مشكلتي مع بنتي ام 9 سنين

[Augie]

السلام عليكم..
عندي بنت عمرها 9 سنين ومشكلتي معاها بس بأيام المدارس تينني تطلعني من طوري,
ورقة الواجب كل يوم يا قاطتها بالزباله ولا خاشتها عني و تقولي ما عندي واجبات والصبح لا نظفت دارها القاها.
ووقت حل الواجبات شي ثاني انا ما اعرف امسك اعصابي ولا صارخت عليها يا تراددني تخليني ازعل عليها واخليها بروحها .. او يا تتبجج و تجرح نفسها, يتقطع قلبي عليها لا شفتها بهالحاله و بالحالتين لازم اقعد بداري و الدموع تنهمر منها
نفسيتي حيل تتعب ايام المدارس اختي تقولي مريضه وديها طبيب نفسي لانها شافتها لا عصبت ولا زعلت شتسوي بعمرها (للأمانه زعلت على اختي يوم قالت عنها جذيه) بس مادري ما ودي احد غريب يتدخل و يكلمها بهالموضوع ودي انا اللي احل معاها هالمشكله مادري شلون !

تراها خوش بنيه شحلاتها ايام العطل اطلع معاها و نتعشى بره و تسولف علي ماشاءالله عليها راكده و سوالفها حلوه و ايام المدارس وحده ثانيه !!

قولولي عندكم بنات جذيه ولا بس بنتي !
وشلون تتعاملون معاهم انا فكرت ادخلها معهد يحلون لها واجباتها عقب المدرسه عشان اريح نفسي شوي جذيه اوكي ولا عندكم حل غيره ؟


اسفه اذا هذرت وايد بس على قولتهم قلبي متروسه..​

 

[ام الدرر]

حبوبة سالفة العناد والاهمال بحل الواجبات عادية وكلنا نعاني منها
بس انها تجرح نفسها اذا هاوشتيها هذا اللي لازم ماتسكتين عنه ومايحلها الا اخصائي
لاتقولين ابي احل المشكلة بروحي
انتي جربتي ياعمري وتطورت الحالة الى ضرر
عسى الله يهديها ويصلح حالها
​

 

[ام الدرر]

حبوبة
شوفي بالمواضيع المثبته
احمد البرماوي اخصائي تعديل السلوك​

 

[M&Ms]

يمكن انتي مدلعتها وايد لا تكلمينها بصراخ حاولي تمسكين اعصابج واستخدمي معاها العقاب من غير صراخ وعصبية لان راح تكتسب هالشي منج ولا تعودينها انها اذا حلت الواجب ان لازم تكافئينها خلج شديدة وياها من غير اعصاب والله يهديها انشالله

 

[Augie]

أم الدرر..
مشكوره و ان شاءالله ألحين بقرى المواضيع اللي نصحتيني فيها

ام اند امز..
صح لازم احاول اغير من نفسي و اطول بالي معاها
ان شاءالله بحاول : )

 

[om MaRyooM]

كلام ام الدرر عدل

وبنتج اسم الله عليها كبيرة
يعني وايد غريبة عليها هالتصرفات @@

 

[رووح ابووها]

غريبه شلون تجرح نفسها !!
ترا بنتج كبيره مو صغيره !
الله يهديها حاولي تحلين هالمشكله باسرع وقت

 

[ماريي]

حبيبتى ماقلتيلنا بنتك اخبارها ايه مع القراءة والكتابة يعنى المشكله بس معاكى في البيت ولا في المدرسة بعد ياريت عشان نعرف بالضبط المشكلة وين

 

[جنى]

بس بالواجبات تسوي جذي؟ يعني لو تقرى الدرس معاج ما تسوي شي؟

 

[Augie]

لا اسم الله عليها شاطره بالمدرسه ودرجاتها عاليه بس المدرسات يشكون منها انها تراددهم اذا كلموها,
و اليوم حاولت اطبق نصايحكم خذيت لي غفوه العصر عقب سويت لي جاي و جابلتها وانا (مروئه) على قولتهم,
الحمدالله كانت شحلاتها اليوم معاي ما نرفزتني يمكن العله مني لاني اصارخ عليها مرات..

بس ان شاءالله بالنسبه للعصبيه اللي فيها بحاول معاها انا بنفسي و بعد بسأل عن اخصائي ..
لأن جد مو طبيعي اللي تسويه بعمرها لا عصبت مستحيل انها تبجي بس عادي تسوي شي بعمرها فهالشي حيل مخوفني عليها.

والله يعطيكم العافيه خواتي ماقصرتوا والله : ))

 

[توتاتوتا]

الله يحفظها اعرفي منها ليش ماتحب الدراسه و تساهلي معها المرحله هذي مب مصيريه في الدراسه
و يمكن تجرح نفسها دلع او شايفة الحركه بالتلفزيون مو معناته ان عندها مشكله نفسيه بس لازم تخلص منها علشان ما تضر نفسها بالخطأ و هي ماتدري

 

[hneen2]

والله انا بنتي عمرها ٧ اسم الله عليها بثانيه ابتدائي جنج تتكلمين عنها عاله قلبي والمصحف

احنا مانقعد تكتب وتراجع لاااااااا مطاقق وبجي ونواح واورقها العمل كله قاطتهم ومقلمتها كله ماتدري وينها مضيعتها بالمدرسه وفوق هذا قبل النوم بدقايق تقول الابله طالبه مني مثلا اغراض او الوان اذا قلنا لها باجر الحين مافي وقت تعالي شوفي الافلام والبجي ولما تكتب الواجب يوميا بجي ليششش؟؟؟؟ تقول ليش خطي موحلو معني خطها مقبول عادي للي بسنها بس اهي حنااااانه وتحب النجره الله يهديها والله قلبي رايح منها بس شسوي لكن سالفه بنتج تجرح نفسها لاااا تسكتين لا سمح الله تتطور ويها السالفه



والله يهديها ويعدي بنيتي وبنات المسلمين يارب


والله والله ان ايام المدارس تتعب نفسيتي

 

[hooryah q8]

كلام اختج مايزعل و الي يروح دكتور نفسي او اخصائي مو عيب
بالعكس هذا دليل انج مثقفه و تواكبين التطور الي يصير معانا
الدكتور النفسي راح يساعدج بالموضوع و يحسن من ممشكلت بنتج ماراح يضرها! مايزعل الموضوع
و انتي ماعندج خبرة و خلفيه عن هالمشاكل شلون بتحلينها ابروحج؟؟ ضروري اتشوفين دكتور او اخصائي
اذا سكتي عن بنتج باجر يطور هالسلوك معاها و انتي الي راح تتأذين معاها