نادي الكتاب Book Club لشهر يناير - جمان مجموعة قصصية لعلياء الكاظمي

[قصــب سكــر]

السلام عليكم

شلونكم بنات اعذروني ماقدرت ادخل الفتره اللي طافت مشغوله شوي ولما القى وقت ادش والمزود مشغوول

ان شاء الله اكون موجوده بعد شوي وألحق عليها لاني مواعده ولدي اوديه الجمعيه يبيله شغله من لوازم العائله ؛؛

بالنسبه لمناقشه القصتين الباجين راح اكتبهم بأقرب وقت

بس ما قلتولي الاسئله متى الددلاين لهم ؟

 

[Shiny Star]

حياك الله قصب سكر والله لك وحشة

الأسئلة نزلتها أمس وتقدرين تجاوبين عليها بأي وقت قبل لا يتسكر النادي

أنا بعد فقدتك وايد يالغالية

 

[علياء الكاظمي]

مساء الخير ... أنا علياء الكاظمي .. في البداية أحب أشكر شايني على اختيار كتابي جمان في نادي الكتاب ... المنتدى رائع و مميز ومفيد وأنا سعيدة جدا بجميع التعليقات على كتابي

 

[Shiny Star]

حياك الله علياء معانا والله نور المنتدي

وأنا شخصيا أفتخر أنك من بنات الكويت اللي رافعين راسنا واسم ديرتنا

وأنتي اللي مشكورة إنك عطيتينا من وقتك

وإن شاء الله ما ضايقناك من تعليقاتنا

والله كانت نقد بناء بهدف حبنا

مثل قسمنا ( تنمية المهارات وتطوير الذات )

 

[علياء الكاظمي]

مشكورة وأنا جدا سعيدة بالمشاركة و على فكرة كنت يوميا أتابع المنتدى و أقرأ التعليقات وبالنسبة للانتقادات كانت بناءة وراح اخذها بعين الاعتبار في أعمالي القادمة ان شاء الله

 

[Shade]

حياك الله أخت علياء بين خواتك وقرائك

أنا ترى ما كنت أعرفك قبل بس من البوك كلب هذا يعني من الشهر اللي طاف لما قريت جمان وااااااااااااااااايد عجبني وأول ما دريت إن نزلك كتاب يدي على طول رحت شريته

سؤالي الأول : ليش ما نشوف لك لقاءات تلفزيونية أو إذاعية ، أقصد حسافة ما في دعاية إعلامية حق إصداراتك ، حرام هالإبداع ما يحصل إنتشار

 

[علياء الكاظمي]

في بعض المشاركات حسيت انهم قرأوا القصص بتعمق جميل وتعلقوا بالشخصيات ولاحظت هذا الشيء أكثر في التعليقات على قصة جمان كان ودي أعرف شنو أكثر قصة حبوها بالكتاب؟ بالنسبة للمقابلات في المجلات انا وايد تنعرض علي بس عندي تحفظ على نشر صورتي وحاليا عندي لقاء في مجلة أسرتي عدد يناير وانا سجلت لقاء اذاعي في برنامج خطاب وقلم مع الاخ فهد الهندال تقريبا قبل شهر وتم اذاعته على مدى حلقتين

 

[علياء الكاظمي]

واليوم نزل خبر في جريدة الرأي العام عن اصداري الجديد

 

[Shiny Star]

ولا يهمك يالغالية راح أنزل لك استطلاع بخصوص أكثر قصة البنات حبوها بكتاب ( جمان) إذا حابة تتابعينا بالمنتدى

سؤالي : شنو العوائق اللي تواجهك كمؤلفة كويتية

 

[علياء الكاظمي]

أنا سعيدة جدا بجميع القارئات اللي تعرفوا على من خلال كتاب جمان

 

[فرح الياسر]

اهلا وسهلا بالكاتبه الكويتيه علياء الكاظمي

 

[قصــب سكــر]

حياااج الله مؤلفتنا بالمنتدى

سعيدين بوجودج معانا وبصراحه الكتاب مميز واسلوبج في السرد جدا رائع عشنا مع كل كلمه وكل احساس

بالنسبه لي كان لي الشرف اتعرف عليج من خلال نادي الكتاب وماكان عندي فكره عن مؤلفاتج سابقا

ونفس سؤال شيد ليش ما في دعايه حق كتبج حرام هالابداع كله يظل مغمور

سؤال ثاني بالنسبه للقصه لما تكتبينها على اي اساس تجي الفكره الاساسيه لها يعني موقف او خبر او خيال وتصور ؟؟

 

[علياء الكاظمي]

أكثر عائق يزعجني اهو صعوبة نشر أعمال الكاتبين الكويتيين خارج الكويت ... أتمنى من الجهات المعنية تساعدنا بهذا الخصوص وتدعم مواهبنا ففي النهاية احنا نرفع اسم بلدنا .. عشان أوصل كتبي للخارج لازم أتحمل تكلفة الشحن بالاضافة الى الحصول على التراخيص المعنية من الدول الاخرى وصعب على الكاتب أن يقوم بهذه الاجراءات أما شركات النشر ما تقبل الروايات وتركز فقط على كتب الطبخ! يعني لازم أحط جم وصفة بكتابي الياي عشانهم :27d66a9c24b146327bfأهلا يا فرح شلونج؟

 

[Shade]

متابعة اللقاء

 

[علياء الكاظمي]

أشكرك على كلماتك الرقيقة يا قصب السكر ... بعض القصص حقيقية مثل قصة بلا هوية و رحلة الصمود وبعضها استوحيت أحداثها من حياة ناس أعرفهم وبعضها خيالي

 

[علياء الكاظمي]

لكن أنا من بديت أكتب صرت أحب أسمع الناس أكثر و قمت أحس بمعاناتهم أكثر وأكثر و هذا الشيء خلانيحساسة أكثر من الأول ..

 

[علياء الكاظمي]

لكن أنا من بديت أكتب صرت أحب أسمع الناس أكثر و قمت أحس بمعاناتهم أكثر وأكثر و هذا الشيء خلاني حساسة أكثر من الأول

 

[قصــب سكــر]

من حظنا هذا الاحساس الحلو اللي طلع لنا ابداعات مميزه

 

[علياء الكاظمي]

مشكورة وأنا أحب أنتهز هذه الفرصة وأشجع البنات اللي عندهم موهبة في الكتابة أحب أقولهم لا تترددون و ثقوا باقلامكم وان شاء الله أشوف بعض العضوات زميلات لي في عالم القلم الجميل

 

[Shiny Star]

أنا عرفت من إصدارك الأخير ( ورود ملونة) إن قصة رحلة الصمود أرسلتها صاحبة القصة وكانت تبيك تكتبين قصتها ، هل ترحبين بأي شخص ممكن يبعثلك قصته ، ممكن تستخدمينها كفكرة لأحد إصداراتك ؟

ما شاء الله عليك أحسك وايد تعرفين توصفين المشاعر وتتعمقين في الذات بصيغة روعة