واحة الجمال ...عالمي الخاص ...الجزء الثاني , حياكم

[أحترت أعبر]

مرحبا كويتيات ...مثل ما وعدتكم هذا هو الركن الثاني من واحتي الخاصه بعالم الجمال ....
اليوم طبعا راح اكلمكم عن الاضاءة والبلاشرات اللي عندي , واكيد مع رايء الشخصي فيها من ناحية جودتها وعيوبها من كل النواحي
واول شي راح اتكلم عنه...

البلاشرات

​

من اليمين ...هالمدورين من كرولاين واحد لونه ذهبي على برونز ويصلح كبرونز وكمان ينفع تحطينه فوق البلاشر,يعطي لمعه حلوه وراقيه والثاني لونه أحمر فاتح ,سعرهم فيهم لان الوانهم حلوه وقويه وتثبت على البشره والاحلى الكميه اللي بالعلبه كبيره يعني مو بسهوله يخلص من عندج , نصيحتي لو بتاخذون بلاشر من هالماركه أخذوا الالوان اللي تستعملونها بشكل دائم (للدوام او الجامعه مثلا )بهالطريقه بتستفيدون منه اكثر ...اللي يمهم هذا ديور الوانه ورديه حلوه وشيمري يصلح كبلاشر او حتى للوجه يعطيج اضاءه حلوه وينور البشره , سعره فيه وجودته هم حلوه ...​

​

من اليمين ...نارس ( Angelika) وردي عذااب ونارس شدواتهم وبلاشراتهم ما عليها كلام , اللي بعدها بوبي بروان ( Slopes17)ودي هادي بدون شيمر كميته شوي وبسرعه ينحفر بس ممتاز من ناحية قوة اللون والثبات عيبه غالي مقارنة بكميته , استي لودر ...كل شي حلو فيه ان حبيتيه بلاشر نفع وان بغيتيه برونز يصير وان حبيتي شوية اضاءه تأخذين من اللون الوردي على عظمة الخد هم يصير ,سعره فيه , كارجو ...الحلو في هالبلاشر هالخطوط اللي مسوينها ,يعني كل لون كأنه بروحه ,شايفين اخر لون من فوق محفور ,تدرون ليش ؟؟؟أحطبصبعي واحطه على الخشم من فوق واخذ اللون الاغمق واحطه على جوانب الخشم ,وكمان اخلط الالوان بالفرشه واستعمله على وجهي كله ...سعره فيه ووايد حبيته ...​

​

من اليمين ,هذولا من YSL حلو شكلهم لكن للاسف لا لون ولا ثبات ,وحتى لما اجي احطهم لازم وجهي يتبهدل ...خسارة بيزاتي :krkrkr: اللي بعده هذا من لانكوم ,حلو لونه ويثبت بس تحتاجين تردين عليه بعد ساعه علشان يظل اللون قوي مثل ما اول ما حطيته ,كميته شويه وسعره غالي , الباليت هذا من ميك اب فور ايفر , وهذولا مو بلاشرات ,اصلا كانو شدوات بس انا عجبتني الوانهم كبلاشرات أستخدمهم للدوام اكثر شي ,الباليت عملي وحجمه معقول بالنسبه للشنطه والالون حلوه بس لازم تعيدين عليها كل بين فتره علشان اللون ...مو كل غالي سعره فيه ​

​

من اليمين سينما , هالماركه الوانها وجودتها تنافس اجدعها ماركه بالسوق , ثبات وقوه ليس لها مثيل واسعارهم ولا احلى جربوها وادعو لي بنات ....الثاني من بيوتي بيرل ,حلوه الالوان والثبات والقوه مثل سينما والسعر ولا احلى ...اخر واحد قولدن ليدي ,الوانهم حلوه لكن للاسف تحسينه بودري زياده عن اللزوم ,يعني لازم يتنثر من العلبه وانتي تحطينه ,مو ثابت لازم كل شويتين تعيدين عليه وسعره حلو ورخيص ....​

​

هذولا برونزرز قلت احطهم بهالموضوع مره وحده ...من اليمين كلارنس وطريقته مثل YSL , له نفس العيوب بس هذا فيه لمعه اكثر ,ينفع كلمعه فوق البرونز بس بروحه ما ينفع وسعره غالي وكميته شويه ...الثاني ديور ليمتد اديشن ومعاه قلوس يجنن ,سعره غالي واللون حلو بس تلاقون احلى منه وارخص ... شانيل ,هالبرونز احبه وايد برغم انه غالي بس لونه حلوه يعني البرونز اللي يخلى البشره مشرقه وحلوه مو اللون اللي يكتم الوجه ...غالي بس يستاهل ​

​

من اليمين جيفنشي , ما ادري ليش شريته ,الوانه تصفر الوجه وما يناسبني خير شر (حسبي الله عليك يا ابليس ) الثاني من بوبي بروان (Aruba-Bali Brown)الوانهم واحد افتح من الثاني بدرجتين تقريبا , يستاهلون سعرهم واحد برونز والثاني ممكن يكون لمعه او اضاءه فوق البرونز .روعه شويه عليهم ...​

​

MAC ​

الجوده كلكم تعرفونها يعني ما بقول شي جديد ...بس بحط لكم الاسامي بس انتبهو هالمره من فوق وراح ابتدي من اليسار ....Peaches-Plum Floolery-Breezy-Doliymix-Love Joy-Gigly-Sakura-PinkSwoon والوسط My Paradise من الكوليكشن الاخير ​

​

أمممممم تدرون ليش هالاثنين حطيتهم بروحهم .؟؟؟؟ سألتوني ليش ....لانهم تقليد مو اصليين ,لكن الحين أنا بسألكم ,لو كنت صفطتهم مع عيال عمهم اللي فوق كنتوا عرفتوا انهم تقليد ؟؟؟؟:eh_s(10):,جودتهم ممتازه والله العظيم ما يفرقون عن الاصليين بشي غير السعر , الوانهم تطلع بسرعه وثابتين وحتى العلب نفس الشي بالضبط ...الله يخلى التقليد ولايحرمنا منه يارب ​

الاضاءات

​

MAC
بس بقولكم شي عنهم ,من اليمين هذا Honour لونه فانيلا على ذهبي احطه على عظمة الخد او فوق البلاشر .الثاني لوووس باودر من اليمن لونه صدفي واسمه Sliver Dusk والثاني لونه ذهبي واسمه Golden Bronze أستخدمه مثل الاولي

​

من اليمين ...جيرلان لمعه على شكل بخاخ ما تستاهل سعرها ,تطير يسار ويمين ولا تثبت (خسارة البيزات بس . الثاني هذا كريم فيه لمعه ينخلط بكريم الاساس او ينحط فوق الاساس من ماركه ايطاليه اسمها Bottaga Verde حلو بس ما يثبت واوقات يزيد شوي ويخرب الاساس كله ,أو يمكن انا ما عرفت له ...واخيرا باليت كرازا ,غنيه عن التعريف هالماركه , والباليت روووعه كل الوان الاضاءه الاساسيه موجوده فيه ,ثابت وسعره ولا احلى ويستاهل اكثر بعد ​

​

من اليمين ...كرولاين أضاءه صدفيه على وردي فاااتح ...شهادتي مجروحه في هالماركه ,كل شي فيها حلو واسعارهم يستاهلونها برغم الكميه البسيطه بس لانها اضاءه تدوووم عن البودره ...الاثنين اللي جنب بعض من K Star وقالوا لي انها نفس ماركة كرولاين قبل لا يغيرون الباكيج والاداره بس ماني متاكده ...الثبات والقوه روووعه واسعارهم ماني ذاكره واحد فاتح على ابيض والثاني شوي برونز بس بعد فاتح اللون ​

المره الجايه اكلمكم عن الشدوات
اشوفكم بخير يا حلوات
خذوا ورده:eh_s(7):​

 

[ޢޢޢإيمانޢޢޢะۣۨ>]

تسلم إيدج ويعطيج العافية على المجهود
ماشاء الله عليج حاطه كل شي بالتفصيل
وفي ماركات أول مرة أسمع فيهم
كي ستار و بيوتي بيرل
مشكورة وبانتظار الجديد​

 

[أسيرة_أحزاني]

مشكووووورة على الشرح وعليج بالف عافيه

 

[زهرة الفردوس]

يعطيج العافيه موضوع رائع

 

[UNICORNA]

تخلصينهم بألف عافيه (=

 

[محاميـــة]

ماشاااء الله رووووعة

مممم بسئلج شرايج ببلاشر ماك اللي جنه كريمي
(ثاني واحد عاليمين من فوق)

 

[وافرر]

مووضووع رووعه يسلمووو ويعطيك الف عافية

 

[النجلا88]

وناااسه نزلتي الجزء الثاني بااين انهم حلووين بس الصور صغاااااار مايمديني اشوووف :d

 

[..~Goolz]

مشكوره يعطيج الف عافيه
بليز المره اليايه كبري الصور شوي لانه عنونه ما تبين

 

[عاشقة العطور]

تخلصينهم بألف عافيه (=

 

[ღ Mzajiya ღ]

يعطيج العافيه​

 

[أحترت أعبر]

ޢޢޢإيمانޢޢޢะۣۨ>....هلا بيج حبيبتي , كي ستار ما ادري اذا هي نفسها كرولاين بس الباكيج والاداره القديمه او لا , وبيوتي بيرل هاذي تلاقينها عند الهنود , جربي حمرهم وقلوساتهم وايد حلوين ...

أسيرة_أحزاني...شرفتيني يا الغلا ...مشكوره

زهرة الفردوس... الله يعافيج حياتي تسلمين

UNICORNA...تسلم لي هالطله ...عاد امنيتي اخلصهم يكون اسوي باك تو ماك واخذ حمره

محاميـــة...ثاني واحد على اليمين من فوق اسمه Breezy...هذا مو كريمي حياتي , بودره عاديه بس يمكن لانه محفور ولونه الحلو شكله يشبه الكريمي ... عاد اتصدقين اني ما عمري حطيت بلاشر كريمي لاني ما اعرف استخدمهم , واذكر من زمان شريت البلاشر اللي من بنفت كانه صبغ اظافر ولا عرفت استخدمه ....

وافرر...هلا بج حبيبتي ...شرفتيني يا الغلا

النجلا88.... هلا حبيبتي النجلا , الصور انا صغرتهم لانهم صارو وايد كبار ,وخفت يخترب الموضوع , بس من عيوني اي بلاشر تبين تشوفينه اوضح ,قولي لي وانا ارد اصوره ...

تكفيني الذكرى...شرفتيني يا الغلا ...ان شاء الله الجزء الجاي اكبر الصور واي بلاشر بغيتي تشوفينه اوضح من عيوني اصوره لج ...وفديت عنونج انا

عاشقة العطور...ربي يعافيج ويسعد قلبج يا رب ...مشكوره

french.coffee...مشكوره يا الغلا على المرور ...وربي يعافيج حبيتي​

 

[eva beach]

ماشالله حلووووووووووووووووووين

عليج بالعافيه

 

[cute tiffany]

تسلم الأيدي

 

[NaYoob]

أحترت اعبر بليز وين الاقي منتجات كرولاين رحت الافنيوز عند دبنهامز كل ما اسأل احد ما يعرف

وين احصله اي مكان واي محل

 

[باذنجانه]

ما شاء الله تبارك الرحمن
الله يهنيك فيهم وتخلصينهم بالعافية

 

[أحترت أعبر]

eva beach....نورتي يا الغلا ...مشكوره حبيبتي

cute tiffany...يسلمج ربي ,مشكوره فديتج


NaYoob...حبيبتي انا من البحرين ,عندنا موجوده هالماركه بمحل خاص لها ونفس الشي عندكم , موجوده بالبحرين بمجمع السيف ومجمع الدانه , وانصحج سالي البنات وروحي شوفي مكياجهم اكيد بيعجبج شي من عندهم لان مكياجهم بروفيشنال وسعره فيه من ناحية الجوده والثبات وهم الالوان ....

باذنجانه....شرفتيني يا الغلا وربي يسعد قلبج على المرور​

 

[لف ليدي]

مشكوره حبيبتي

 

[أحترت أعبر]

لف ليدي ...نورتي حبيبتي ...مشكوره​

 

[Sweet Face]

مشكورة على الجزء الثاني روعة أغراضك وأختياراتك أغلبها موفقة .
موفقة