نادي %كويتيات% لهواة التصوير الفوتوغرافي

[supermarket]

بنات موضوع للفضفضة وتحريك النادي بعد اغلاقه للتصليحات وتغيير للاثاث



بسم الله نبدي

حبيت اسولف معاكم عن التصوير شلون اذا كنتوا برة وبتصورون احس اني شوي استحي من الفضوليين شلون اتغل على هالشي


دعوة للسوالف ،،،

 

[جاي وحليب]

اول شي مبروك سوبرماركت عالكاميرا توني اشوف ردج.. والله يهينج فيها..
ومنتظرين تجاربج الاولى معاها ..

بالنسبه لسؤالج .. انا بعد كنت استحي والحين خفت الشغله هاذي
بس قبل كنت لدرجة اني ماخذه الكاميرا معاي بصور بعدين اشوف لقافه الناس ادخل الكاميرا مره ثانيه واهون....
بس الحين اشوه.. حتى نظره الناس خفت ولقافتهم بعد خفت ...

تدرين بما انج فتحتي هالموضوع .. خل نخلي موضوعنا الحين مواقف صارت لكم مع الناس من تطفلهم وفضولهم .. سواء موقف حلو ولابايخ..
وخنسولف فيهم مع بعض..

ولي عوده ان شالله مع ممواقفي ^_^

 

[supermarket]

جويهة المشكلة الكاميرا معاي كل يوم اوديها الدوام بس استحي اطلعها مثلا بالشارع اصور الجو او اي شي

ارييد حلا

 

[جاي وحليب]

لالالا مو لي هالدرجه .. سوبر ماركت مو من كبر كاميرتج
وبعدين والله حرام جذي تطوفين مناظر ماتتطوف وتتحسفين بعدين..

جربي من باجر .. طلعيها خل يشوفون الناس خل يتليقفون .. خل يطلون داخل شاشة كاميرتج بعد .. بس حطي في بالج انج تنمين موهبتج واهم شي عندج انج تطلعين بصور حلوه..

تجاهليهم .. تجاهلي الناس .. دوسي دقمة التجاهل عندج وصوري :eh_s(20):

 

[الحياة]

بنات انا احب التصوير بس ماعرف فيه اي شي ..

حطو لنا صوركم خنشوفها جايز اتولع بالتصوير واسوي مثلكم

عاد انا بدوامي .. اناالمصورة حق اللقطات النادرية والمناسبات
بس الكامرا اي شي

 

[supermarket]

الله يسمع منج جويهة واقدر ادوس دقمة التجاهل


الحياة حياج الله معانا بالنادي وحاولي تقرين الموضوع من الاول علشان تستفيدين

 

[Pink GirL]

سوبر ماركت انا بعد والله اعاني من نفس المشكلة مع ان كاميرتي السبير الكومباكت معاي على طول بجنطتي على قولة رفيجاتي هذي صديقتج الصدوقة 24 ساعه معاج

جاي حليب مديناااااا بطاقة التجاهل خخخخخ قوليلنا شلون بديتي تتجاهلين الناس ولقافتهم ونظراتهم البايخه

 

[SabaQueen]

مساء الخير بناات

مبرووك سوبر ماركت على الكاميرا يلا حطي لنا شنو اول صوره صورتيها !!

بالنسبة لموضوع اللقافه هذا واااايد اعاني منه لاني وحده خجوله و ياما طرفت لقطات عجيبه من لقافة النااس
اذ كانوا الملاقيف مو كويتيين كنت اتجاهلهم بس اذا من ربعنا لا و الله اهون ما اصووور

يلا نبي حل

 

[supermarket]

سبا كوين شنو الحل تكفووون

مع ان صوبنا منظر برج التحرير عجيب وقت الغيم بس يختي استحي اطلع كاميرتي



بينك: شلون تصورين اللي بالمطعم بموضوع صور من الموبايل ودي ابتدي بالشي هذا بس احس الناس تقول مو شايفة خير تصور اللي تطلبه خخخخخخخ

 

[Pink GirL]

سوبر ماركت لوول هذي سالفة

بالمطعم الله يسلمج اختار الكرسي اللي مجابل الطوفة ولا صاد شوية عن الاوادم
وساعات اصور بالموبايل فتصير السالفة سهله شدراهم اني مصورة مايبين عدل

علشان جذي اكثر الصور عندي حق البلعه خخخخخ

 

[supermarket]

وييييييي وانا ياية اتعلم منج خخخخخخ

يافرحة ماتمت ... جنه بايقين حتى الاكل نصوره بالخش والدس

 

[جروح تبتسم]

السلام عليكم بنات


اول شي بقول يحلات جمعتكم ماشالله تبارك الله
من زمان ودي اطل عليكم ومتردده وماعندي وقت للتصوير
والصرااااااحه كامرتي ماتشجع

المهم انا عندي كاميرا ديجيتل ماركه سوني اخذتها بشي وشيات
ماذكر بالضبط جم يعني

بس للاسف ماعرفت لها او بالاحرى مارتحت لها كللللللش

وقالو لي ماراح تيب سعر لوبعتيها حرام ودي استفيد منها

زومها 3.0

5.1 ميجا بكسل

ونوعها : cyber-shot


dsc-T33\n

مادري صح ولا لأ هذا اللي مكتوب انتو ادرى

زينه او لأ؟؟

مره صورت فيها ياني انهيار عصبي هههههههههه
لانها دوم تصور صور مهزوزه واتنرفز منها
المهم اذا في مجال تعلموني شغله ماعليكم امر

يصير لهالنوعيه من الكاميرات احط لها زوم .... او شغلات للتصوير ؟؟
انا اسمع بشي اسمه الغالق هل له علاقه بالاهتزاز وشو الحل؟؟

ومشكورين

 

[جروح تبتسم]

وودي احط لكم من تصويري بس الشحن ضايع
وقالو لي لازم تروحين الضجيج بس هناك تقدرين تشترينها ...!!
وعلى فكره كنت شاريه ميموري يديد وضاع الشحن ماستفدت منه

انا يعني ساعات لمن اصور
الكل يقولي تصويرج عادي بس تصيدين لقطات حلوووووووووه

 

[Layz]

أنا رايحة مجمع قبل أمس و بس قاعدة أصور حتى بالمطعم و بره بالسوق شوي ولا أشوف ناس ثانين قاعدين يصورون ( يمكن شافوني و طلعو كاميراتهم ) .. عاديييي ..
و هاذي اهيا الصور ..
http://www.flickr.com/photos/qadsawiya/sets/72157594524317355/

ومرة كنت مسافرة و قاعدة أصور داخل مجمع ..
ولا إيي واحد يطل بالكاميرا و يبتسم ..
و بنفس المكان شافتني وحدة ولا تقول شفيها هاذي شتصور ( ما اهتميت لها ) ..

انا أصور بس على حسب اللي طالعة معاه مالي شغل باللي بالمكان ..

 

[جاي وحليب]

خل اقولكم عيل من المواقف اللي صارت لي..

انا قبل كنت مااصور بره واوادم قاعدين يمنا كان شي مستحيل.. وخاصه اذا كويتيين نفس ماقالت سبا كوين..
بس الحين اشوه . .شوي شوي صار عادي..

1-
يعني مره كنت رايحة اصور بحولي بارك بليل وكنت ابي ابطأ الشتر واجرب هالشغله على شي حلو كوني اول مره اجربها بوقتها ..
معاي ستاندي .. قبل لاااطلع شغلي سألت السكيورتي قالي اخذي اذن من الاداره
واخذت اذن .. وطلعت الستاند وضبظت الكاميرا وبديت اصور وكل الصور اللي بخاطري جربتها..
الاوادم يمرون .. ويطلون .. ويعلقون.. لا ولي درجة ان واحد يه يمي يطل بشاشة الكاميرا الـ Lcd ويشوف الصوره معاي!! مستوعبين اللقافه لاي درجة؟؟؟
ههههه

2-
مره كنت رايحة اصور مرينا ويفرز .. مكاني بالضبط اللي واقفه فيه يم هارد روك صوب البحر..
طلعت الستاند وبديت اصور واجرب واغير بالاعدادات .. الناس يمرون ويطلعون ويمشون عااادي .. فجأه واحد يطق هرن حقي انا عبالي اختي لانها تنطرني بالسياره.. لفيت اطالع ولا واحد يأشرلي يقولي .. صووره صوره صوريني تكفين انا ستايل ماكو مني!!! ربي لك الحمد .. لفيت بكمل موراظي يمشي الاخ.. عكر مزاجي لاخر درجة.. شلت ستاندي ومشيت..!

3- مره بالكوت حاطه الترايبود عند النافوره وقاعده اطلع كاميرتي واضبطها..
ولا اللي يمنا ريال وياه يهال الظاهر مأذينه وبيسكتهم.. يقولهم شوفو شوفو هاذي مصوره بتصور المنظر والنافوره .. لول!
جان اصدق عمري


وووايد مواقف .. بس من هالمواقف بديت اخذ عالوضع.. وقمت اتجاهل
يعني قمت احط في بالي اني يايه علشان اطلع بصور حلوه فـ لازم اتجاهل بعض العقبات ومنها لقافة الاوادم..

وفعلاً بالمطاعم اكثر شي يقثوني الناس بكلامهم ان شنو موشايفه خير تصور الاكل!
عموماً لان اغلب مطاعمنا اضاءتهم خافته .. ولاني افضل اصور باضاءة الشمس..
فـ انا افضل صور الاكل اللي بالمطاعم اصورها بالنهار او العصر.. وبهالاوقات الاماكن ماتكون هالكثر زحمه...

وموقف اخير.. مره كنت قاعده اصور بمطعم.. فـ خالتي قالت لي شفيج سمالله عليج اول مره تشوفين اكل !!؟
اهي على غشمره بس انا ماطوفتها.. قلت لها لا احب اصور كل شي واطلع بصور تعجبني.. بس انزل الصور على الكمبيوتر اوريج احلاها ..
وفعلاً عقبها بيومين دقيت عليها كانت بالدوام مريتها ووريتها من صوري.. وصور حلوه وصور قديمة.. فجأه تغير رايها ! قامت تقولي صورج عجيبه مافكرتي تطبعينها وتبروزينها تحطينها في بيتكم؟! عقبها جان تقولي تدرين احنا بالشركه>>بدوامها عندنا قسم يهتم بالتصوير خل اوديج تشوفين .. وكانت جوله حلوه معاها
والاهم اني قدرت اخليها تغير رايها باسلوب حلو



امبيه ردي شطووله .. بس ماعليه المواقف تعلمنا فـ ماحبيت امر بدون لااقولكم بعض مواقفي

 

[جاي وحليب]

بنات الشي هذا بالذات محتاج لمساعدتكم .. شوفو دول بره..
خصوصاً شرق آسيا.. كلللللل مكان يصورون كللللللل شي يصورونه
بنات.. شباب.. يهال.. حتى شيابهم...... عمري ماشفت شعب يحب التصوير كثرهم!
بفلكر.. اللي من دول شرق اسيا مجموعة الصور اللي يصورونها وينزلونها يومياً عدد خياااالي! واحنا بالاسبوع يالله نطلع بمجموعة وعدد حلو، ويمكن يعجبنا ويمكن لا
حتى الدول الثانيه .. ليش لي سافرنا نشوف الكل يطلع كاميرته ويصور اللي يبي..
ليش مانشوف التعليقات المليقه والقثيثه بره ديرتنا او بره الخليج .. ليش عندنا بس جذي

ولا ننسا ان من المعروف ان أي شي بهالدنيا محتاج لتدريب بشكل مستمر.. علشان نحافظ على الابداع والمستوى نفسه..
الكلام اللي قاعده اقوله ترى موجه لي قبلكم .. موعبالكم انا شخصية مثاليه بس اقدم النصيحة لي ولكم لانكم خواتي ..

لازم نتعاون كلنا ونصور كل شي نبيه ومانطوف اي منظر جدامنا.. صح احنا بنات وشلون وجذي .. بس لازم نتعاون ونخلي نظره البشر خصوصاً بالديره تتغير.. سواء لنا كـ بنات يصورون .. او حتى شباب..
علشان نستفيد ويصير الشي طبيعي مثل بره.. احنا ماسوينا شي غلط
ماسكين كاميرا ونصور.. ليش الناس بنظرتهم لنا يحسسونا ان احنا ماسكين سلاح موكاميرا!!

 

[Pink GirL]

مواقفج عجبة جاي وحليب خصوصا الملقوف اللي يطل بال Lcd والابوو وعياله اما الفنكي اللي على البحر لو انا منج جان ريحته وصورته لأن صارت فيني بسوق المباركية كناا مع الاستاذ بهاء وطافوا يمنا مجموعة شباب من الجيش يتحرشون ويقولون صورونااا لما صورناهم انحاشوااا لووول

وان شاء الله الطلعه الياية بطلع كامرتي واصور واطنش الموجودين كلهم

 

[SabaQueen]

مساء الخير بنات شلونكم ،،
ودي اذكركم بنات في الحين مسابقات تصوير بالكويت وايد من كذا جهه منهم :
النادي العلمي و عنوانها من أجل الكويت _ مسابقة فندق ساس عنوانها الكويت بالقلب
و مسابقة جامعة الكويت .
يلا بنات شدوا حيلكم و اللي تشترك تقول لنا علشان نحضر المعرض و نشجع بعض .. آنا ودي بس الياهال و الوقت ما يسعفني و صوري مكوده بصندوق يبيلهم فرز و دواره ..

البركه فيكم

 

[supermarket]

جروح تبتسم : ناطرينج بالنادي يمكن تتشجعين وتنضمين لنا وتحطين التوقيع


مس يلو : ماشاء الله التصوير رووووعة ةخاصة النوارس بالماي عجيييييييييييب

واذا على التصوير برة الكويت عادي ما استحي تصدقين حتى الكلونيل ومك دونالد اللي يكونون تماثيل برة المطعم اوقف معاهم واصور معاهم عاااااادي :eh_s(3): يعني لو كنت بالكويت جان مابقى واحد ماضحك علي


بس مشكلتي داخل الكويت اسسستحي جني مسوية شي غلط لان ربطنا التصوير بالهنود لانهم اهم بس يصورون كل شي وكل مكان

 

[supermarket]

جااااي : والله مواقفج تشجع وان شاء الله احاول اتذكر كلامج كل مااستحيت اطلع كاميرتي

بييينك : يالله تشجعي وطنشي الموجودين وادعيلي :eh_s(8):
وابي رايج بدورات بهاء شلونها تنصحيني فيه ببيت لوذان والا بدورات النادي العلمي؟؟

سباكوين : تصدقين كا ما اقرا عن الدورات يفز قلبي ودي اشارك بس توني عليمية اتمنى انتي وجاي ومس يلو وكل بنات النادي يشاركون... نبي همة كويتياتنا