الله يوفقج حبيبتي من جميع النواحي
اهم شي ابدي بالاهتمام والعنايه بالجسم والشعر والبشره لانه العنايه يطول على مايبين مفعولها والله يسعدج يارب ويتمم عليج
ثاني شي اسنانج والليزر واذا ماتبين مهرج كله يروح على الليزر نصيحه اشتري جهاز الليزر واستخدميه بالبيت وفيه عضوه هني الله يوفقها يارب حاطه تجربتها مع جهاز الليزر من الغانم
وبعدين اشتري لج اغراض الجمعيه التناتيف وخشيهم عشان قبل العرس بشهر تكونين مخلصه تجهيز ومرتاحه مايبقى عندج شي
واذا تبين سوالف فناتق سوي ارواب الحمام عزج الله عند لولو الشطي الله يذكرها بالخير تسوي لج الروب على اسمج واسم زوجج واذا تبين تقدر تحط لج تاريخ زواجكم على الارواب وسعره جنه ب40 بس مو اكيد هذا سعره مو ذاكره والله بس اتوقع 40 وصاعد
وفصلي عبايات وخشيهم واشتري بدلات بوقت التنزيلات وعطور الحين مكياجي اللي بالكوت عندهم عروض 50 % عالعطور والمكياج روووووووعه توني شاريه سنفره ومرطب وطقم منى امرشا الاحمر وطقم بنكهة التوت كله طلع علي ب19 وشي حده رووعه
ومري ماكس اسبنسر اشتري بجايم حرير وبجايم اقطان وملابس داخليه
ومري اويشيو اخذي لج جم قطعه حلوه بس مو تكثرين ومري الطاهر وانور اخذي لج شغلات ناعمه وحلوه بس مو تكثرين لانه فيه اماكن واجد احلى
يعني من كل مكان اخذي قطعه ولا قطعتين
والدراريع عندج العربيد بلازا رخاااااص وحلوييييين رووعه وعندج خياطين الجمال بعد رخاااص
وعندج خياط ريم العرب جنب الدبوس بالفحيحيل يفصل دراريع وحيل رخيص
ونصيحه لا تفصلين من المشاغل عند الحريم والله حيل اسعارهم ناااااار للامانه والمشكله الديزاين بسيييييط اللهم شوي فصوص على كريستال وباقي الدراعه خاليه ساده وفاضيه بس من عند الصدر شوية كريستال قالو ب50 وفوق ليش والله حرام والحق ينقال طبعا مو كلهم ما اعمم صج صج فيه حريم تعاملهم ينحط عالجرح يبرى مع الزبونه عسسسسسل وربي وفيه حريم اللهم يا كافي نفييسه وماترضى تنزل لج كلش حتى لو شوي ما ترضى وكل وحده كيفها والله يوفق الجميع بس انا اقول عشان ما تقطين نص مهرج على هالمشاغل نصيحه روحي خياطين واشتري الخام والكلف على ذووقج وفصلي الموديل اللي يطق براسج عالاقل اذا كاسرتيه غصب ينزل ويراعيج شوي بالاسعار واذا سويتي اكثر من دراعه ينزل لج واجد من السعر عن تجربه
والاكسسوارات عندج الفراوله و الحمرا مول وتمر حنه واخذي لج ساعه فخمه من كولكيشن ساره وطبعا اللي هناك مصري اقعدي عظظظظم ببلعوومه لين ما ينزل لج السعر
والشيلات عندج الحوش عند الهنود شيلاتهم حلوه وسيتي سنتر و الشوزات عندج الحوش البرنس وفاشن والجوهره واجد فيه محلات حلوه بس ترى كل اللي يبيعون سوريين ومصاروه اقعدي عظم ببلعومهم لين ينزلون السعر لانه نظامهم اذا ما كاسرتيهم ياااكلوونج بالاسعار انا مره شريت شوز من 20 لي 12 نزلي السعر لوووووووول نشفت ريجه لين نزل لي ونظام يقولي هذا اصلي ومادري من وين يقعد يألف على مخي عاد كسرت فيه قلت انا اعرف انه كله صناعه سوريا ومصر وانا ابيك تكسبني زبونه ولا السعر مو مهم يعني تحايلي لانه اسعارهم ناار والله حرام
وكل يوم وترك لا تنامين الا وانتي حاطه زيت على شعرج
و احجزي بصالون برنامج كامل من الحين بس نصيحه لا تقولين لهم انج عروس لانه نظامهم الحمام المغربي ب10 على بو انه عروس يسوونه ب15 و20 والكريمات نفسها مثل ماهي بس اللهم اسمج عروس لازم يغلون الاسعار جبح ويه
واذا سالوج عروس قولي لا مو عروس بس جذي بسوي برنامج عنايه لانه اغلب الصالونات قرقه يقرقون على مخج لين ما تصدعين ولا تعطينهم وجه ترى نظام يسألون وعينهم مبققه وحاااره قطيعه واذا بطلو حديث معاج جعميهم قولي لهم انا ما احب سوالف كوكلي بليز يعني خليها تخلصج بسرعه ترى والله انا مجربه صالونات خدمة منازل وبالصالون نظام قرقه بس عينهم وحده بوحده واذا قالو مثلا هالشغله حلوه فيج او مدحوج جعميهم قولي لهم ايه قولو مشاءالله ولا تستحين احسن لا ينومونج بالفراش من عيونهم
وبالنسبه للعبايات فصلي بالدبوس والعربيد وخيطان وكلهم هنديات ترى اللي يقعدون بمحلات العبي عاد انتي بلعيهم بلسانج اللي يقوطر عسل يعني قولي يالله حبيبتي نزلي لي من السعر انا من اليوم ورايح زبونتج ومن هالكلام والسعر مو مهم اهم شي شغل نظيف واصير زبونتج علطول واذا عجبني الشغل بجيب لج زباين حق محلج يعني رفعيهم بالسما وشوفي شلون ينزلون لج بالاسعار واهم نظامهم مثلا العبايه ما تسوى بسيطه بس يقولون لج ب30 مثلا اذا شافوج غشيمه بهالسوالف وعادي تقطين فلوسج وما تكاسرين رح يستغلونج بس انتي قولي لهم انا مو اول مره افصل واعرف اسعار العبي ومن زمان افصل ويالله نزلي لي السعر
حتى جم اروح محل عبي واقعد افصل واكاسر المره و تدش وحده علينا تبي تشتري او تفصل بس شكلها ماتعرف تكاسر وجذي عاد انا اصير محامي الدفاع لها لووووووووووول والله مره صارت وياي وحده ماعرفها استاااانست علي انا صرت محامي الدفاع لها اهيا مسكينه ماتعرف بسوالف المكاسر والمره الهنديه جبح ويه قاصه عليها قايلة لها العبايه ب40 @@ عاد المره اللي تبي تفصل مسكينه ما تكلمت قالت اوك اخذي قياسات جان انا ابقق عيوني اشكره جدامي نصب عيني عينك جان اكل الهنديه بلساااني قلت لها شنووووووووووووووووووو هذا اخر شي 25 يالله يالله مافيه غير 25 شنو اربعين هذا كلفه خفيف وخام بوكنان قديم وعادي والمره مسكينه يوم كليت الهنديه جان يطلع لها لسان وقامت تكاسر عاد انا اعلمج عالمكاااسر لاني خبره بسووواااالف الاسوقه من يوم كان عمري 10 سنين وانا اروح مع امي اسواق واشوفها تكاسر عاد الحين صرت اعرف اكاسر عدل ما اطلع من المحل الا وانا ماخذه الشي بالسعر اللي انا ابيه يعني خليج فطينه بهالسوالف وكااااسري عدل بالسوق مو تشترين وخلاص خاصتن عند الهنود والمحلات الشعبيه لا تخلينهم كاسري عدل واذا نظام قالج الهندي هذا اخر سعر قطيه بوجهه وقولي خلاص بروح المحل اللي جنبك واخذه شوفي شلون يركض وراااااااج ويعطيج بالسعر اللي تبين
والمجمعات لا تطبينها الا وقت التنزيلات تاخذين كل شي بنص القيمه
والسالميه القديمه كل شيييي تتنزيلات ورخيص حتى الفارس روووووووعه وكله رخيص مسوي تنزيلات
والذهب بعد مانسيتج بالذهب كااسريه لين ما ينشف ريجه ويقعطيج بنص القيمه
مره رحت اشتري دبله قالي ب45 اخر شي الله وكيلج بلعته بلسااني قلت شنو 45 اخر شي ثلاثين تبي ولا مرح اخذها قالي مايصير يمين يسار قعدت فوق النص ساعه المحل ورجلي وقتها مسكين يقولي يالله ترى مليت امشي مايبي مو غصب قلت له لا انطر انطر بس بعدين قام يستانس علي حتى باسواق الديره حق المسابيح والاقلام والخامات ياخذني عشان اكاسر يقولي تعجبيني بسوالف المكاسر فطييينه
وانتي بعد انا اقولج كل هذا ابيج فطينه كاسري عدل عدل مو بخل بس انا كلش ماحب النصب يعني اهم يشترون بالجمله بربع القيمه ويبيعونها غالي على شنو @@
والله يوفقج يااارب ويتمم عليج زواجج على خير واي شي تبين انا حاضره بس دزي لي خاص اخاف انسى موضوعوج وما ارد له
