مشكلة بنتي :(

[قلبي الصغير]

السلام عليكم حبيباتي...
بدش فالموضوع على طول لانه واايد مضايقني..:0bee2e8d89:
بنتي فالكجي 1 بس كلش ما تحب الدراسه...تعبت معاها جيتها بكل الطرق ولا في فايده..من افتح الكتاب كله تبجي وخلص اليوم على كلمه او حرف بسسسسس
ماني عارفه شنو اسوي..يعني انا شفت عيال خواتي واخواني يقعدون يتهربون من الدراسه بس مع شويت رص يمشون ويقعدون يدرسون عاادي بس بنتي مستحيلل كله تبي تلعب وبس...انا خايفه من المراحل الي عقب اخاف من المستقبل هذي اذا تسوي فيني الحين جذي باجر شنو راح تسوي...اخاف ما تفلح فالدراسه وتظل كسلانه فالدراسه ماتحاول تكتب الحروف لا كله تسوي لي شخابيط ومن اقولها يالله خلاص دراسه وين هذيك الدموع وين البجي!!! تضحك وتسولف وتلعب عاادي وما في احسن منها...شنو اسوي يا خواتي معاها انا تعبت والله حاسه انه القولون عندي ضارب توب من المحاتاه حرمتها من الالعاب واللعب زعلت منها وماحاجيتها لين ما تصير شاطره تحب الدراسه كلمتها بهدؤ صرخت عليها نفس النتيجه :0bee2e8d89:

بليييز خبروني شنو اسوي معاها واذا في احد كان عياله جذي والحين عاادي يعني اهي مرحله وتعدي ولا تستمر؟
المدرسه واايد اوكي وهي تحبها يعني المشكله مب من المدرسه والمدرسه التيجر هم ممتازه وطيوبه...
سااااااااااااعدوني طقت جبدي وتعبت

 

[فلونة احلى وردة]

في طريقة تدريس عن طريق اللعب
تعلميها
يعني جنج تلعبينها مو تدرسينها
بحثي عن هالطريقة وتعلميها ولعبيها وياها
وحرام تعقدينها جذي باسلوبج
سامحيني الظاهر طريقتج بالتدريس مو مشوقة

 

[قلبي الصغير]

في طريقة تدريس عن طريق اللعب
تعلميها
يعني جنج تلعبينها مو تدرسينها
بحثي عن هالطريقة وتعلميها ولعبيها وياها
وحرام تعقدينها جذي باسلوبج
سامحيني الظاهر طريقتج بالتدريس مو مشوقة

صدقيني اختي اني سويت لها هاي الطريقه وما اقولج انها ما فادت بس دقايق وتمل ما تبي
كل اساليب التعليم سويتها لها حتى الكومبيوتر فتحت لها مواقع تعليميه عشان تتعلم وتتسلى في نفس الوقت بس هم ماكوا فايده
يعني خبريني شنو اسوي اكثر من جذيه

 

[Om eL-3a9aGeeL]

اممممم

جربي ييبيلها ديفيديات تعليمية اللي تكون على ببايات وعلى شكل قصة

حاولي تحببينها فيهم مثلا قعدي شوفهم معاها واكلوا نفيش !!

وإذا لقيتي دروس مرتبطة بمنهجهم شي حلو تخلينها تشوفه على انه بباي وبنفس الوقت راح تتعلم منه

وبعدين فجي معاها الدفتر وربطي اللي بالمنهج مع اللي شافته بالفيديو

والله يهديها انشالله
ولا تخافين يمكن لما تكبر تتغير توها صغيرة وما تعرف شنو يعني شهادة =)

 

[السنعة2]

اذا بنتج عمر صغير يعني مواليد ديسمبر يناير فبراير مارس
صبري عليها شوي ودرسيها باللعب والضحك وراح تفرق عليج وايد

 

[انشالله]

صاجه السنعة انا اعرف مدرسة حق اولى ابتدائي تقول اذا حسيت البنت مو مستوعبة معاي
وقلبها على اللعب اشوف بالملف مالها اي مواليد وتطلع من الصغار بالصف فتكون لها معامله خاصة
وطبعا اليهال فروق فرديه شئ يتسطر حق الدراسه ويخلص بسرعة وبعضهم يعلون القلب واهم شئ وسعي صدرج
وحببيها بالدراسه قد ماتقدرين علشان ماتتعبين عقب والله يوفق الجميع

 

[حلم الطفولة]

ان شالله يارب يكون مجرد وقت ويعدي ... عندي وحده من عيالي نفس المشكله كانت ماتحل ..
وتبجي حيل ...بص وصلت أولى ابتدائي .. خفت وماحسيت مدرستها مساعديني حق تسوي الواجب ..
واشوفها كله علامات كامله ... وهي صغيره بصفها ..
كانت متضايقه من المدرسه وكان وااااايد واجبات !! داخت ودخت معاها ..
والحين تعدلت وعقبال بنتج تتعدل وترتاح وتريحج..
( بس تبين الصج .. غيرت المدرسه .. نقلتها .. ماكانت مرتاحه هناك )

 

[أم عبووووود]

وعليكم السلام ورحمة الله وبركاته

انا من رايي تشترين لها العاب من بو اميه وقولي لها اذا جاوبتي او حليتي معاي بدون بجي راح اعطيج هديه وانتي فعلا عطيها في البداية كل واجب هديه لكن بعدين حاولي تخففين وان شالله تتعدل ترى هي فترة وراح تعدي ان شالله بس بنتج توها صغيرة فتدور اللعب

الله يهديها ويحفظها لج يارب

 

[بدوره 22]

اذا بنتج عمر صغير يعني مواليد ديسمبر يناير فبراير مارس
صبري عليها شوي ودرسيها باللعب والضحك وراح تفرق عليج وايد

صاجه .. انا من مواليد فبراير والله لي الحين اتذكر اني بالصف ما كنت استوعب المعلوومات بسرعه مثل باجي البنات

شوي شوي عليها .. يمكن انتي وايد تظغطين عليها ... انا مو قصدي كاسلوب بالتدريس .. لأ

اقصد انج وايد تقولين لها خل ندرس

 

[غلاي غير]

اكيد بنتج فيها خوف

غيري المدرسه

 

[قلبي الصغير]

مشكوورات حبيباتي على الردود الي ريحت بالي.. هي فعلا اصغرهم فالصف انا ما ادري ليش ما فكرت من هاي الناحيه؟؟؟
بمشي وياها عالراحات لانها فديتها اصغرهم وانشاءالله مثل ما قالت لي الاخت كل ما حلت عطيتها هديه من قوم 100 عجبتني الفكره
مشكوووووووووووووورات