نعم لأكل البيت و لا لغراش الجمعية .. ابتداءاً من 6 شهور !!

[قطيف]

ومنكم نستفيد , انا مقررة اليوم اعطيه أول وجبة

ناوية اهرس له بطاط لحاله

 

[غروري ذابحهم]

موضوع روعه
انا ولدي عمره 10 شهور حبيبي فيه اكزيما وعنده حساسيه من القمح والبيض معور قلبي مادري شنو اعطيه
بس اعطيه عيش مع بطاط وكوسا وجزر وبروكلي وزهره انوع فيهم طبعا ع الغدا والعشا وجربت عطيته الشوربه ماناسبته زادت حساسيته وقالي الدكتور عطيه شوفان بس موعارفه شلون اسويه له
الفواكه عنده حساسيه من البرتقال والموز اما التفاح افوحه بماي شوي وعقب اهرسه له بس ماتقبل طعمه مايبيه

 

[*kim*]

اب اب

 

[yasmeen_q8]

اب اب
موضوع حلو انا عمره ٦ شهور واسبوعين بس لاني طالبة واكون بالجامعه للساعه ٥ ونص ٦ المغرب امي تسويله حق الغدا خضرة وتحط عليها شوية صلصه عشان يصير لها طعم شكلها يذكرني بالمرقوقه بس بدون العجين
واعطيه الفواكة البرطمانات يحبهم حيل حق العشا
والصبح اعطيه بسكوت فيرليز مع حليب
بس
وصورت اللي تسوونه لعيالكم وانشالله بعطيه

 

[فرح79]

انا اعمله خضار كوسا وبطاطا وجزر
وكمان قرع عسلي وبطاطا حلوه طعمه روعه ومستصاغ للطفل ياريت تجربوه
وكمان مهلبيه تمر بتعرفو فوائده كتير ومعقود البرتقال واللي عندها اي استفسار تبعتلي على الخاص

 

[فرح79]

خواتي ترا في كتاب الطفل السليم مع الدكتوره ريم في وصفات حلوه وجديده
مثل السميد مع التفاح وكمان الشوفان والحليب حلو التجديد
مشكوره صاحبه الموضوع موضوعك حلو الله يجزاك الخير

 

[Um Tuki]

فديتكم استفدت منكم و بين وقت و وقت اغير له


على فكرة ولدي لما دش ٩ شهور قالت لي الدكتورة اعطيه ياكل كل شي بس مايكون فيه بهارات و مايكون حار ابدااااااا

فتميت اسويله بالاسبوع مرة او مرتين كفتة و بصراحة خذيت له الجاهز و قليته بالبيت استانس عليه ههههههه

بس الدجاج ما يحبه وايد و يحب السمج المقلب مع عيش ابيض

طبعا الحين ولدي عمره ١١ شهر في رمضان يتم السنة ان شاء الله

ربي يخليه و يخلي عيالكم و يحفظهم جميع يارب

 

[يارب احفظ عيالي]

جزاج الله خير حبيبتي على هالموضوع المفيد وايد نحتاج حق هالمواضيع


انا كنت اسوي لعيالي خضره واخلط معاها عدس وبقدونس


واسوي شوفان مع تمر بعد اينن لليهال ووايد ايحبونه اذا الياهل صغير احط ماي واذا عقب السنه احط حليب


بعد آخذ من ماي الدياي مع شوية عيش ودياي واخلطه في الخلاط


امممممم بعد شنو


روب مع عيش ابيض


والفواكه بعد كنت اخلط لهم موز اوتفاح او كمثرى او اعصر برتقال مع الوجبات


وطبعا" كل ماكبر الياهل تتنوع اكلاته اكثر لان الياهل اقل من سنه ماياكل بيض ولاحليب ولاقمح ......الخ ولازم لما تبتدون تأكلونهم لازم كل صنف ابروح عشان لو فيهم حساسيه ايبين



بس هذي اللي اتذكره الحين وان شاء الله اذا تذكرت شي برجع


الموضوع حلو اقترح انه يتثبت

 

[Um Tuki]

فديتج ماقصرتي ..

وربي يحفظ لج عياااااااالج ..

 

[Lulu_Perla]

موضووع حلو

اهم شي الاكل الطازج للبيبي و اهم شي شغل بيت

حسيت وايد على البيبي شوربة ماجي..! احس مو زينة لقبل عمر سنة


انا طريقتي استخدمي محضرة الطعام ايفنت من فيليبس للاطفال
تنباع في مذركير

تطبخ الاكل عالبخار و بعدين تقلبينها و تخلطه


جربت لبنتي تفاحة كبداية
اقطعها مكعبات صغيرة و اخلطها

قرع.. اطبخه بالبخار و اخلطه

بطاط مع جزر

بطاط مع قرع

عيش و قرع

و خذيت طريقة من وحدة من المنتدى تسوي مهلبية تمر
و هذي طريقتها

اول شيتاخذين 4 تمرات و تشيلين النواة منهم و تهرسينهم شوي بايدج
و حطيهم بكوب و صبي عليهم ماي حار
و حطي هيل حب معاه < زين لمعدتهم عن الغازات
خليه شوي 10 دقايق او نص ساعه يتنقع
قعب اخذي التمر و شوية من ماية و حطيه بالخلاط مع 4 قفشات حليب البيبي و نص قفشة شاي نشا
خلطيهم عدل عقب حطوهم عالنار لين يطبخ و يثقل و يصير نفس المهلبية
و حطوه بصحن البيبي و عقب عالثلاجة لين يمسك

انا اطلعه قبل لا اوكلها بنص ساعه عشان لا يصير وايد بارد عليها
و حبته طعم التمر مع الهيل وايد حلووو

 

[بسانت]

صج موضوع حلو ويطبق منكم

 

[فوديتني]

موضوع رووعه
انا استفدت من هذا المنتدى منتديات ثانيه
ابني عمره تسعة شهور ابتديت معه من عمر ستة اشهر
الغدا >> رز وخضار بطاطس كوسا جزر
احيانا ارز وفلفل رومي احمر وبطاطس
اضيف دجاج او لحم او سمك
ومرات مكرونة الحروف مع عصير طماط

السناك مشمش مسلوق مع الشوفان او تفاح وشوفان او كمثرى مع اضاف شوي قرفه
مرات عصيدة القرع >>قرع مسلوق مع التلبينه المحمديه << شعير محمص ومطحون
العشاء على حسب ممكن ازيد من الغداء او التلبينه المحمديه مع التمر
مشكلة ولدي مايحب عصير الفواكه

 

[فرح79]

خواتي متى نقدر نعطي الزبادي للطفل

 

[نـعـومـه]

انا كنت اعطيها سيريلاك بس الحين قلت اغير عطيتها قرع مع نشا مادري شوفان اتخربط بينهم هههههههه

وعقبها بجرب بدال القرع جزر كل اسبوع اغير لما اشوف الاكل مشه معاها هنيه اخلطهم كلهم مع بعض بطاط وقرع وجزر وجذي

 

[Um Tuki]

جربي تغيرين .. بس حاسبي اذا ولدج او بنتج فيهم امساك .. خففي بطاطس ..

و اما عن الزبادي فروحة انا ولدي 11 شهر .. وعطيته ياكل زبادي من عمر ال9 شهور ..

بس في ناس يقولون جنه من عمر السنة


بس انا اعطيه الزبادي البلدي .. مب مال نادك او ندى او المراعي .. أفود و أخف

 

[Bloom]

جزر قرع قرنبيط طماط وكيري

بروكلي بطاط جزر كيري

قرع بروكلي سمك السالمون وجبن بارمزان او كيري

 

[Um Tuki]

ااااااااااب

عشان الكل يستفيد

 

[عاشقة الككاو]

انا ولدي فية حساسية من منتجات القمح والبيض والبسكوتات واي شي فية حليب بقري ما عدا حليبة
لانه تركيبة خاصة << نفولاك الرينوفا للي فيهم حساسية من لاكتوز وبروتين البقر
طبعا ريحة وطعم الحليب الله لا يوريكم خااااااااااااااااااااااااااااااااااااايسة
وما يحب يشربة كلش
وتأخر ف التسنين والحبي بسبب اتوقع نقص الكالسيوم
ويادوب بطاط جزر كوسا وعيش ابيض
ومرات تفاح وبرتقال وعنب



صفار البيض ممنوع
الروب
الكاستر
معلبات دناو ودنايت ممنوع
السمك
الموز
فارليز
سريلاك

والله احترت شعطية

 

[فرح79]

ااااااب

 

[Um Tuki]

عاشقة الككاو .. شوفي من الأكل اللي البنات حطوه وياريت لو كل وحده حطت العمر لأنها تفرق اذا ولدج بيت 6 لي 9 شهور حطيه خفايف .. واذا من 9 و رايح اي شي عطيه

لحم و عيش و اي شي بس ما يكون فيه بهارات ..