~ ||x مــشــكــلــتــي مــع الــخــطــوبــه ,, خلآأأأص مليييييت :( x|| ~

[حلآوهـ حمرهـ]

السلآآم عليكم يا بنااات



اشحاالكم




والله اني مليييت يا بناات من سالفه الخطوووبه والعررس .. احس اهلي كرهووني بهالساالفه والله


انا من فتره حطيت موضوع اهني وكنت متحيره بين 2 .. وف النهايه رفضت الاثنيين







الحيين الله يسلمكم ياني واحد ثااني ولاازم تفهموون القصه عدل وتشوفون وين الغلط وكلام اهلي صح ولا لا ؟؟




من جم شهر اختي يات تقولي انه شي ريال مكلم زوجها عني .. على كلامه انه من سنتين كان يشوفني عند المدرسه لما ياخذ اخته .. والحين قرر يخطب لانه قبل كان يشوفني صغيره وهو توه متوظف ..

وسالنا عن الولد والكل يقول انه ريال زين ومحترم وطييب ودين وخلووق .. بشهاده الجميييع

الولد الاسبوع اللي طاف يانا البيت بروحه وقعد مع اخويه العود .. لانه ابوه متوفي وهو اكبر اخوانه

اخوي على كلامه يقول انه الولد وايد مثقف ورزين ..




انزيين الحين واجهتني كم مشكله .. الاولى : امي تقول انه الولد صغير عمره 23 وانا 19 وشكله صغيير بعد .. وتقول انه البنت تكبر اسرع من الولد واحسن لج خذي اللي عمره 26 و 27 ..

الثانيه : اهل امه .. طيبيين وااايد وامه واايد زينه وطيبه .. بس العوق انه ولد خاله متزوج اخت مرت اخوي .. واهل مرت اخوي يكرهووننا ودووم مشاكل معانا .. اختي تقول بيضروونج وبيشيشوون خواته عليج ..

الثالثه : انا قالولي انه الولد ياته فتره التزززم وطول لحيته ومادري شو .. ولما صارت مشاكل عندنا بالامارات بسبة المطاوعه والارهاب وقاموا يمسكون الشباب الملتزمين .. شال لحيته ورد عاادي نفس قبل ..
واختي تقوول يمكن بعده مطووع ومشاكلهم ماتخلص .. واحتمال يضغط عليج باموور وايد مثل النقاب واللبس والطلعات وغييره .. ونحن عايلتنا منفتحه شوي ماعندنا هالعقد ..



هاي هي المشاكل اللي مواجهتني .. انا صليت استخاره مره وبصلي مرتين و3 ..



وانا تبغون الصدق وايد مرتاحه للولد .. مايعيبه شي ماشاءالله والكل يمدحه وخواته زيناات وحبوبات وامه طييبه .. واللي مريحني اكثر انه ماعنده اخوان اولاد يعني برتاح من سالفه حريم اخوانه ..

وسالفه التدين اللي فييه .. قالولي الولد يدووخ .. كيف مطووع ويدووخ ؟؟ مادخلت راسي !!


ومقهووووره من اختي والله بتنبط جبدي منها ..

تفكر بمصلحتها بس وشكلها جداام النااس .. تبيني اخذ واحد منصبه عالي وراتبه فوووق واهله معروفين وكشخه وزقرت
دووم تسوي جي .. واخرمره اللي يابته لي عايبنها ليش فيه هالمواصفات بس ماعنده شخصييه ..

ولما قلنالها عن هذا على طوول قالتلي لا لا خلهم يولوون شو تبين فييهم باجر اييلج االاحسن منه ..
كل مره يقولون ي جي وارفض واييلي غيره وارفض .. احسن عن هالولد شو بحصل ؟؟ انا هذا اللي ادوره الطيبه والاخلاق والدين .. والالتزاام شنو ؟ عباده واخلاق وانا شو ابغي احسن عن جي ؟ بيكلمني عن سالفه النقاب مثلا .. لو اهو يستاهل والله لعيونه بتنقب ومع الوقت بقتنع بنقابي ..

من متى وانا ارففض يا بنااات وانا خاااطري مكسوور بس عشاان هلي .. اخاف اقبل بواحد ومايعجبهم ويقولون لي اي شي يصير معااج نحن مالنا شغل لانه هذا اختياارج ..



تخيلوا يا بناات .. في حريم جايفيني بملجه ربيعتي ويبون يخطبووني .. فوق ال5 حريم ساروا يكلمون اختي هذي بدوامها
ردتهم كلللهم .. تقول لهم والله البنت صغيره بعدها تكمل دراستها .. يقولون لها ماعليه بس خطوبه عالاقل وهي رااافضه حراام عليها تقطع نصيبي جي .. انا مب صغيره انا بثاني جامعه وعمري 19 وكل ربيعاتي انخطبوا وعرسوا الا انا


انا المشكله اصغر وحده وكل خواتي اكبر عنني وشخصيتهم اقوى مني .. مب قادره افرض راايي .. صح انا اللي بتزوج بس كل وحده تكلمني حسب تجاربها واللي هي تفكر فييه ..

امي ياحليلها تقولي انا مابي اجبرج على شي .. اني جوفي وين راحتج .. مابيج اتكونين متضاايجه طول عمرج ..




كل مره يرفضوون ويرفضوون .. محد يحس فيني والله واستحي اقوول انا ابغيه فلان او مرتاحه له .. خواتي يردون علي ويهاوشوني ويقولون انتي صغيره ماتعرفين مصلحتج







الحين انتو شو رايكم يا بناات بالسالفه كلها ؟؟ تشوفون الولد يصلحلي ؟؟ ولا كلام خواتي هو الصح ؟؟

وشورووا عليه دخيييلكم ..




وفييه مشكله ثانيه بعد تحملوووني فديييتكم .. ترى والله ماقدر افاتح خواتي بهالمواضيع استحي ..





اللي تنخطب وتملج او تعررس .. تحس انها يوم عن يوم تحب ريلها ؟؟

انا اجووف ربيعاتي لما يكلمون رياييلهم بالتلفوون بالملجه مثلا .. اقول بخاطري مايملوون ؟؟ 24 ساعه وياه ع الخط احس ملل بطفرر منه ..

وعقب العررس مثلا .. مايملوون مجابلين بعض طول عمرهم ؟؟ .. في بنات يقعدون مثلا ب سنتين و3 بدون عياال .. حياتهم ماتصير ملل ؟؟ ..

وفي شي بعد صدق محيرني .. العلاقه الزوجيه .. ف البدايه مره ومرتين بعدين الريال مايمل من هالشي ؟ او مايمل من حرمته ؟ واللي مع بعض سنيين .. ماادري ليش جي افكر بس انتو معرساات خبروووني كلامي صح اوغلط ؟؟











فدييتكم اتريااكم شوروا عليه بسااالفه الخطوووبه والله محتاااااااره ..

 

[حشمه]

اختي دام مرتاحه له ليش ترفضين

وكل الكلام اللي سمعتيه من الاهل

احتمالات محد يدري شراح يصير الا الله

القبول اهم شي والراحه قبل الموافقه

واما باجي الامور لو متفقه مع الخطيب فيها

خلاص محد له شغل والله يوفقج ان شالله

 

[LA TROO7]

بصراحه يالغاليه مااشوف فيه عيوب تنرفض والاهم الاستخارة اذا مرتاحه توكلي على الله ولا ان شاءاالله ماتملون من بعض لاحبيتيه

 

[opera]

اول شي الزواج قسمه ونصيب

والبنت لازم تنخطب اكثر من مره لين تشوف نصيبها وين



مو من اول خطبه تتزوج البنت ..


ثاني شي: على سالفت انه مطوع .. انا من رايي لمن ايي يخطبج تقعدين معاه وتحطين شروطج وتكونين واضحه وصريحه شلي تبينه من الزواج بالضبط .. عشان باجر لا تتحسفين

مو عشان رفيجاتج تزوجو تبين تتزوجين

لازم تطونين عارفه حجم المسؤوليه اللي راح تصير .. وتكونين عارفه الريال شنو يبي وشنو لازم تكون حقوقج وواجباتج

انا شايفه فارق العمر بينكم معقول .. ولو اني ضد الزواج المبكر .. يعني اشوف انتي صغيره واهو بعد صغير

السؤال الحين:

اخوج ماله كلمه على امج وخواتج ؟؟ ريل اختج مايقدر يدخل ويجمع بينكم ؟

 

[مراسي الشوق]

حيااتي مالج شغ باحد الي مرتاحه عليه سويه ... لا اتفكرين بفلانه وفلانه خلج بنفسج يا قلبي اذا انتي صدق مرتاحه للولد واهله زينين توكلي على الله يا قلبي والله يكتب الي فيه الخير يارب

 

[حلآوهـ حمرهـ]

مشكووريين يا بناات ع الردووود ..


انا عارفه انه البنت لازم تنخطب وايد قبل .. بس انا واااااايد خطبووني ورديتهم لاسبااب .. والحين هذا الولد وايد مرتاحه له .. خايفه ارفضه واتندم عقب ..



اخوي قال انا بسال عن الولد بس اهم شي البنت تستخيير .. اللي مضايقنهم عمر الولد .. انا اقول لامي انه نحن ماراح نتزوج الحين في شي اسمه خطووبه وملجه تمتد سنه وسنتين يعني لولد بيكبر بعد مابيتم صغير ..

ونسايبي مالهم كلمه بهالموضوع .. كل اللي يقولونه البنت صغيره ولا تزوجونها الحيين ..

 

[درة أهل الطولات]

خليج مع رايي اهلج

 

[ايمانو حلوة]

اهلييين حلاوة

حياتي اذا انتي مرتاحة للشخص هذا توكلي على الله وماعليج مم كلام الناس

موفقة حياتي تستاهلين كل خير وعأبال ماتيين تقولين لنا انج تزوجتي

 

[ام الحوراء زينب]

حبيبتي صلي استخاره وان شاءالله مايصير الا الخير

 

[miss_jamsheer]

والله اختي مادري انا بس اللي اعرفه اني سمعت الوحده تاخذ واحد اصغر منها بس عشر سنوات لانه المره تكبر اسرع من الريال بس عادي انا فرق بيني بين ريلي سنتين بس فعادي من ناحيتي والباجي مادري اتمنى البنات يفيدونج

 

[جوك احلى جو]

صلي استخاره واختاري الانسب بالنسبه لج

 

[m0o0on]

حبيبتي والله حاسه فيك لاني قبل كنت في نفس حيرتك بس الفرق خواتي ماكانوا راضين يتدخلون ابدا لاينصحون ولا يقولون رايهم وكنت محتاره ونفس عمرك واهو اكبر مني بسنتين بس الحمد لله تزوجت وسافرت وتغربت انا وياه بس وعايشين بسلام لازم مشاكل بس اهم شئ الحب موجود واهم شئ رايك وراي امك واستخيري واللي ربي كاتبه بيصير

 

[قدها وقدوود]

انا راح اجاوب على سؤالج عن العلاقه بين الزوجين بعد كم سنه مايمل منها لالالا بالعكس راح يتعلق فيها ويتعود عليها بالعشره والحياه اذا متفاهمين كل مالها وتحلى اكثر ولو عالملل ليش احنا مانمل من اهلنا واخواتنا سنين وياهم بالنسبه للزواج ماحد راح يقدر يجاوب الا اللي عايش بالوضع وكل شي قسمه ونصيب

 

[حامله القنديل]

ماقصروا البنات\بس اقول استخيري احسن

 

[أم الغاااالية]

استخيري للمرة الثالثه واذ في نصيب بتاخذينه

حبيبتي انتي فكري في الموضوع عدددددددددل انتي اللي بتتزوجين مواحنا عشان لاتندمين بس يا قلبي

موووووووووووووووووووووووووووووووووووووووووووووووووووووووووووووووووووووووفقه ياحلي حلاوه

 

[دلع روز]

مادري والله
انتي استخيري وشوفي شنو ربي يختارلج
والخيره فيما اختاره الله

 

[المدينه]

مدام انج مرتاحتله وافقي عليه والله يوفقج

 

[sweet 30]

صلي استخاره ياعمري وسألي امج واخوج واخذي برايهم انشاءالله يكون خوش صبي ونفرح فيج عروس

 

[حلآوهـ حمرهـ]

مشكووورين يا بنااات .. والله ردوودكم تفررح القلب وترييحني ..


بصراحه الولد ك شكل مب نفس اللي انا دووم اتمنااه .. بس شو فايده الشكل بدون اخلاق

 

[حلا قطر]

حبيبتي الله يوفقج ويكتب لج اللي فيه الخير ولا تفكرين بسالفة العمر ترى هاي كله احسه خرابيط شدخل؟؟

اذا انتي مرتاحه توكلي على الله ترى البنت مب كل يوم يجينوها خطاب لو تموا الناس يجونج وتردينهم خلاص بينعرف ان انتي تردين المعاريس وماعاد راح تنخطبين بيحطون في بالهم ليش نخطبها هي كله ترفض ليش نحرج انفسنا؟؟

وصدقيني الحياة الزوجية مافيه احلى منها انا مااقولج انها عسل بعسل احيان تصير مشاحنات ومشكل وشد بس شوي يرجع كل شي طبيعي والمسألة تعتمد عالزوجين وتفكيرهم

الله يوفقج ويسعدج ويكتب اللي فيه الخير والصالح ونسمع خبر ملكتج