رجعت لكم مثل ما وعدتكم..
من المواقف الطريفه اللي صارتلي..
يمكن ردي شوي غير.. لاني حطيت مع كل موقف صارلي الصوره اللي كنت اصورها..
يعني سبب الموقف ههههه
-1-
هذا العام كنت مسافره بالصيف.. وياربي باوربا وردهم يهبل حتى اللي بالسوق يبيعونه
شحلوه وغريب واغلبه ماعندنا مثله اهني بالمحلات لان اغلبه مايعيش بجونا...
المهم.. كنت بالسوق واخر شي قبل لانطلع اخذت من محل الورد وردتين لونهم فوشي
البياعه تطالعني ومخترعه.. تقولي تبين بس وردتين!!؟ قلت لها اي!
نادت رفيجتها.. تسألني نفس السؤال!! للتأكيد هههههه
استغربت قلتلهم ليش تسألون..
قالت لي احنا عندنا اللي ياخذ عدد زوجي من الورد يعني حق اموات ويحطونه عند قبرهم..
جان اضحك قلت لهم لا..لا.. ووريتهم كاميرتي بجنطتي قلت لهم انا مصوره
وما اهتم لهالامور ماخذه الورد للتصوير بس....
استهلو عقب مساكين وقامو يسولفون ولا اول شي مخترعين ! هههه
وهذي صور الوردتين ....
-2-
مره بالكويت كنت واقفه عند هارد روك كافيه قاعده اصور.. واختي تنطرني بالسياره
مزاجي كان تصوير ليلي... المهم مرت سيارة شباب ومابقى تعليق ما قالوه...
ومن صجهم واقفين ماحركو.. واحد يقولي تكفين بس صوره صوره!!!
انا مزاجي اعتفس من حركاتهم.. يعني علشان انا بنت وابروحي جذي يصير لي
ومومخليني بحالي.. شلت كاميرتي واستاندي وركبت السياره ومشيت...
ويومها اذكر حتى ماطلعت بصوره ووحده حلوه.. والسبب هالشباب الله يسامحهم
ماطلعت بصوره حلوه.. فـ ماكو صوره
-3-
وحده بالسوق.. كنت قاعده بالكافيه اصور النافوره وكوب القهوه مالي...
واهي تصير طاولتها وراي.. فجأه تطالعني وتعصب.. وتغطي ولدها!!
عقب استوعب انها شافت بيدي الكاميرا عبالها بصور ولدها البيبي !! امبيه تصرف غريب
وهذي صورة كوب القهوه مالي... من PAUL
بس طبعاً انا ذاكره هالمواقف اهني الطريفه لاني اطلع من عقب هالمواقف اضحك على تصرفات هالناس
الحمدلله والشكر.. واقارنهم مع برا شلون يخلون المصور على راحته ويساعدونه ومايعلقون ولايتصرفون تصرفات مليقه جذي
واحلى موقف..
-4-
كنت بالكوت.. رافعه كاميرتي اصور القبه فوق مع الظلال والاضاءه كانت شي عجيب
ومر شاب.. وطالعني وطالع فوق >> المكان اللي اصوره.. وكان مستغرب او معصب شوي
ماادري الظاهر عباله كنت اصوره ؟ مع اني رافعه الكاميرا فوق..
بس انا اعذر الناس لانهم مايدرون شنو اللي مركزين عليه بالكاميرا ونبيه يطلع بالضبط..
المهم.. قلت له تبي تشوف اللي صورته.. وطلعت الصوره بكاميرتي ووريته!
تغيرت ملامح ويهه وبالعكس قام يشجعني.. وقالي لو تصورين بالمناره ترى منظرها جدا حلو
وقالي انتي مصوره؟ تشاركين بمعارض؟..... من هالاسأله والاستفسارات عالسريع
وقالي يالله يعطيج العافيه ومشى.....
هذي صورة القبه اللي كنت اصورها..
وايد حبيت الموقف هذا ومااظنتي راح انساه..
ووايد حفزني وشجعني مع ان موقف واحد ايجابي من مواقف عديده سلبيه!!
عذراً على الاطاله.. وشكراً يااحلى سوبر ماركت
