العلبة اللي سويناها ، بتكفيج استعمال شهر ونص تقريبا .
* السعر :
طبعا بما انه راح تشترون الاغراض يديدة راح يكلفكم شوي ، بس لا تحاتون ، لانه انتو محتاجين من كل شي كمية بسيطة ، يعني الاغراض اللي شريتوها بتخليكم تسوون من هالخلطة وايد ، يعني زيت الزيتون و ماي الورد و الخل و الكبسولات راح يتمون عندكم وايد ، اما زيت الخروع و زيت اللوز بيكفيج بس مرتين ، و اللوشن بتستعملينه علطول ، بس بعطيكم السعر التقريبي للمجموع اذا انتو تبون تشترون الاغراض كلها ،
زيت الزيتون بدينار ، و الخل بنص دينار ، و ماي الورد بنص دينار ، و لوشن فازلين بدينار ونص ، و زيت الليمون بدينار ، و زيت اللوز الحلو بدينار ، و زيت الخروع بدينار ، و كبسولات الفيتامين إي بـ 6 دنانير ونص يعني المجموع تقريبا بيطلع عليكم 13 دك تقريباً .
* والخلطة سهله و بسيطة و خفيفة ، و استعمالها سهل و سريع ، و طبعا اللي تبي تحافظ على اظافرها و تتم معتنية فيهم فـ تستعمل الخلطة دايماً ، طبيعية و ما منها مضار ، و تعطي كل العناية و الفوايد اللي محتاجتها الاظافر ، عني اول شهرين بما انه اول استعمال للخلطة فيكون الاستعمال دقيق و متواصل يوميا و مرتين باليوم ، وبس عاد عقبها يصير مرة باليوم ، و بعدين خلاص كل يوم وترك مرة ، لانه صار القصد عناية فقط و محافظة و خلصنا من مرحلة العلاج و العناية القصوى .
* و الخلطة مليانة فيتامينات و عناصر مغذية و فيها نسبة ترطيب عالية ، ومعادن تقوي من الاظافر و تصلبها ، و زيوت تمنع الجفاف و التكسر و تطولها و تنعمها، و فيتامين إي مركز يغذي و يحافظ عالظفر .
* النتايج :
هذا السؤال اللي كلكم تسألون عنه و قبل لا تستعملون الخلطة وحتى قبل لا تقرون مكوناتها ، وكالعاده جوابي واحد ما يتغير ، سواء للي تسأل عن خلطاتي أو عن الخلطات اللي كتبتها لكم أو عن هالخلطة ، انه الخلطات الطبيعية نتايجها تختلف من وحده لي وحده ، وكل وحده تقبلها للخلطة يختلف عن الثانية ، و كل وحدة فيكم جسمها وشعرها و ايدها و اظافرها وكل شي غير عن الثانية ، فماقدر اقولكم تشوفون نتيجه باسبوع ، يمكن فعلا جم وحده منكم تشوفها باسبوع بس الباجي يشوفون باسبوعين و اللي بيشوفونها بشهر لانه مثل ماقلت كلكم تختلفون والتقبل يختلف و نسبة المشكلة بعد تختلف .
فالزبدة عشان تشوفون النتايج ، استعملوا الخلطة استعمال يومي و صحيح و التزموا عدل ، و اقل شي مدة كورس كامل اللي اهو شهر ونص ، لين تنتهي العلبة ، وعقبها شوفوا النتايج النهائية , و اكيد بتشوفون نتايج مبدئية قبل هالمدة بس الوقت يختلف عندكم كلكم .
* ملاحظات :
- عقب ما تقومين من النوم تبين تغسلين اظافرج من الخلطة ، او بالمرة الاولى عقب ما تخلصين و تبين تغسلين اظافرج ، غسليها بماي دافي و صابون طبيعي مافيه عطور ولا كيماويات ويفضل صابون جونسن للأطفال ، وعقب ما تنشفين ايدج حطي المرطب ، و المرطب انتي شاريته اللي اهو فازلين الوردي ، عشان جذي خليتكم تشترون الحجم الكبير للخلطة عشان ترطبون فيه ايدكم واظافركم كل يوم
- يفضل تقصين اظافرج قبل لا تبلشين بالخلطة عشان لو اظافرج متكسرة او تعبانه او متقصفه تكونين شايله كل المشاكل و تبدين العلاج من أول و يديد على ظفر نظيف و يديد
* ارشادات هامة لناحية جمالية أكبر للاظافر :
- لا تنسون تهتمون بالتغذية الصحية الجيدة لأنه العناية الداخلية أهم من الخارجية وبالنسبة للاظافر والعناية فيها احنا محتاجين ناكل الاغذية اللي تحتوي على الفيتامينات و الكالسيوم و الحديد والمعادن .
- ابتعدي عن مشكلة قضم الاظافر
- دايما لبسي الدس وانتي تسوقين السيارة عشان اظافرج لا تحوشها الشمس و تجففها و بالتالي تكسرها
- دايما رطبي اظافرج بأي مرطب و خليه علطول بجنطتج ، يعني باليوم الواحد 3 مرات رطبيهم
- لما تطولين اظافرج خليهم بالمعقول لا تطولينهم حيل ترى كل ما زاد الطول يتكسر بسرعه و تتأذين بالعنايه
- لا تقرضين اظافرج و اهي مبللة ديري بالج ترى تكسرين اساس الظفر من داخل و بيطلع متقصف وجاف
- لا تكثرين من المانيكير اللي اهو صبغ الاظافر ترى ما وراه غير الجفاف و التقصف
- يفضل لما تحطين المانيكير حطي قبلها طبقة من مقوي الاظافر او مرطب الاظافر بعدين حطي الصبغ
واعتقد كفيت و وفيت بالشرح المفصل بالتفصييل الممل ، وهم بعد اذا عندكم أي سؤال او استفسار من عيوني .
.
و بالنهاية احب اقولكم .. جربوا و استفيدوا ..
وانا انشالله ماراحاقصر معاكم ..
و لنا لقاء جديد بإذن الله ..
انتظروا جديدي ..
اختكم /
( المـلاك )
يعطيها العافيه الاخت الملاك كفت ووفت .. والخلطه والله يابنات انها شي خيااااااااااااااااااااالي .. وانتو شفتو النتيه على اظافري ..
