مطلق وعنده ولدين .. تعالو عطونا رايكم " للمتفتحات ذهنيا فقط"

[Little_Queen]

هالقصة صايره اليوم حق اقرب رفيجاتي و مو عارفه بشنو انصحها ..

و هالبنت عندها مشروع صغير و تشارك بمعارض احيانا

و من شهر 5 و انا اشوفها عايشه بسعاده والله ما تنوصف يا بنات ماشالله
ويهها تغير .. ضعفت و احلوت .. قامت تلبس تكشخ .. حتى دراستها تحسنت و قريداتها الكورس اللي طاف ماشالله تبارك الرحمن كانت ممتازه .. و تخرجت من الجامعه و اهي رافعه معدلها... عقبال كل الجامعيات

انا حسيت ان البنت تحب ..
لكن ما حبيت احرجها و نطرت ان اهي تيي تقولي بنفسها .. و مابي اقولها و اغصبها تتحجى .. ابيها اذا بغت تقول .. تتكلم من نفسها

من يومين دقت علي و اهي منهاره و تبجي ... و اعترفتلي بكل شي

اعترفتلي انها كانت مشاركه بمعرض و تعرفت على واحد بالبدايه كان كلامهم بخصوص البزنس و المشروع مالها و ان عنده اهتمام بمشروعها و اهو هم عنده مشروع ممكن يندمج معاها و يكبرون مشاريعهم مع بعض ... المهم تقولي كلامنا مع بعض كان رسمي و بزنس و كنت اكلمه و اتفاهم وياه جدام اهلي

و بعدين اعترفلها ان معجب فيها و حاب يتقدملها قريب ..

و مع الايام حبته و حبها ..

تقولي علاقتنا كانت بيركفت .. كل شي باحترام .. و كل شي حلو .. و كان يكلمها عن الزواج طول الوقت و شنو شروطج و شنو رغباتج
و متفقين على كل شي ...

المهم ...
ليش تبجين يا بنت الناس ؟؟

صارله يومين ما يرد علي !! من رديت من السفر و اهو كللللللللش ما يرد على التليفون ولا عالوتس أب ولا عالمسجات !! و قاعد يقرا الوتس أب بس ما يرد !

هديتها و قلتلها يمكن و يمكن و يمكن ... طلعت مليون عذر و مليون سبب .. تليفونه خربان .. تعبان .. اهله فيهم شي .. ليما شوي ارتاحت و هدت

قبل شوي دقت علي .. و قالتلي انه دق ...

قلتلها حلو !

قالتلي اعترفلي بشي .. وانا مو عارفه شسوي

اعترفلي انه متزوج وعنده ولدين !!!!!!!!!!!!!!!!!!!!!!!!!

و بين مرته مشاكل من شهر 1 الي طاف !!!
و ان بينهم قضايا طلاق .. و اهو يبي يطلقها للضرر .. و موكل محامي ..

و انه لما بدا يحبها حاول يقولها و يلمح لها اكثر من مره ..

رفيجتي احيانا ما فهمت التلميحات عبالها يتغشمر ..

و قالتله انزين ليش ما قلتلي بصراحه
قالي كل مره اكون بقولج القى سبب يمنعني .. يا عندج امتحانات .. يا مستانسه وايد مابي اخرب وناستج .. و عقبها سافرتي مع اهلج ومابغيت اكدرج بالسفره ! قلت خل ترد من السفر و اختفي من حياتها و اهي بتمل و بيطيب خاطرها مني و بتفل .. ! لكن لقيتج قاعده تتعذبين و ماهان علي اسوي فيج اكثر ..
و هذا الشي الي كان مانعني من اني ايي اخطبج .. وادري كنتي كل يوم تسألين نفسج هالسؤال و مستحيه تسأليني ياه ..


تقولي رفيجتي .. انا ما هسترت ولا صرخت .. سبحان من نزل علي عقل و هدوء ..

تقول قمت اكلمه بهدوء .. و ان انا متفهمه الموضوع .. و كلنا نغلط و كلنا بحياتنا اسرار .. وانت ماكان ضروري تقولي ببدايه علاقتنا شنو حياتك الشخصيه لان سوالفنا كانت شغل و جذي .. وبعدين لقيت نفسك تحبني ! و لقيتني عندي امتحانات و تخرج و سفر !!


المهم اهو الحين عطاها مهله تفكر..
اذا قررت انها تبيه و ماعندها مانع ، تجس نبض اهلها اذا يرضون .. و تبلغه .. و رح يطلق مرته حالا و يدفعلها كل اللي تبيه و يصكر ملف المحاكم و القضايا الي بينهم ! و اييي يخطبها


و اذا قررت انها لأ .. رح يحترم قرارها و يبتعد بهدوء و ما يلومها ..


البنت عمرها 24 و ماتزوجت من قبل ..

و الولد لما قالتلي مواصفاته .. بصراحه والله مافيه شي ينعاب ..
وظيفته زينه
و عايلته معروفه و محترمه و كل اهله متعلمين و وظايف
و عايلة امه بعد معروفه و الناس يتمنون يناسبون هالعايله
و البنت كانت حيل مرتاحه وياه طول علاقتهم مثل ما وصفتلي .. و كل شي فيه بالظبط نفسها .. حتى ظروفه العائليه و اصله و مذهبه ..


بس اهي محتاره و ما تدري شتسوي
اهي تحبه
و اهو يحبها

منو فيكم تزوجت واحد مطلق و عنده عيال ؟
و شنو تنصحونا ..

الي بتقولي لازم تفل عشان اهو خش عليها .. مع احترامي لرايج .. اهي سامحته على هالشي و متفهمه هالموضوع .. و مو زعلانه عشان خش عليها .. البنت مو زعلانه من شي كلش ! اهي بس محتاره بقرارها !!

و الشي الثاني للخوات الي بيقولون شلون تكلمه و شلون تحب و شلون تعرف ... هم مع احترامي و حبي و تقديري لكم ... مو هذي مشكلة البنت و كل واحد حر في نفسه .. و اهي كيفها مع اهلها و تربيتها ..

 

[نحوله عسوله]

القرار اول والاخير لاهلهااا


اهم اللي بيرضووون او يرفضوووون


والحين المطلق ياخذ بنت بيت عااادي


انا رفيجتي ماخذه واحد مطلق وعنده ولد


بس هل اهوووه صادق معهااا او لا ؟؟

يعني بيتقدملهاا صج او لااا ؟؟


هذا الاهم

 

[NORO]

شوفي ااختي دام ليلحين صغيره 24 ومادشت بمرحلة ممكن نقولها ماعليه شفيه المطلق

توها صغيره وخريجه جامعة والوظيفيه والمستقبل جدامها ليش مستعيله ولاا بتاخذ واحد مطلق

انزين يمكن يرد مرته بأي وقت لاتقوليلي محاكم وقضاياا ,,اعرف ناس من رفعت عليه مرته قضيه ردهاا

وتره بقولج عمر الشهاده ولا العايله تبين انه هالشخص كفوو

ايي واحد من عايلة الكل يتمني يخطبون بنته بس هل اهيه واثقه بكل الاشخاص الي بالعايله وبتربيتهم والريال اذا بيعوف المره بيعوفها لاتقوليلي امه تمنعه ولا ابوه

توها صغيره والعمر جدامها وانا اتكلمت من منطلق لو كنت مكانها

 

[غرق بالماي]

والله ياقلبي انا شايفه الريال ماغلط بالعكس خايف على مشاعرها وكل مايبي يقول لها


مايبي يكدرها


والله والله مافيها شي لو تزوجها وايد اعرف بنات تزوجو مطلقين وعندهم اعيال وعايشين حياتهم اذا اهو يحبها


واهي تحبه

لا تفكر بزواجه الاول خلاص شي صار وراح والماضي مايتحاسب عليه


خليها تستخير وان شاء الله الله يعطيها اللي في الخير


وانا من ناحيتي مافيها شي اذا تزوجت واحد مطلق


اذا كانت ماتحبه وخطبت اهل لا انا مو وياها العمر جدامها ويجيها اللي احسن منه


بس اهي تحبه واهو يحبها وعارفين بعض ومتفقين ويا بعض مافيها شي


خليها تتوكل على الله ويارب يكونون من نصيب بعض يارب

 

[Little_Queen]

نورو .. مو مرته الي رافعه عليه قضيه ..

اهو رافع ! و اهما الاثنين ما يبون بعض و قايلها صارلنا سنه و نص كله مشاكل و من شهر 1 اهي ببيت اهلها و اهو ببيت اهله ..
لان رفيجتي سألته شلون كنت تكلمني كل يوم لي نص الليل دامك متزوج ! قالها انا ببيت امي و اهي ببيت اهلها من شهر 1

و معاج حق من ناحيه ما تضمنين كل العايله ، ياما عوايل كلها زينه و يطلع واحد فيهم يعر ..
لكن اذا اهو يحبها و شاريها ؟ و اهي تحلف تقولي والله ارتاح معاه بطريقه ما ارتاحها مع اهلي .. و يفهمني و يستوعبني من غير ما اتكلم ..

على قولتها تقول احنا حبنا مو بالقلب .. حبنا بالقلب و العقل !
اهو قالها هالكلمه .. ان اذا رفضي رح اتفهم انج صغيره و الف من يتمناج و ماكو شي يجبرج تاخذين مطلق ..

بس اهي مو مستوعبه شنو المطلق .. ليش مو زين يعني ؟؟؟
شنو السلبيات الي ممكن تصير بحياتها كونه مطلق ؟

انا قلتلها وحده من السلبيات ان اهو بيصير ابو فلان (على ولده من طليقته) .. و انتي ام فلان ثاني ! ..

فزت قلبج على اول ياهل .. مارح تكون مثل فزت قلبه .. اهو عنده 2 و متعود ..

قلتلها لكن بنفس الوقت ممكن المطلق و الي انخرب بيته يكون حريص ان بيته الثاني ما ينهدم و يحاول يتجنب المشاكل ..
و يكون عنده خبره اكثر بالتعامل مع البنات ، عشان جذي انتي مرتاحه وياه وايد و تحسين معاملته لج وايد زينه و مريحه و جنه يقرا أفكارج !

----------------

نحوله عسوله .. قلتلها نفس سؤالج .. بيتقدملج صج ؟

جان تقولي انا شخسرانه اذا تقدم او ما تقدم ؟
تقول بالعكس .. اهو اذا انا بلغته بقراري و راح صج طلق مرته و دفعلها اللي تبيه و صكر المحاكم و القضايا .. و عقبها ما تقدملي .. اهو الخسران مو آنا !!
و وجهة نظرها مقنعه ..

قالتلي حتى لو ما طلقها .. اهلي ما رح يرضون يزوجوني متزوج ! انا مادري شنو رده فعل اهلي على مطلق .. ما انحطيت بهالموقف او هالنقاش من قبل .. لكن المتزوج انا ادري ان مرفوض من اهلي .. و حتى مني آنا ..

و هم كلامها سليم ..
اهي ما عندها شي تخسره .. اهو الي رح يخسر اذا ما تقدملها ، خصوصا ان اهو يحبها و صارحها لان يحبها و لان هالشي اهو العائق الوحيد الي كان بطريج انه يخطبها

 

[لحن التياعي]

خليها تستخير
ولاتخلي الحب يعمي عيونها المطلق بصراحة يخوف وهي صغيرة عمرها 24 سنه انا لو مكانها مستحيل اتزوج مطلق وعنده 2 بعد

 

[Little_Queen]

غرق بالماي ..

ردج مريح .. و كلامج منطقي ..
عموما اهي قاعده تقرا كل شي ..
والاستخاره انا بعد نصحتها فيها .. قلتلها قبل كل شي استخيري .. و عقبها فكري و قرري و شوفي اذا بتكلمين اهلج او لأ ..

انا اول شي قلتلها شلون يخش و لااااااااااااا كان مفروض من البدايه يقولج و ماكو شي اسمه مالقيت وقت

لما شرحتلي كلامه .. حسيت كسر خاطري
حسيته صج ما يبي يكدرها و لا يزعلها

يقولها بديت احبج عقب شهر من عرفتج ..
كنتي باديه امتحانات فاينل ..

قلت ماني قايلها الحين خل تخلص امتحانات يصير خير ..

خلصتي امتحانات شفتج تخرجتي و الناس كلها فرحانه فيج و كل يوم زواره و هدايا و حفله و مستانسه .. قلت مو وقته

عقبها لقيتج تحبيني !!! و كل ما تكلميني تكونين مستانسه !!! و عقبها قمتي تجهزين حق السفر قلت بلا نكد لا اكدرها و اهي رايحه تسافر تستانس .. خل ترد و ما تلقاني احسنلها من اني اعذبها !

حرااااااااااااااااااااااام والله اهما الاثنين كاسرين خاطري ..

 

[Little_Queen]

بدويه ماركه ..

ليش يخوف ؟
طيب و اذا يحبون بعض و متفاهمين على كل شي ؟
صح اهي صغيره و العمر جدامها .. لكن الوحده مو كل يوم تلقى شخص ترتاح له و تتفق وياه و يفهمها

 

[روح مغليها]

تستخييييير. والخيره بما اختاااره الله

 

[غمزه وإبتسامه]

ماكو مشكله انها تاخذ مطلق وعنده ولدين

المشكله ليش طلق ؟ وليش خش عليها ؟ وليش جذب ؟؟


وخل تستخير كل يووووم

 

[بريق الالماس؟؟]

تستخير ....
واهم من هذا كله راي اهلها ...
قبل لاتقرر هي شيء ....

وتبين الصراااحه ... ما ارتحت له بالمره
وهي توها صغيره ... وصدقوني بيجيها اللي احسن منه
ماتدري يمكن الفتره اللي اختفى فيها خيره لها ....

والله يكتب اللي فيه الخيره ....

 

[Little_Queen]

بريق الالماس .. الفتره اللي اختفى فيها اهي ماتت و حيت ! انا ادق عليها ما ترد كلش و عقبها تدق و اهي تبجي و منهاره و اهلها ذبحوها بالبيت شفيج وشفيج يومين البنت ما كلت .. هم صعبه واحد تحبينه و يحبج و فجأه يختفي !!! لا يرد ولا يدق ولا يعبرها بكلمه !! و خصوصا انهم لا تهاوشو قبلها ولا شي بالعكس طول ماكانت مسافره تطرشله مسجات و كل شي اوكي ! يوم ردت اختفى و اليوم قالها هالحجي ..

و صح اهي صغيره و ممكن يجيها احسن .. لكن مثل ما قلت من قبل مو كل يوم الوحده تلقى انسان هي ترتاحله ، وانا عارفه البنت شقصدها لما تقول مرتاحتله و متفقه وياه بكل شي .. اهي مو اول مره تتعامل مع رياييل بحكم المشروع مالها .. و مخها كبير مو صغير ، يعني لما تقولي انا مرتاحتله و متفقه وياه معناته اهي صج بعقلها مرتاحه و متفقه مو بس بقلبها ، و كلنا ندري ان هالشي مستحيل يصير بالعمر مرتين انج تلقين الشخص الي تحسينه توأم روحج ! ..

غمزه و ابتسامه : اهو ما جذب ، اهي ما يت سألته بيوم انت متزوج و قالها لأ ، اهو خش الموضوع اي .. و انا معاج ان هالشي غلط تماما وكان مفروض يصارحها ، بس انا كتبت من قبل ليش ما صارحها ، ماكان يبي يكدرها و ماكان لاقي وقت مناسب !
و بالنسبه له اليوم بس كان انسب وقت و قال !

اما ليش طلق .. مادري ما سألتها :| و لا اعتقد تدري لو تدري جان قالتلي ... سؤال وجيه لكن تهقين عادي انها تسأله هالسؤال ؟ ولا فشله ؟

 

[Little_Queen]

روح مغليها ..

ونعم بالله الآخذ المعطي .. عسى ربي يكتبلها الخير و انا نصحتها بالاستخاره والله و عطيتها طريقتها بعد

عسى ربي يكتبلها الخير .. والله الموضوع محير ..

 

[أإلع ـشق دلع ـهـأإ]

شوفي حبيبتي ..

خليه أول يخطبهآ علشآن تتآكد أنه مآيلعب ..

وأذآ خطبهآ رسمي من أهلهآ ذيك السآعه تفكر وتستحير وتستشير .؟!!

أذآ خطبهآ خليهآ تفكر بعقلهآ تفكر للمستقبل !!

تفكر مثلآ تقول .. الرجل هذآ مطلق وعنده 2 أولآد ..

هل الآولآد رآح يعيقون على مسيرتي الزوجيه .؟ << حلوه مسيرتي خخخخ

شلون تعرف جوآب الشي هذآ تسأل اللي مآخذه مطلق وعنده عيآل !!

تفكر هل رآح يرجع مرته .؟!!

لآنه في أحتمآل بعد مآيتزوجج يرجع مرته !! بتقولين شلون أنآ أقولج ..

وآحد اعرفه تزوج وحده وجآب ولد وطلقهآ أهو وتزوج غيرهآ البنت من درت ان طليقهى تزوج رفعت عليه القضآيه .. وتعرفين ان القآنون مع المرآه أخذت منه كل شي بدل اثاث بدل مادري شنو صفى الرجآل ع الحديده !!

والرجآل قآل برجعهآ لآنه معآشي رآح !!

فكري بآلأحتمآل هذآ !!

خلصنآ من السلبيآت ..

نجي للآيجآبيآت .. شخصيته حلوه !!

يحبهآ .!! متفهم ..!! تميل له .!! ترتآح له ..!! وتحبه وهذا الآهم .!!

تخلي أهلها يسألون عنه !! ..
وتستخير ربهآ ..

والرآي الآول والآخير لهآ ..

أهي تعرف حيآتهآ ..

والله يوفقها ويسعدها

 

[منار البربرية]

تحبه شي وتتزوجه شي ثاني ،، وبما انها على قولتج ما بذنها ماي تبيه بكل عيوبه خل يتقدم لها اذا جاد بالعلاقه

وخل اخوانها يكثرون من العزومه عليه يعزمونه غذا والخ يدرسون اخلاقه وخاصه الرجال يعرفون لبعضهم ،، وبجذي يبين وخاصه ان المطلق عليه نفقة عيال والخ في اشياء لازم تسوي حسابها لانهم عياله اذا باجر خذاها وانجبت منه بصيرون اخوانهم شاءت ام ام ابت ولهم حق عليه يشوفهم ويصرف عليهم والخ ،،،
الله يوفقها و اذا فعلا يبيها واهلها موافقين خل يتقدم وتتزوجه والي اوله شرط اخره نور ،،، انا اعرف وايد من اهلي تطلقوا وخذوا حريم وهم عندهم عيال عادي يعتمد على الطليقه اذا مو شرانيه وتتمشكل وتسوي حساب انه ما يرد لها اهني عاد صدمه اذا رد لها ؟؟

 

[صادقة بكلمتي]

حبيبتي خلها استخاره الله وماخاب من استخارهبس في شي لااااااااااااااازم يصير انها تحاول بطريقة غير مباشرة تعرف ومو منه من وحده بالمحكمة ولا جيران مرته شنو سبب المشاكل لانه لو كان اهو اللي رافع يبي الطلاق عاااااااادي مو للحين بينهم قضايا والقاضي بالنهاية بقرر منو الظالم من المظلوم وانا اقول خلها تبتدي حياتها مع واحد مو متزوج مو لعيب بالمطلق لا بس يمكن باجر الغيرة ادش قلبها لو ملرته اطلقت وتصير تقوله انت كنت معها ولا سويت ولا متعود ولا عيالك ولا جذي طبعا على حسب شخصيتها بس الله حط الغيرة بالقلب والقلب مو بالايد حتى زوجات رسول الله عليه افضل الصلاة والسلام كانوا يغااااااااااااااااااااااااااااارون من بعض واهم قدوتنا وعلشان لا ادش من باب ظلم لعياله باجر وتلرا الحب مو كل شي اهي للحين صغيرة وجدامها ان شاء الله فرص وايييييد وعمره بضل مرتبط بعياله اللي من مرته الاولى ولهم حق عليه و و و انا اقول تسال عدل ومو منه وتستخير رب العالمين وصج الزواج قسمة ونصيب لكن بعد اختيار الله حط جدامنا الخيارات الزينه والشينة واحنا نختار واهو ما يحب لعباده الا الخير ان بغيتي الزين ودعيتيه ساعدج عليه وان اخترتي الشين كان اختيارج والله يسهل دربها ويستر على كل بنات المسلمييييييييييييييييييييييييييييييييييييييييين بالازواج الصالحين اللهم امين

 

[fulla 7elwa]

العشق دلعها كلامج روؤووووووعه
سحرتيني الصراحه

 

[منار البربرية]

اما ليش طلق .. مادري ما سألتها :| و لا اعتقد تدري لو تدري جان قالتلي ... سؤال وجيه لكن تهقين عادي انها تسأله هالسؤال ؟ ولا فشله ؟

لازم تعرف السبب بصراحه انا عن نفسي احب اعرف حتى لو كان السبب ما يغير نظرتي للشخص

اللي احبه بس من باب المعرفه لان رب اسره وعنده طفلين وجم سنه متزوج ترى مو سهله

انسان يخرب اسرته ويروح من جد وجديد يبي يبدأ من الاول انه يكون اسره ثانيه

الله يوفقها يارب :eh_s(7):

 

[GaLbI t7aWaL]

ana ashoof etha y7boon ba3a'6

5l ytzwjoon

w maku 3aib blsalfa

 

[Pearl Qatar]

خلها تفكر وتستخير مليون مره ,, لان الحب شي ثاني والزواج شي ثاني

واغلب علاقات الحب بائت بالفشل

ومب شرط اذا مطلق تكون فيه عيوب ,, يمكن يكون ريال زين ويمكن يكون لا ,,

الله يوفقها ويستر عليها ويسعدها