هلا حبيبتي
موفقه و إن شاء الله تكون تجربة حلوة لج و تاخذين الــ a
بقولج كم نصيحه مهمه لج و لكل بنات الميداني
أنا كنت ميداني الكورس اللي طاف
المهم
-نصيحه كوني رسمية مع رئيسة القسم و مع معلمات القسم و كل المدرسة و لا تسولفين معاهم بحياتج الخاصة
-كل يوم مري على مكتب الناظرة و الوكيلة بس مجرد تلقين السلام عليهم
-التزمي بدوامج لا تتأخرين ولا دقيقة لأن خسارة بينحسب لج تأخير !!!!!!! و لا تتأخرين عن حصصج .. و روحي لصفج قبل الجرس بـ 5 دقايق
-الالتزام بالطابور و عدم التأخير و ضبط الصف في الطابور و الحركة و ضبط البنات لأن الناظرة تطالعج و تشوف شتسوين
-شوفي نظام الريوق عندكم بالقسم .. ممكن إذا تحبين أكلهم تقطين معاهم .. أو تجيبين ريوقج الخاص بس اسأليهم أو شوفي الوضع من أول يوم
-إذا شفتي المدرسات يحشون برئيسة القسم أو بمدرسة معينة أو .. أو بالناظرة أو بطائفة أو قبيلة .. إلخ ... تسكتين و ما تعلقين و كأن ماسمعتي شي .. لأن ممكن يقولون عنج شي ماقلتيه أو يسببون لج مشاكل أو يقولن عنج نقالة حجي
-أهم شي عندج بالمدرسة رئيسة القسم .. قبل لا تطلعين من المدرسة اسألي رئيسة القسم إذا تبي شي ؟؟؟ و إذا جيتي الصبح سلمي عليها .. أهم شي رئيسة القسم
-اسألي رئيسة القسم عن حدودج بالفصل يعني بالعقاب و الثواب مع الطالبات و ضبط الصف ،، ممكن تمنعج مت أشياء معينة مثل الزف أو غيره .. فعشان ما يكون عليج مأخذ اتفقي معاها من البداية
-لا تنقلين كلام رئيسة القسم للمعلمات و العكس صحيح لا تقولين لرئيسة القسم مثلا المدرسات يشتكون من الشغلة الفلانية ولا فلانه تاخذ أغراض فلانه ... ديري بالج .. مالج شغل إلا بنفسج
-إذا تبين شي يخص الشرح و تبين يعلمونج شلون تشرحين معلومه معينه لا تترددين تسألين رئيسة القسم لأنها ملزومه فيج و مسئولة عن تدريبج .. لأن ممكن تدش عليج بحصة و تكون حجة عليج إن ما عجبتها طريقتج
-اهتمي بدفتر التحضير كااااامل و مرتب دائما و حاولي تورين رئيسة القسم تحضيرج قبل يوم لدرسج باجر و ناقشي الأهداف معاها
- إذا سويتي وسيلة أو شفيفة أو استخدمتي اي شي بحصصج قولي لرئيسة القسم و وريها شغلج عشان تعرف إنج قاعده تشتغلين و تتعبين .. لأن ممكن تدش عليج بحصص ماتكون عندج وسائل نفس كل مرة ... فهالشي يدش بتقييمج حرام لازم تعرف كل شي عن شغلج
-انتبهي لوقت الحصة لازم تخلصين و تطبقين قبل ما يطق الجرس.. و ممكن تزورج رئيستج مثلا بأول حصة و يكون الطابور ماخذ من وقت الحصة انتبهي و قللي الأمثلة و أهم شي التطبيق
-بعض رئيسات الأقسام يقولون لج قبل بيوم أو أسبوع عن زيارة الموجه أو الموجهه و بعضهم لا!!! فدورج تكونين جاهزة فكل يوم و كل حصة ،، ولوكانت رئيستج طيبة و كريمه تعلمج عن زيارة الموجه...ناقشي معاها الدرس اللي بيدش فيه و طرق الشرح و التحضير,, لأنه يأثر حيل بدرجاتج
-تقبلي النقد من الموجه و رئيسة القسم و حسني من نفسج و خليهم يلاحظون الفرق و التحسن بكل زيارة
-طبقي كلام الموجه بحذافيرة و كلام رئيسة القسم .. لأن هم اللي بيحطون قريدج شوفي تعليماتهم و طبقيها
-لا تسكتين عن حقج بالتقييم لما تشوفين إنج مظلومة بنقطة معينة ناقشي ولا تستحين .. لأنه كله يدش بقريدج .. و خصوصا لو كان ظلم .. عشان يحسبون حسابج و يعطونج حقج..
-في البداية راح تكون فترة كلها تحضرين مشاهده و تسجلين ملاحظاتج .. فلا تعطين البنات وجه و خليج جدية و انتبي لطريقة المعلمة في الشرح و ضبط الصف
-بأول حصة تدشين فيها عالطالبات وريهم العين الحمرة .. مو شرط بالصراخ لأ .. بس وريهم إنج عصبية و جدية و ماترضين بأي غلط منهم فحصتج.. من أول دخلة لج عليهم خليهم يوقفون للسلام و بصوت واحد و عالي و بسرعه ،، و يجلسون الجلسة الصحيحة و أغراضهم بآخر الطاولة عشان ما يتعبثون فيها((هذا بالنسبة للابتدائي))- و اللي ناسية شي من أغراضها ولا مو حالة الواجب ولا متأخرة توقفينها ... و تقولين لهم قوانينج من أووووول يوم .. و تعينين رئيسات المجموعات عشان ما تصير مشاكل بين البنات
-دائما دائما اهتمي بنظافة صفج و ضبط الصف و الهدوء و ترتيب الطالبات و أخذ الغياب من بداية الحصة و اهتمي بالكتب تكون مصححه و كامله
-لا تسمحين للبنات أو الأولاد يدشون غرفة المعلمات و زفيهم لأن هالنقطة راح تنحسب عليج .. إلا للضرورة طبعا
- استغلي وقتج بالمدرسة بقراءة درسج باجر و التحضير و تحديد الوسائل .. شوفي ممكن تكون موجودة بالقسم .. أو تعاونج المدرسة نفسها اللي انتي ماسكه صفها و تورين شغلج لرئيستج
امممممم هذا اللي يحضرني حاليا
و أي سؤال من عنوني :eh_s(7):