النيه نروح NYC + florida (orlando) + california
مادري california تسوى نروح و وين نروح بالضبط
انا خاطري اتمشى بالتايم سكوير و اروووووح ديزني
اشرايج جم يوم نقعد بكل ولايه ؟؟
:gathering:
غلطااانة ماتروحين كااليفوورنيا !! بسويلج خطه وانتي عاد شوفي اللي يناسبج انا ماعرف حق جم يوم انتي رايحه بس خل نفرض 25 يوم اوكي ؟ .. خلي الرحلة اللي بتختارينها توصلج نيويورك قعدي فيها 5 ايام زيين بعدها فلوريدا 10 وكاليفورنيا 10
بالنسبة لنيويورك انصحج تسكنين في مانهاتن .. قريب منج التايم سكوير , انصحج بنيويورك تروحين غير التايم سكوير اليونيون سكوير ونااسه اهناك كله يسوون مظاهرات هههه لا بس جد المكان حلو للتمشيه وكله مطاعم وكافيهات وفيه حديقه بعد وفيه محلات اذكر محل ديزل .. وفيه مطعم ايطالي راح تدعيلي اذا كليتي منه اسمه باستا باستا روحيله اهو باليونيون سكوير .. المهم الاماكن الحلوة الثانيه بنيويورك اهي حديقه السنترال باارك روعه شوي عليها فيها بعد حديقه حيوانات ودي اليهال يتسانسون
المهم بنيويورك بعد شعننندج ؟؟ اييي تمثال الحرية لازم تروحونله وهم الامم المتحده والاهم من هذا الساكس الفيفث افينيو كله محلات ملايس وجواتي تكرمين وكافيهات والمكان حدة زحمه بس انا احب جذي
بالنسبة للمطاعم بنيويورك ترى لاتحاتين واايد ومتنوعه مثل فراديز وبلانت هوليوود وهارد روك كافي وفلافل مأمون ومطعم ميريام لذيذ وفيه مطعم عربي معروف اهناك بمدينه بروكلين حضرموت بس امانة ولا مرة رحتله هذيل اللي ذاكرتهم الحين ..ايي ونسيت بعد بالنسبة للسوق فيه مانهاتن مول (زوين) وبعد فيه شارع فيه محل ماسيز نسيت اسمه بس كبير وصاير بالزاوية انشالله البنات اهني يتذكرون
المهم نيويورك 5 ايام ترى زين واحس كافي نروح الحين حق فلوريدا
طبعا انتي قايله بتروحين ديزني لاند . ديزني اذا معاج يهال يبيلج تقريبا اسبوع يالله تشبعون ( وصدقيني ماراح تشبعون
) ماراح اتحجى وايد عن ديزني البنات اهني كفو ووفو.. المهم باقيلج تقريبا 3 ايام من تخلصون ديزني خليه لللتسوق والاماكن الثانيه ( معنه الداون تاون بديزني راح يفلسج ادري هههه) بس تطمشي بالمولات الثانيه ماكو مانع ..انا انصحج تروحين مركز كينيدي مال الفضاء ومنطقه اسمها clear water كلها شواطئ وبحرهم عجيب
بس نسيت انتي بتروحين عالشتا برد ومو وناسه حلاته صيف , الاسواق اهناك باورلاندو اللي اعرفه البرايم اوتلت طبعا هذا الاوتلت له فروع تقريبا بوايد ولايات , يم ديزني اهو تقريبا ربع ساعه جذي , هم بعد فيه سوق اسمه ميلينا حلووو موبعيد عن ديزني , وفيه بعد منطقة اسمها كيسيمي هم فيها اسواق رخيييصه
بالنسبة للمطاعم لايطوفج مطعم باهاما بريز bahama breeze روووعة رووعة وطبعا لاتنسين تشيز كيك فاكتووري
بنسبه حق كاليفورنيا .. غلطانه الف مرة اذا مارحتي اهناك , وكاليفورنيا كبيرة واغلب مناطقها حلوة بس الاهم انج تروحين لوس انجلس . الاماكن السياحيه اهناك معرووفه مدينه العاب سيكس فلاجس واليونيفيرسال سيتي ووك روووعه محلات وطااعم وسينمات ,, و باليونيفرسال ستوديوز وبتشوفين مسرح كوداك هالمكان اللي يسوون فيه البريميير لاكبر الافلام وممثلين يون وجذي والله وناسه وهناك فيه عروض للفلام يعيشوونج جوو جنج معااهم ..انا مرة حطيت بعض صوري هناك شيكي شوفيهم..
عندج بعد محل aamerican girl place اذا عندج بنووته صغيرونه رااح تنهبل عالمكان هههههه انا مرة شكبري ينيت
احطلج صور المكان انشالله مرة ثانيه .. المهم انكمل بعد وين تروحين بلوس انجلس .. عندج هوليوود ووك اوف فيم ممشى المشاهير اللي يكتبون اساميهم بالارض اهو صاير اب هوليود بولفارد وعادي اهناك تشوفين يصورون افلام مرات .. هم بعد عندج متحف الشمع اهناك مثل مال مدام توسو ومتحف ريبليز هذا يمكن يخوف اليهال ..اييييي تذكرت عندج محل ملابس داخليه رااقيه وحلوة اسمه فريدريك اوف هوليوود هذا هم بلوس انجلس فيه ديزني لاند كاليفورنيا بس مادري اذا عاد لج خلق ترووحين مرة ثانيه وانتي توج راادة من فلوريدا
المهم غير لوس انجلس عندج سانتا مونيكا , فيها الباسيفيك بارك هم مدينه ملاهي ونيسه لليهال وهم الليجو لاند هذي انصحج تروحينها احسن من الباسيفك احلى وداخلها فيها العاب للجميع ومطاعم ومحلات بعد تبيع اشياء سوفينير والعاب وملابس لليهال . وفيه رحله بحريه تروحون تشوفون الحواته ,, ( يعني جمع حوت )
والله ماا اخلص وانا اعددلج الاماكن حبيبتي انا بطلع الحين وانشالله لي ردة
