موعارفه شنو احتاج عشان اسوي اكله ساعدوني بليز

[0oR0R0 honeyo0]

السلام عليكم امهات
ولدي اسم الله عليه بجري كمل السادس وانا للحين مادخلتله اكل بس اعطيه مايلوبا رايس بالمميا مع الحليب

مو عارفه شنو الادوات الي احتاجها عشان اطبخله ؟
وافوح الخضار بماي البيبي او الفلتر ؟
ويصير اعمله كميه من الخضار واحطها بالفريزر ؟
متى اعطيه فواكه ؟
متى اعطيه بسكوت ؟
اشلون انظم اكله مع رضعاته ؟
واذا في معلومات مفيده وبتساعدني عفيه لاتقصرون قولولي كل شي ,,
لاني مو عارفه شي ومافي احد يعلمني وعلى فكرا الموضوع بيفيد كثير امهات فلا تقصرون لانهم راح يدعولكم كمان ,,
الله يسعدها دنيا وآخره الي تساعدني وينولها الي ببالها :eh_s(7):..

 

[0oR0R0 honeyo0]

اشدعوه 5 مشاهدات ومحد رد ؟؟؟؟؟؟؟؟

 

[noynoy]

الادوات: جدر تيفال صغير اصغر حجم عشان عقب يوم تطبخينله العيش و هالسوال ما يلزق
خلاط موليناكس اسمه بيي شيف مال اليهال
تفوحين الخظار بماي عادي مال الفلتر

اول شي ابدي بنوع واحد يعني بطاط تقشرينها و تفوحينها و تهرسينها و تعطينه لمده 3 ايام و تشوفين رده فعله اذا صار في حساسيه او لا بعدين عقب ال3 ايام تغيرين النوع مثلا كوسا و اللي عقبه قرع,زهره,بروكلي,جزر,بطاطا حلوه
عقب خلطي نوعين او 3 او 4 انواع خظار و عطيه
بعدين تبدين شوي شوي تدخلين العيش مع الخظار و تخلطين نوعين خظار او 3 انواع مع العيش و طبعا هذي بتكون وجبه الغدا

اما الوجبه الثانيه مالت الفاكهه تعطينه فاكهه مقشره، يا انج تبشرينها بالمبشاره مالت الجزر بشر صغار، او انج تحطينها بالجدر مع شويه ماي و بعدين تحطينها بالخلاط (تفاح، مشمش،كوج،عرموط)و تتبعين نفس طريقه الفاكهه عشان تشوفين اذا حسس جسمه او لا،

و عقب ما تتاكدين انه تقبل الانواع هذي، حاولي تدخلين شغلات ثانيه
يعني بدال العيش حطي مكرونه الصغار، و مع الفاكهه بدال لا تطبخينها بروحها حطي شوفان(كوكير) + عصير برتقال فرش مصفيته بالمشخال وايد مفيد و لذيذ و اليهال يحبونه،
و بعدين دخلي الفواكهه المجففه (تين-اراسيا-مشمش-كشمش)
و مع الغدا دخلي( لحم دياي جبده دياي عدس ماش ) و اللحوم لا تدخليها قبل السابع يعني انا عطيت بنتي 7 شهور و نص او 8 شهور ماني ذاكره

هم تقدرين تعطين البيبي مهلبيه ، و الجلي ترا وايد مفيد
لا تحطين ملح و لا شكر و لا بهارات، ماعدا كركم قفشه صغيره لانه مفيد حق اليهال مع الغدا طبعا عقب 7 شهور
و نتفه دارسين اذا بتطبخين الفاكهه مع الشوفان يعطيه طعم حلو
بالنسبه حق التفرزن اعتقد تقدرين تفرزنين، لمده اسبوع
انا اطبخ لهاالغدا بكميه تكفي 3 مرات و احطي جزء حق اليوم و جزئين بتبروير زجاج مو بلاستيك
اذا بتسخنين الاكل لا تستخدمين مايكرويف مو زين

و اللحوم انا اشتري من اللحام لحم غنم بدون عظم هبره و احط كل قطعه بجيس التوست البلاستيك عرفتيه و بعدين احط كل جياس التوست اللي عندي بجيس بلاستيك مال الخظره و احطه بالفريزر اسهل، و الصبح اطلع قطعه و اخليها ساعتين الا الثلج فاج عنها و اقدر اطبخها
و نفس الشي الدياي و جبده الدياي اشتريهم فرش من الجمعيه الدياي صدور دياي اللي بالفلين عرفيتيه و الجبده بعد و احط كل قطعه بجياس التوست نفس اللحم
بس الصدور كل صدر اقصصه نصين او 3

و الخظار اللي اهيا الجزر البزاليا الفاصوليا السبانخ البروكلي هذول كلهم اشتريهم مثلجين
البطاط القرع الكوسا البطاطا الحلوه المولوخيه هذول اشتريهم فرش
الكركم اشتريه من سمراء عدن لان جربت مال الجمعيه حسيته بودر حتى ريحته مو شي
العيش استخدم عيش مصري

و اذا تبين اي سؤال قولي

 

[آهات الليل]

ماشالله الاخت ماقصرت

بس ميلوبا رايس مع الحليب وكليه بالقفشه مو بالرضعه حبيبتي

 

[.دمعتي الحزينه.]

ماشاء الله الاخت كفت ووفت الله يعطيها العافيه
ويحفظ لج ولدج

 

[miss swan]

اور اور شلونج
حبوبه نصيحه مني اخذي كتاب ماادري شسمه بس تلقينه بالصيدليات لونه وردي فيه كل المعلومات عن الطفل كل شهر مراحل نموه شنو توكلينه فيه وصفات حق كل الوجبات سهله ولذيذه بالنسبه حق ياهل
انا ماخذته من صيدلية انترناشونال كلنك اللي ورا ليلى جلري
على مااعتقد اسم الكاتبه الدكتوره ريم

​

 

[nazek_q8]

اكل اليهال سهل وما يبيله شي

انتي حطي خضار مشكله مثل بظاظ كوسا وقرع وبروكلي وجزر واغليهم لما ينضجون تالي حطيهم بالخلاط وممكن تضيفين شويه كمون وكركم وزبده

وبقولج على شغله
اذا خلطتي الخضار عندج مثلا البروكلي والبطاط مالهم طعم ووممكن يرفضه الياهل فانتي شتسوين حطي معاهم كوسه او بطاطا حلوه عشان تغير الطعم ويكون حالي انا دايما اضيف قفشه شوفان مع الطبخ



وفي اكله انا احبها وايد ومفيده

واهي شوفان مع تمر اغليهم مع بعض وبالخلاط وايد مفيده

كل مره ظيفي نوع من الخضار وشيلي نوع مثلا سبانخ او ملوخيه او ذرة بازلاء وومكن تاخدين الخضار المثلجه المشكله

 

[miss swan]

البطاط عشان يصير طعمه حلو حطي معاه جبن شدر بدال ملح
مع سيريلاك القمح
ومثل ماقالت الاخت زيدي عليه كل مره نوع من الخضار
على نفس الوصفه انا بنتي كيفت عليه مع الشدر
والصبح ممكن بسكوت فيرليز بالموز مع حليب الاطفال اللي تشربينه
بهالعمر ممكن تعطينه بيض بس بعد متجربين الخضار
روب بالفواكه مفيد ولذيذ انا احب المراعي
فواكهه(موز تفاح تمر عرموط)
عصير برتقال مخفف تحطين بالمميه ملعقه صغيره عصير برتقال +ماي+سكر نبات
اشتري خلاط من مذركير مال الاطفال
واذا تبين مساعده انا موجوده بالتجمع انشالله اقدر اساعدج
كسرتي خاطري لاني كنت نفسج
​

 

[كتكوته22]

البنات كفو ووفو

 

[0oR0R0 honeyo0]

حبيباتي كلكم ماقصرتو ربي يسعدكم وينولكم الي ببالكم اللهم امين

 

[*ماي الورد*]

ما قصروا البنات بس بعد خلطي قفشة روب خالي الدسم مع اكله مفيد و لذيذ