مسوية جراحة فك .....قولي تجربتج هني

[safia]

ماعطوني ولا شي لا ابره ولا عود ولا غيره
الاميري مو شي ماعجبتني معاملتهم بالمره
بعد العمليه على طول ماكانوا مسكرين حلجي كلش وكان الدكتور يمرني الساعه7 الصبح ويضغط فكي على بعض ويروح وكنت اقدر ادخل القفشه
بس الحين يوم ركبولي السيور صار صعبه حيل اكل

امس بغيت اشرق من الشوربة
وفوق هذا خشمي من الوايرات اللي كانوا حاطينهم فيه مسكر وماني قادره اتنفس عدل

بنات تقدرون تقولون اني تحسفت والله مو قصدي احطمكم بس صج صج ماتوقعت جذي حيل تعب

 

[dantella]

فديتج ماعليج الا العافيه ... اول الايام طبيعي يكون هذا رايج ميخالف انتي الحين باصعب مرحله طولي بالج لاتنسين انها ايام بس من خلصتي الجراحه يعني حتى شهر ماصارلج
لاتحكمين الحين ........ انتي الحين محتاج انج تصبرين بس وتتطمنين وتطولين بالج
هالتعب هذا حتى انا مريت فيه
تسكيره الخشم تروح بس استخدمي قطره التروفين
موجوده بالصيدليات راح تساعدج تتنفسين
حتى انا لمن طلعت ما عطوني ولا شي ومومطلوب ان يعطونج شي غير التوصيات
يعني انتي الي لازم الحين تنتبهين لنفسج
طولي بالج انتي سويتي الصعب الحين مرحله الشفاء هذي الكل مر فيها ومحتاجه صبر لاتكونين متسرعه ولاتتحسفين

 

[safia]

الله يعافيج دانتيلا
عطوني قطرة لخشمي ماحسيتها تنفع
تخيلي اليوم قعدة من النوم ثلاث مرات كله مختنقه
صوبي اليمين منتفخ اكثر من اليسار

متى ارد طبيعيه وشلون كنتي تاكلين لاني ميته جوع
انا عصلة خلقة والحين بختفي اذا بس شوربة وعصير
السيور ماتخليني اقدر ادخل القفشه مالت الحوس

 

[dantella]

ميخالف حبيبتي هذي غلطه دكتورج ..... اذكر قبل دكتور اشرف كان يوصلي المحتاجين للجراحه قبل الجراحه اذا كانو ضعاف ان يزيد وزنهم عالاقل 10 كيلو بس عشان لايتعبون
انتي بحالتج لاتستهينين بالعصاير والشوربات والشغلات الي تحسين فيها سكر وايد ميخالف كلها 4 اسابيع ... تالي عقب ال4 اسابيع بكون الاكل اسهل بس مو على طول يعني اشياء مهروسه ....... الحين لاتحاولين انج تغامرين الحين خلج كله شغلات سائله حيييييل وشفافه
ليييييييييش
لان الحين بما ان حلجج مسكر لو تاكلين شي ويترك اثار ماراح تقدرين تنظفينه
وان قعد لو شوي من اثارا الاكل بمكان الجروح راح يلتهب الجرح ويطلع لج خراج وانتي عارفه ان صعب تاخذين ادويه بالفتره الحاليه
لا مضاد ولا مسكن
فطولي بالج ماعليه
الورم طبيعي يكون شكله جذي
عقب سبوع بتحسينه فش
عقبها بتحسين لا رجع ورم
وجذي لمده 6شهور ماعليه تحملي السالفه موبسرعه
بالنسبه للقطره الالتروفين قويه بس بخيها بشكل تتاكدين انها دشت داخل خشمج وعقبها انسدحي خل تدش الماده عدل ومفعولها بساعدج
بوصيج على شي
فديتج لي دشيتي الحمام تكرمين لاتقفلين على روحج الباب ودوم بلغي احد بالبيت انج بالحمام
لاسمح الله دختي الا في احد معاج
بس اهم شي لاتستهيني بالعصاير والشوربات بهالفتره راها بتكون غذائج الوحييييييد مده هالشهر
عقبها بتشوفين كلشي يسرج وطولي بالج
اي سؤال انا موجوده والبنات مايقصرون

 

[dantella]

لاتحاولين الحين انج تبطلين حلجج ولاتحاولين تدخلين شي ابدا مومطلوب انج تحركين فكج الحين الجرح بعده طري
ماعليه تحملي
متى موعدج مع دكتور التقويم؟

 

[dantella]

وبقولج شي بس السموحه مابي الوع جبد الي يسمعون
لاتتضايقين اذا شفتي نفسج تسعبلين اسفه عالكلمه
ترا جدا طبيعي بسبب ان الشفه وارمه واصلا فاقده الاحساس فيها
لاتتضايقين ودوم خلي يمج فوطه
ونصيحه لايضيق خلقج اذا يوج ناس وزاروج وشافوج بهالحاله
ماعليه بيستغربون شكلج حاليا
بس تاكدي انك بتطلعين قمر بالاخير وقولي دانتلا قالت
كافي انج قويه واقدمتي على خطوه الجراحه
كافي انج كملتي درب التقويم كللللله وتحملتي هالتعب خلالالالالاص خلصتي كلشي الحين مابقا شي بس اهتمي بصحتج بهالفتره وخلاص
وتذكري النيو لوك اليديد فديتج لاتغلقين

 

[safia]

دانتيلا لا الدكتور اشرف ولا غيرة قالوا لي زيدي وزنج
بس كانوا يضحكون يقولون انتي ضعيفه بس ماقالوا لي زيدي وزنج
بعد عمليتج اول ماصحيتي كانوا مسكرين لج حلج ولا بعدين سكروه؟

انا اللي حط لي السيور دكتور احمد الرفاعي وكان يقول لي دخلي الفرشه بين السيور ونظفي من داخل وقال لي عادي اكلي عيش مهروس ولبن وحاولت لكن الاكل مايدش

عندي موعد يوم الاثنين ان شاءالله بشوف يمكن طريقتي غير عنج ويشيلون لي السيور لان الدكتور محمد المصري كان يقول لي حركي حلج ومصي بالمصاص

وبالنسبة لشفتي احس فيها بس اللي تحت من يمين ماحس فيه ووقف التسعبل شوي << سوري على التعبير

وانا حاليا بغرفتي ومنعت اي احد يزورني بس اختي تقول وجهج صار اقصر لكن ماعندي جراة اشوف شكلي اخاف مسكرة كل مناظر غرفتي

 

[dantella]

الظاهر طريقه جراحتج غير احس ان انتي افضل
انا من طلعت من الجراحه وحلجي مسكر مو بس بسيور لالالالا بقطعه بلاستيكه وابر غارزينها باللثه فتحوها عقب شهر عالاقل انتي افضل تقدرين تاكلين انا لا كان صعب كان اكلي عن طريق السرنجات وبالهوز ادخل الاكل
اي فعلا هالجراحه تقصر الويه بشكل حلو وتالي راح تبرز لج خدود هذا طبعا لو كانو رافعين فكج الفوقي بس نصييييحه لاتحاولين تحكمين على شكلج حتى من بعد مرور شهرين بكون حده تو الناس
افضل شي انج منعتي الزياره لان مو الكل يتحمل هالنوع من النظرات
بس لاتسكرين على روحج جذي عادي فرفشي لاتغلقين كلها فتره وبتصيرين قمر بس طولي بالج
ولاتحاتين هالسعابيل عادي كلنا مرينا فيها
عاد انا عكسج من اول يوم صحين وانا مهستره ابي منظره شالوني السسترات ودوني تكرمين الحمام للمنظره جان تيني الضحكه وضحكو لي السسترات شلون لي خلق
بس نفسيا كنت مرتاحه لان فعلا كنت راغبه بهالجراحه بقوه
وانتي بعد متى ماصرتي احسن صدقيني بتحمدين ربج ان سهلج امورج وسويتيها وقمتي بالسلامه

 

[safia]

شكلهم غيروا طريقة الجراحه
يعني تتوقعين ان بموعدي الجاي الدكتور يشيل لي السيور؟
لاني بالمره مو قادره اكل حده صعب
انا مسوية رفع لفكي اللي فوق وفكي اللي تحت مجدمينه
بس ماشاءالله عليج شلون عندج جرأة تشوفين نفسج

انا شايلة هم شكلي راح اتقبله ولا لا

 

[dantella]

حبيبي مو بهالسرع يشيلون السيور يبيلها مده راح تتشلع ويردون يحطون لج ويعلونج شلون تركبينها
ولد عمي مسويها من 3 شهور عند دكتور محمد المصري وهم نفس طريقتج الغريب ان اهو بسرعه فش الورم عنده اعتقد اهو مارفعوله الفك العلوي
لان مالاحظت ان ويها تغير مثل ماتغير ويهي
خلج صبوره لاتستعيلين ولاتتوقعين ان الشغله بسرعه بتخلص
اهم شي نفسيتج خلج دوم كول وفرش
اظن وصوج انك تبتسمين لان الابتسام مفيد لان يحرك العظلات
ويساعد ان الاحساس يرجع
والروح المعنويه المرتفعه تساعد ان العلاج والشفاء يصير اسرع
بطلي على يوتيوب وحطي مقاطع ومسرحيات تضحك وضحكي ههههههه جد
وسئلي الدكتور بموعدج الياي عن التمارين الي المفروض تسوينها حق شفايفج
لان في تمارين معينه بالشفايف

 

[^^ROSE^^]

روز rose

سالتلج الدكتور عن العمليه اللي تبينها قالي 1000 دينار
و قال انها زينه و اكيد احسن من السيليكون

مشكوووووورة بعد قلبي ونستيني انا كنت احاتي انها اكثر لان اسعاره غاليه و لان الصبيح يسوي السيليكون ب 700 فقلت اكيد هالعمليه 1500 و فوق دام فيها لعب بالعظم
واي ابي اسويها اليوم قبل باجر احس شكلي بيتغير 180 درجة

بس سؤال 1000 شامل المستشفى ولا بس حقه هو 1000؟ بعرف المستشفى جم تكلف عشان اعمل حسابي وباذن الله بعطلة الربيع اسويها

 

[safia]

لا والله ماعلموني على ولا شي
واللي مضيق خلقي اول ماقعد من النوم عيوني تختفي من كثر مايكون وجهي متفوخ
واللي مضيق خلقي زيادة ان اللي اشربة الحين موزين استمر عليه فترة اخاف صحتي تضعف
كله سوائل والتنظيف صعب بشكل مو طبيعي

والله ماتخيلت نفسي اكون متحطمة جذي
قبل كنت اقول راح ينربط حلجي ست اسابيع وكنت اشوفه عادي والحين امس مسكرين لي حلجي واحس خلاص مليييييت
ميته جوع الشوربة ماتشبع
والله صرت ارحم اللي يسوون رجيم صج تعذيب

 

[dantella]

سالفه الويه الي لي نمت يصير متفخ الله يسلمج هذا لازم تنامين على مخده شوي مرتفعه عالاقل او شهر عشان السوائل لاتتجمع وراح تلاحظين ان الورم هم راح يخف اسرع
غريب ان ماعلموج على هالسوالف وانتي بالمستشفى
ماعليه هذي الحكومه مافي اهتمام
وهم لي رحتي عند اشرف قوليله عن شنو لازم تحتاطين
صج ان الكتور اشرف كلامه قليل وساعات يبط الجبد لكن خلي احد من اهلج يكلمه ويخلي يقولج عن شنو لازم تاخذين بالج
انا حاسه فيج ميخالف الي انتي في حاليا صعب بس كل يوم يروح وينتهي راح تحسين ان الي عقبه افضل
صدقيني اول الايام حدها بطيئه اليوم يمر جنه شهر بس ماعليه كل هذا بروح وماراح تتذكرينه
لاتكثرين قعده بغرفتج
شيلي عمرج وقعدي مع الاهل ميخالف لاتنحرجين خل يطالعون بعد هذي الجراحه
طالعي شوي تلفزيون تالي اقري جرايد تالي حوسي بالنت
بيقزر عليج الوقت
لي رحتي موعدج قولي للدكتور ان موقادره تاكلين شوفي شقولج
شوفي ماقولج ان صحتج ماراح تتاثر ... وطبيعي ان دمج بكون نازل بسبب ان ممكن تكونين فقدتي دم بالجراحه
وهم بسبب قله الاكل
ووعدي نفسج ان متى مابلشتي تاكلين انج تعوضين جسمج اخذي كورس فيتامينات وسوي تحاليل واهتمي باكل ترا كلللللللله يتعوض
انا عقب سبوعين من جراحتي الا اطيحلج على ذيك الثعلبه الي صارت براسي شكبرها وحت منها الشعر
ان شاء الله مايصير معاج جذي بس ان صار لاتحاتين خلج متوقعه اي شي

 

[safia]

اخاف انزل تحت يطب علينا احد فجاه وفوق هذا عندنا اطفال اخاف على مشاعرهم لووووول
واخوي يكلمني من ورى الباب مايبي يشوفني وكاسرين خاطري الخدامات انا دايم بيني وبينهم طايحه الميانه الحين اذا دشوا علي ما يطالعوني كلش ولا يكلموني

بغرفتي حاطه تلفزيون وانترنت بس هم ملل

متى رديتي تاكلين عادي؟

 

[dantella]

انتي تخيلي احنا عندنا قطوه بالبيت
لمن سويت الجراحه
حتى القطوه كانت تخاف مني
لي مريت صوبها توخر مع ان مربيتها
فلاتلومينهم والخدم ترا حساسين
عموما الحركه لج زينه حتى وانتي بالغرفه حركي ريولج لاتضلين فتره طويله قاعده عشان تساعدين السوائل انها تمشي وتتحرك
الاكل عندي صار تدريجي موبسرعه
يمكن عقب ال4 شهور بديت اكل طبيعي
بس لي يومك المكسرات ماغامر واكلها

 

[شكنوومه]

بنات انا ودي اسوي عملية ارجاع الفك العلوي لموضعه الطبيعي
بس مادري منو احسن دكتور جراحه في وحده قالت لي عن احمد الدنف منو فيكم جربت هالعمليه خل تفيدني
وشاكره لكم

 

[دانه وصلت]

صافيه يا قلبي شكلج عنــــــــــــــــونه



انتي اشكره ما سالتي عن العمليه و لا بعد العمليه .. فا ما الومج يوم انصدمتي
انا دانتيلا مهدتني عدل و المواقع الاجنبيه حتى فيديو و صور شفت

فا متوقعه انه هالشي بالمره مو سهل !!!!!!!!!!!!!

اهم شي اهم شي اهم شي

ان العمليه انجحت و ماكو مضاعفات و لله الحمد

هذا اهــــــــــــــــــــــــــــــــــــم شي عندي

والباجي يعدي و بنتحمله ان شاء الله
.. سكتي حدي خايفه و ودي أأجل عمليتي :0bee2e8d89:

احاتيها وايـــــــــــــــــــــــــد .. حت اهلي يحاتون

روز ROSE
اي 1000 اهو بس قوليله عني " دانه " راح يذكر هالسالفه

اتوقع 200 للمستشفى .. لأنه ما يبيلها عنايه مركزه يمكن نفس اليوم تطلعين !! ما ادري

انا قلتله ما احب السيليكون !!!! قالي و لا انا احبه اصلا هالعمليه لعبتي !! هههههههه

 

[dantella]

هلا فيج شكنومه
اعتقد بدايتها لازم تشوفين دكتور تقويم واهو يقولج شنو تحتاجين
وانصحج بدكتور عماد النجاده لان شخصيا انا جربته شغله ممتاز بس الله يعين الناس على نفسيته

 

[دانه وصلت]

اي والله دانتيلا صاجه

لوووول

عاد انا ما يمشي عندي نفسيه

الله يعين اللي بالحكومه صج صج

 

[dantella]

صافيه يا قلبي شكلج عنــــــــــــــــونه



انتي اشكره ما سالتي عن العمليه و لا بعد العمليه .. فا ما الومج يوم انصدمتي
انا دانتيلا مهدتني عدل و المواقع الاجنبيه حتى فيديو و صور شفت

فا متوقعه انه هالشي بالمره مو سهل !!!!!!!!!!!!!

اهم شي اهم شي اهم شي

ان العمليه انجحت و ماكو مضاعفات و لله الحمد

هذا اهــــــــــــــــــــــــــــــــــــم شي عندي

والباجي يعدي و بنتحمله ان شاء الله
.. سكتي حدي خايفه و ودي أأجل عمليتي :0bee2e8d89:

احاتيها وايـــــــــــــــــــــــــد .. حت اهلي يحاتون

روز rose
اي 1000 اهو بس قوليله عني " دانه " راح يذكر هالسالفه

اتوقع 200 للمستشفى .. لأنه ما يبيلها عنايه مركزه يمكن نفس اليوم تطلعين !! ما ادري

انا قلتله ما احب السيليكون !!!! قالي و لا انا احبه اصلا هالعمليه لعبتي !! هههههههه

فديتج لاتأجلين كلللللللللللش دشي بقلب قوي افتكي منها وخلصي والباجي كله سهالات ويروح
بس وكلي امرج لله وسويها بس اذا انتي ضعيفه تكفين متني لو 5 كيلو
عشان لاتتعبين تالي