتين وتكتمين الهم والحزن في قلبك
ليش ماتوضحين له أعراض الحمل وان هذا شىء طبيعي
الله يسخرة لك