السلام عليكم
هلا بنات ، اسمحولي انقطعت فترة لاني انشغلت مع الدوام ، وكورسات ، وجا رمضان ووووووووو الخ ..
للتذكير فقط : انا عندي قمي سمايل ، وبروووز للفك العلوي . والجراح قالي اني احتاج لقص او رفع الفك العلوي بس ماقالي كم مللي لحد الان ، وقالي احتمال احتاج تقديم للذقن شوي لاني ذقني مسحوب على ورا شوي.. ههههه ، وبما ان وجهي طويل شوي ، قالي مع رفع الفك العلوي بيقصر الوجه وبيكون شبه دائري ، وقالي : اكييييد بيكون للاحلى , انا هني شقيييييييت الويه وعطيته ابتسامتي الي بالقمي سمايل ههههههه...
والحمد لله اقتنعت اني اسوي العملية وباذن الله بسويها بس نهاية السنة يعني نهاية 11 او نص 12 لاني مشغولة كثير هالفترة وخاصة بعد العيد ، الششغل بيكون قد راسي ، وعندي التزامات كثيره ههههههه..
انا من قطر ودكتوري مصطفى الخليل ، وحددت معاه موعد باذن الله بعد العيد لاخذ القياسات كاملة ، وقالي : بعد القياسات باقولج كل شيء بالتفصيل من حيث قياسات الفك وكم ممل لازم يرجع ووو ..
عندي كم سوال بالنسبة للعمليه :
الصفايح او الشرايح الي يحطونها بين العظم ، على كلام الجراح انها ماتنشال وتكون طول العمر ، بس هل فيه اي اثار جانبية منها ؟ اي مشاكل لاسمح الله في المستقبل ؟؟ لاني سمعت ان فيه شرايح وبراغي تذوب مع الوقت بس الجراح مانصحها وقالي انها ممكن تسبب اثار جانبية وتتفاعل مع العظم ومادري قام يخربط على راسي ومافهمت ، بس الخلاصه ان الشرايح والبراغي الي تذوب احتمال يكون لها اثار وايضا هو مايستعملها ولا ينصح فيها ، وقالي انا ما استعملهم اصلا ... المهم : هالشرايح والبراغي ، ولكل الي سووا العملية ، هل بتكون معاكم طول العمر ؟ ومن اي مادة هي ان امكن ؟ ومالها اي اثار لاسمح الله في المستقبل ؟ وماحذركم الدكتور من شيء ؟
وقالي العملية تقريبا مع التخدير تكون حوالي ال5 ساعات ، وقالي خلال اسبوعين بعد العملية بتحسين بتغير كبير وتحسن ، واغلب العمليات الي سواها يقول ماكان في انتفاخات كثيره او تورمات ، وتكون التورمات واضحة اكبر خاصة للي يسوون عملية للفك السفلي.
بخصوص ضروس العقل : انا بعض الاضراس ظهرت وبعضها لحد الان ماظهر .. هل في مشكله من ناحية هالموضوع ؟؟ لانه ماجاب لي الجراح اي طاري ناحية ضروس العقل ..
وانا عندي اللثة منتفخه بعض الشيء دايما تلتهب معاي ، ويصيبها بعض التضخم احيانا ، وهذا بسبب بروز اللثة والقمي سمايل وخبركم حلجي مفتوح 24 ساعه ، فقلت حق الجراح هل بيخف انتفاخ اللثة ؟؟ قالي لازم تتكلمين في هالموضوع وتعالجين لثتج مع اخصائي لثة ، انا كجراح اتعامل مع العظم فقط ، ولاكن اقدر اعطيج نصايح انج تروحين بعد العملية بفتره - مايضر - عندج اخصائي لثه وتعالجين لثتج .. شنو رايكم في هالموضوع.. ؟؟؟
ما ابغي اطول عليكم ، بس كلمة حق اقولها في هالمنتدى وبنات هالمنتدى ان لولاكم ماجاتني هالعزيمه والاصرار واتشجع اني اسوي العمليه ، ولو ان مافي حد منكم من قطر ومسويها في قطر ، بس مدحولي الدكتور وقالولي انه خبره. وصراحه بما انه دكتور عنده خبره وكفؤ وتمر عليه حالات كثيره وخاصة انه في ديرتي ، افضل اسويها عنده .
والله يوفق الي بيسوون العملية في المستقبل - ومنهم انا - وييسر امرهم
دعواتكم
تحياتي
هلا وغلا بأهل قطر
بالنسبه للصفايح أو الشرايح اللي نتحط تكون دائمه وما تنشال ومالها أي آثار جانيه >> آمنه للغايه
وترى حجمها صغييير يعني حتى لما تلمسين مكان الفك ما تحسين بشي
مع تطور الطب تم اختراع الصفايح والبراغي اللي تذوب مع الوقت بالعظم .. والمواد اللي متكونه منها نفس المواد اللي متكونه من العظم نفسه أي يغلب عليها الكالسيوم
يعني المفروض واللي أعرفه انه مالها أضرار
بس اكيييد حاليا جاري البحوث عليها وراح يطورونها في حال إذا فيها شي
وأساسا ليلحين ما تم تجربته بعمليات الفك بالخليج >> ما وصل لنا ليلحين
علما بأنه الخيوط المستخدمه أثناء جراحة الفك تذوب من نفسها في حال إذا التئم الجرح
وفي خياط داخلي .. يستخدمون فيها الخيوط اللي تذوب من نفسها
وتطلع من الجسم مع العرق او مع الخروج أو البول وانتي بكرامه إذا تحللت
يعني تطمني كلها مواد آمنه والحمدلله ولم يثبت علميا أي شي ضدها على مر السنين :rerrerek:
ترى جراحة الفك قدييييمه يسوونها من الخمسينات والستينات >> بس حاليا اللي اشتهرت لأنه الكل قام يهتم بأدق تفاصيل الجمال
وقاموا يبتكرون أشياء يديده تسهل الجراحه على الدكتور وعلى المريض مثل موضوع الخيوط أو الصفايح اللي تتذوب من نفسها
ترى قبل طريقة كسر الفك تختلف >> كانوا يستخدمون مطرقه للكسر
فبالتالي يصير ازرقاق وكدمات بالوجه
الحين الطب كثيييييير تطور
بالنسبه للثه >> نصيييحه روحي لأخصائي و عالجيها الحين قبل لا تبدين مشوارج
دام تصير حمره ودايما تلتهب يعني فيها مشكله >> وحطي ببالج انج اذا ركبتي التقويم ( أنا مادري إذا انتي مركبه الحين أو لأ ) راح تتفاقم المشكله أكثر وتلتهب أكثر
راح تتأذين واااااااااااااااااااايد
ضروس العقل >> أحيانا يكون الضرس مو طالع ( مو شاق اللثه) لكن الجذر موجود
بهالحاله يشيلونه جراحيا قبل العمليه أو أثناء العمليه >> يعتمد على خطة العلاح المقرره لحالتج