مساعدة بليز للي يعرفون بالمواقع الصينية

[أميرة الورد]

السلام عليكم بنات


بليز بنات محتاجة أعرف وين يبيعون ورد صناعي بس ذرب يكون بكميات كبيرة يعني مو 10 او 20 اكثر طبعا وسعره زين ..أو اذا وحده منكم تعرف موقع صيني تقدر تطلب لي منه هالشغلة راح أكون شاكرة لها ...




بليييييز بنات ناطرة ردودكم مو اطنشون أبيه ضروري ولكم دعوة مني بظهر الغيب ان شاء الله ​

 

[الدلوعه2008]

حبيبتي والله ما ادري عندج سووق الرمز فيه ورود واجد بالشويخ ان شاء الله فدتج

 

[عبق البنفسج]

عندي لج مكانين بتستانسين عليهم وبتلقين أنواع وأشكال من الورود المجففة ..
وهما يبيعون بسعر الجملة "هما الي يبيعون على محلات الورود"

المكان الأول:
حطي حديقة الشعب على ايدج اليمين والاشارة كمليها سيدة وعقب ماتكملينها بييلج محل ورد على يمينج بنفس العمارة في سرداب يبيع كلا فازات وورود مجففة

المكان الثاني:
سرداب كبير وفيه أنواع واشكال من أوراق تغليف الهدايا و الورود المجففة ..
شفتي اشارة المهلب .. اخذيها يمين وكملي سيدة بتيلج اشارة كمليها سيدة وكملي سيدة سيدة سيدة ولما اييلج التقاطع اخذيه يسار وعقب بتلقين عمارتين أو ثلاث يتشابهون على ايدج اليسار بوحدة من هالعمارات الي مدخلها صاير على شكل قــــــــوس بتلقين هالمحل واذا ضيعتي .. بتلقين محل فطاير على ايدج اليسار قوليله وين دنيا خزعل أو سرداب الهدايا وبيدليج عليه .. "هالمكان وايد وايد بينفعج لانه فيه أنواع واشكار من الورود"

 

[أميرة الورد]

الدلوعه ماقصرتي حبيبتي

عبق البنفسج حبيبتي ماقصرتي ربي ييسر لكم أموركم وكل ما تتمنون ان شاء الله

 

[أذكري الله]

آنا مرة شارية من ماكس اللي بمجمع البحر الورد عندهم اينن جنه صجي بس الأسعار مو رخيصة و لا غالية .

 

[أميرة الورد]

اذكري الله مشكورة حبيبتي على ردج بس انا ابي كمية يعني 200 او 300 حبه جذي

 

[Engainera]

مدام تبين وايد يمكن ما افيدج لان the oneعندهم ورد روووووعه كانه صجي بس اتوقع انه غالي مو حق 200 واذا ماني غلطانه في بلاند مارك !!
شوفي بياع الورد للي بحولي يقولون فيه كل شي

 

[Swan]

الورد الحلو عند the one ومحل البستان بالمرينا
وميداس واقل مستوى فيهم A2Z
واسعارهم تقريبا دينار ونص وانتي صاعده

 

[أميرة الورد]

مشكورين بنات بروح أشوف الاماكن اللي قلتوا عنها