صباح الورد والعنبر ودهن العود
الحمدلله محافظة على قيام الليل والورد اليومي من القرآن
الاستغفار مع الأسف صار لي يومين مقللة منه مادري ايش جاني ..أعوذ بالله منك يا إبليس
اليوم بحاول أجاهد نفسي واستغفر بشكل أكبر إن شاء الله
الجسم اليوم الحمام المغربي
أول شي دهنت كل جسمي بخليط زيت سمسم + زيت لوز مر + جليسرين
خليته على جسمي تقريبا ساعتين وقعدت احضر خلطات وماسكات الحمام المغربي
الخيمة
حطيت على الماي نقطة عطر ورد علشان الريحة المنعشة ..ممكن تحطون مسك أو دهن عود ..مجرد نقطة مو أكثر
يساعد على الاسترخاء وطبعا يكسب جسمك ريحة حلوة بتلاحظينها آخر شي انها ماسكة في جسمك حتى لما تعرقين تشمينها أول يوم لأانها تتغلغل في كل جسمك
أول خطوة قعدت في الخيمة أقل من عشر دقايق ..الي تتحمل تخليها ربع ساعة
دهنت كل جسمي بالصابون المغربي مع ملعقة صغيرة من الكبريت المطحون ( الكبريت يبيض ويصفي البشرة ويوخر الحبوب وآثارها ) لكن ملعقة مو تكثرون يحرق
رجعت للخيمة وقعدت اتفرك داخلها
طلعت منها وأخذت الليفة المغربية ..ليفت كل جسمي واهتميت أكثر بالأكواع والركب
الماسك الثاني
( شبة + حنة + كركم + مسمار + نشا ) الظاهر كان فيه سفيداب ماذكر لأني محضرتهم على الناشف من قبل ..لووول فقدان ذاكرة
ورجعت للخيمة
طلعت وتفركت
الماسك الثالث
( طمي مغربي + بابونج ) المفروض بعد ورد مطحون بس ماعندي
الطمي يبيض ويصفي البشرة + يشد الترهل + يزيل التجاعيد يعطي البشرة لمعان
الماسك الرابع
( زعفران + ماي ورد + حليب بودرة )
الي عندها اي آثار حبوب على جسمها مع المداومة هذا الماسك يوخرها وجسمها ينعم ويصفى
الماسك الخامس سائل التبييض وتصفية الجسم
( خل تفاح + ليمون + نقطتين الشاور جل ) استعملت شاور جل بريحة اللافندر يساعد على الاسترخاء
طبعا لو فيكم حيل بعد كل خطوة ادخلوا الخيمة عشر دقايق لربع ساعة ..أنا صراحة اقل مافيني شدة
وبعد كل ماسك اتفرك
المفروض ماسك الزعفران آخر شي قبل سائل التبييض لكن نسيته ورجعت حطيته بعدها
غسلت كل جسمي بشاور جل دوف لشد البشرة
المنطقة الحساسة كير فري
آخر خطوة ماي بارد ..تجيبين على الأقل لتر ماي بارد أقرب للمثلج واشطفي آخر شطفة لتسكير كل المسام وشد البشرة ..مهمة جدا هالخطوة
طلعت من الحمام وأنا تافلة العافية لووول
نشفت كل جسمي
خلطة التشققات
ترطيب بخلطة الكريمات
ترطيب الرجول ولبس شرابات
ترطيب المنطقة الحساسة بكريمها ولبست شورت قطني
ترطيب الوجه بزيت نعناع ...خليته على وجهي فترة وبعدها تونيك ماي ورد وجليسرين ورطبت بكريم اولاي مع دم الغزال
فازلين + دم الغزال على الشفايف
كريم الصبار على الشعر ومشطته وربطته كعكة <--ياقدمي كعكة لووول
شربت كل الماي الي في البيت ويمكن 3 أو 4 علب عصير تفاح
لااااااازم تشربون بعد المغربي ...تعويض عن الي خسرناه في البخار
عندي ملاحظة أخيرة :
لاحظت من اليوميات بنات يسوون الحمام المغربي كل أسبوع !
ياحبيبات قلبي مو زين ..مرهق جدا للبشرة ويخليها تعجز وتترهل
المفروض البخار يكون مرة في الشهر فقط ! ولو عندك مناسبة مهمة مرة كل أسبوعين
البخار والتفرك الزايد الهدف منه نشيل الخلايا الميتة ونطلع جديدة + نحفز البشرة تسوي كولاجين جديد...مايصير كل أسبوع نسوي كذا فيه إرهاق شديد على البشرة وتقليل من دورة حياة الخلية الجديدة
النتيجة ترهل وتجاعيد وتخسر البشرة مرونتها
ممكن تلاقين نتيجة بياض وصفاء وتوحد لون سنة أو سنتين لكن بعد فترة طويلة على نفس الحال بتلااقين عمرك شكلك أكبر من عمرك
نبي في الثلاثينات والأربعينات نصير اصغر من أعمارنا :eh_s(22):
