يوميات اطفالنا ... فكاهاتهم و ازعاجاتهم

[PuPa^^SWeeT]

السلام عليكم


امهاااات شلوونكم


ان شالله بخيير


طبعا البعض امهات لاطفال رضع


والبعض لاطفال الحضانة و الروضة


و البعض لاطفال الابتدائي و المتوسط



والبعض لجميع ماسبق



مع تداخلات اليوم و المشاكل و رعايتنا لهم و نسيانا لروحنا



يتخللها بعض التصرفات من الاطفال و المراهقين



اما مضحكة و حلوة :ggdw::ggdw::ggdw:



اما مزعجة :eh_s(4)::eh_s(4)::eh_s(4):




شرااايكم نذكرها اهنييي



موضوع للسوالف و الفضفضة

 

[كويتيه صغيره]

انا من كثر ماهو ولدي اسم الله عليه حركي وايد ومينني بشطانته قمت اللي يكلمني مارد عليه بالكلام بس اشر باايدي احس مابقى فيني مخ

 

[موريا آدم]

اب اب اب

 

[الأميرة جوري]

مره كنت اعلم ولدي عالحمام وكنت معصبه ابيه يتعلم عدل قلت له ماما اذا فيك شي قولي واديك الحمام اهو صغير سنتين يعني توه بادي يتعلم قالي وانا معصبه ماما جب ههههههههههههه مت ضحك شلون يقولها يعض شفايفه اخر شي والواقف وااااااااااايد مرات يقولي قومي من نوم ساعه نص يعني 4 ونص هههههههههههه

 

[Model Look]

ولدي ليلحين صغير

بس رفيجتي ولدها عمره 4 سنين ابوه معصب عليه يزفه قاله بابا زفني بس مو تفل ههههه لوول واهو معصب للابو قاعد يطشر تفال من غير لايحس

الابو قاام يضحك

 

[أمـ مبارك]

خوووش موضوعع . . ..



أنا ولدي اذا اخذت منه شي يلوي شفافيه لي تحت يعني زعلان ويخلي نفسه يبكي ويكتم ضحكته حييييييييييييييل انا من اشوووفه اموووت عليه بهالحركه والشطااااانة . ..


ربي يحفظ عيالناااااا . ..


وولد أختي ،، أختي تعلمه على الحمام واذا رااااح الحمام ماتسمعييين إلا صرييييخه ويقوووول ماما ماااابي أقطهااااااا أخااف أخاااااف

وطبعا البيت كله يسمع البكي منه . . .

واحنا ميتيين ضحك

 

[M!SS.LOBY]

الله يخليهم لنا قولو ( أأمين)

 

[M.O.F]

اميييييييييييين


ههههه ياحلوها والله موتوني من الضحك ربي يحفظهم خوش موضوع

 

[PuPa^^SWeeT]

لوووووووووووووووول



مواقفكم لا يعلى عليها



كملوو كملووو

 

[مشتطـه]

انا ولدي ذابحه الرقص
على نغمة الايفون يرقص


بنات انتو جذي عيالكم؟؟


اخاف انا اللي علمته
والا كل اليهال جذي يرقصون ؟


يتشقق عالاغاني يرقص ويناقز
واذا اشتط قام يهز راسه

اسم الله عليه عمره 10 شهور

 

[قَلبڪْ صًخرْ]

مشتطه كنتي تسمعين اغاني وانتي حامل ؟
يقولج الياهل يخزن وهو بيبي في بطنج

 

[PuPa^^SWeeT]

مشتطة


ايي عاادي



يحبووون يهزوون



انا بناتي كانو يهزون اييدهم ياقلبي




بس كبرووو شوي قاموو يركضون ما يرقصون هههههههههههه

 

[قمورتي فطوم]

ههههه انا رحت الحج وجيت شفت بنتي كلا ترقص وهي ببيت اهلي
والحين ع اقل رنة او نغمة رقصت هع

ودايم اذا رفعتها او نزلتها اقول لها هووبا وتقول اوبا وهي تقولها تضحك
وحماتي دايم تلعب معها سباق وتراكض
عاد نعد لها ١٢٣ ومن نقولهم توقف ع الجدار هههههه عشان يجون جنبها ويراكضون



استغفر الله رربي واتوب اليه

 

[مشتطـه]

لا الاغاني الحمدلله من زمان قاطعتهم

كلشش مو نظامي اغاني

 

[أم يزيد &سديم&]

ـأنا ولدي الصغير يحب لعب المسابقات يلعب مع أخته
يطلعون هو وإياها الحوش وتعد تقول واحد وهو يقول نين وتقول ثلاثة ويركضون
عاد شوفو كم طيحة يطيح بسم الله عليه
وبنتي تقول على المسابقات مساقبات دايم لما أنزل الحوش تقول ماما تعالي نلعب مساقبات
أخواني يموتون ضحك عليها وياويل اللي يفوز عليها واللي يسبقها بسرعة وجهها ينقلب

عمووووووما يا زينهم الأطفال هم أكبادنا تمشي على الأرض

 

[غلاي امي وزوجي]

انا ولدي اذا جينا عند المطبه قال هيلا هوووووب


واذا شاف ابوه بياخذ اخته قام يصرخ يقول والله ما تخذها

واذا قال له ابوه نبي ناخذ اختك معانا قال لا نايمه حرام وهي بالاساس قاعده

واذا شاف قطوه تفر تكرمون على الزباله قال حرام قطوه جوعانه

ولدي عمره سنتين وشهر

 

[PuPa^^SWeeT]

انا بناتي يحبون يلعبون


غمييضة



و لما العب ويااااهم بسرعة يصيدوني


لانه الاثاث نازل فا ابين



بس اهم المفروووض سهل انهم ينخشون


كله ينخشون و يطلعون ريولهم


هههههههههههههههههههههههههههههههههه

 

[Perfume]

لووووووول
يحليلهم
انا ولدي يصكر عنا التلفزيون واحنا نطالعه
يفتحه ويصكره الف مرة
والله تلفزيونا بيحترق بسبته
والشي الثاني اللي معذبني انه يعضضض
يعضني وقت الرضاعة ذبحني وشوه صدري
مادري شسوي
والمشكلة انه يطالعني ويظحك يعني يدري انه يعورني

 

[PuPa^^SWeeT]

^^^^^^


نورتي بيفيوووم ياقلبي





اييي والله الرضاااعة تعبتنا حزتها



عاد حركة يطفي التلفزيوون بايخة لو مندمجيين


ههههههههههههههههههه

 

[فـراوله]

لو بتكلم عن عيالي ما راح أخلص ​

ولدي الكبير للي ما يعجبني فيه كله يشلع الوايرات مالت التلفزيون لين ما صرت
خلاص أكره أشوف التلفزيون واذا يبي التلفزيون لازم براعم أو عبودي " ستديو الابطال "
يقعد يقول أبي عبودي عبودي ويحن واذا سمع الآذان برا يقوم بسرعه يركب واير التلفزيون ويعطيني
الريموت ويرفع ايده الله وأكبر ويقول حطي الله ويمسك ايدي عشان نقوم نصلي ​

وألحين أنا أعلمه عالحمام كل ما يحس يبي يروح حمام يروح يركض عند الحمااام ويقول ماما كوكو حمام
ويناديني تعالي بصراخ يعني بسرعه قبل لا أسويها على نفسي هههههههه ​

واذا ما عطيته للي يبيه يسوي روحه زعلان ويقلب بوزه ويطالعني من تحت لي تحت ​

واذا بنطلع أتعمد ما أخذ الصغير وياي بشوف شيسوي أقوله يالله بنطلع يقولي لا لولي باي يعني بيأخذ
اخوه الصغير معاه ولا ما أطلع على كثر ما يفلع فيه بس حنون يبيه وياه ​

واذا بجي الصغير يقوم يركض يقول ماما لولي ممه يعني يبي يعطيه المميه ​

وايد عندي سوالف بس أكتب لكم اشوي اشوي

ولدي عمره سنتين للي أسولف عنه


​