نفسيتي تعبانه وايد وانا توني متزوجه 3 شهور

[دلوعه حيل]

شخباركم بنات

انا توني متزوجه 3 شهور تاخر زواجي سنتين بسبب ظروف عائليه وصبرنا انا وخطيبي وايد

تخيلنا بجد بنعيش عمر وردي ويا بعض من بعد الصبر اللي صبرناه على اهالينا...

اهو وايديحبني وهذي مشكلته

اقصد يبيني اكون مثاليه ف كل شي

اصلا ما يقنعه شي وما يمديني اتكلم واسولفله الا وينتقد اشياء وايد فيني..ينتقد ويجرح والمشكله يحكي ل لامه اني كذا وكذا يعني شغلات بايخه ومن تفسيره بروحه...


كنا مخططين للحمل بعد فتره بس قدر الله وما شاء فعل انا الحين حامل في الشهر ال2 والوحام هالكني ..ضعفت وايد وهفست بدوامي ومستشفيات وحوسه.....وفوق كل هذا ما عندي حد يساعدني بالبيت اهو مسكين يساعدني وايد بس بيتضايق بعد فتره

هالكني مقارنات بخالاته وعماته وامه ومادري منو.........كأنه ما عاجبه شي فيني ابد
اللي يسمعه ينتقدني بذيك الصوره يقول انه زوجته تورط فيها
مابي امدح نفسي والله شزيني وكثير خطبوني واستخارتي رست عليه ---حاولت افكر واحط اللوم ع نفسي بس لين متى ...بجد ثقتي بنفسي بدت تقل

انتقاداته من لما كنا بشهر العسل والله والله على اشياء ما تسوي ولا تجي فبال احد والمشكله يكبرها لين تصير مشكله كبيره

بخبركم اخر موقف كنا امس انا وهو رايحين بيت خالته قضينا نص اليوم كامل هناك وبصراحه تعبت وايد حسيت بلوعه وظهري عورني من الجلسه انا وايد ضعفت من الحمل وروحنا س 9 ونص بالليل....جتله شرايك ما نرد البيت ابي اتمشى وياك
ومشتهيه طبخه من المطعم الفلاني وبصراحه المطعم بعيد بس تعنالي وفرحت وايد من تصرفه شرالي العشا وقاللي شرايج نروح الحديقه قريب وايد من المطعم جتله اوكي

دشينا الحديقه وبصراحه انصدمنا من وصاختها

جتله حرام هالمناظر الحلوه وشركات التنظيف مو مهتمين ابد والناس بعد....... وبس ما جلت شي 2...وكنت مستانسه لان الحديقه كلها عوايل واطفال..رحنا ويلسنا على كراسي وما ادري الا بانتقاداته تنهال عليي

يجول انتي لين متى نظرتج سلبيه للامور جذيه .وينازعني.وانا مو فاهمه شي....اثاريه يقصد ليش قلتي ان الحديقه ليش هاملينها كذا.....

وبدا يقارن موقفي بمواقف امه واهله لما يروحو يتمشون ويصادفون اوساخ فالمكان و و و و و و ......وما سكت الا لمن بكيت بحرقه قدامه وسكتته قلتله شو بتسوي بزوجتك بايخه ونظرتها سلبيه ومستحيل توصل لدرجة خالاتك وعماتك وامك.....ورحت عنه وانا ابكي بقوه

الموقف والسبب بايخ بس والله و تدرون شكثر واقفلي لاي كلمه اقولها.....ويقلبها سالفه كبيره

بدايات حملي كان يهوشني اونه ليش كله مريضه وهامله واجباتج المنزليه و و و .....على فكره انا فبيت اهلي متعوده على حشم وخدم وبصراحه انا اللي طلبت منه اني مابي خدامه بداية زواجنا وكنت شايله الشغل كامل وتعلمت الطبخ وستانس فيني بس انقلب حالي من حملت وتعبت ...وانقلب حاله صار يهاوش اكثر ...وانا بصراحه تعبت نفسيتي منه وصايره ساكته ولا اتكلم وحنا بس 3 شهور

مادريحاسه اني ما وضحت الامور وايد لكم

بس هو يكبر المواضيع وايد ويسوي منها مشكله كبيره

 

[سحايب برنس]

عاااادي اغلبهم جذي يا اما انه يبيج توب وحد مثلج ومثاليه
او شايف انج شي واجد عليه بصراحه فقال أحاول اكسر فيها ع شان ماتشوف نفسها علي
انتي المفروض حبيبتي ماتبجين ولاشي اذا وجهج وقارنج بأحد ثاني قوليله كل وحده ليه شخصيتها ونظرتها وذوقها
وانا عاجبني الوضع او ابتسمي وطنشيه لين يمل والله يهديه لج ويعينج عليه

 

[ام كوثر2007]

حبيبتي هالامووور تكون في بدايه الزواج عاديه

انتي شخصيتج غير

وهو شخصيته غير

وانحطيتوا في بيت واحد يبيلكم فتره طويله عشان تاخذون علي اسلوب بعض وافكار بعض

انتي الحين حامل وصايره حساسه زياده عن اللزوم ..

حاولي تفهمينه انه مرحله الحمل صعبه اشوي بالنسبه للحرمه ويبيلها مراعااه وخليه يقرا بالنت او دزيله رابط معين لموقع او كتاب معين يقرا والمفروض اهو يكون واعي للامور هذى ....

وصدقيني قد ما تصبرين عليه قد ما يتسنع ويصير ادمي تناقشي معاه قوليله ما اقدر اصير بيوم وليله نفس فلان وعلان

ويمكن احاول واقدر ويمكن افشل لانه كل انسان له شخصيته ما يقدر يقتمص شخصيه امك او خالتك او يدتك

ولازم يتعود علي هالشي بس تعاليله بأسلوب حلووو

وعسى الله يسخره لج ان شاءالله .

 

[Gifts&Occaions]

الله يعينج

 

[ابتسامة نثيه]

الله يعينج ويصيبرج وانتي طوفي طوفي مو علا اي انتقااد تنااقشيينه وتلوعوزييينه هذه شخصيته صعب تتغير بيووم وليله حااولي تتغيرين عشاان مااينتقدتج صيري نفس اللي في باله عشاان يغليج ويحببج انا نفسج عرووس وتغيرت شخصيتي وطبعي عشاان زوجي يبي جذي عشاان ماايشووف غيررج حبيبتي خلج معاااه مطيعه صبووورة ماتعاندينه ماتعلقين علا انتقاادااته اللي ينتقدج فيهاا طوفي الاشياااء اللي تضاايقج عشاان تستمر الحيااه وانتي اذا هدت اعصاابه وانتقااده اللي علقه فيج قووليله بهداوة وبسعه صدر موبنفس الوقت جنج موعاجبج كلامهولا شراايج؟؟

 

[ديانا سبنسر]

مع العشرة يتغير

 

[سويرة بنت خالد]

هذا صراع الاطباع . يبي لكم لحد ما تتعودون على اطباع بعض وتتأقلمون

الله يسخره لج ويسخرج له يارب

 

[Tom ♥ Jerry]

.


موحلوة المقارنه

حياتي قعدي وياه و قوليله انج مو مقصره في زوجج و لا في بيتج
و انه المقارنه الي كل شوي يقارنج بناس ثانيين مو حلوة
قوليله ترضى كل سالفه و الثانيه اقرانك باخوي أو ابوي أو عمي او ولد عمي ؟!
أكيد ما ترضى و لا راح تتقبل الوضع اصلا !!
و انا الحين حامل و تعبانه و نفسيتي تعبانه بعد و هرموناتي متلخبطه و مزاجي على طول متعكر ..
خلك عون لي لا تصير فرعون علي ، حاول على الاقل اذا ما تسعدني لا تضايقني
كلامك و اسلوبك و طريقتك وياي قاعده اتعبني و تحبطني ؛$

انا انا و ما اقبل اتقارن بشخص ثاني ؛)
كلميه بكل هدوء و ان شاء الله يفهم كلامج

و شخصيه ريلج تبين طيب بس وايد متاثر بـ عايلته امه و ابوه و خواته وعماته
من جذي كل كلمه والثانيه يكلمج عنهم ،
و مبين عليه دقيق و حساس في بعض الامور
دليل انه من قلتي الحديقه مو حلوة سواها سالفه !
انتي عرفي شخصيه زوجج شنو .. من النوع الحساس احتفظي بـ كلامج شوي ؛*

موفقه والله يقومج بالسلامه ؛$

 

[معزوفة عشق&]

اتعوذي من ابليس واستهدي بالله حبيبتي ..
اقعدي معاه وفهميه انك حامل والحامل خاصه في الشهور الاولى راح تعاني من ضغوطات نفسيه واكتئاب والواجب عليه يتحملك ويراعي ظروفك ...
وادعي دايم في الثلث الاخير ان ربي يجملك بعينه ويسخركم لبعض ...وبالتوفيق لك

 

[ابدا يالغالي مانساك]

اوووووف الله يعينج بصرااااحه
ويسخره لج صبري شتسوين انتي حامل
مع الايام بتفهمين طبعه وهو يفهم طبعج
توكم معاريس وتصير في الاغلبيه مو انتي وبس

 

[! بــدويه وآآيــد !]

،


شوفي حبيبتي يقارن باحد مو حلو قولي له كل واحد وشخصيته اعدل من شخصيتي اي لكن اتغمس شخصية غيري لا
وسالفة يدقق على كل شي عادي اول الزواج جذي انا زوجي كان يجيك على القلاص والقفاش لما اجيبهم له متخيله؟؟ كنت احس روحي خدامه توني مشتغله عندهم وبيتأكد من نظافتي وكنت حيل حيل اتضايق وقالت لي وحده عادي اول الايام لازم التدقيق والحين ماصار دقيييييييييييق كلش ولا يجيك على شي ولا يطالع بالشي اذا جبته

بس سالفة كل شي يقوله لامه قوليله ان زوجي ستري وغطاي لازم تستر على عيوبي وتعدلهم بيني وبينك ودشي له من باب الدين فيه حديث بعد ماتفهمينه ان هالشي مضايقج وجذي دزي له هالمسج (( قال رسول الله صلى الله عليه وسلم: «إن من أشد
الناس عند الله منزلة يوم القيامة الرجل يفضي إلى امرأته وتفضي إليه ثم ينشر سرها ))

وسالفة ينتقدج وانتي حامل الدكتور او الدكتوره الي تراجعينها اخذي رقمها ودقي عليها وقوليلها مشكلتج قولي نفسيتي تعبانه واذا جيت المراجعه الثانيه نبهي على زوجي ان نفسية الحامل جذي والخمول والكسل شي طبيعي خليها تفهمه بدون لايحس انج ورا الموضوع

الله يعينج حبيبتي مافيه رجال كامل وعيوب زوجج بأذن الله تتعدل مع الوقت بس يبيلها شوي تصبرين

 

[زوجة عزيز]

،


شوفي حبيبتي يقارن باحد مو حلو قولي له كل واحد وشخصيته اعدل من شخصيتي اي لكن اتغمس شخصية غيري لا
وسالفة يدقق على كل شي عادي اول الزواج جذي انا زوجي كان يجيك على القلاص والقفاش لما اجيبهم له متخيله؟؟ كنت احس روحي خدامه توني مشتغله عندهم وبيتأكد من نظافتي وكنت حيل حيل اتضايق وقالت لي وحده عادي اول الايام لازم التدقيق والحين ماصار دقيييييييييييق كلش ولا يجيك على شي ولا يطالع بالشي اذا جبته

بس سالفة كل شي يقوله لامه قوليله ان زوجي ستري وغطاي لازم تستر على عيوبي وتعدلهم بيني وبينك ودشي له من باب الدين فيه حديث بعد ماتفهمينه ان هالشي مضايقج وجذي دزي له هالمسج (( قال رسول الله صلى الله عليه وسلم: «إن من أشد
الناس عند الله منزلة يوم القيامة الرجل يفضي إلى امرأته وتفضي إليه ثم ينشر سرها ))

وسالفة ينتقدج وانتي حامل الدكتور او الدكتوره الي تراجعينها اخذي رقمها ودقي عليها وقوليلها مشكلتج قولي نفسيتي تعبانه واذا جيت المراجعه الثانيه نبهي على زوجي ان نفسية الحامل جذي والخمول والكسل شي طبيعي خليها تفهمه بدون لايحس انج ورا الموضوع

الله يعينج حبيبتي مافيه رجال كامل وعيوب زوجج بأذن الله تتعدل مع الوقت بس يبيلها شوي تصبرين

معاها :rerrerek::rerrerek::rerrerek:

 

[اخت خالتهم]

أولا كلهم والله جـذي مو عبـالج انتي بـروحج
احنا مرات نتهـاوش على رموت ومرات عـلى جوتي كرمج الله والله
يعني مو عبـالج اول سنة بتكون بيرفكـت
بالعكسسئلي أمج بتقولج ما حسيت بالراحه الا عقب سنه او سنتين او ثلاث
انا امي تقول 5 سنين عقب ارتحت

يبيله وقت لين نفهم الانسـان اللي جدامنـا ليـن نعـرف التصرف معـاه لين نتبـع اسلوب معيـن

ما اقـولج انتي غلط بالعكس اهـو الغلط .. و حيل دقيق
بس كلهم كلهم جذي
انا ريلي يقـول ملاحظج اذا شربتي ماي ما تغسلين قـلاصج
خوو مااي اكيد برد اشرب مرة ثـانية

عـااادي حيـاتي .. و انتي حامل عشـان جذي هرمونـاتج لو وقت ثاني ولو مو حـامل جان ما بجيتي يمكـن

الله يعينج و يوفقج ياارب .. بس تصـرفـاتـه مبين وايد يحبج مو شوية
الله يخليكم لبعـض

 

[katkoota90]

حبيبتي شغلي سورة البقرة بشقتج

هذي عين وما صلت على النبي

حاولي تطوفين .. وتغيرين الموضوع بشي احسن

هذا طبعه وان شاءالله بيتغير مع الايام

بس انتي هدّي وطوفي وتحملي المشاكل الي دايما تصير بين اثنين


الله يخليكم لبعض ولا يفرقكم .. ويقر عينج وعينه بشوفة البيبي

 

[عنزيه ومافيه شك]

مرحبا حبيبتى الله يعينك والله كانك تتكلمين عنى انا وزوجى مابي احطمك انا لى 5 سنوات متزوجه على هالحال بس يكسر مجاديفي على قولتهم واله حتى خوانه واهله دايم يقولوله احمد ربك على اللى عندك بس ماغير نقول الشكوى للله والله يصبرك على فكره انشاءالله تقومين بسلامه ويشوف المولود يغير نضرته الله يوفقك

 

[FJ style]

حبيبتي والله والله والله طبيعي هالامور تصير بين الازواج الجدد
اغلبنا مرينا بهالحال ونفس هالسوالف بالضبط

الصبر ثم الصبر ثم الصبر
حاولي ما تناقشينه وايد وخليه اهو يسولف
انا زوجي ذبحني قبل بامه وطباخها وتضحياتها ووووو
صبرت وشوفيه الحين تعدل الوضع
ترى يبيلج فتتتترة
ما تستقر الامور الا بعد ٣ سنين عالاقل من الصبر عالاطباع والاختلافات وووووو وبعدها سمن عالعسل
بتقولين اصبر ٣سنين
طبعا
كل شي بالتضحيات والصبر يتم
انتي مدحي امه جدامه او ان قال شي عنها قوليله اي ماشاءالله عليها الله يخليها وووو

 

[فرزاشيهـ]

مع >> توم اند جيري


حبيبتي انتي نفس حالتي تقريبا كلهم جذي قطيعه ! يحنون يبون بيبي و حمال ولا حملنا قالوا انتي كله تعبانه كله نايمه و دلوعه و تدلعين فوق راسي و بلا بلا بلا و يقارن بفلانه و علانه انا مو ذنبي ان فلانه صراحه over power عندها طاقه ماشالله انا غير و هي غير بعدين انا كل ما قارني اب احد اقوله >> عفوا يازوجي العزيز انا غير و هي غير لاتقارني بحد بليز ! < و اكتشفت هالاسلوب يخليه يستحي يقارن مره ثانيه على المد البعيد القصير لول ،.~ الله يعين بسس

 

[دلوعه حيل]

اشكر الجميع على ردودهم الحلوه,,,,, ارتحت شوي الحمد لله

تدرون شو سويت؟؟؟؟

صرت يوم كاااامل اتعامل معاه على حسب انتقاداته لي اللي مادري من وين يابها..........

كل شي مو صحيح انتقدني فيه خليته من طبعي ...طبعا ما عجبه وشاف اني متغيره وصرت موزينه فهم انه هذي انتقاداته وصرت اطبقها ع نفسي يعني بغيت افهمه بطريقه غير مباشره انه كل انتقاداته كانت مو فمحلها وكانت غلط والدليل اني من طبقتها ع نفسي لاحظ وتضايق عاد احين من حقه ينتقد مو قبل ....وصرت هااااااااااااااااديه جدا وشكله اشتاق لسوالفي

وطبعا هو لاحظ هالشي وفهم وعلى اخر اليوم ما دريت الا وياني كانه يعدل الجو ويتلجط مني ومناك

والحمد لله يت عندنا امه وعمته امس بالليل ويلس يمدح فيني وانا مبطله حلجي مستغربه بس ستانست

 

[لبـى قلبـي]

حبيبتي شغلي سورة البقرة بشقتج

هذي عين وما صلت على النبي

حاولي تطوفين .. وتغيرين الموضوع بشي احسن

هذا طبعه وان شاءالله بيتغير مع الايام

بس انتي هدّي وطوفي وتحملي المشاكل الي دايما تصير بين اثنين


الله يخليكم لبعض ولا يفرقكم .. ويقر عينج وعينه بشوفة البيبي

على اي اساس قلتي عين ؟

البنت ماذكرت اي شي يدل على انها عين !!


وإذا قصدك على الخلافات
عمر الخلافات ماكانت دليل على العين !!

 

[ماركة انثى‘]

حبيبتي هالامووور تكون في بدايه الزواج عاديه انتي شخصيتج غير وهو شخصيته غير