شلوونكم بناات
انا توني طحت على الموضوع و قريته كله وباجر عندي امتحان ادعولي
دانتيلا كفيتي ووفيتي بكل شي و انا قاعده اقرا قاعده اتذكر روحي و شصار فيني
انا سويت العمليه من 5 سنين اول ماكملت 18 سنه الحين انا 23
كان فكي من احسن ما يمكن و ما كنت اعاني الا من الاسنان البارزه و حطيت تقويم عند دكتور هندي بالاميري مااذكر شسمه و بعد ما شال التقويم بدا فكي العلوي يبرز لي برا انا حطيت التقويم ب 2 متوسط و و بأقل من سنه شاله
و لمن رحت ثانيه ثنوي اسناني رجعت برزت مو نفس قبل بس فرق عن اول ما شلت التقوييم و الفك وايد برز و زياده صار معاي ارتخاء بالفك و كان يعلق لي فتحت حلجي و اروح الطوارئ يسكرونه لأني مااعرف و دكتورة المستوصف هم ما تعرف واللثه وايد نزلت صلت وانا اتكلم تبين من كثر ما كانت نازله بس كان شكلي عاجبني وماكنت متايقه من شكل الفك يمكن اللثه كانت قاثتني لانها ماكانت جذي
كانت العيشه مأسااة الحمدلله على كل حال
و حطيت التقويم مرا ثانيه عند دكتور اشرف مختار لان كنت احتاج جراحه حق فكي العلوي و ظليت بالتقويم لين كملت 18 سنه قال عشان يكتمل نمو العظم خيرني بين الاميري والبابطين امي سألته شنو الاحسن قال البابطين عند د عماد النجاده طبعا ماكنت متوقعه شنو راح يصير فيني و كنت احسبها سهالات و داشه وانا مستانسه سوالي طبعا القياسات و صورني ورحت شرق مصور الدكتور طرشني له يصوروني و دكتور اشرف قال خشمك حيكبر حته صغيره فماا كنت متوقعه الي بيصير كللللش
طبعا العمليه طولت 6 ساعات قعدت بالعنايه 3 ايام و بالمستشفى ظليت زياده 10 ايام بالعنايه الحاله كانت كسيفه الله لا يوري احد بس اتذكر البربيش و كنت ابجي اقولهم تكرمون بروح الحمام و الهنديه السستر تقول عادي حاطين بربيش وانا اصيح ايام الله لا يرجعها انشالله ولا يوريها احد
العوار كاان مو صج مو طبيعي كنت كل يوم ابجي اقولهم ابي مسكن عطوني اي شي و لمن كانوا يقزوني ابرة المضاد كنت احس العروق بتنفجر ليما اسبوع يمكن يالله خف العوار بس ظل موجود مااذكر لي متى و السسترات لي يوني كانوا يقولون you have a moon face nowوانا احسب صرت حلوه خخخخخخخخ ما شفت ويهي الا قبل لا اطلع من المستشفى بيوم ولمن شفت ويهي قمت اضحك وا بجي بنفس الوقت لأن شكل الويه كان يخرع ويضحك ماكو معالم ويه شفتوا ويه تويتي جذي جنه ويهي بالونه وتافخينها و كل شي متفوخ معاها الحلج الخشم الخدود كل شي وارم \حمدلله ماكان في الوان ازرق واخضر بس كاان ويهي اصفر اصفر مثل الكركم عمري ما شفت ويهي بهالون قالوا هذا الدم الظاهر كان مطعن بس لااني ما شفت روحي الا بعد اسبوعين كنت متحبطه نفسيا خصوصا اني كنت بعدي ادرس كنت برابعه ثنوي الكورس الاول و متأزمه شلون برجع المدرسه بهالويه
عطوني اجازه شهرين بس انا داومت بعد شهر ونص لان امتحانات طبعا قبل لا اداوم عزمت رفيجاتي بيتنا عشان يشوفون ويهي و ما ينصدمون و يساندوني و مااكون بروحي وحمدلله ما قصروا حسسوني انه ويهي ما في شي زكنت اصدق روحي وانا معاهم بس كنت كلما اشوف المنظره اتيني البجيه لاني قاعده اشوف ويه مو ويهي كرهت المنظره و لحد الحين بعد خمس سنين ساعات اشوف المنظره و اقول هذا مو ويهي
اما كنت احس بشفايفي بس الحين عادي لا تحاتين دانتيلا بس احلى شي لي رحت بحف ماكنت احس بشي خخخخخخخ بس مااذكر خلال شكثر راح الخدار
انا ما سويتها بليزر انا كسروا فكي بمطرقه
حمدلله انتي احسن
بس الخشم حدث ولا حرج مفرووش و مخنفر و الويه مو عدل احس صار ويهي عدل و و صار خد اكبر من خد جنه عندي ضرس وارم و الحلج و اسناني وايد دخلهم لانهم صاروا ما يبينون الا اذا رفعت شفايفي لي فوق ولا ضحكت حيل قبل كنت لي ضحكت اسناني الي فوق تبين لها و كنت احب هالشي فيني كنت ارتز بكل الكاميرات بس عشان اضحك و اشوف صورتي و اسناني الحين لي ضحكت صار العكس اسناني الي تحت اهي تبين و هالشي مسببلي ازمه قمت اكره الكامريا و التصوير خصوصا انه يبين ويهي عوي لي صورت سيدا لازم اذا بصور على جنب و ناويه بس اتخرج واشتغل اطول اسناني الي فوق عشان يبينون مثل قبل شلون ماادري بس ناويه انشالله اكبرهم واطولهم
دكتور اشرف مو مارته صارلي فوق السنتين مالي خلق احس تعبت ولاني مو راضيه اصلا من نتيجة العمليه وساعات اقعد ابجي اقول انا ليش سويتها من الاساس و ساعات اشوف روحي مملوحه مافيني شي بس لو يرجع فيني الزمن مااسويها بس الحمدلله على كل حال \ودي اروح حق دكتور اشرف بس العيز ذابحني و الحين لمن دريت انه يسوونها بالليزر ودي اروحله اخليه يعدل ويهي العوي الي خربه
بس احس صعبه لاني تزوجت و عندي بنت و الي مريت مو شويه يمكن لو مو متزوجه جان من زمان رحت بس احس فشله اسويها و ريلي يشوفني بهالحاله وارمه و اخرع ومااقدر اسوي شي احس صعبه
و بنتي يمكن تخاف مني او ما تتقبل شكلي لانها صغيره بس صج صج حلمي انه ويهي يتعدل ز اسناني الي فوق تبين لان حيل حيل مأزمني و احسه وايد وشكله غلط
على كثر ماكنت كارهه لثتي الحين احلم انها ترد تبين مثل قبل بس انا المشكله بفكي انه كان يحتاج علاج ولا جان ما سويتها
وترا الخشم يسوونها بالحكومه بالبابطين و في اكثر من دكتور يسويها منهم عماد بس ماا مدحوه بالخشم جنه في دكتور اسمه محمد العجمي مو متأكده مادحينه بالبابطين لاني كنت بسويها بس حملت و تأجلت السالفه و الحين حدي خايفه و متردده اخاف هم ما يسوونه عدل
بناات نصيحه الي ماتحتاجها والله لا تسويها
دانتيلا حمدلله تبارك الرحمن الله تمم عليها و نجحت معاها وا عرف ناس سووها و هم نجحت معاهم بس انا من الناس الي ما سووها عدل و اعرف وحده كانت معاي بالمستشفى لمن سويت فكي اهي بنفس الوقت كانوا مسويين خشمها هم اهي كانت تتحلطم من ويهاا وانه صار عوي و دشت بخشم عماد وقالتله سو خشمي واهو الي سواا خشمهاا
يعني مع احتمال انج بتصيرين حلوه و بيتغير شكلج احتمال انه ويهج يتغير و للأسوأ و يصير الويه عوي مثل حالتي و مثل حالة الي كانت معاي لان اهو بيرفع خدين شتضمنين انه يرفعهم لج بنفس المستوى \الي بتسويها ختففكر عدل ليش بتسويها وعشان شنو و هل الهدف تجميلي ام علاجي اذا كان علاجي لاحول ولا قوة والله يسهل عليها انشالله اما اذا كان تجميلي وعشان شي بسيط لا تسوونها الا اذا كان الفك مشوه الانسانه بشكل كبير / مشوه مو اهي بس مو عاجبها
انشالله ما طولت عليكم
و دانتيلا بس بسألج
انتي بعدج تراجعين د اشرف ؟؟
عفيه اذا بعدج عنده سأليه في وحده كانت تراجع عندك ومسويه العمليه من 5 سنين وصارلها سنتين مو يايه عادي ؟؟ولا لازم اراجع ؟ لاني الحين ساعات احس بالبراغي ماادري شي عادي ولا لأ
