الله يعوضج خير يارب
وخيره افتكيتي من هالناس اللي ما تستحي
مالت عليهم هم وولدهم مافيهم خير
بالنسبه لي :
الرجل هو واهله يدورون نقاط ضعفج واذا وصلوا لنقطه منهم
يستغلون هالنقطه
يعني طليقي بينت له اني انسانه ابي العيشه وابي امشي مركبي معاه سواء ما صرف او اهتم بالبيت او اهتم فيني
اول 8 شهور ماعنده سياره كنت اتصرف واروح مع سواقين وادفع لهم
ودايم اهماله وتقصيره واهاناته ما اعلم اهلي ولا اعلم ابوي
لحد ما تمادى حيل معااااااااي
من اول اسبوع يبي يمشيني على نظام ويفرض نفسه ويستقوي علي
ان طلعت بره لاتدقين عادي يغيب يومين ومدري عنه وممنوع ادق
ان دقيت محترقه ايدي او تعبانه قام يسبني وخرا عليج
وبس شغلي انا وياه مسجات
وكله سهران وبره من كنت عروس ونفسه خاااااايسه
ويعاملني جني خدامه من يدش البيت يدور وراي سلة الغسيل متروسه والمنشر الهدوم اللي عليه ليش للحين ما كويتيهم
يدور زله يدور مشكله يتسبب
مع انه عنده هدوم بالكبت
كنت انطم على الاهانات ما ارد لاني ما تربيت على المرادد واللسان
صح ان عصبت وانفجرت من التراكمات اصرخ وصوتي عالي
بس ترا اغلب الوقت ابي السلام والهدوء
وهو قاسي وجاف وكان يدور الزله عشان يهاوشني ويسمعني كم سبه
الظاهر هو شاك برجولته فعباله ان سبني ودور وراي الزله واستضعفني انه رجال وقوي
اكبر شي خرب على حياتي
هو اني كنت اسكت واتحمل ليمه تمادى وتعود
السكات جرررررريمه بالحياة الزوجيه انا سكت ليمه انفجرت ولما انفجرت خلاص وصلت حدي وكرهته صرت حتى ما اعتبره بني ادم
لازم تناقشين مع زوجج وتكلمين معاه
ولازم يسمع
وان ما سمع هذا فيه بلا
انا لما اجي اتكلم معاه يسكتني ما يخليني اكمل فكرتي
وكله محتقرني ويعيب علي وعلى لبسي لدرجه كرهني نفسي وكرهني حتى اني اكشخ له كل ما حطيت مكياج امسحي
ان بخرت وتعطرت قال يع
سالفة التبخير والتعطير مستمره عليها كنت لانها غرامي
اما المكياج لاء
بس اللبس كنت البس دايم بجايم وقمصان جدد
وكان كله مستعجل يجي بس حق ينام ياكل وركضه طلع جنه عنده بيت ثاني
جني داخله على مراه ثانيه وعندها عيال وبيت
بس بره
واكثر شي كرهني فيه سالفة الطرد بدون سبب اللي على طول يجي من بره ما ابي ارجع القاج موجوده يجي يبي ينام يقول بقعد من النوم مابي القاج موجوده شوفي سايق تروحين لاهلج واسبابه يبي يقعد لحاله
هذي اللي خلتني مو اكرهه الا خلاص اقطع الرجا فيه واقرر الطلاق
فجاه بدون مقدمات روحي لاهلج بقعد بالشقه لحالي ما ابيج عندي تعبني يمكن لو على كيفه اسكن عند اهلي ومتى ما بغى مني غسيل وكوي جابني وان بغى فراش جابني شي يلوع الجبد وعيشه قرف
ان صار الويك اند لازم لازم اروح بيت اهلي غصب طيب وان قطني عليهم اسابيع ومايسال عني
وان خلصت هدومه
يلا شوفي سايق ارجعي عشان تغسلين لي هدوم
قسم بالله ما كان معتبرني زوجه
جني خدامه جني جاريه عنده
لا ويمكن الخدامه يرحمها لانها خدامه
اما الزوجه بشرعه لازم يغثها ويقهرها ويعتبرها نعل عشان يحس انه رجال
الخص لج اللي تعلمته من زواجي الاول :
1- لازم بالخطبه نسال عدل عدل واهم شي الاصل والفصل قبل كل شي
2-بالخطبه يجي يشوفني لان الارواح جنود مجنده ما اختلف منها اختلف وما ااتلف منها ااتلف على حديث الرسول اللهم صلي وسلم عليه , لان لما شفته اول مره بشقتنا حسيت انه مو زوجي ما ادري ليش
حسيت انه مو هذا اللي راح اكون له العمر كله ما حسيت كلش بالامان ولا بالراحه .
3- لا تتنازلي وتسوين عنه مسؤولياته اللي المفروض كزوج يسويها سواء روحه وجيه حق المقاضي لازم يخصص لي وقت معاه نقعد بالبيت مو كله طالع اللي كله طالع ترا فيه بلا واللي ما يبي زوجته تقعد بالبيت ويطرد بدون سبب هذا يا انه يبي يرجع سكران والا محشش وما يبيها تشوف او انه يبي يقعد بهالشقه لحاله يسوي شي الله اعلم شنو هو او انه يبي يقهرها انا كان طليقي مثل العدو اذا شاف شي يفرحني واحبه حاول يحرمني منه يعني يروح ويجي يلقاني مستانسه اني قاعده ببيتي لا ما اخليها ترتاح خل تروح لاهلها
ليش يبيني غصب طيب كله عند اهلي هذا فيه بلا والمفروض من اول علمت اهلي وابوي واتخذت موقف.
3- لازم اطلب ما استحي اطلب مصرف اطلب طلعات اطلب اهتمام وما اشحذ منه عاطفه واكون واثقه بنفسي ولا ابين له ضعفي وان رفض معناته مو زين .
4- ما اسكت عن حقي كلللش واهله ان تطاولوا علي ارد عليهم بالحق وما اكون طيبه معاهم يعني علاقه رسميه سلام وعليكم السلام فقط فقط فقط .
انا قبل كانت مواضيعي بالمنتدى شلون اعرف انه زوجي يحبني وشنو علامات الزوج اللي يحب مرته
لانه هو كان حيوان يهيني ويقهرني ويسبني ويقسى علي ويهملني وليل نهار طالع ويجي مثل الحيوان يعاشرني
جني مو بشر جني مو بني ادم جني مخده والا اثاث بهالبيت والا جاريه عنده
5- اهم شي الكرامه والاحترام ولازم احس نفسي عزيزه عنده واطالب ان ما يمس كرامتي ولا اسكت له لان ان سكت راح يدوسني ولا راح يرحم هو رجال اجنبي عني وغريب مو اهلي عشان يرحمني.
6- التوفيق من الله , وادري اكيد انه لان طلبت طلاقي وتركته وكرهته وتعبت وهو كان دايم يعترف انه مقصر وغلطان علي ويبي يتغير بس كان يضيع علي الوقت ويقص علي يعني عيشي معاي على امل اني بيوم من الايام اتغير واصير زين وهو ماعنده نيه يصير زين بس يقص علي عشان استمر معاه ادري الحين مع الزوجه الجديده اللي خذاه انه تعلم من غلطاته علي لان كلش كان كاره الطلاق وما يبيه
وبالعموم انا اشوف اني تحملت اشياء مافي مره تحملها
وعمري ماراح اسامحه لا هو ولا اهله على غشهم وخداعهم ومعاملتهم الزفت
انا بنت اصل وفصل وناس معروفه ولو هم فيهم خير كان حطوني على روسهم بس في مثل يقول : الطيب ما يبين ولا يقزر بعين ......
وسلامتكم
والله يوفقج يا صاحبة الموضوع مبين عليج بنت حلال واجوديه
