مشكلتي مو مقتنعه بخطيبي وهذي الاسباب

[noura ooo]

دامكم فيها اتركيه يشوف حياته مع وحده تسره

وانتي بعد الله يوفقك مع اللي ترضين فيه وراضي فيك

انا تزوجت واحد ماكنت راضيه فيه مافيه اي توافق بيننا وانتهت بالانفصال
انفصلي بدري احسن من انك تحتارين شلون تنفصلين عنه

 

[غلآوي .~]

حبيبتي انا نفس مشكلتج بالضبط بس خطيبي اصغر بشوي ملجت وماكنت مرتاحه كلش وكلمته وحسيت في اختلاف بينا بشكل كبير .. وكذا مرهـ افكر بالطلاق واحنا بس املجين بعدين نحل مشاكلنا .. وانا كنت احن على اهلي قلت مابيه وابي الطلاق ..

بس يوم فكرت قلت الرجال ما يعيبه شي اهم شي صلاته وسمعته الطيبه وبعد العرس بيتغير كل شي من ناحيه فكره وعقليته ..

وفكرت ان كلام الناس ما يرحم لو اتطلق اول شي بظلم الرجال معاي وثانيا بظلم روحي لاني وافقت وعقبها قلت ابي الطلاق .. " وعسى ان تكرهوا شيئآ وهو خير لكم "



حبيبتي فكري بعقلج .. يمكن انتي كارهه معاملته وشخصيته او شكله .. بس ماتدرين يمكن تشوفين كل المواصفات الحلوه فيه بغض النظر عن الاشياء الثانيه ..

سآلفه الطلاااق لا تفكرين فيه : )



وعسى الله يوفقج : )

 

[جوك احلى جو]

مثل ماقالو الخوات كلمي الوالده او اي شخص تحسينه قريب ومتفهم لج

بس ماتدرين وين الخيره يمكن يطلع انسب ريال لج بعد الزواج الاوضاع تكون غير

 

[نهى الأحمد]

يمه حبيبتي الزواج هذا قرارج مو من كلام البنات تقررين تستمرين وياه والا لاء

يمكن يشورون عليج اتركيه وخليه دامج عالبر وتندمين باجراذا حسيتي انج ظلمتيه وظلمتي نفسج وبنفس الوقت مااتقدرين تضمنين نصيبج بالثاني اذا بيسعدج والا بيقهرج
وتختف تستمرين وحياتج تنقلب فوق تحت اذا تميتي تهوجسين بهالشعور انج ماتحبينه ولافي توافق بينكم

انا بعطيج رااايي والهون ابرك مايكون حبيبتي
تكلمين امج واهلج القربين لج بهالسالفه يمكن الريال ماطلع لج كل مشاعره الحين يمكن خايف منج لاينصدم فيج يمكن ويمكن تراااا الريااييل بفترة الخطوبه يحسبون الف حساب حق شريكة حياتهم خصوصا اللي زواجهم يكون تقليدي
عالعموم انتي الحين فترة ملجه ومثل ماقلت لج تسألين اهلج ويمديج تسألين عنه اكثر وتعرفين عنه كل شي يحوس بقلبج والقرار الاول والاخير لج يمه
بس هم ارد واقول ترا وايدييييين صادفتهم بنفس حالتج والله العظيييييييييم بداية الملجه كانت بالنسبه لهم عزااا كثر مايبجون ويشكون بس كل شي تغير عقب العرس وحياتهم الحين من اورع مايكون لاتتسرعين يمه اخذى وقتج بالتفكير العقلاني ماعليج من المظاهر شوفي الريال من داااخله غووصي فيه وتعرفين معدنه ياما ريايييل جمال وملح مكتكت وعقولهم فاضيه طنك مافيها رزانه ولاغيره علي حريمهم والعكس صحيح سألي اول شي عن صلاته وين يصلي اي مسجد يروح له وشنهي اهتماماته وشنو طموحه وكل شي تقدرين تعرفينه بهالفتره وعسا ربي يسخركم حق بعض ويتمم عليكم علي خير يارب

صح لسانج :eh_s(15):

كلامج عين العقل يا الغاليه

وانا اقول استخيري ياقلبي مرة ومرتين

وان شاءالله خير

 

[ســتارز]

لا تتسرعين يمكن ترددج بسبب الخوف اللي يصير لبعض البنات بعد الملجة

 

[مفسرة الاحلام]

استخيري مره ومرتين وعشر

وشاوري امك وناس الى تثقين فيهم والله يكتب لك الخيره

 

[الحـالمه]

الف شكر لكم خواتي وعلي كلامكم اللي من قلب ..

الموضوع قديم ...

ربي ماكتب وهذي قسمتي ونصيبي

الحمد لله ع كل حال ,,

شكرا لكل وحده شاركتني رأيها

 

[جامعيه طموحه]

" وعسى ان تكرهوا شيئآ وهو خير لكم "

 

[ياهم لدي رب]

الرسول خير البريه قال من رضيتم خلقه ودينه فزوجوه
اذا فيه هلامران توكلي على الله وادعيه بالتوفيق

اما موضوع توافق الافكار هذي قشور بعد الزواج تتوافقون اذا فيه حب بس راح تكون في مشاكل بداية الزواج ومو شرط على حسب شخصية الزوجة وحنكتها

 

[رضية الوالدين]

الحالمة .. قوليلي كيف سويتي أتجرأتي على الفسخ انا ماني مرتاحة له .. كنت حاطة أمل بعد العقد ارتاح لكن للأسف مافي ذرة فرح ولا أحس اني عروس ولا حتى انشراح أحس بطفش و انه ما يناسبني اهتماماته غير عني و مااقدر عليها .. نفسي افسخ خايفة مايجيني إلا أبو عيال ولا مع أهله هذا غير خايفة من ردة فعل ابوي
ولا لو علي بتحمل حتى نظرة الناس مؤمنة ربي قادر يجبلي احسن منه لكن المشكلة محقدر أتحمل ردة فعل ابوي و بيصير قاسي معي جدا لين يجي عريس ثاني افتك

 

[غـايـه]

صلي الاستخاره وإذا ما أرتحتي خلاص
لا تسكتين وبعدين تندمين
وخيره إن شاء الله

 

[بنت شيخ]

حبيبتي دامج ما تبينه ايش توافقين من البدايه
لحد يقص عليح ويقولج انتي للحين عالبر لا
الوحده اللي تنفصل بوقت الملجه حوالينها 1000 علامة استفهام ويمكن ما تلقين نصيبج مره ثانيه
البنت المنفصله اصعب من المطلقه
ادعي ربج واستغفري وادعي لزوجج ان يكون زوج صالح لج والرجال بيتغير مع الايام
والرجال على ما تعودينه وتربينه

 

[رضية الوالدين]

انا على يقين اللي مكتوب لها نصيب يصيبها .. لأحد يقول الفاسخة مثل المطلقة فيه فرررق توها ببيت أهلها خصوصا لو الاهل محافظين

و نظرة المجتمع آلان توعت و تغيرررت عن أول



المهم هو بالنصيب والله و كلام الناس طز فيه أهم شي راحة الوحدة فينا

 

[جوك احلى جو]

الزواج مو لعبه والقرار قرارج احنا مانعرف تفاصيل شخصياتكم وشعوركم ... الله يكتب اللي فيه الخير ان شاءالله

 

[أم عموره]

انا رأيي لو مو مقتنعة وحاسه انك مو متقبلته ممكن بعد الإستخارة تكلمي أهلك لأن اأصعب لو تزوجتي وتكوني مو حابته

 

[جنون هاجري]

الموضوع قديم شكلها تزوجت وجا عليها عيال