السلام عليكم .. شلونكم يا احلى كويتيات ..
مشكلتي يمكن تكون طويلة ياريت تصبرون وانتو تقرونها لأن خلاص تعبت وابي حل للي انه فيه ..
الحمدلله وماشاءالله الله عطاني ام وابو واخت واخو علاقتي معاهم قويييييية جدا وماشاءالله الكل يضرب فينا المثل في علاقتنا
كأنا أصدقاء وعايلة في نفس الوقت.. ورزقني الله بزوج طيب وحنون وعلاقتنا جدا سعيدة ولله الحمد ..
اللي يجوفني ويعرفني عمره مايحس او يتوقع ان كل يوم يمر في حياتي قلبي يتقطع ويتدمر زود ..
الشي اللي مدمرني الصداقات اللي كانت اكثر من صداقات بالنسبة لي .. فقدتها قبل 5 سنين .. كل يوم اسأل نفسي ليش
وشلون وكل يوم اقول ياريت وياريت ..
في البداية .. بنت خالتي اللي اهي اختي بالرضاعة .. كنا مع بع على طول من يوم احنا في اللفة ..
حتى اسامينا قريبة من بعض .. وكل شي نسويه مع بعض .. يعني من زود ماكنا مع بعض يدتي الله يرحمها
كانت دايما تقول (ياخوفي وحدة منهم يصيدها شي والثانية تروح وراها ..مو زين هالكثر انتو مع بعض) ..
اهي اصغر مني بشهر بس طول الوقت كنت احس روحي اكبر منها وان من واجبي اني احميها واخلي بالي عليها
وانصحها .. رغم انها من اعقل البنات في العايلة ورزينة ماشاءالله عليها ومتفوقة في الدراسة بعد .. في السنة الدراسية انه
كنت سنة مجدمة عنها .. بس بعد نقلت من مدرستي لمدرستها بس عشان نكون مع بعض.. فبجذي صديقاتها اللي كانو
زميلاتها صارو صديقاتي .. وصرنا مجموعة صداقتنا روح بالروح مثل ما يقولون .. كنا اكثر من خوات .. كلهم
اصغر مني بشهور .. يعني انه كنت اكبر وحدة في المجموعة .. الأيام مرت والحمدلله تخرجت من المدرسة .. والسنة
اللي عقبها تخرجو مجموعتي من المدرسة .. كل وحدة راحت جامعة مختلفة .. هم تمت علاقتنا نفس الشي ماكان في أي
تغيير رغم ان كل وحدة صارت في جامعة ومشغولياتها .. بنت خالتي كان ابوها وده انها تشارك خواتها اللي اكبر منها
وتروح تدرس في لندن .. بس ماكانت تبي تصير بعيدة وايد فإقترحت عليها انها تروح الإمارات وتدرس في جامعة امريكية
واهي من احسن الجامعات في الخليج بعد ..
المهم .. اهي كانت على عاقة مع واحد 7 سنين .. هو قدنا يعني .. من يوم عمرهم 13 واهم يحبون بعض ..
وانه كنت اراقبها واحاسب انها ماتسوي شي غلط .. والصبي كان محترم لآخر درجة ومن عايلة محترمة .. بس صار
ان علاقتهم تمت مدة طويلة يعني 7 سنين ..وهو كان ولد الجيران سابقا فكنت اعرفه خصوصا ان لما كنا صغار كنا نلعب
مع بعض فعادي لما اجوفه اسلم عليه وكان ايي بيتنا يلعب بلاي ستيشن مع اخوي .. كان كأنه اخوي بالضبط وثقتي فيه
100% في يوم من الأيام بعد هال7 سنين خلاص كبرنا ورحنا الجامعة .. بنت خالة امي اللي كانت في نفس جامعة
حبيب بنت خالتي .. ياتلي وصدمتني وقالتلي ان هالصبي وايد لعوب وعنده حركات مو شي ! .. ما صدقتها ..
راوتني اشياء عالنت ودلائل .. انصدمت صدمة قوية منه لأن ابد ماكنت متوقعة .. شلون اقول حق بنت خالتي اللي
في الإمارات ماتدري هالصبي شقاعد يسوي من وراها طول هال7 سنين !!!!!!!!!! غضبت غضب مو طبيعي
حسيت بخيانة مو طبيعية .. كلمت بنت خالتي ذيج الليلة مثل كل ليلة عالمسنجر .. حست ان فيني شي مو طبيعي ..
حنت علي حنه إلا اقولها شصاير .. قلت لها مافي شي .. ما ابي اقولها اهي في الغربة واذا درت بيصيدها شي
بعد 7 سنين مو شوية !! .. وهو عالأساس يخطبها جريب بعد !! .. حنت وحنت وبطت راسي من الحنة وانه
من الأساس كنت معصبة ولايعة جبدي .. قلت لها بكل عصبية الموضوع كااااااامل .. سكتت .. وصاحت ..
اهني انه حسيت ان المفروض ماكنت اقولها على الأقل اصبر ليما ترد الديرة عشان اكلمها شخصيا وتواجه الصبي ..
المهم .. حلفتها براس وبصداقتنا انها ماتقوله شي ولما ترجع الجيرة تواجه المشكلة بشكل جدي .. حلفت وكل شي ..
وصكيت المسنجر ورحت نمت .. انه هالصوب صكيت المسنجر وهاي من ذاك الصوب صكت المسنجر وراحت اتصلت
فيه وقالت له كللللللللللللللللل شي .. وطبعا طبعا كل شي انقلب علي .. وصرت شنو؟ صرت انه اللي بخرب
بينهم !!!!!!!!؟؟؟؟؟؟؟؟؟؟؟؟ انقلب الموضوع تماما علي وبطريقة غرييييييييييييييييييييييييبة !!!! ..
انه من كثر العصبية على السالفة قاطعت بنت خالتي يمكن 4 شهور .. وهي كل يوم تتصل فيني وتصيح وانه حاقرتها ..
ليش تتصرف بهالشكل ؟؟ ليش راحت قالتله والصبي قلب علي الموضوع كامل وهي مصدقة !!!!!!!!!! ..
المهم بعد هالسالفة بشهور .. خطبها .. وانه ماحضرت الخطوبة .. واختربت العلاقة تماما بعد هالموضوع ..
وطبعا خسرت المجموعة كلها على هالموضوع .. كل شي انفهم غلط .. وتميت انه بروحي .. 5 سنين على هالسالفة
ولحد الحين ماعرف ليش صار كل ذي .. كلهم مازالو صديقات .. وانه اهني بروحي .. ومو قادرة اتقبل اللي صار
كله ضدي .. وفي نفس الفترة وحدة من المجموعة كانت تتكلم عن وحدة ويانا على طوووووووووووووووول يعني مادري
ليش .. انه حسيت بتأنيب ضمير ورحن قلت حق اللي نتكلم عنها .. وبعد انقلبت السالفة علي .. ؟؟!!
يعني مادري شنو الغلط اللي انه سويته .. بعد اللي صار بسنة .. رحت بيت خالتي عالأساس اكلم بنت خالتي واقولها
ان كل اللي صار سوء تفاهم والمفروض مانخلي صبي يدخل بينا .. تدرون شنو ردت علي ؟ .. ( انتي كنتي بتخربين
حياتي .. والحين تيين تقولين شي ثاني .. انتي فيج انفصام في الشخصية ؟ ) ... آآآآآآخ .. كانت هالجملة مثل السهم
في قلبي .. مو عارفة شلون انسى الموضوع كامل .. بنت خالتي اختي وصديقتي .. وصديقاتي .. وين راحو ؟؟
ليش صار كل ذي ؟؟ ليش انه تميت بروحي ..
يمكن ماشرحت لكم الموضوع عدل وطولتها وايد .. بس وانه قاعدة اقولكم والله الكيبورد كله دموع .. كل يوم اصيح ..
5 سنين .. وانه ليحين مو قادرة اتجاوز هالشي اللي صار كامل .................
