^^نقلتي عيالج من خاص إلى حكومة وندمتي؟؟؟ تعالي قوليلنا تجربتج علشان نستفيد

[برونزية رشيقة]

السلام عليكم يا بنات شلوووووووونكم ؟


طبعا الموضوع واضح من العنوان .. أبي العضوات أللي نقلوا عيالهم من مدرسة خاصة إلى مدرسة حكومية .. يتكلمون عن تجربتهم .. علشان العضوات اللأخريات يستفيدون ..

أو نتدارك بعض الأخطاء قبل وقوعها ...

وأنا راح أبدي وأكون أول وحدة .. بتكلم لكم عن تجربة صديقتي عندها بنتين فوق راس بعض .. دخلتهم وحدة من المدارس الخاصة القوية والمعروفة جداااااااااااااااااا

وخلتهم في هالمدرسة إلى رابعة إبتدائي .. لاحظت المستوى المنخفض لهم في كل المواد ماعدى اللغة الأنجليزية لأن المدرسة نظام بريطاني .. فقررت تطلعهم خصوصا إن بعد سنة راح يدخلون أخوانهم الذكور لنفس المدرسة بالصف الأول الابتدائي الكبير والثاني راح يدخل كي جي سنة أولى .. وعليكم الحساب وكسسسسسسسسسر ميزانية الأسرة !

مع الحسبة طلع الحساب السنوي لأربع عيال في مدرسة خاصة بيكلفها قريب التسعة آلاف دينار سنوياااااااااااااااااااااااا ...

فقررت تكنسل السالفة ككل ..

طلعت البنت الكبيرة من رابعة ابتدائي ونقلتها سيدة مدرسة حكومية .. وبعدها بسنة نقلت أختها أللي أصغر منها بسنة ..


التجربة أسفرت عن :

1- البنتين كل سنة دور ثاني في مادة اللغة العربية

2- الرياضيات سقوط والله ستر بغوا يعيدون السنة بسبة هالمادة

3- مدرسيين خصوصيين من طلعتهم من الخاص والبنات وصلوا للثانوية ولحد الآن لازم مدرس للغة العربية وإلا ما يمشون .. بالإضافة إلى مدرس للرياضيات

4- ماكو صداقات أول جم سنة لأن صديقاتهم كلهم بالخاص .. وتوهم تأقلموا وصارت عندهم صديقات

5- بعد البلوغ صار عند البنتين ( تعظيم ) للثقافة الغربية و ( عدم اهتمام بتعاليم الإسلام وضحك وتطنز عالتعاليم الإسلامية ) لأن أساس التعليم من الصغر في مدارس نظامها بريطاني أثر على هالشي


هذي تجربة صديقتي سردتها لكم .. مثل ما قالتها لي ..




وألحيييييييييييييييييييييين ناطرة مشاركات العضوات .. خلونا نستفيد

 

[برونزية رشيقة]

خل أشرح لكم شنو يعني ( تعظيم للثقافة الغربية ) على حساب تعاليم الإسلام ..

يعني يبون حفلات تنكرية هالوين .. وعارفين الكريسماس .. وإيستر عيد القديسين .. ويعرفون بابا نويل وعندهم مو حرام ؟؟؟؟ شفيه بابا نويل أصلا يحب السلام ويحقق الأمنيات ..


وحاولت تحجبهم .. كاااااااااااااااااااارهين الحجاب .. وزعلوا من الأم جم مرة على سالفة ما نبي نلبس الحجاب ..


هذي الشغلات أللي ذكرتها .. وإذا تذكرت شغلات ثانية بقولكم ..

 

[حجيه هيونه]

احسن شي ثنائيات اللغه

ياخذون اللغه وبنفس الوقت اهتمام باللغة العربيه والمواد الثانيه

 

[مفرفشة ومنعنشة]

شوفي حبيبتي المدارس الخاصة مونفس الشي وجوها مو واحد ، يعني في مدارس خاصة تكون مختلطة من الروضة للثانوية وفيها جنسيات مختلفة وعندهم وايد مدرسات اجنبيات مومسلمات ( في مدارس مدرسينهم اجانب ومسلمين واحيانا المدرسات متحجبات ) هالنوع من المدارس وااااايد فري وجوها العام وايد منفتح فتلقين الطلبة الي فيها غالبا وايد منفتحين وكل شي عادي ونادر تلقين بنت متحجبة ، وغالبا هالمدارس تعطي الطلبة منهج العربي والاسلامية مال الحكومة وبس بدون اي اضافة او زيادة من عندها عشان تقوي اللغة العربية والدين عند الطلبة ، فتلقين الطلبة غالبا ضعاف بالعربي ومعلوماتهم جدا سطحية بامور الدين .
وفي مدارس خاصة يفصلون البنات عن الاولاد من الابتدائي او من المتوسط فالبنت او الولد يتخرجون وهم يعرفون انه في حدود لعلاقة البنت والولد وانه موكل شي عادي ، ويحطون لهم منهج مساند للغة العربية والاسلامية عشان الطلبة يتقوون ومدرسينهم غالبا مسلمين حتى لو كانوا اجانب ، وتلقين وايد طالبات متحجبات واغلب الطلبة كويتيين . الي متخرجين من هالمدارس سهل يتأقلمون مع مجتمعنا وما يحسون انهم غير عن الباجين الا بنوعية الدراسة وطريقة التدريس لكن تشوفينهم محافظين عالعادات والتقاليد ومو مختلفين عن المجتمع الي عايشين فيه .

 

[دروبك يالسهر]

لا والله اسمحيلي اقولج ان بنات رفيجتج اساسا ضعااف في الدراسة يعني مانفع معاهم لا مدرسة خاصة ولا حكومية وفوق كل هذا مدرسين خصوصيين وخصوصا انج تقولين انهم كانوا في مدرسة قووووية يعني انتي شلون حكمتي انها قوية الا انها ممتازة وانا ولدي في مدرسة امريكية وماشاء الله التاسيس عندهم رووووعه في اللغتين العربيه والانجليزية وعيال عم ولدي بمدرسة خاصةبس لان العيال اساسا مايحبون الدراسة والله ولا فلحوا فيها وحطوا اللوم على المدرسة انها مو قوية وفاشله وبنفس الوقت بنت خالتي مدخلة ولدها في نفس المدرسة اللي فيها عيال عم ولدي وتمدحها وااايد يعني بختصار هذا يرجع للطفل اذا اهو ذكي والا ضعيف

 

[برونزية رشيقة]

رفع


ولي عودة للموضوع .........

 

[Nona77]

شوفي حبيبتي المدارس الخاصة مونفس الشي وجوها مو واحد ، يعني في مدارس خاصة تكون مختلطة من الروضة للثانوية وفيها جنسيات مختلفة وعندهم وايد مدرسات اجنبيات مومسلمات ( في مدارس مدرسينهم اجانب ومسلمين واحيانا المدرسات متحجبات ) هالنوع من المدارس وااااايد فري وجوها العام وايد منفتح فتلقين الطلبة الي فيها غالبا وايد منفتحين وكل شي عادي ونادر تلقين بنت متحجبة ، وغالبا هالمدارس تعطي الطلبة منهج العربي والاسلامية مال الحكومة وبس بدون اي اضافة او زيادة من عندها عشان تقوي اللغة العربية والدين عند الطلبة ، فتلقين الطلبة غالبا ضعاف بالعربي ومعلوماتهم جدا سطحية بامور الدين .
وفي مدارس خاصة يفصلون البنات عن الاولاد من الابتدائي او من المتوسط فالبنت او الولد يتخرجون وهم يعرفون انه في حدود لعلاقة البنت والولد وانه موكل شي عادي ، ويحطون لهم منهج مساند للغة العربية والاسلامية عشان الطلبة يتقوون ومدرسينهم غالبا مسلمين حتى لو كانوا اجانب ، وتلقين وايد طالبات متحجبات واغلب الطلبة كويتيين . الي متخرجين من هالمدارس سهل يتأقلمون مع مجتمعنا وما يحسون انهم غير عن الباجين الا بنوعية الدراسة وطريقة التدريس لكن تشوفينهم محافظين عالعادات والتقاليد ومو مختلفين عن المجتمع الي عايشين فيه .

انا ودي في المدرسه اللي تجمع بين الانجليزي والدين والعربي
انا ةالله مرتاحه من مدرسه المجموعه الانجليزيه للتعليم المبكر بس اللي مو حلو ان بنتي راح تروح اولي ابتدائي وهذي في السالميه وانا خايفه من البعد
اشرايج بالانجليزيه للبنات اللي في سلوي

 

[مفرفشة ومنعنشة]

انا ودي في المدرسه اللي تجمع بين الانجليزي والدين والعربي
انا ةالله مرتاحه من مدرسه المجموعه الانجليزيه للتعليم المبكر بس اللي مو حلو ان بنتي راح تروح اولي ابتدائي وهذي في السالميه وانا خايفه من البعد
اشرايج بالانجليزيه للبنات اللي في سلوي

مادري عنها حبيبتي ... بس الافضل تدخلين تجمع امهات الانجليزية للبنات اذا مسوين تجمع او تسألين احد مدخل عياله هالمدرسة :eh_s(17):

 

[رفرف]

بالنسبة لي ماجربت بناتي صغار ليلحينهم بخاص

بس تعليقي على تجربة رفيجتج بناتها من الاول ضعاف يمكن مستوى المدرسة ما كان مناسبهم ..
وضعف العربي ماله شغل لان الخاص يمشون على منهج الحكومة فكان المفروض تتداركه من الاول لأن العربي تراكمي اذا ضعاف من البداية صعب يتقوون لي كبرو ..
وهم جانب الاخلاق والعادات اهيه لها دور من الصغر تعلمهم الصح والغلط لا يتأثرون بكل شي يشوفونه لان الام تربي مو المدرسه وهي دورها تحاور عيالها وتصحح اي مفهوم غلط عندهم وتخلي عندهم اعتزاز بدينهم

 

[manarah]

رفع

 

[برونزية رشيقة]

رفع بمناسبة العودة للمدارس

 

[عشق]

4 ابتدائي وطلعتهم للثانويه واهم متعلقين بعادات الغربيه
انا بنتي للحين بثانيه روضه بخاص ما اقدر احكم
بس الحجاب والعادات من البيت اعتقد ماله شغل المدرسه
بنتي مشتريه لها عبايه وشيلات وتطلع مرات معاي واهي لابستهم واخليها على راحتها ولا اقول لها شي
ومره بحفله اطلبوا ملابس تنكريه حق مهن المجتمع قالت انا بصير ام وابي ملابس ام
كنت مسافره واختي ما رضت تلبسها
لما رجعت كلمت الناظره وقلت مابي اخلي شي بخاطر بنتي لبستها عبايه وحجاب وخذت لعبه معاها الروضه وراحت

 

[Q8_ButterFly]

4 ابتدائي وطلعتهم للثانويه واهم متعلقين بعادات الغربيه
انا بنتي للحين بثانيه روضه بخاص ما اقدر احكم
بس الحجاب والعادات من البيت اعتقد ماله شغل المدرسه
بنتي مشتريه لها عبايه وشيلات وتطلع مرات معاي واهي لابستهم واخليها على راحتها ولا اقول لها شي
ومره بحفله اطلبوا ملابس تنكريه حق مهن المجتمع قالت انا بصير ام وابي ملابس ام
كنت مسافره واختي ما رضت تلبسها
لما رجعت كلمت الناظره وقلت مابي اخلي شي بخاطر بنتي لبستها عبايه وحجاب وخذت لعبه معاها الروضه وراحت

يحلوها اسم الله عليها عشق انتي بنتج في بلاي قروب صح ؟

 

[عشق]

اي حبيبتي في بلاي قروب بسلوى

 

[miss swan]

بصراحه يمكن الام ماتجابل دراستهم متكله على المدرسه
وبالنسبه حق الحجاب ماادري بس احس في مدارس خاصه تقوي شخصية الطفل لي درجة يصير ماصخ مايحترم شي
بس بالدرجه الاولى يرجع لتربية الام​

 

[ام دودو المزيونه]

المدرسة جانب تعليمي فقط والأساس البيت بالأخلاق والدين وما هومسموح وممنوع يتعلمه الطفل من البيت
بعدين اساسا المدارس البريطانية والأمريكية انشأت لهالجاليات فشئ طبيعي عندهم مبادئ تختلف عنا فمن الأساس الي تبي تحافظ علي اخلاق اطفالها كمجتمع معتدل ( لاحظوا ما قلت محافظ ولا منفتح ) فيه مدارس خاصه فيها طلبها وبالكويت كل انواع المدارس الخاصة موجوده بس يقع الدور بالأختيار علي الأهل هم الي يتحملون نتيجة اختيارهم لنوع التعليمي الي يمشي مع هواهم
فيه كويتيين منفتحين ويعجبهم النظام الغربي فتلقيت العيال بمدارس امريكيه واغلبهم علاقته بالدين ضعيفه لأن الأهل يبون هالشئ
وفي المعتدلين يبون التعليم الراقي مع المحافظه علي الدين فيختارون من يمشي مع مبادئه من مدارس ( مدارس تفصل الجنسين من الأبتدائي ) وفي من يرغب بالتعليم الديني القوي (مدرسة الرؤية تجبر الطالبات علي ارتداء الحجاب من عمر معين )
العيب مو من المدارس العيب من اختيار الأهل الخاطئ بالأساس
بنتي تخرجت من بلي غروب حضانة وروضة فقط لأني ابي تأسيس للغة الأنجليزية قوي وفيه اسباب اخري لأختيار للخاصة بمرحلة الروضة ما ابي الحكومة رياض اطفال وحاليا اهي الأبتدائي رابع حكومة ( وأن لاحظت فرق كبير بين النظامين من اهتمام ومراعات لنفسية الطفل ) فتحسفت اني طلعتها من الخاصة للحكومة
وحاليا اخوها ببلي غروب بمرحلة الروضة ايضا وشكلي بخليه معاهم بالأبتدائي علي الأقل

 

[برونزية رشيقة]

بعد نبي مشاركات بنات ..

إذا تعرفون ناس نقلوا عيالهم لحكومة وتندموا ؟؟؟

أو بالعكس تأسسوا عيالهم صح بالحكومة !

 

[عبق الزهور]

انا ولدي نفس حالة بنات رفيجتج تأسيسه بالعربي ولاشي
وافكر انقله للحكومه ومتردده
اهو في 4 ومايفهم بالعربي ولاحرف

 

[miss_uk]

بنات انا بقولكم تجربتي انا عيالي مو مدارس خاصه الا ببريطانيا بكبرها
ولدي كبر معاهم من انولد
اهم عاداتهم وحياتهم غير بس بالمدرسه الدين ما يدرسون بس في اشياء بحياتهم مثل الكريسماس واللحم الخنزير هذي ماقدر امنعهم فيها خصوصا عيالي ياكلون الغدا كل يوم بالمدرسه.
طبعا اعيالي بفضل الله ما ياكلون منه لانه موصيه المدرسه بالبدايه ولدي كان يسالني ليش ربعي كلهم ياكلون هام ساندويج وانا لا،، قلت لا احنا ما ناكله احنا ناكل دياي ومرت السنين ومره بالجمعيه قالي ابي هام قلت له انا ما احبه ولا بابا ولا اختك ولا احد بالبيت وقلت رايي من غير اي انفع وكا ما ادش الجمعيه من غير مايقول انا اقول يييعععع هام ماحبه،،اللحين اهما اسم الله عليهم ابروحهم يقولون حق ربعهم انه ما ياكل خنزير وكل ما عطس قال الحمدالله واذا خلص اكل قال
وفاهم الله وانه لازم نشكرة،،
الله يتمم عليهم ان شالله
كل هذا واهوا بمدرسه خاصه في بريطانيا نفسها مافيها لا دين ولا عربي ولاهم يحزنون

 

[برونزية رشيقة]

بنات انا بقولكم تجربتي انا عيالي مو مدارس خاصه الا ببريطانيا بكبرها
ولدي كبر معاهم من انولد
اهم عاداتهم وحياتهم غير بس بالمدرسه الدين ما يدرسون بس في اشياء بحياتهم مثل الكريسماس واللحم الخنزير هذي ماقدر امنعهم فيها خصوصا عيالي ياكلون الغدا كل يوم بالمدرسه.
طبعا اعيالي بفضل الله ما ياكلون منه لانه موصيه المدرسه بالبدايه ولدي كان يسالني ليش ربعي كلهم ياكلون هام ساندويج وانا لا،، قلت لا احنا ما ناكله احنا ناكل دياي ومرت السنين ومره بالجمعيه قالي ابي هام قلت له انا ما احبه ولا بابا ولا اختك ولا احد بالبيت وقلت رايي من غير اي انفع وكا ما ادش الجمعيه من غير مايقول انا اقول يييعععع هام ماحبه،،اللحين اهما اسم الله عليهم ابروحهم يقولون حق ربعهم انه ما ياكل خنزير وكل ما عطس قال الحمدالله واذا خلص اكل قال
وفاهم الله وانه لازم نشكرة،،
الله يتمم عليهم ان شالله
كل هذا واهوا بمدرسه خاصه في بريطانيا نفسها مافيها لا دين ولا عربي ولاهم يحزنون

مشكورة حبيبتي على ذكر تجربتج لنا .. واستغربت من موقف ولدج على لحم الهام(خنزير) جان قلتي احنا مسلمين ما يحل لنا :eh_s(22):