يومياتنا بالصور للتخلص من ال10كيلو الباقية / ج2

[نارنجه]

بسم الله
وعلى بركة الله

نفتتح الجزء الثاني من تجمعنا السابق
يومياتي بالصور و لمدة 3 اشهر متواصلة حياكم

الي افتتحته شيخة*** البنات
.



.


.​

 

[نارنجه]

شروط هالتجمع لبدايه صحيحيه .. ​

- نبتعد عن الميزان لمده شهر نحذفه
بعيييييد عن عيوننا .. ​

- نبتعد شوي عن الزوارات اللي مالها اول و لا تالي
وبس نقعد وناكل .. ​

- نسوي رياضه خفيفه خفيفه لو 20 مره تمرين معده ..
أو تنظيف البيت أو أي شي المهم نتحرك ..​

- نشرب اعشاب << عندي خلطه اعشاب
بكتبها لكم بعد شوي ..​

- كل يوم نرطب جسمنا و نشرب كميه كبيره
من الماي ادري ماتشربون وايد المفروض
8 قلاصات بس مو مشكله عالاقل شربو
4 قلاصات قبل كل وجبه وقبل كل سناك .. ​

..​

هالتجمع مفتوح للكل و بأي وقت اللي ​

ودها تشترك و مستعده وقدها ​

تحط بياناتها..​

الاسم :
الوزن:
الرجيم:​

 

[نارنجه]

الله يوفقني ويوفق الكل :yaaaaaarb:

 

[نارنجه]

خلطه الاعشاب من د. مصريه شفتها بيوتيوب ماذكر شسمها ..

بصراحه اقتنعت بكلامها و الخلطه سهله و لاتحتاج اي كلافه

وكل شي موجود بالبيت ..

مقادير الخلطه ..

قلاص ماي مغلي مو تغلين الاعشاب فيه لا بس حطي ماي

بالقلاص وحطي فوقه هالاعشاب و خليهم ينقعون وشربيهم

والله الطعم حلوو وعاااادي و مايلوع الجبد ..

وتحرق الدهون بشكل خيالي وتسد الشهيه ..

وتنزل شكل جسمج كأنج نازله 7 كيلو ..

مره ثانيه مقادير الخلطه .. ..

قلاص ماي مغلي + شريحتين ليمون + قفشه كمون مطحون+

نص قفشه زنجبيل مطحون+ربع قفشه دارسين مطحون ..

..

وهذي خلطة الاعشاب المعتمدة في تجمعنا:rerrerek:

 

[نارنجه]

الاسم : نارنجه
الوزن السابق: 74 وكسور
الوزن الحالي :68.4

الهدف :58

الرجيم الي ناوية اتبعه ان شاء الله
رجيم الدكتور عبد الله المطوع



[[ الريوق ]]

نصف خبزه سمره خفيفه + جبن أو لبنه أو بيضة + خضار (طماط وخيار) أو 3 زيتونات + كوب حليب خالي الدسم



[[ الضحى ]]

حبه فاكهه (ممنوع الموز والمانجا) أو استكانه مكسرات (جوز - بيذان - فستق - حب) + شاي او قهوه



[[ الغداء ]]

سلطة (ملعقة زيت زيتون) + 2 همبرجر لحم او دجاج يكون مشوي أو صدر دجاجه مشوي أو علبه تونا بالماء أو 2 صيخ مشوي + كولا دايت أو ماء



[[ المغرب ]]

ككاو وسط (كتكات ابو اصبعين أو اي ككاو لكن الحجم الصغير) أو حبه فاكهه (الموز والمانجا ممنوع) + شاي او قهوة




[[ العشاء ]]

العشاء عندج اختيارات بس أفضل شي تمشين كل يوم على نوع والأفضل تكثرين من الي عليهم وجه مضحك لأنهم ينزلون الوزن بسرعة


أول يوم: 1 بيضة مسلوقة أو مقليه + عصير برتقال + توسته سمراء + خضار

ثاني يوم: تشيز برجر من ماكدونالدز + دايت + سلطة

ثالث يوم: (لو كنتي طالعة مطعم لبناني) كوب تبولة + صيخ مشوي + دايت أو ماء

رابع يوم: من 3-4 شرائح اناناس طازج + كوب روب اكتيفيا

خامس يوم: 1 توسته سمراء + جبن قليل الدسم + خضار + كوب لبن خالي الدسم + تفاحه

سادس يوم: روب خالي الدسم + خيار + 2-3 كيوي

سابع يوم: (سلطة) وتتكون من خس + (ملعقة زيت زيتون + ليمون + خل) + 3 شرائح جبن مالح أو حلوم قليل الدسم +ملعقة زيتون شرائح + دايت او ماء
او 2 سلطة أمريكانا اليونانية greek لو ماكان لج خلق تسوين هالسلطة لأنهم نفس الشيء

ثامن يوم: عصير أناناس KDD حطيه بالخلاط مع 3 حبات كيوي واخلطيهم واشربيه
أول شيء مشبع حيل واهم شيء لما تنامين يضل هالعصير يحرق الدهون بالجسم طول ما انتي نايمه
وهذا كلام الدكتور لي نقلته لكم بالحرف الواحد

$$$$$$$$$$$$$$$$$$$$$$$

ملاحظات مهمة

اشربي ماء في اي وقت بكمية كبيرة

مارسي الرياضة من 20 - 40 دقيقة يوميا تزيد من سرعة انقاص الوزن وبقوة

مسموح بتناول الخضار الورقية وبشرب الشاي (البابونج - المرمية - الينسون - الزنجبيل - النعناع) باي كمية بين الوجبات الرئيسية


ملاحظة مهمه

هذا الرجيم ينزل الوزن بدون رياضة
لكن مع الرياضة يصبح انقاص الوزن اسرع واكثر


الي نظامها تقوم الظهر الساعة 10 او 11
تتريق عادي بس ما تآخذ وجبه فترة الضحى وتنقلها لي عقب العشا بالليل إذا كانت تسهر الليل
​

 

[نارنجه]

نصيحة من الدكتور عبدالله المطوع
عجبتني حييل ومادري اشلون كانت غايبة عن بالي

تذكريها دايما
وانتي تاكلين
سواء متبعة رجيم أو لأ :


الاعتدال في الأكل وتركه قبل الشعور بالشبع تطبيق حديث الرسول عليه الصلاة والسلام
{ ثلث لطعامك وثلث لشرابك وثلث لنفسك }
وهذا معناه :-
ان تقومي من الوجبه ولديك الرغبة في أكل لقمتين أو 3 لقمات زيادة

 

[نارنجه]

اول يوم مع رجيم د المطوع

الريوق
نص خبزة شعير
بيضه عيون
خضروات ورقية / اخذت السلطة الجاهزة من مركز سلطان قلت اريح لي من الغسال و التقطيع
بس حسيتهاا ناشفه /: والخس لونه متغير
ما مدااه :$

حليب

 

[سأكون يوما ما أريد]

مبرووووك علينا الافتتاح الجديد

عواافي على قلبك نارنجه

تصدقين انه وزنك مقارب لوزني انا الحين 69 كانت 75 وهدفك نفسك هدفي انا بخاطري اوصل 58
يله خلينا نتنافس انا وياك

بصراحع مليت من الرجيم الكميائي متعب اليوم سادس يوم بكمل اسبوع وبسوي معاك رجيم المطوع انشاء الله


الريوق

اول شي لتر ماي بعدها بيضتين سلق ونص برتقاله

​

 

[مشتاقه للحب]

هلا وغلا باصديقاتي نارنجه

واختي ساكون يوم

ومبروك التجمع الجديد

انا معاك

وبتبع كل نصايحك

ومن باجر ببتدي معاك رجيم

يااللله نبغاها منافسه قويه

اليوم اول ماصحيت شربت خلطة الليمون

وفطوري كان لبنه مع خيار


والضحي تمر مع حليب


والغدا

مادري بشوف

وسسسسلامتكم

 

[نارنجه]

مبرووووك علينا الافتتاح الجديد

عواافي على قلبك نارنجه

تصدقين انه وزنك مقارب لوزني انا الحين 69 كانت 75 وهدفك نفسك هدفي انا بخاطري اوصل 58
يله خلينا نتنافس انا وياك

بصراحع مليت من الرجيم الكميائي متعب اليوم سادس يوم بكمل اسبوع وبسوي معاك رجيم المطوع انشاء الله


الريوق

اول شي لتر ماي بعدها بيضتين سلق ونص برتقاله

​

ياهلا بهالطله
:****

وناسة اوزانا قبل و بعد متقاربه
والهدف واحد

يالله جد نبيها منافسة حامية
وارادة قوية
كنت بالبداية ابي احقق الهدف قبل رمضان
الحين حاطه في بالي اني اوصل 58 كاقصى حد شهر مايوووو

همتج معاي
ان شاء الله نحقق الي نبيه

انا قلت من البداية الرجيم الكيميائي متعب
خلصي الاسبوع
وابدي معاي برجيم دكتور عبدالله
عاد يقولون انه رجيم صاروخي
ان شاء الله ننزل هالكيلوات واحنا بصحه وعافيه

و بالعافية عليج الاكل

 

[نارنجه]

هلا وغلا باصديقاتي نارنجه

واختي ساكون يوم

ومبروك التجمع الجديد

انا معاك

وبتبع كل نصايحك

ومن باجر ببتدي معاك رجيم

يااللله نبغاها منافسه قويه

اليوم اول ماصحيت شربت خلطة الليمون

وفطوري كان لبنه مع خيار


والضحي تمر مع حليب


والغدا

مادري بشوف

وسسسسلامتكم

هلا بالمشتاقة الغايبة

فقدناج

ودامج رجعتي اكيد ان شااااء الله الهمة عالية

والله يوفقنااااا و نحقق الوزن الي نبيه

عن نفسي ناوية التزم بالنظام بحذافيره
ماعدا ترتيب ايام العشا
بلتزم بس مو بالترتيب المكتوب

/

و بالعافية عليج الريووق

بانتظار باقي اليوم
ويارب يعدي من غير تخبيص

 

[نارنجه]

مجموعة نصايح من الدكتور عبدالله المطوع :eh_s(15):



شرب الماء

الاكثار من شرب الماء يخفف من تساقط الشعر

سرّ عدم نزول الوزن

عدم الشعور بالجوع هو سر عدم نزول الوزن فلن ينزل مالم تشعر بالجوع

كلما شعرت بالجوع تذكر
1-انك تسير على الدرب السليم
2- ان اللحظة التي تشعر فيها بالجوع تحرق خلالها الدهون



قطع وجبة العشاء

لا لقطع وجبة العشاااااااااااء

خففي منه وذلك بقطع النشويات منه مع الانتباه الى عدم قطع النشويات طول اليوم




أفضل وقت لممارسة الرياضة

جميع الأوقات مناسبة لكن يجب مراعاة عدم ممارستها بعد الأكل مباشرة لتنجب سوء الهضم الناتج من تدفق الدم في الأمعاء بشكل كبير

وأفضل، وقت في رمضان هو ماقبل الافطار بساعة واحدة فقط فهي تحرق الدهون المختزنه مباشرة



شرب الماء والكرش

هناك اشاعه بان شرب الماء بكثره يزيد الوزن لكن الصحيح انه :-

اذا تم شربه خلال الوجبة يؤدي الى انتفاخ البطن خلال الوجبة وهذا يؤدي الى دفع المعدة الى استقبال المزيد من الأكل ونصيحتي أن يتم شرب الماء بين الوجبات والتقليل منه مع الوجبة

​

 

[سأكون يوما ما أريد]

باااك

لتر ماي قبل الغدا
والغداا و3 حبات كيوي

مشيت كيلوين ع الجهازز
والحين قاعد اشرب جاي اخضر​

 

[سأكون يوما ما أريد]

بالعافيه مشتاقه للحب

ويله همتك معنا

كم وزنك ؟؟​

 

[نارنجه]

بالعافية ساكون يوما

/

باقي يومي

الغدا

سلطة خضرا + تونه

السناك

مكسرات + كيت كات
قشر قهوة



العشا

توستة مع جبن قليل الدسم
تفاحة
خضروات مشكلة
حليب بالقرفة بدال اللبن لان علي الدورة :$

والحمدلله ع النعمة

 

[شيخه***البنات]

يزاج الله خير نارنجه والله يوفقنا ونضعف بصحه وعافيه يارب

اليوم الاول لي في رجيم اسامه حمدي


..


ساكون يوما ما اريد

شكثر صارلج بالرجيم وجم كنتي قبل لاتسوينه ؟؟؟

 

[شيخه***البنات]

نارنجه صووووج تشووووق عليج بالعافيه

 

[مشتاقه للحب]

هلا

أنا وزني الحين ٧٥

وهدفي الاول اوصل ٧٠

انشاء الله وانا بصحه وعافيه وااجميع

وبأذن الله مع بعض بنوصل للي نبيه

اكمل لكم يومي

الغدا جريش حوالي ٨ ملاعق بدون زيت وسلطه وبرتقاله

العشا لبنه مع نص خبزه كنت جوعانه

السناك فاكهه

وسسسسسلامتكم

ومن بأجر يبتدئ رجيم عبدالله المطوع

 

[مشتاقه للحب]

صباح الخير والسعاده

الله يسعد صباحكم

الفجر شربت خلطة الليمون

وقلاص ماي

فطوري ٣حبات شابوره مع حليب

الضحي باخذ ثمرت فاكهه مع جاي اخضر

الغدا باخذ اشوي سليق مع سلطه وحبة فاكهه

العصر باخذ زبادي مع جاي اخضر

ويمكن أخذ قطعة كاكو

العشا

بيضه مسلوقه مع اثنين توست وسلطه

وقبل النوم زبادي مع تفاحه


اي ناويه اسوي خلطة الأناناس مع الكيوي وشربها قبل النوم

وسسسسسسسلامتكم

 

[سأكون يوما ما أريد]

بالعافيه عليكم


شيوخ اليوم اكمل اسبوع من رجيم اسامه من بديت الرجيم كان وزني 72 وشوي واليوم قست ظلع 68و 800 غرام
يعني نازله ما يقارب 3 كيلو وشوي وي وي وناااسه الحمد لله يارب

امس العشا كان همبرغل لحم مشوي وسلطه

يوميات اليوم الريوق بيضتين سلق ونص برتقاله ​