يومياتي مع رجيم د. أحمد الخولي

[<miss botamba>]

السلام عليكم ورحمه الله و بركاته


شلونكم يالمكلبزات

لول الضعاف مالهم حل هني


طبعا هذا ثالث يوميات لي وان شاء الله الثالثه ثابته

لان هالمره خلاااااااص قرار نهائي ومعطيه نفسي مجال لي العيد

اذا متابعين بتعرفون انا اعاني من الغده و السكر ودكتوري قالي اذا ماسنعتي السكر بسويلج عمليه تكميم هههه

مع ان انا كتله جسمي للحين بس سمنه ماوصلت لا سمنه مفرطه ولا سمنه خطره

بس لان السكر قاعد يصعد




اول شي

عندي ملاحظه


أي وحده تاخذ الرجيم تدعيلي ان الله يشافيني من السكر و اتخرج و افتك من الجامعه

ماني قايله مو محللين وهالسوالف الي مادري شلون بس يعني مثل مابفيدكم فيدوني وادعولي و ان شاء الله لكم بالمثل :eh_s(7):



المهم


الدكتور واايد حليو ويشرح من قلب هههه ممكن بتحسون ان شوي بصك راسكم بس مسكين واايد زين
ومو نفس بعض الدكاتره يلا هاج رجيم وتطلعين لا يقعد ويسولف ويحلل الوقت عدل

وموجود في بوشهري كلينك بالسالميه

الرجيم الي بحطه بمشي عليه من اليوم (7 - يونيو) لين (18 - يونيو)



يتبعـ ..

 

[مسز بسبوس]

اي اكيد حبيبتي بوتمبه كملي وبالبدايه الله ايشافيج يارب وتتخرجين من الجامعه يارب وبصراحه شوقتيني ابي انزل ٩ كيلو لاعت جبدي اللبس كلش مو حلو علي

 

[قطوووة]

موفقة والله يشفيج من السكر

مثلي فيني سكر

بس لاتخافين من السكر دام اكلج منظم ومهتمه بجرعتج


موووفقة

 

[الكيكه دندن]

الله يشافيج حبيبتي وانا متاكده انج بتوصلين ان شاء الله

وان شاء الله تنزلين ونتي بصحه وعافيه

يارب :*

 

[<miss botamba>]

نصائح مهمه أثناء الرجيم

1- ضروري شرب 2 كوب ماء قبل كل وجبه ويفضل الماء الدافي مع الليمون وخصوصا بالصباح ( انا عن نفسي ما احبه يسببلي اوقات لوعه فعادي ممكن شرب الماء العادي )

2- ممنوع النوم بعد وجبه العشاء مباشره ويفضل النوم بعد ساعتين عالاقل

3- يجب المشي او ممارسه الرياضه عالاقل نص ساعه يوميا مع شفط البطن باستمرار

4- منتجات الألبان يجبن ان تكون قليله او خاليه الدسم

5- المصابين بالسكر عند شعورهم بالهبوط خلال البرنامج يتناولون عالفور ملعقه عسل او 3 حبات تمر وتخفض الادويه بعد استشاره الطبيب المعالج

6- عندما لا تذكر الكميه تكون الكميه مفتوحه حتى الاشباع

7- عدم قياس الوزن الا في نهايه المده

8- ينزع الجلد و الدهن من الدجاج و اللحوم قبل الطبخ

9- يجب الفصل بين الوجبات ب 4 الى 6 ساعات

10- ممنوع الاكل امام التلفاز

11- يجب معالجه الامساك فور حدوثه


يتبعـ ...

 

[<miss botamba>]

التسلسل الغذائي للوجبات

1- شرب 2 كوب ماء

2- أكل السلطه الخضراء مع زيت الزيتون وخل التفاح

3- ثم شوربه الخضراوات (بدون بطاطا) و اضافه عصير الليمون

4- التوقف عن الاكل لمده نصف ساعه

5- الوجبه الرئيسه حسب البرنامج



بدائل الخبز بالبرنامج


1- قطعتين شابوره

2- ربع خبزه ايرانيه

3- خبزه لبنانيه سمراء كامله

4- صمون هوت دوغ اسمر حبه واحده

5- خبزه صغيره من الشعير او النخاله او الجودر او الصويا و يفضل الاسمر

6- شريحه توسته واحده

 

[*باربي*]

ياحيااتي ..
الله يشفيج .. و تنزلين بصحةة و سلآمةة ..
و استغفري .. وآيدد بالنية الشفاء من سكرر ..
سبحانك ربي ..

 

[<miss botamba>]

المسموحات بالنظام عند الشعور بالجوع

1- شرب الشاي و القهوه مع حليب قليل الدسم او خالي الدسم + سكر دايت

2- مشروبات تروبيكانا

3- بيبسي او كولا او سبرايت دايت (علبتين صغيرتين فقط)

4- الخس و الخيار وشوربه السالاري (بين الوجبات باي كميه) ( اذا ماتحبون السالاري ممكن اي نوع شوربه حتى مع كريمه بس ممنوع العدس و الشعريه )

5- السلطات التاليه باي كميه ( سلطه خضرا - روب و خيار - سلطه تونا - سلطه سيزر - تبوله - فتوش بدون خبز - سلطه مشروم - سلطه يونانيه )

6- جميع انواع الصلصات الجاهزه للسلطات مسموح

7- السناك المسموح واحد من الآتي ( 3 حبات تمر او كوب صغير آيس كريم للرجيم او فروزن يوغارت مع فواكه مسموحه او حبتين كاكاو ماكنتوش او جواهر)

8- عصير ليمون مع نعناع بسكر دايت

9- كاكاو بودر مع سكر دايت






الممنوعات بالنظام

1- المقليات

2- السكر البيض و السكر الاسمر

3- جميع العصائر سواء معلب او طازج

4- الفواكه التاليه ( الموز - المانغو - العنب - التين)

5- ممنوع استبادل الفاكهه بالعصير

6- ممنوع استخدام الكاتشاب و المايونيز و السمنه و الزبده

7- ممنوع اكل البطاطا و الشمندر

8- ممنوع اكل المخللات

9- الوجبه الواحده باليوم

 

[<miss botamba>]

طريقه شوربه السالاري

المقادير:

بصل - فاصوليا خضرا - كوسا - بروكولي - ملفوف - سالاري - مكعب ماجي - بهار

الطريقه:

تقطع الخضار وتسلق مع مكعب الماجي و البهارات لمده ربع ساعه ويمكن اضافه الليمون او معجون الطماطم




طريقه اومليت الخضار


الطريقه:

تخفق بيضه واحده مع البهار و يضاف اليها البصل و الفلفل الاخضر و البقدونس

تصب في مقلاه مع القليل من زيت الزيتون وتقلب الى ان تنضج


ملاحظه:

ممكن اضافه الجبن الخالي من الدسم

 

[<miss botamba>]

أخيرا و ليس آخرا


الرجيم




الإفطار:

2 كوب ماء

ثم إختيار واحد من الآتي:

1- حبه كرواسان صغيره + بيضه مسلوقه او جبن

( اذا ماتحبون البيض المسلوق ممكن اومليت )

2- شريحه توست + روب او جبن

3- شريحه توست + 2 مورتديلا + خس ( ممكن استبدال المورتديلا باي نوع تفضلونه )



سناك:


حبه فاكهه + مشروب ( من المسموح )




الغداء:

سلطه اي نوع من المسموح + شوربه + ربع دجاجه او شريحه ستيك او 2 فليه سمك (مشوي) + مرق او خضار سوتيه باي كميه + 4 ملاعق اكل ارز او باستا او 4 حبات ورق عنب


( هذا كله للغدا اللحم و الدجاج ممكن يكون قطع صغيره او ممكن هوت دوغ او كفته او همبورغر )

المرق ممكن باميه او خضار



العشاء:

صنف واحد من الفاكهه المسموحه باي كميه

 

[<miss botamba>]

اليوم الأول:

اليوم قعدت مصيف فبس شربت بطلين ماي صغار


حاليا غداي


سلطه تونا + شوربه ماشروم







مراح آكل سناك لان مشغوله ماعندي وقت يمكن اخذ من ستاربكس قهوه


وبليل بروح استقبال بشرب قهوه و باكل ال 2 كاكاو المسموح

وعشاي باكل تفاحه

 

[<miss botamba>]

مسز بسبوس

قطوووة

الكيكه دندن

*باربي*



مشكورييييييييييين عالردود ماقصرتوا ;**

 

[Myno0na]

حلو الرجيم
شادة حيلي وابي اكون معاج
يوم شفت الممنوعات غيرت رايي
عاد انا ما استغني عن البطاط ( الشيبس )

وانزين ماكو يوم فري ناكل وجبه فاست فوود
لووول

 

[Myno0na]

اي نسيت أقولج الله يشفيج وينولج اللي ابالج :**

 

[عسله]

ان شاء الله توصلين للوزن الي تبينه وانتي بصحه ويروح السكر وربي يحفظج ويسهلج امور الدراسه وتتخرجين ونفرح بفرحتج يالغاليه

 

[اشلون يعني &]

واصلي واصلي واصلي

 

[ملح الدنيا فيني]

وياك حبي

 

[RicardO]

والله والله والله يا بوقته الموضوع ماتتخيلين شكثر تعبت نفسيا وجسديا
:krkrkr:

خلاص انا بيتت النيه لي العيد مشتركه بقروب ثاني بس سوالف دايت بسوي رجيمج سهل :eh_s(15):
وبمشي وياج وبصور وبحط وبتعدل

انا اشوف كل يوم اوقف عالميزان مايتغير

انا خلاص قررت ابي انزل لي اخر الشهر هذا يعني على 1-7 انا قاطه 5-6 كيلو :eh_s(11):
تدرين قاعد اتحلم اسوي تكميم تحزيم :eh_s(16):والله فيني بجيه

امانه بتبوت تكفى تكفى طلبتج بليز لاتقطعين كملي لين نضغف لان انا معاج من الجزء الاول:$ هههههههههههههههههههههههههه
:krkrkr:​

 

[كويتيه cool]

عسى الله يشافيج يارب وتضعفين بصحه وعافيه

وانا معاج قاعدة اراجع عنده وعطاني نفس البرنامج اللي عطاج اياه اول اسبوعين وضعفت عليه 3 كيلوات

بس كنت اخربط شويه

وعطاني برنامج ثاني لما رحت المراجعه ويبيني هم انزل 3 كيلوات

بس وايد قاعدة اخربط فيه

فالله يستر

 

[3la-q8']

بالتوفيق اممم بمشي على رجيمج حبييته