مشكلتي البلوك 

[~Mazuna~]

السلام عليكم ورحمه الله وبركاته ،،.

قوه بنات شلونكم شخباركم ؟!!

انا مشكلتي شوي تضحك بس حدي متضايقه

زوجي مسافر وانا اكلمه بالواتساب وانا كنت شوي قرقه مو شوي الصراحه حدي قرقه
جان يعطيني بلوك بالواتساب وصارله 4 ايام معطيني بلوك واهوا مسافر مع ربعه
وعقب شهر يرد ان شالله ،، وانا قايلتله من قبل طلبتك لا تحطلي بلوك قالي حاضر
بس يمكن نسى بس الزبده حطلي بلوك ،، واعتقد ماراح يبطله الا لمن يرد الكويت 
السؤال الحين لمن يشيل البلوك اثقل عليه وعاادي والا اعاتبه والا شسوي بليز المتزوجات ابي رايكم
يهمني لانهم حاسين فيني 

 

[كايبه]

عاتبية بس مو بصراخ وهواشة بهدوء تعالى بدلع لأنة اذا تهااااوشتي وياااااه راح تكبر السالفة ع الفاضي بس نصيحة تعالى بهدوء

 

[ام كوثر2007]

حبيبتي ترا الريال طفارته المرا القرقه وانتي الله يهديج بعد معترفه انج قرقه يعني اكيد بيصكج بلوك ومالج حق تعاتبينه سوي نفسج عادي وطاف وما صار شي لانج لو بطلتي الموضووع مو حلوه يقولج انا مسافر ويا ربعي وانتي تقرقين علي راسي .


بجذى راح تنجرحين اكثر

 

[كربون امها]

والله موقفج صعب حيل مدري شقولج راي بيني انج زعلانه عشان يحس
على دمه ولا سافر خلاص يعني من لقى اصحابه نسى احبابه

 

[قاهره عذالي]

لو مكانج ازعل صج
واروح لاهلي
رايح مع ربعه يستانس وانتي طقاق مايسال فيج
قرقه يقولج دوختيني انزعجت بس مو يصكج بلوك
تصررف منه غير محترم

 

[ام كوثر2007]

لو مكانج ازعل صج
واروح لاهلي
رايح مع ربعه يستانس وانتي طقاق مايسال فيج
قرقه يقولج دوختيني انزعجت بس مو يصكج بلوك
تصررف منه غير محترم

لا صراحه خوش حل .. عجبني .. يعني بتروح لهلها زعلانه شبتقولهم شنو سبب الزعل ؟


صكني بلوك عشاني هذره ؟؟؟؟؟؟؟؟


صراحه الواحد لمن ينصح يا ينصح بشي يعمر البيوت يا انه يسكت ..


شنو تروح بيت اهلها عشان عطاها بلوك ؟ وين قاعدين ؟؟؟؟؟؟؟؟؟

شنو نوع تفكيركم انتوا ؟
​

 

[ابي اصير ممثلة]

لا تاحجينه طول الوقت ثقلي يعني على الاقل كل ثلاث ايام وممكن تغيرين الوتسب اب بمسج واحد وخلاص

 

[sosowaty]

اي والله من صجج تروح البيت عشان بلوك بصراحه صدمتيني

و يا صاحبة الموضوع معليش سامحيني ع الكلمة بقولج ياها الحين

سوري بس ما تحسين انج شويه لازقه بريلج و حاذفه روحج عليه ؟؟

يعني :

لزقه = من ناحية القرقه

و حاذفه روحج عليه و ترجي = تكفا طلبتك

و حبيبتي الريال ما يحب وحدة تتلزق فيه و تترجا و تذل نفسها عشانه

لزقه + ذل + حب بشكل مو طبيعي = ينرفز الريال و يكش منا

الريال يحب الوحدة ثقيله

لا تحطينه كل اهتمامج زوجج

و دايما قولي اللهم لا تجعل زوجي اكبر همي

و سامحيني ع صراحتي بس حبيت افيدج

 

[الصعيريه]

عآتبيـــه بس بهدوووء
ضروري يعررف انه هالشي ضايقج
عشان لايتكرر
وإنتي حآولي قد مآتقدرين تغيرين من طبعــج
عشان لا يمل
ويلقى البلوك الحل السهل


والله يهديكم لبعض ويووفقكم

 

[فلافل وبطاط]

انتي شلون عرفتي ان معطيج بلوك !!!!
وامنبهته بعد ههههههه يعني في سوابق !!!!

حبيبتي الريال مايحب المراه القرقه لا ومسافر مع ربعه
اهم بالديره واذا طلع مع واحد من ربعه زين يرد واذا رد
من نبرته اتحسين ترا خير الكلام ماقل ودل .. واذا تقدرين
لا تدقين الا للشديد القوي ....

الله يرده لج بالسلامه يارب وانا اقول خلي عنج الواتساب
دقي عليه او دزي مسج قوليله بس حبيت اتطمن وخلي العتاب
لي رد الديره ... وبهدوء ...

 

[ام كداوي]

انا لو مكانك اطنش ولو يدق تلفون علي مارد وخليه يحاتي ولما يعاتبني يقولي ليش ماتردين اقوله ببرود شفتك عطيتني بلوك علواتساب قلت اخباري ماتهمك عادي والله ينقر

 

[sosowaty]

لا بليز. لا دقين عليه نهائيا

عطيه فجه خليه يشتاق يقول وينها غريبه ما دقت اليوم و لا دزت مسج

خليه اهو الي يسال مو انتي

 

[د. فاطمة]

الله يهديكم يارب

 

[Beyoncee]

اخذي امورج بالهداوه كلميه بهدوء

 

[لوفيه]

سالفتج تضحك والله حبيبتي

لاتقرقين زهقتيه خليه يشتاق والله مايمديه الا انتي طالعه بويهه

عسى الله يسخركم لبعض

 

[!الجادل الصعب!]

اتوقع انحرج من المسجات تطلع عالشاشه كل شوي مع ربعه ..!
اثقلي عليه .. ولو اني اشوف حرآم ما يسوى بلوك مره وحده الا اذا انتي
عاد قررررقه حييل ..!
بس 4 ايام قويه .. مالج الا تعاتبينه .. السالفه مو شوي عشان تطنشينها وموو قوويه عشان تزعلين زعله
كبيره .!.

 

[جوري 2007]

موحلوة الريال يعطي مرته بلوك ،، عاتبيه بهدوء

 

[انثى عاشقة]

لو مكانج اطنشششش واثقل وبس ​

 

[love u 4ever]

أنا لو أدز مسج وريلي يتأخر بالرد علي .. والله أتضايق وأنقهر وتنبط جبدي ولي اتصل أو رد علي ما رد !

بس الحمدلله إني مو قرقه نفس حالتج !

مادري بس مو حلوة يطنشج ولا يسأل عنج من 4 ايام !

الحل : إنتي بعد طنشي ولا تسألين شغلي نفسج .. ولي اتصل ردي عليه عادي بس خلج ثقيله وعاتبيه ...

 

[Al-RoRo77]

وعليكم السلام ورحمة الله وبركاته
اذا انتي تدرين انج قرقه ع قولتج خلاص انسي الموضوع وحاولي تغيرين هالطبع لان مو حلو ويغث والريال مسافر يغير جو مايبي حنه!
سوري حبيبتي اذا ردي ماعجبج بس قاع انصحج كأخت وانتي شكلج ع نياتج لا تحنين عليه ولا تقرقين وايد غيري هالطبع فيج
وحببيه ان يقعد معاج ويسمع سوالفج لا تسولفين وايد
دقي عليه الحين سلمي وبينيله انج ولهانه عليه وسكريه لا اطولين !
ولا جنه شي صار لو انتي مو معترفه انج تتكلمين وايد جان قلتلتج من حقج تعاتبينه
الله يخليكم لبعض يارب