مثل ماوعدتكم تقسيم المهر وادارة ميزانية العروس

[Pearla & Ribbons]

تقسيم المهر وادارة ميزانية العروس



السلاااام حبايبي اشتقت لكم من زمان عن هذا القسم لكن رديت وبقوة مع مسلسل تجهيزي التركي....لووول...بصراحة اليوم الصبح بالدوام كتبت موضوع يهبل عن نفس الموضوع ومن العجلة ولأني بالدوام طفوا علي الليتات والبورترات يلا ماما دوام خلاص جان اضغط على اعتمد وللا للاسف مانزل الموضوع ...(قصة خلصي علينا ) بحاول.اتذكربعض النقاط لانها من بنات افكاري



طبعا كل بنت تنتظر يوم تنخطب ثم يوم زفافها وتبي تكون بافضل زينة .وسبحان الله من تنخطبين حتى قبل استلام المهر يجيج حماس موطبيعي على السوق والمجمعات وحتى العيادات والصيدلية والجمعيات ...



اهم نصيحة توجهي لربج اول شي واستعيني فيه وتوكلي عليه وتصدقي عسى ربي يوفقكم ويبارك لكم ويرزقكم الذرية الصالحة ...



اهم شي لازم تتهيئين نفسيا حق الثروة اللي اهي المهر قبل لاتمسكينه ..يعني لازم تعرفين ان هذه فلوس حق تكاليف ليلة العرس يعني اللي تلبسين فيها الابيض اوالاوفوايت كيفج ....لازم تعرفين شلون بتتعاملين معاه وتمسكينه ...وتعرفين قيمته ...وشنو بتسوين فيه بالضبط...لازم تكتبين قائمة حق كل شي تحتاجينه بالفعل للعرس خاصة الليلة الاولى خاصة الاشياء اللي مايمشي من غيرها العرس..



نصيحتي اهي الاولويااات .. الاولويات ثم الاولويات ...لاتفسفسين فلوسج عالخرابيط بعدين لما تجين للمهم ولا ماعندج شي ...والمهم يبيله فلوووس والفلوس عند العروس لووول يعني تعالي دوري احد يسلفج هالمبلغ ....

شتسوين ؟؟؟

اول ماتمسكين المهر خلصي المهم من بدلة بيضة او اوفوايت كيفج ومصورة زينة تصويرها محترم وصالووون..



الباقي لاحقة عليهم لانهم شغلات بسيطة مثل ملابس داخلية وعطورومكياج ودراريع لاتخافين ..اذا.خلصتي المهم ..قسمي كل راتب او اعانة او مصروفج من اهلجا و الباقي من المهر مابين دراعة وبدلة وقميص نوم وعطر وهكذا ...



بنات انا عروس من فترة بسيطة داخلة حاسة فيكم وابيكم تستفيدووونمن تجربتي وتجاربي وخباااالي احيانا ...لأني شريت الكثير الكثير ولله الحمد من عطور دراريع عبايات لانجري ميكب اكسسوارات لكن لم استفد الا من القليل ...

اللي وزعته واللي استغفرالله قطيته حسيت مايناسبني ....

يعني لاتكثرووون من شي لأنج لاحقة بعد الزواج ..

اخذي اغراض تكفيج اول شهر بعدين انتي بتملين وتروحين تشترين اللي تبين .. لاتخافين محد بيشوف جهازج واذاكلش كلش حسيتي اغراضج مووايد قولي اغراضي بجيبهم بعد العرس...

انا من كثر الخرابيط اللي شريت للحين نص الاغراض ببيت اهلي والله للحين كل اسبوع اجيب شغلات من بيتنا لبيت زوجي ...واحس احسن عشان ملابسي تطلع مفاجئة محد يتفرج عليهم ...يعني شنو مويعني تروحين تشترين اغراض وتقطين نصهم ببيت اهلج ! لالالا لكن احب اقولج انج تقدرين تشترين بعدين وراح يعتقدون انها اغراض خاشتها ,,,

ادري يبنات انه متعة تشرين اغراض كشخة ووايد وتشيلين معاج جهاز فخم وكبير بس المتعة الاكبر انج تشترين بعدالعرس لاتصيرون مثلي ومثل بعض البنات

...للحين موقادرين نشتري عطر ننطر لين نصرف البلاوي اللي عندنا ...نسأل الله يباركلنا ويباركلكم بكل فلس وكل شي نشتريه ....لأن فعلا بعض الاغراض فيها بركة...



شلووون اكبح جماح نفسي المحبة للشوبينغ؟؟؟؟



ادري حلوة اكبح ...





دايما قيسي الشي وحكمي عقلج وحدسج هل احتاجه؟ هل راح يفيدني؟ هل يأثر على ميزانيتي ؟ هل يعبر عن شخصيتي؟(شكو) يعني لاتحكمين عواطفج وتتأثرين بالدعاية ترا اهما المحلات شطار ودارسين سيكولوجي ...يقدرون يقنعونج بالسلعة اللي طايحة بجبدهم...



وموكل شي تسمعين عنه تروحين تخمطينه ترا بعض الحريم الله يهداهم يمدحون شغله ويطيرونها عالفاضي وهي ماتسوى او يمكن زينة لكن ماتناسبج ...

مثال حمرة انجل يمدحونها حيل يوم رحت اجربها تلووع الجبد

...اساسا ماك يدرون انها موحلوة عشان جذيه خلو كيم كاردشيان تسوقها ومشت ...آنا ابيض من كيم وماناسبتني ...ودايما اي شي بتاخذينه جربيه سواء بدلةاو ميكبا و احذية عزكم الله ...حتى الجنط في جنطة تناسبج في جنطة ماتناسبج ..لما تلبسينها تعرفين ولاتنسين سالفة اختلاف الفصول والجو اشتري شي يناسب الجو اللي بتتزوجين فيه لاتاخذين كله صيفي وعرسج برد او العكس



من كتاب كيف تديراموالك لفيصل كركري ...

[url=http://www.7ammil.com/]

[/url]

يقول ان الابتعاد عن اماكن التسوق تخفف الانفاق وتوفر عليج... طبعا يقصد لاتروحون السوق بدون حاجة لانكم راح تتأثرون بالدعاية والاغراض ..حاولي قد ماتقدرين ماتطلعين لأماكن تسوق ...



انا عن نفسي هالايام احاول اذا بتمشى واضطريت اروح مجمع اصعد سيدة فوق للسينما والمطاعم ...طبعا هم صرف بس اهم شي بعدت عن الاغراض ...



واذا شفت شي وعجبني شسوي؟؟؟

دايما اقولكم ان كلمة مايتطوف هي سبب خرابنا وتفليسنا...

احب اقولج لالالالا كل شي يتطوف ترا السوق ماراح ينحاش..وكل سلعة او منتج (نفس الشي) اي شي تخلينه يجي بداله مية واحد واحلى ...فلا تخافووون ..



زين واذا شريت وخلصت وطاح الفاس بالراس شلون اكبح جماحي ؟؟؟



احتفظي بكل فاتورة او وصل او رقم مهم او دعاية ممكن تستفيدين منها ..



سويلج ملف مثل هذا اللي بالصورة

[url=http://www.gulfup.com/show/X2ae7d9jpd3fo8]

[/url]

خشي فيه كل فواتيرج واوراقج ومواعيدج ...واي ورقة كينت اواي فاتورة شريتي فيها شي حتى لو من فرع الجمعية حتى لو خدمة بصالون..

[url=http://www.gulfup.com/show/Xrgursfk4hus4c]

[/url]

هنيه تقيمين نفسج ومصروفاتج والتكاليف ويصير عندج خبرة بالاسعار...وتعرفين شنو الشغلات التافهة اللي شريتيها ومومحتاجتها تلغينها من حياتج ...حاولي تفرقين بين كل فواتير كل شهر والثاني بفواصل ...

ومع الوقت راح تتحكمين بنفسج الجشعة وتقل مصروفاتج وتصيرين حكيمة في ادارة ذاتج ومصروفاتج..



وحطي فيها الارقام المهمة خاصة اللي تعاملتي معاهم بحجز اوخدمة ...سبحان الله لو يضيع رقم ولايخترب تلفونج لو سمح الله ولا الرقم عندج لأن ياماصارت لناس اعرفهم...

وانا على فكرة للحين احتفظ بفواتيري مو بس وقت التجهيز ..حتى دفتري اللي شفتوه انترس الحين ورفيجاتي قاعدين يصورون عليه لووول ..

بالنهاية خلي الاستخارة شعارج بالحياة وطريقج بالنجاة ..على طول وبكل شي لأن الاستخارة منارة ...



وبالتوفيق ...اتمنى افدتكم بالموضوع

 

[Pearla & Ribbons]

هاااي طبعا هذا الحجي من يومين لان مثل ماتعرفون الموقع علق امس

 

[omhagar]

ماشاء الله عليك حكيمة

 

[sغديرs]

مشكورره

 

[Pearla & Ribbons]

ام هاجر وغدير اشكر مروركم ماقصرتو نورتو الموضوع بنات نبي تجاربكم ومعلومات حلوة منكم شكلي اخر شي بألف كتيب عن تجهيزي ... خلاص شجعوني وان شاء اللة بسوي كتاب شرط معرض الكتاب الياي انزل وتلاقوني قاعدة اوقع على كل نسخة ولابسة طرحة لووول

 

[حكاية قلب ~]

الموضوع حلوو ويعطيج العافيه انا لحد الحين ما جهزت شي مهري 7000 وراح ازيد عليهم ياليت تعطينا التقسيمه المناسبه

لان جد احترت انا واختي شنو نقسم وشنو نخلي احس الفلوس شويه :’( الحمد لله على نعمة الله

بس ياليت بحكم تجرتج تقولين لنا التقسيمه المناسبه وخصوصا كل شي صار غاااااااااالي

 

[Pearla & Ribbons]

هلا حكاية قلب ياقلبي ان شاء الله بحاول احطلج تقسيمة مناسبة بس بصراحة مهرج ماشاء الله زين يعني كم كنتي تبين انا ورفيجاتي مهورنا كنا متفقين على 6 و7 مع اهل المعاريس لكن الصدمة واللي وصلها اربع واللي وصلها 5 الاف بس احمدي ربج اهم شي البركة بالزواج مومهم اللبس بس من عيوني بقولج شنو المهم اللي يضحك اان مهاتنا قبل احسن منا بالمهور ولا وقدروا يشترون الذهب بكل انواعه واحجامه مااشاء الله ,, واحنا بوقتنا زين الوحدة تلاقي زوج ,,انا بصراحة عن نفسي زد على مهري للاسف يمكن اربع الاف وشلت الذهب من حسبتي وهذا الشي اللي مابيكم تسوونه لنا تكملة بالموضوع واذا نسيت ذكريني

 

[Pearla & Ribbons]

شدعوة 80 مشاهدة ومافي ردود على راسي اللي ردو

 

[ياحبي له..!!]

تسلم ايدج ويعطيج العافيه حبيبتي
والله ريحتيني انااا كنت احااتي شسوي بالمهر وشنو المهم واول شي ادفعله
والله يعين بروحي اموت بالسوق وادوخ من ادخل مااخلي شي مااشتريه
والسالفه فيهاا ناااس وحموله وزوج يحكم من اول نظره ع كل شي لازم الكشخه
عشان بعد لايقول مااخذه المهر وطيرته ع الفاضي

 

[يـاكـرهـي $:]

الله يعطيج العافيه حبيبتي ,

 

[حناينq8]

يعطيج العافيه خوش موضوع

انا بكل المواضيع انصح العضوات - لا تشترين اغراض وجنج بتهاجرين لديره مافيها سوق
السوق موجود حتى عقب الزواج واغلب طلعاتكم مع الريل بتكون بالمولات

 

[ياسمينا12]

يعطيج العافيه ...

انا عن نفسي مهري 7
و 4 راح ع الذهب مع العلم ما شريت الا ( شبكه و سبحه ) بس

وشريت جم شغله وخلص مهري ؛)
وعرسي بعد العيد

والحين انا ع اعانتي الجامعيه و فلوس ابوي وامي

والليزر امي متكلفه فيه

واحاتي وايد لانه باجيلي وايد

وانا ادري السوق مايطير بس لازم نشتري شي كشخه مو اي شي انتي عروس و يديده فبيتهم
ولازم تثبتين نفسج
مو عشان مضغوطه ماديا تشترين اي شي
لان بعدين لو تقولين اشتري و جذي بيقولون شعدل ذوقها
بيحكمون من اول شي

يعني من اولها اثبتي نفسج

^ هذا رايي ولج كل احترامي
وي ريت تساعدينا شلون نتعدا ازمه التجهيز

 

[^لغموضي معاني^]

مااقصرررتي


عساج ع القوه

 

[انوثتي غير وياك]

يعطيييج العاااااااافيه

 

[baby qa6wa]

uppp

 

[دروب البنفسج]

يعطيج العاافيه ويزاج الله كل خير

 

[Pearla & Ribbons]

الله يعافيكم حاضرين للطيبين

 

[Pearla & Ribbons]

اب اااااااااب

 

[&'الذآهبـھ'&]

يعطيج العآفيه حبوبه ^_^
انزين بستلمج أنا بأسئلتي
انا ألحين عرسي شهر 9 طيب وبلشت بالبشره وليزر...إلخ بس ماجابو المهر
المهم بشنو ابدي عطور ومكياج ولا بدل ولا ساعات مادري احس متلخبطه حتى مادري جم ساعه وجنطه آخذ اتكلم عن الماركه بس مفكره اروح للخبر هناك الحميضي والدهام وماركات شكثر بمجمع واحد ^_^
ماعليه ازعجتج اسمحيلي ><

 

[ماركة انثى‘]

مشكورة