ليش تتضايقين لما وحده ....... !!

[أربيعينية]

اللي يضحك ويبكي بنفس الوقت
لمن تشوفين وحده مع خدامتها وعيالها يكلمون بعض انجليزي ركيك ( انجليزي المعزبات مع الخدم )
شالله حادكم
احيانا الفلسفه على غير سنع تفشل

 

[عاشقه رويشد]

بالعكس انا مااضايق بس في بعض البنات لما ااتسولفين وياهم تتحجي انقليزي بطريقه اتحسسج انج ولا شي ماادري ليش اسلوب التحقير
وبس بس يا حلات حجينا وكلامنا الواحد لازم يعتز بلغته كفايه لغه القران الكريم

 

[بنت الحداد]

خخخخخ لو كنتي جدام الي ببالي بتقطها بويهج وبتقول محد يعرف يتكلم امجليزي الا انتي !!

بس انااا ماعندي اي مشكله بهالشي كل واحد واسلوووووووووووووووووبه !!

 

[Rock & Zoza]

شكرا عالمشاركات
و احترم وجهة نظركم المختلفة و المتشابهه ^.^

 

[a7la tooota]

بالعكس حلوو انج تتكلمين انجليزي وانا مو شايفه انه السالفه فيها تفلسف او غرور بس اللي متعود أو اللي يبي يتعلم لازم يتحاور مع الناس

علشان تثبت عنده اللغه ,, ومو بس الانجليزي أي لغه حاب انه يتعلمها ,,

أنا لما دشيت الجامعه واختلطت مع البنات شفت أنه اغلبهم يتكلمون انجليزي وبطلاقه وبدون لايستحوون فحبيت الوضع حتى الدكاتره بالكليه

يشرحون بالانجليزي لأنه كتبنا كلها انجليزي وماكو عربي ,, فصج شنو استفدنا انه مانعرف غير العربي ؟ انا حدي متحسفه ولو يرد فيني الزمن لي ورا

وكنت فاهمه جان قلت حق امي وابوي دخلوني انجلش سكوول ,, وعلى فكره انا شاطره بالانجليزي وأقط قطات بس مشكلتي أستحي اذا كلمت

أحد ,, وخصوصا انه اغلب رفيجاتي مايتكلمون عربي ,,

كل واحد على راحته محد يفرض على أحد شلون يتكلم ! وصح احنا نعتز بلغتنا واهيا لغة القرآن ماقلنا شي وكلنا نعرف نقرا عربي

ونقرا قرآن هذي مو مشكله ,,حلو انه الانسان يتعلم اكثر من لغه

 

[ارض الاجواد]

حبيبتي صح كلامج مو غرور البنت تحب تتكلم عادي بالعكس ما اتضايق كل وحده فينا تتكلم بالطريقة الي تعجبها ما اجبر الكل ما يتكلم عشاني )
عشتووو:dddds:

 

[ملكة على عرشي]

ok ana bayn kalami cham kelma english
bas fee nass
feehum naq9 ytfalsefoun wayed
thnx tra hatha mo '3roor
intay 5alch wathqa oo bas
hathoula m7tareen laish mo 7a9elihom y3arfoon cham kelma bil english

انزين ولي يكتب با الانقليزي شنو !!!!لوووووووووووووووووووووووووووول_03ba:

 

[zumreda]

موضوع حلو للنقاش بالنسبة الي انا مو زينة بالانكليزي يعني الكلام افهمه بس الكتابة مو زينة بيها المهم احب هذا الدزاين اللي يتكلم عربي ويدخل بكلامه انكليزي واصلا جان عاجبني اكون هجي بس ما حسيته يتماشى ويا شخصيتي بس كون ما تكون تتكلم على انوا شوفوني وبغرور عادي اتقبله منها واللي ما يتقبله بكيفه هاي عاداتنا وتقاليد مجتمعنا ما نكدر نغيرها لازم يكون هناك انتقاد

 

[Rock & Zoza]

صح .. ذكرتوا نقطة مهمة , ان كل واحد و له الحرية الشخصية و طريقته الخاصة بالتعبير
اذا كان هذا الشي يضاقكم .. فـ يراجع لكم
كل إنسان حر بإختيار اسلوبه ^.^

و يسلمووو على مشاركاتكم

 

[طمــوح]

طبعا أتضايق !


لأن احنا لغتنا العربية لغة القرآن الكريم لازم نعتز فيها .. شنو الداعي و شنو السبب اني اتكلم انجليزي ؟؟

أنا خالتي ريلها يشتغل بالسفارة بره و بناتها من يوم اهما بالروضه هناك و كاهم الحين كبار و لما يتكلمون و لا كلمة ينطقونها انجليزي مع ان طول عمرهم عايشين بره !
و بنات المدارس الأجنية أنا عيال خالي كاهم الحين بالجامعه و خريجين مدارس اجنبية و امريكيه عمرهم ما تكلموا انجليزي !
إلا طبعا في حال ان الكلمة مالها مرادف بالعربي هذا شي 2 ..


و بعيدن هذا يعتبر من التغريب و العولمه اهما اساسا يبون هالشي يبون يمسحون اعتزازنا بغتنا العربيه لأنها لغة القرآن الكريم
و يا الغالية لو تشوفين ان الحين لما وحده تقول كلمه بالعربي يضحكون


يعني اضرب لج مثال :

انا رفيجتي مره قالت : ليش دزيتيلي رسالة :؟؟
الناس كلها ضحكت @@ ويع شنو رساله قولي مسج !!!

و مسج شنو اهيا اصلا .. مو رسالة بالانجليزي ؟
ليش صار اللي يتكلم انجليزي اهوا المتطور و اللي يتكلم عربي متخلف ؟؟
ليش صارت لغة الانجليزي المعرب اهيا السائدة بين البنات و الشباب ؟؟
لغتنا فيها شي ناقص ؟؟ اصلا احنا اللغة الوحيده في العالم اللي فيها هالثروة اللغوية و الكلمات و التعبيرات !!



و عشان تعرفين هاج هالمقوله :


اللغة العربية تراث لغوي يحمل عقيدة اجتماعيه يجب ان نحاربها"
سلامة موسى - مدرسة بريمر

هذا اللي قاله سلامه موسى شخص عربي قح ! و لكن يحارب لغة الام !
فهل احنا راح نساهم بهالحرب العشواء على اللغة ؟؟


رسالة حق اللي يكرهون يتكلمون عربي او يحبون الانجليزي المعرب على العربي ..

و اذا كنا نعتقد ان استبدال اللغة العربية بلغة ثانية فانت محاربه لها @@


ودي اعرف .. هل اللغة العربية ناقصه أم معوقه ؟ عشان نبدل حروفها بحروف لغة ثانية ؟

اللغة العربية اصلا محاربه من زمان من ناس غير عرب و غير متحدثين باللغه العربية
مستهدفه منذ اللورد كريمر إلى بريمر




يقول غلاديستون :
" ما دام هذا الكتاب( القرآن ) بيد المسلمين و العرب فلن تقوم لنا بينهم قائمة .. إذن استهدفوا اللغه لكي تتغير ! "

فهل أنتي من ضمن المستهدفين ؟!


رسالة لمن يكتبون الادعية والآيات القرآنية بحروف لاتينيه ( انجليزية )هل الآيات نزلت بحروف عربية ام بحروف انجليزيه ؟
هل يوجد مصحف مطبوع بحروف انجليزيه يقرأه العرب ؟
هل انت تعيش بين اناس غير متحدثين للغة العربية كي تكتب لهم الادعية والآايات بحروف انجليزيه ؟

يا للعجب !

و اخيراً
لدي سؤال اعتبره صعب جدا

لماذا أحيت أسرائيل لغةً ميته ؟ .. بينما يقتل العرب لغةً حية ؟!

هل اليهود افضل منا ولغتهم افضل من لغتنا لكي تحيا .. ولغتنا تموت ؟


" لغتي أمي .. لا أستطيع أن أغيرها حتى لو كانت قبيحه , فكيف وهي أجمل الأمهات ؟! "

 

[حمام شاقني فنه]

يعني مو متعودين على هاللهجه الدخيله

حنّا لغتنا الاساسيهه العربيه شكو تكلم اجنبي


عن نوفسي ماحب انخرط بالتجادل مع هالنوعيه لاني ماراح اتاقلم >ميح بالانجليزي

 

[MaFaZ]

اختي الفاضلة مشكورة على هالموضوع بس انتي اللي ما تعرفينه ومادري اذا درستيه او لا بس هذا جزء من مسحهم لشخصيتنا ولغتنا العربية اللي اهي لغة القرآن الكريم يعني الحين لو اسالج سؤال نحو ما راح تعرفين او معنى كلمة عربية فصحى بالرغم من انج بلبل انجليزي صح ؟؟
وهذا كان جزء من مخططاتهم لما استعمروا الدول العربية عشان جذي لو تشوفين دول المغرب العربي اغلب كلامهم فرنسي
بلغتنا العامية تلاقين وايد كلمات دخيلة فالزبدة من هذا كله هالمرة لما استعمرونا ما استعمرونا بدبابات وجيش واسلحة لأن شافوا الهطريقة مكلفة وتستهلك من شعوبهم وايد استعمرونا باللبس والاكل والاسلوب وللاسف بالكلام

 

[الموت ولا فرقاك]

شوفي انا بوجهه نظري اذا كنتي تعرفين انقلش ووحده تحجت قدامج عادي
بيكون معاج الامر عادي
اما اذا كنتي ما تعرفين فما يعجبج لانج تحسين نفسج ضايعه يوم تتحجى
هذي وجهه نظري

تقبلي مروري

 

[أفرض هيبتي]

مادري مااحسه غرور وانا من النوع هذا اللي تقط بعض الكلمات الانقلش مع هلي

وفاهميني ويردون علي عادي بنفس الطريقه او بالعربي



بالعكس اشوفها شغله حلوه وتقوي اللغه عند الشخص

وبس سلامتج

 

[Rock & Zoza]

شكرا بنات على مشاركاتكم
و احترم آرائكم المختلفة
يعطيكم العافيه عالمشاركة

 

[JooJoo Hamsters]

بالنسبه لـــــــي


الشغله مو حلوه على اي احد ..

الناس المتعودين على الانقليزي من الصغر تشوفينهم شايفين خير وما يقطون الكلام الا بمواقف معينه ..

حلو الواحد تكون عنده خبره بس كل دوله لها لهجه تعتز فيها ..

ليش احنا نهد لغتنا ونروح للغه ناس ما تعتز فينا أبــــدا ؟


صح اللغه الانقليزيه الحين مطلوبه بكل مكان .. و الكل يحتاجها

بس مارسيها بالاماكن المحتاجه ^^

يعني ماله داعي تسولفين مع رفيجاتج ونص كلامج انقليزي .. دام انج تعرفين الترجمه بالعربي ..



بالنسبه لي ما احب واتضايق من الي كلامها كله انقليزي ..

لانه الحين صارت الكويت هبه بهالسالفه وكل من هب ودب قامت تقط كلام انقليزي وتتفلسف ..

اما البنات المتربين على هالشي من اهلهم من الصغر تلاقينهم شايفين خير وما يتحجون بكل مكان وبس بمواقف معينه ان تطلب الامر

تقول الكلمه بالانقليزي

وهذا يشرح كلامي من اختي الي فوق

نا خالتي ريلها يشتغل بالسفارة بره و بناتها من يوم اهما بالروضه هناك و كاهم الحين كبار و لما يتكلمون و لا كلمة ينطقونها انجليزي مع ان طول عمرهم عايشين بره !

وطبعا مو كل البنات الي ما يفهمون انقليزي ما يحبون الي جدامهم يتكلم >> لانه ما يفهمونه ..

لان انا حدي 100% بالانقليزي واتكلم و كل شي اوكيه

بس ما احب اتكلم مع وحده تقط قطات بالانقليزي .. مادري اتضايق منها ^^


وكل واحد ورايه مادري

 

[Vera~]

موضوع حلو بالأول اختي الكريمة أنا عن نفسي أحب اللغة الانجليزيه من صغر ومع إني دخلت مدارس حكومية حالي حال غيري لكن عشقي للغة خلاني اتطور فيها منذ الصغر الي تقول فلسفه ومن هسوالف ليش ما نظرتوا فيها ان لما تسافرين لعلاج وبغيتي تكلمين دكتور كلمتين على بعض مو قادرة تقولينهم؟؟؟ ولا تاشرين وحالتج حالة؟يعني الحين احنا لما نيب خدامة ببيتنا مو نتعامل بالاشارات وكلمات ولهجات غريبه حتى ماهي لهجتنا عشان تفهم علينا؟وتلاقون بعد اليهال الي بس للأسف قاطينهم عليهم أغلب اوقات تلاقون كلامهم مكسر؟بالعكس حلو تعتزين بعروبتج وحلو أيضا تعلمين اطفالج اللغة الانجليزيه لانها لغة عالمية لو تحطون بس دقيقة على أخبار bbc وغيرها من قنوات شوفوا بس شلون يحرفون المواضيع ضد العرب لو ان العرب ما يتعلمون لغتهم بجدارة شلون ممكن تحاربونهم؟موضوع اللغة وتعلمها متفرع حول مواضيع كثيرة بعض ناس بتقول عروبتنا واحنا فخورين وما يحتاج لكن أي عروبة تتكلمون عنها بهذا اليوم وانتم الي راكضين ورا الاجانب سواء بلبس او بعادات غريبه وصلتوها بإيدكم لدولكم؟ليش العروبة تطلع بس اذا صار السالفة فيها تحدي واذا واجهناكم بشي غلط او شي غريب وعادات وطريقة لبس وغيره من اشياء ما تدش العقل قلتو لا انتم متخلفين ورجعيين احنا بعصر العولمة ومن هالحجي الفاضي!؟

على العموم أنا آسفه على الإطالة ولك وحده منها راينا وأنا واعوذ من كلمة أنا^^ طرحتي راي بللي أشوفه

وأشكر صاحبة الموضوع على طرحها يعطيج العافية وهذي كانت اول مشاركة معاكم

VERA

 

[girl_188]

اختي مشكوره على الموضوع المهم

اول شي انا دراستي كلها انجليزي وهذا الشي ما يمنع اني اتكلم عربي

فيه وحده معاي ما تعرف تقرا عربي يعني ما ادري حتى شلون تقرا قران مع انها كويتيه ام وابو؟

ثاني شي بنات اذا رحتوا الدول الاوربيه مثال والله يحبون لغتهم ويعصبون اذا اكلمهم انجليزي خصوصا اسبانيا

ليش احنا مو نفسهم؟

واكثر شي يغث الامهات الكويتيات لما تحاجى ولدها بالانجليزي ليش؟ مو كافي المدرسه يعني ولا شنو؟

ومره سمعت وحده تزف بنتها لانها تكلمت كويتي
ولا المدرسين الاجانب يستغربون ليش نتكلم مع بعض انجليزي ويضحكون علينا


وطبعا حلو الشخص يكون مثقف وتكون لغه ثانيه مو اولى

 

[ام شباصه]

والله بالنسبه لي يعتمد على البنت
يعني اعرف وحده متخرجه من مدرسه اجنبيه ودارسه ومشتغله بامريكا فوق ال7 سنين يعني طبيعي كلامها الاصلي انجليزي واحس العربي صعب عليها
لكن تييج وحده ثانويه حكوميه وحدها بالانجليزي الافلام الاجنبيه ...ماله داعي التفلسف يعني ترا اعرف انجليزي اصلا يبين لان تلقينها مثل الي اتهوس على الكلمه زياده يعني انتبهو ترا اعرف انجليزي

 

[mi corazon]

عزيزتي على حسب الموقف والمكان يحكم

يعني احنا نفخر لمن نلاقي وحده رابيه بره وكله مدارس انجليزيه لكنها تتكلم بالعربي او لغتها العاميه مع انها تواجه صعوبه فتلاقينها تتكلم ببطء وتفكر بالكلمه قبل لا تقولها لأنها صعبه عليها

لكن لمن يكون الموضوع جاد او نتناقش بسالفه وتيي وحده تقط كلمات وايد زياده عن الحد انجليزي هم مو حلوه احس جني قاعده بمعهد تعليم لغه او شي جذي

هالشي عادي لمن تحسين ان اللفظه بالانجليزي معناها ابلغ من لمن تقولينها بالعربي

يعني مثال لمن اقول هالبنت عندها ال skills رهيبة ( الحين استخدمتي الكلمه اهني مع جمله كامله عربيه فما راح تختل ولا بتضايقين السامع لانه ماراح يسوي شفتات وايد على الدكشينري اللي بمخه مال اللغه)

غير لمن تيي وحده تقول امس كنت مع ماي انكل ورحنا سوينا شوبنق عجيب بعدين رحنا الموفي وطلعنا مرينا الكوفي شوب .. بلا بلا بلا

يعني صج هالجمل المركبه جدا مرهقه للمخ لأن اللي جدامج يحسج مو جاده بالحجي او تقصدين تستفزينه

وهاللي قرقته كله من وجهة نظري واكيد غيري عنده راي غيري بس ماحبيت اجامل

بس لو انتي تقصدين تقوين اللغة فهذا شي يعتم على شخصيتج وثقتج .. يعني لايهمج راي احد ابد

ثانكيو عالموضوع