مطلقة .. شنو استفدتي من تجربتج و شنو اللي بتتجنبينه بزواجج الثاني ؟؟

[قاهره عذالي]

اختي قاهرة عذالي وايد احتريت عليج يارب الله يعوضج دعوة من قلبي والله وممكن تسمحيلي ادعي عليه الله لا يوفقه وانشالله بيشوف يوم اسود مثل ويهه مفكر بنت الناس لعبة روحي بيت اهلج الله لا يهنيه ولا يريحه قولي امين

والله حسبي الله والنعم الوكيل فيه
كنت مرات اساله باول زواجي لما يسوي مواقف تقهر وتخرق القلب حرق
اقوله ليش
هو بينك وبين اهلي ثار عشان تسوي جذي فيني وانا توني عروس
يقول لا وينكر انه حذف علي بدون سبب قلاص وانه سب اهلي وسبني اول الايام
عقب لاني اسكت وما اعلم ولا اسوي مشكله خلاص لسانه اخذ على كلمة العن ابوج ليل نهار يسمعني هالكلمه
مع انه والله وقتها ما كنت اشكي لابوي وابوي والله مو مدح فيه بس عشان خاطري ما يغثه والا حاس انه الوضع مو مريح لانه كله امي طالعه مع السايق توديني وتجيبني وكل ما يدور امي يقولون رايحه مع قاهره

والله ابوي والله من تزوجته ليمه اخذت ورقتي عمره ما غثه بكلمه والا كان يقول انا باط جبدي ودي اسمعه كم كلمه بالعظم اقول لا يا يبه ولخاطري يسكت

يعني ابوي هالشايب اللي مدة زواجي ما دخلته بيني وبين زوجي الا لما نويت الطلاق وعمري ماشكيت له عن زوجي

يسبه

يعني انسان بالعربي طليقي مايستحي ومو كفو طيب

يعني شنو هالجريمه اللي سواها ابوي

انه قدرك يا هالشاوي واعتبرك انسان وعطاك بنته ووصاك علي وقال امانه برقبتك بنتي

والله يا اختي اسرار انا ما تركته من قليل

والله ما اقول الا حسبي الله ونعم الوكيل عليه وعلى كل واحد من صوبه اذاني

جيتهم بنيه طيبه وهم يعترفون اني طيبه

بس نفس ما قلت الطيب ماينفع

 

[Canon~]

قاهره

الله يعوضك بالزوج الصالح اللي يعرف قدرك


وكل مطلقه يارب


والله يوفقك صاحبة الموضوع بزواجك يااارب

 

[قصْر شآمخ~]

يا عمري

الله يزوج كل مطلقة ويعوضها خييير ويرزقها أحسن رجال بالدنيا ..

وجزاكم الله خير على عرض تجاربكم .. وشنو استفدتوا منها ..

وهالشي جداً مهم لكل وحدة مقبلة على الزواج عشان تتفادى الأخطاء

ربي يوفقكم ويسعدكم

 

[قاهره عذالي]

قاهره

الله يعوضك بالزوج الصالح اللي يعرف قدرك


وكل مطلقه يارب


والله يوفقك صاحبة الموضوع بزواجك يااارب

امين يارب

جزاج الله خير على الدعوه الحلوه :eh_s(7):

 

[كلي_أمل]

بعد قلبي كلامكم روعه

و صج التجربة الثانية احسها انجح من الأولى

 

[yam_yam]

الله يعينج و يعوضج خير

و الله ينتقم من كل واحد اخذ وحده و استغلها
حسبي الله و نعم الوكيل

 

[yam_yam]

اهم شي استفدته
انه ما اطلع اي شي يخصني بره بيتي لو شنوو
و اني استقر بحياتي و ما اقعد مع اهله لو شنوو
ما اقدم تنازلات بدون مقابل
اخذ اللي يناسبني و يستاهلني ما اخذ عاهة و يتمنن بعد لوووووووول

 

[توتة UAE]

ربي يتمم لج ع خير استانست لج وايد حبيبتي 3>

قاهرة عذالي حسبي الله ونعم الوكيل عليه ما عليج
لا تفكرين ولا تزعلين أكثر لأنه مرده بيعيش العذاب . .
الله بيراويه صدقيني هالأشكال نهايتها جذي كلللللهم
يا رب أذقه حسبانا يعيش مرارة عيشها معه آااااااامين

وايد قهرني مادري كيف طلع هالدعاء ههههههههههه

بنات كل وحده تطلقت وانظلمت الله بيجازيها الخير
وبيعوضها بالأحسن . . ربي ما يهمل 3> 3>

واللي تقول من تطلقت مب طايعة تتزوج يختي
استانسي وسوي عرس والبسي فستان وعيشي
حياتج وايبي يهال . . شو يفيدج رفضج للزواج وصياحج
كل ما حد طرا سالفة الزواج . . هالحالة عالجيها
واسعدي نفسج حبيبتي

 

[وش الدنيا بدونك]

صاحبة الموضوع مشكوره وربي يوفقج

قاهره الله يعوضج خير يارب

ذكرتيني بمعاناتي حسبي الله ونعم الوكيل على كل ظالم

وتطلقت وارتحت والله يعوضني باحسن منه

 

[مشتاقه لعيونه ~]

الله يعوضج ويوفقج حياتي ..

 

[كركميه]

موضووووع روعه بروعة كاتبته وخواتي المشاركات
جميل جدا ان الانسان يستفيد من تجاربه السابقه فلولا تجاربنا وخبراتنا ما كنا انضج واكبر
الله يوفقكم ويسعدكم ويرزقكم باللي يقدركم ويسعدكم ويصونكم

واهم الاشياء اللي استفدتها بحياتي
الثقه بالنفس فلما الوحده تكون واثقه محد يقدر يكسرهاا ابد ،
ثانيا العقل والحكمه ،لازم نتصرف بعقلانيه ونوازن الامور ولا نعطي الاشياء اكبر من حجمها ولا الناس اكثر
من ما تستاهل
ثالثا اقوم بكامل واجباتي على اتم وجه ووفق ما امرني ربي لكن اطالب بكاامل حقوقي واللي تتنازل عن شي مع الوقت راح تتنازل عن اشياء
رابعا ،دينج صدقيني ان كل شي بيد الله واللي قلبه متعلق بربه الله بيعطيه اجمل من ما يتوقع ويتصور
فما وصيكم بالصدقه وقيام الليل آه ياقيام الليل فيه العجايب والمستحيلات ،الدعاء حققلي اشياء من المستحيل اوصلها لكن بفضل ربي وصلت
واخيرا اهتموا بثقافتكم واقروا راح تعرفون اشياء تفيدكم بحياتكم وتعاملكم وعلاقاتكم وراح توقنون ان الحياه اعظم واكبر من زوج وحموله
فوسعي مداركج وكثري اهتماماتج ولا تعتبرين الزوج كل حياتج بل مجرد اضافه جميله لحياتج باذن الله


الله يوفقنا واياكم لما يحب ويرضى

 

[نوفآ]

قاهره عذالي
شلوون ترضين يلعن ابوج وانتي سااكته! !!!!!!!
والله لوو اني امووت عليه ويموت علي ويلعن ابوي ما اسكت له واعلم ابوي واخواني
ابوي خط احمر من طلعت عالدنيا يربيني ويصرف علي واخرتها اجازيه بانه ينسب وانا اسكت! !

ويا بنات ترا العمر.ماله شغغل امهاتنا تزوجوا اصغر منا وفاهمات
كل شي اخذوه بالعقل والمنطق ولا احد يتنازل عن حقوقه

صاحبةة الموضوع الله يهنيج بالثاني بس بالاول انتي غلطانه في اشياء بديهي ما ترضين فيها شنو تلبس قميصج وتدخل وانتي مو.موجوودده! !
وين قااعدين سووق هوو عشان تدش جذي؟ ؟؟
اسمحيلي اشوف الغلط منج مو من عمررج، العمر ماله شغغل

وموفقات جممييعا

 

[قاهره عذالي]

قاهره عذالي
شلوون ترضين يلعن ابوج وانتي سااكته! !!!!!!!
والله لوو اني امووت عليه ويموت علي ويلعن ابوي ما اسكت له واعلم ابوي واخواني
ابوي خط احمر من طلعت عالدنيا يربيني ويصرف علي واخرتها اجازيه بانه ينسب وانا اسكت! !

ويا بنات ترا العمر.ماله شغغل امهاتنا تزوجوا اصغر منا وفاهمات
كل شي اخذوه بالعقل والمنطق ولا احد يتنازل عن حقوقه

صاحبةة الموضوع الله يهنيج بالثاني بس بالاول انتي غلطانه في اشياء بديهي ما ترضين فيها شنو تلبس قميصج وتدخل وانتي مو.موجوودده! !
وين قااعدين سووق هوو عشان تدش جذي؟ ؟؟
اسمحيلي اشوف الغلط منج مو من عمررج، العمر ماله شغغل

وموفقات جممييعا

سكت له سنه وشهر

كنت وقتها تو متزوجته واخاف من الطلاق وهو واجد كان يتحجج يدور سالفه عشان يهددني بالطلاق لانه كشفت له بتصرفاتي اني ابي المركب معاه يمشي وبس

وهو لقى نقطة ضعفي اني ما ابي الطلاق فاستبد فيني

رحت زعلانه 3 شهور

وعقب رداني ورديت له بشروط وقدام ابوي ولما رديت وقال العن ابوج علمت ابوي وخليته يحاجيه ابوي
وقلت لابوي ترا يلعنك من اول الزواج كل ما جا يبي يقهرني هالحقير اللي مايستحي قال العن ابوج
مع اني بالمقابل كنت اشوف مغثه مرات من اهله بس انا محترمه ومتربيه ما اغلط على اهله وهو ابوي عمره ما غثه بكلمه واول فترة زواجي عمري مارحت لابوي واشتكيت

يوم كلمه ابوي قال هي تحدني هي تعصبني وانا ان لعنت استغفر وما اقصد

مع انه والله جذي مني والطريق يقول العن ابوج
انا شنو عندي من سالفه اغثه فيها هو كل ما انغث من نفسه قالي العن ابوج
ورد ابوي حاجاه قال المفروض لو اني بالقبر تحشمني اني نسيبك
وقام عقبها جان يرتعد ليش تعلمين ابوج ليش تسوين مشكله
قلت والله انا فوق السنه وانا ساكته يوم سفرتني عمره بالسوق اقولك بتفرج على الاكسسوارات ماني شاريه شي تجرني بالسوق وتقول العن ابوج لما تقعد معصب ومزاجك عكر قلت العن ابوج ع الصاعده والنازله

وانا خلاص بعد ما اتحمل وانا رديت لك على شروط واشوف ما نفذت شي منهم الاحترام

اذا انا اهلك ما اسبهم وانت شايف مغثتهم لي فليش اهلي اللي بحالهم وعمري ما شكيت لهم عليك تسبهم


بس هم غلط

المفروض من اول زواجي لما قال العن ابوج اعلم ابوي واتخذ موقف عشان يعرف من اولها اني مو سهله

 

[مررررايم]

انا انتظر الطلاق من زوجي لاني صبرت علية سنين موحاسه اني متزوجه لو قاعده في بيت اهلي بدون زواج احسن من هالعيشه لا طلعات لا سفرات حتى شهر عسل ماسفرني ع الاقل سمعني الكلام الحلو مافيه ....انا ماقصرت معه اشتريت له سياره مالت علي واخذت قروض من البنك علشان البيت وخلاني ابيع من ذهبي علشان اشتري مكيفات البيت وان طلبت منه نسافر قبل كان يتحجج ماعنده فلوس مع ان راتبه قوي مع الوقت صار يقول لي انتي ماتستاهلين انا مو مقصره معه اتكشخ واسوي اللي يطلبه مني ومهتمه جدا برشاقتي ...يكفي انه مايريحني في الفراش ومع هذا صابره ....لما تجيني الدوره يلعن فيني ينقل اخبار البيت لاهله واهله يتدخلون في بيتي ومشاكلنا ..جلست معه اتفاهم على الطلاق وتكلمت معه بهدوء ان احنا مانصلح لبعض ومثل مادخلنا بالمعروف نترك بعض بالمعروف عصب وضربني ....وانا مصره على الطلاق مد يده مره اكيد بيمدها اكثر ماعنده شخصيه اهله هم اللي يمشون

 

[قاهره عذالي]

مرايم غلط غلط

تشترين له سياره وهو معاشه قوي وتاخذين قروض عشانه

حنا اللي تطلقنا وطفرنا غلطتنا شلنا عن الرجال مسؤولياته

الرجل هو المسؤول عن اغراض البيت وهو المسؤول يجيب لنفسه سياره

وليش تاخذين قروض لخاطره


هو ماله حق بمعاشج ولا حلالج
ترا الحياة مو بس سفر

خلي السفر يولي

اهم شي المعامله والتقدير والاحترام والكرامه

الوحده شتبي غير رجال يكون نفسه حلوه معاها ويحسسها انها مراه وانسان

ترا حنا الحريم مو صعبات الكلام الحلو يغرنا وعاطفيات

بس هالرجال بخيلين حتى بعواطفهم وكلامهم الطيب

 

[زوووز77]

انا طليقي ولد عمي بعد مايحتاج نسال عنه رجال مطوع ومثقف والكل يمدحه ويحبه وابوي كان يغليه

اول سنه ماحملت كان محترم معاي وكريم واسلوبه زين صج ماكان مدلعني ولاهاب فيني هبه المعاريس وامه كانت تدخل وماكان يرد عليها لكن مافي سبب يدعيني اني اتطلق منه مع ان ثنينا نحب بعض

وغثوني الا اتعالج واحمل تعالجت وحملت بتوم ومن حملت ويطلع الوجهه الاخر له ولامه امه قامت تمادى بالغلط والتدخلات وحاكرتني حكر
ما اروح لسوق عشان اكلف عليه
ماسير عل اهلي
مااكمل درسي مع اني حاطته شرط بالعقد وبالخطبه قالو حنا نساعدها ع الدراسه
طبعا مو ضوع الدراسه عشان اقعد بالبيت اطبخلها
وطبعا هو مع امه

وعاد لمل ولدت زاد بلاهم كنا متفقين يجيبلي خدامه لانهم توم قال مافي مشكله واول ماولدت قال بيعي ذهبج وجيبي خدامه
والدراسه تتركينها ولا اخذ عيالج منج وتسنين عند اهلي اللي هم بمنطقه ثانيه عشان ابوي يصرف عليكم وهو يضل بالبيت
هذي السوالف صارتلي بنفاسي ومنهامارديت له ومن شهر تقريبا طلقني والحمدلله خير
حسبالهم راح يذلوني بالعيال واروح معاهم وين مايبون

 

[قاهره عذالي]

عسى الله يعوضج زوزو

واضح من كلام طليقج معاج

انه هالكلام مو كلام رجال

الظاهر امه كانت تقوله لا تخليها تدرس
لا تكلف عليك وتدفع
خلها تبيع ذهبها وتجيب خدامه
احكرها

وهذي الحين خلت ولدها يطلق وخربت بيتج

حسبي الله ونعم الوكيل

شردت هالعيال والعيال الحين على جبدها هي تربيهم

خنشوف تحملهم او لا

 

[M!$_ $heme]

انا نفسج بالضبط

تزوجت عمري 15 سنه طبعا نصيب مو غصب من اهلي ولا شي وكنت بالثانويه وكان مايعطيني مصروف واذا عطاني 80

الزوجيه بس ولما سقت سياره كنت ادفع 40 من مصروفي عالاقساط وهو 40 تخيلي يبقالي من مصروفي 40 بس حق البانزين

طول الشهر والصالون مره وحده بالشهر وطلعاتي انا وولدي والخدامه طبعا احتياجاتي من ملابس وغيره انسي الموضوع حتى لما

اطلع مع اهلي والله كنت ما اطلب شي بحجة اني شبعانه واذا عطاني وكان كريم 3 دنانيير والله يشهد علي

وغير انه كان بالمطعم تبين طلبي اشياءات رئيسيه مافي مقبلات وسلطات وعصير تبين بيبسي واذا شتهيت كيكه او شي اقوله زين

انا ازيدك والله العظيم هذا كان حالي وطبعا امي وابوي بعد عمري كل ما ازورهم ابوي يطل فبوكي ولما ارجع البيت القا 20 او 50

وفوق جذي مايرضى اخذ من اهلي فلوس وخواتي بعد عمري يدفعولي بالطلعه

والثلاجه مايشتري عصير وكاكاو جذي اشياءات يقول موظروري تين انتي اشتري واذا ماعندي فلوس يقول اخصمهم من

مصروفج الشهر الياي هههههههههه(خدامه مو زوجه)

واهله على كثر ما سويتلهم مابين بعينهم ودايما انا الشينه

وامه تفتح اشقه وانا نايمه بالدار وتسوي مكنسه وخواته يدشون ياخذون هدوم عادي نفس ماقلتي وبدون استاذان

اي واذا راح مطاعم مع ربعه اقوله مو تقول ماعندك توديني يقول اي انا مع ربعي ادفع بس حقي

لكن اذا معاج ادفع حق 2 وغير الطق الي يطقني جدام اهلي لما نتهاوش وبحكم صغر سني كنت

اخاف من الطلاق وموعارفه اتصرف

والحمدلله الله فكني منه

والحين ربي عوضني بواحد يسوى الدنيا ومافيها الحمدلله والشكر لله :eh_s(7)::eh_s(7):

 

[bride2011]

الحمدلله الي عوضج مس شيمي الحياة مع البخيل موت بطئ الي مايبي يدفع زياده ليه يتزوج الي مايبي يتحمل مسئوليه ليه يورط بنات الناس معاه المشكله بعضهم له جوه الخاص وعايش لنفسه ويبي يدخل زوجه وعيال يدون ما يتاثر هالجو الخاص حقه طيب شلون الزوجه تبي العيال يبون امط يمكن عندها غيرك من عيال وزوج بس زوجتك من لها مو معقوله بتكون عاله على اهلها عيل ليه مزوجينها تلقيح بس اعذروني على الكلام بس جد انقهرت هالنوعيات ترفع ضغطي وتلقينه المصيبه شايف نفسه احسن واحد ومستحقر المره المسكينه
والام الي ماتتذكر ولدها الا لما يتزوج ماقول غير حسبي الله على كل ام تدمر حياة بيت ولدها
تموتين لما تزوجينه تعالي تمونين لما يتطلق
انا اقول الوحده ماتتزوج الاا بمؤخر يكسر الظهر بعض هالنوعيات تبي هالشي
قاهره عذالي مالومج على موقفج شي طبيعي الوحده بالبدايه تبي تعدل الريال وتصبر وماتدخل اهلها بالعكس هذا كبر عقل منج
بس اذا استمر هو بعقله الصغير مشكلته عاد اهو يتحمل النتيجه اذا الولد عوج والاهل عوجان قولوا لي شلون تغيره وشلون توقفه عند حده المره
الله يعوضنا خير
انا تعلمت السؤال السؤال قبل الزواج ترى السالفه مو اخذي اي واحد وانتي بطيبج تكسبينه وتغيرينه ابدا ابدا مفهوم التغيير عندنا غلط على الاقل اخذي شخص طبيعي وتشاركي معاه بالحياة

 

[Zinab BH]

الله يرزقكم بالزوج الصالح اللي يحبكم و يخاف الله فيكم
قاهرة عاد انتي كوم ثاني طليقج صدقيني مريض نفسي حسبي الله و نعمة الوكيل فيه
صاحبة الموضوع الله يعوضج بالزوج الثاني و تتعلمين من اغلاطج و يحنن قلبه عليج و يسخره لج يارب

اهم شي المراة ماتصرف على الريال ولا تنزل روحها له ولا تسمح له يتمادى بالغلط اما سالفة الحمولة كوم ثاني لازم من البداية ماتسمح لهم بالتددخل في حياتهم الخاصة