ليش تتضايقين لما وحده ....... !!

[$فزولها$]

أول شئ انا افتخر وافتخر فى لغتى كاااااااااااااااافى انها لغة قرأنى الكريم
وثانيا انا أشوف اللى اكلمه اذا هو عربى نفسى ليش الساخااااااااافه وأقط كلماااااااااااااات اجنبيه احس باااااااااااااااااااااايخه يا اتكلم اجنبى سااااااااده او عربى ساااااااااااااااده وب وبعدين اذا اللى قدمى اجنبى حتى لو يعرف عربى عااااااى اكلمه فى لغتة اهوووووووو اجنبى وسلامتكم وهذا رأى

 

[$فزولها$]

أول شئ انا افتخر وافتخر فى لغتى كاااااااااااااااافى انها لغة قرأنى الكريم
وثانيا انا أشوف اللى اكلمه اذا هو عربى نفسى ليش الساخااااااااافه وأقط كلماااااااااااااات اجنبيه احس باااااااااااااااااااااايخه يا اتكلم اجنبى سااااااااده او عربى ساااااااااااااااده وب وبعدين اذا اللى قدمى اجنبى حتى لو يعرف عربى عااااااى اكلمه فى لغتة اهوووووووو اجنبى وسلامتكم وهذا رأى

 

[أحبك لو تجافيني]

انا اذا تكلمت يمكن يكون نص كلامي او اقل English بس مادري ليش بعض الناس يشوفونه غرور

وكل ما اتكلم English احس ان اللي معاي يتنرفزون وبعض الناس يطلعون حجي من وراج انج مغروره وشايفه نفسج وغصب تبين تتحجين English وانتي ما تعرفين :eh_s(14):
والله الحمدلله اعرف اتكلم English عدل ولساني اساسا متعود ومو قاعده اقول هالكلام يعني غرور وجذي لا بالعكس علشان انا عندي رفيجات بالمنتدى واهم معاي بالدوام ويصيرون لي حبيت اقولهم جذي علشان ما يطلعون عني حجي من وراي

واذا يبون يقولون كلام خل يقولون جدامي احسن لهم علشان ما ياخذون اثام وانا راح اتقبل الكلام لأنه وجهه نظر

وهذا رايي ​

 

[انصاريه قمره]

انا وحده احرص على ممارسة اللغات علشان ما انسى لاني هالسنه وقفت قيدي لاني حملت وحسيت اني ما قمت اتكلم انجليزي بطلاقه مثل قبل بس احب امارسها مع ناس يتقنونهاا مو حريم كبار مساكين اقعد اتفلسف عليهم

 

[katko0ota]

صباح الخير عزيزتي

الموضوع الي طرحتيه حلووو بس شائك و متشعب يعني كل وحده لها سببها و ظروفها

عندج انا بسبب ظروف شغلي و دراستي قمت اخلط بالكلام لدرجه الوالد يقولي ساعات احس ان امج هنديه هههههه

ظروف عملي تلزمني اني طووول الوقت اتكلم انجليزي فا تخيلي اذا انتي اغلب الوقت تتكلمين انجليزي و ظربيهم بجم سنه من عمرج شنو الوضع
هذا غير مجال دراستي لغه انجليزيه و ادابها يعني دراسه و شغل ؟؟ غير اني لفتره كنت عايشه بره في فرنسا فتخيلي الوضع فا اصدقائي ماكينتوووش تقدرين تقولين هههههه

لكن مع كل الظروف لغه العربيه هي الأصل و السبب يرجع لأن تاسيسنا من البدايه كان قوي لدرجه انه لغتي العربيه ما نسيتها و ما تاثرت ؟ لأن الوالده بالبيت ماسستنا عدل الحمدلله و لأنها لغه القران و بالعكس لما كنت بره دايما ابين لأصدقائي مدى جمال اللغه العربيه و انها من اصعب و اجمل اللغات

هذي وجهه نظري و اسفه علىالأطاله

تقبلي مروري

 

[د-سوسه]

ماتضايق ..استغرب ..حتي من الي ماتتكلم كويتي عدل يعني انها صغيره وماتعرف حجي الحريم الكبار .. لان اللهجه يعني هويه ليش اهد هويتي الي اهي انتمائي واروح حق هويه مومني وفيني لاو عيوبها اكثر من مزايياها شوفو الاجانب اشلون اذا راحو اي ديره مايفكرون بالوناسه نفسنا بالعكس يروحون المتاحف والاماكن التراثيه ويحبون الاشياء التقليديه ..تتوقعون ليش لانهم فاقدين هالشي واحنا نهد عاداتنا ونقلب حجينا ونقلدهم

 

[asrar mdfona]

انا مع ان الوحده تتكلم انجليزي اوكي مع اللي يعرفون انجليزي او اهلها واقاربها ورفيجاتها اذا كلهم يعرفون اوكي مارسي اللغه معاهم
وقويهاا ومع اللي بالمطاعم او المحلات بالسوق لكن اذا اللي قدامج ما يعرف انجليزي او ما يعرف الا كم كلمه بس فاذا تكلمتي انجليزي بينقد عليج وجنج تحرجينه فتلكمي عربي احسن

 

[shaikhat elbnat]

يضايقني في حال حسيت انها تتكلف .. او عبالها مسكينه نوع من التحرر او انها كول .. لانه جد في بنات و شباب يتعمدون يدخلون مفردات انجليزيه .. عبالهم انهم جذيه صاروا متحررين .. هني ما احب

يعني تلاقيني اتكلم مع وحده اتقط لي جم كلمه انجليزي .. و انا متكنه بالنجليزي بس متمسكه في العربي لانها لغتي .. اما اهيا حافظتلي كلمتين و مستانسه فيهم .. صح احيانا تطلع عفويا عادي ,, بس انا اتكلم للي يتصنعون و عبالهم احلى

اما في ناس معذورين ,, تلاقينهم عايشين بره .. او دارسين بمدارس اجنبيه لفتره طويله . مو دارستلي سنه ولا سنتين .. او امها انجليزيه ,, هني معذوره

 

[السكوت مشكلتى]

بالنسبة لى انا مرات اقط كلمات انجليزي حتى لما اتكلم مع اهلى
تعودت لان اغلب اللى فى دوامي اجانب واتكلم معاهم انجليزي مسالة تعود لا اكثر ولا اقل
مو معناه غرور بس فعلا فى ناس مغترة وتتكلم انجليزي على طول

 

[a3andho0om]

يعني عااادي عندي مااا اشوووفها مشكله عوووده و تضااايق كل واااحد يسوي اللي يريحه

 

[ظبيانيه2000]

مرحباااااااااااااااااا الساع

انا معاج احب اتكلم انجليزي بس على حسب المكان مثلا في السوق في العيادات مع ربيعاتي مو مع جدوتي
اوقدام حد مايعرف يرمس انجليزي واذاماتكلمنا ومارسنااللغه راح ننساها ولاشو رايج

 

[حصووونه]

انا باطه جبدي المسممه الكويتيه اللي في فوضه ولا موضه كله تقط انقليزي صراحه مالها داعي تفلسف واضح حتى سعد الدواس صاير مليق..

 

[اللوحة الناقصة]

اولا شوفي حبيبتي انا تخصصي لغة انجليزية بالثانوية وبالجامعة ومع ذلك ما استخدمها الا مع الي يفهون علي تمام عشان ما اعرض نفسي ولا اعرضهم للاحراج

ثانيا بالنسبة لي عادي ما يضيايقني لما احد يقط قطات انجليزية

ثالثا ذكرتني العضوة نتاشا بمادة بتخصصنا بالجامعه اسمها علم لغة اجتماعي وكان في محاضرة عن هالموضوع ان

الانسان احيانا يلجا لاستخدام كلمه او عباره من لغة مختلفه عن لغته لانه يرى انها تعبر عن شعوره او عن الي بقوله افضل

من اي كلمه بلغته اهو الام

يعني مو بالضرورة يكون مغرور او قصده يتفلسف اهو ممكن يكون البعض منهم جذي بس ما نقدر نظلم الكل بهالحكم

ومشكورة حبيبتي عالموضوع

​

 

[روح مغليهآ]

لانه ملااااااقه حده ماقدر اوصفلج شكثر ملاقه

 

[brat]

They're jealous

 

[كسرة عود]

حبيبتي واللة حاسة بكلامج وأدري بما أنج طرحتي المشكلة أنه فعلا مو قصدج تفلسف أبد ...... بس شتسوين بأفهام الناس

أنا عن نفسي كنت ممتاااااااااازة باللغة الانجليزية وأحب أستخدمها بكلامي على البسيييط مع أهلي بس

مع العلم أنني خريجة إسلامية فسمعت مرة وقريت أن من صفات الولاء للكفار حب لغتهم والتحدث فيها وبما أنني إنسانه أحب التزم بديني وادري أن الولاء والبراء شي أساسي في إيمان الانسان
استفسرت من شيخ أني مووووووو قصدي حب لغتهم لأنها لهم بس لأنها مهمة وأستفيد منها وماتقوى إلا بالممارسة فالحمد لله فكرتي وصلت وقال لا بأس بس ....
فالشاهد إنما الأعمال بالنيات ولكل امرئ ما نوى

بس نصيحتي لاتكثرينها مع الناس مراعاة لمستويات الجميع ......وخليها اسبشل هههههه مع أهلج حبيبتي

 

[زقرتيه]

يا بعد عمري يا قلبي ^^ خليني اقولج

يعنيي انا اساسن ميولي انجليزي و تخصصي

و احب اللغه اللأنجليزيه

لكن ليش اتكلم انجليزي اب دولتيي العربيه الأصيله يعني بالله عيليج النجليز بيتكلمون عربييي مع اهلهم

طبعا لا و الكل يعرف يتكلم الأنجليزي و في الفرنسي و اللاتيني و و و

و هذي لغتنا لغة القران بالله اشلون نضيع ثراء لغتنا العربي اب "ايدنا " يا حلوه ^^؟؟؟؟؟؟؟؟؟!!!!!!!!

 

[HaPpY_SpiRiT]

أنا عادي ما تفرق معاي بس ساعات تحسين في بنات لا والله يتفلسفون حتى أنا ساعات ان قطيت كلمة و لا 2 بالانغلش مو زين تشوفين ويووه اللي أحاجيهم اللي أبلش أتخربط هههه و في بعضهم لا والله هم وين و الانغلش وين أمبيه أذكر وحدة كانت توها منقبلة ب GUSt و هي ويييييين و الانغلش وين والله تخيلي تقوللي بدش جامع الخليج فقلتلها ايي ماشالله ألحين وايد ناس قاموا يدشون GUST صارت أحسن من جامعة الكويت تخيلي تقوللي لا لا مو GUST جامعة الخليج و ربي تميت فوق 10 دقايق أفهمها ان سيم سيم بس ماكو فايدة و ألحين ميتة بعرف اشسوت بجامعة الخليج
الله يعينها

 

[Rock & Zoza]

They're jealous

hahaha
hell yeah they are
:dddds:

 

[Rock & Zoza]

و شكرا بنات عـ مشاركاتكم و ردودكم
في بعض كانت مشاركاتهم مشابهه للي قبلهم و رديت عليهم
و يعطيكم العافيه على التفاعل
و احترم وجهات تظركم