ديوانية بيت العمر

[لوباساج]

ام وهابى مبروك ان شاءالله منزل مبارك والتكييف لاتخافين لان المشاكل دايما من تخطيط الدكت وتوزيع الفتحات عشان جذى اللى للحين مابنو لما توصلون لخريطة التكييف اخذوها ودوها حق شركه ثانيه ب10دنانير يجيك عليها ويطلع اغلاطهم وانشاء الله ام وهابى لينزلتو بتتذكرون هاذى الفتره وتضحكون

 

[ام وهابي]

حبيبتي لوبا ساج بعد عمري مشكوره والفال لباجي البنات تعدي مرحلة البنيان على خير

 

[لوباساج]

شلونكم بنات اليوم رح ازودكم بارقام التليفونات اللى تعاملنا معاهم وطلعو كويسين واللى مو زينيين هم رح اذكرهم عشان محد يتعامل وياهم:-
1-الباب الخارجى اسمهم اتوماتيك هوم وايد زيينين ت:4824499(مصطفى)
2-الصحى بوعلى اهو لبنانى بس وايد زين حتى جارنا اخذه ويمدحه هو شوي غالى بس الصحى لاتبخلين عليه لان خرابه جايد
3-الكهربا موشى اسمه بوحسين هم لبنانى وايد تعبت معاه
4-الشتر شركة البيت الكويتى وصراحه وايد زين ورخيص وفى الصيانه ممتازين ت:9645354(لطفى)
5-الصباغ اللى صبغ البيت كله ماعدا الاستقبال والديوانيه واحد هندى شغله وايد حلو وهو مريح فى التعامل يشتري المواد ويجيب الفاتوره وكان وايد محترم مايرفع عينه عن الارض اذا كلمته(رقم تلفونه اجيبه بعدين) اما الاستقبال والدوانيه فصبغتهم وحده كويتيه عندها شركه للصبغ وانا عطيتها الافكار وهى نفذتهم واسمها منال واللى تبيها ادزلها رقمها على الخاص
6-تركيب الارضيات والحمامات واحد افغانى شغله زين بس المشكله مايقيس عدل يعطيج غلط وهقنى فى الجرانيت البيج طلع ناقص 6 حبات ولما رجعت للمحل قالو خلص ودخت على مالقيت شى مقارب له (6645743)ظاهر
7-ديكور واحد باكستانى اسمه محمد(9560384) زين واحنا ديكورنا بسيط مومعقد
8-المصعد ارفلون (2626551)زينيين وسعره اقل من 3000 دينار
9-الومونيم احسن واحد تعاملت معاه صراحه امانه وشغل وايد حلو للابواب والدرايش وايد نصوح(9863148) باكستانى اسمه عبد العزيز
10-التكييف شركة الروابط البريطانيه الكويتيه ماانصح فيها بتاتا
11-النجار وماادراك مالنجار جانا واحد بنغالى واتفقنا معاه على جميع اعمال النجاره فى البيت وكان يينا بسياره تلوع الجبد اهو وعماله وكان يكاسرنى على الدينار والديناريين امانة شغله وايد حلو فبعد ماخلص منا ذكرته حق وحده اعرفها تبنى بيتها فى العديلييه والظاهر كان عندها شغل وايد فصار مليونير راكب ذاك اليوم سياره جيب شحلاتها (6295905)
اكمل باجر ان شاء الله

 

[sara3]

عفية بنات الديوانية :ggdw::ggdw: شقرديات والله


اسفة تاخرت عليكم بس ما شاء الله لا يوقف مداخلات ترفع الراس صج نشاط وهمة:eh_s(9):


اول شى احنا نقتخر ان عندنا فى الديوانية مهندسة العضوة لوبساج :tek:الا معناتها الممر الضيق فرنسية الكلمة

صح اموت على اللغة الفرنسية بونجور وبنسوار وكومن سفا بيان

فكره المنور بالحوش الى امسويتها روعة لان بيوتنا ترى صج لها طابع خاص يعنى مغسلة بالحوش لازم

حق غسيل جدر عود او سجادة صغيرة او قفص الطيور احسها ضرورية

ومشكورة على مكان المحل اشوفة ان شاء الله

 

[sara3]

nono78

شكرا على الصور تسلم ايديك خوش ديكورات

ومشكورة على رابط التحميل يعل شقول ....:tek: كل البنات راح يستفيدون منة ويعل مطبخك يستوى مثل ماتبين وازود:dddds:

 

[sara3]

kuwait butterfly

رحتى وقلتى عدولى ناطرين باجى الحلم مبين عليك رومانسية وايد واتحبين الطبيعة والزرع ديرى بالك الزرع

يبيلة ماى وانا مع حملة ترشيد ولا اشرايك


عندى طلب بما انك اتحبين المودرن نبى اسقف مودرن حركات نعومية على ذوقك والموقع مالك وايد حلو .

 

[sara3]

ام وهابى

مبروككككككككككككككككككككككككككككككككككك المفتاح



:nbvppw:



:stars:



يلا الحين مخططاتك للتاثيث فى بيزات ولا باح بتاخذين القديم ولا نو

بتاثثين الحين ولا بتاخذين بريك

الله يعينك على تنظيف البيت الحين:cxxxp:

 

[sara3]

خبيرة اعشاب

اشلونك حبيبتى كدرتى خاطرى على البلكونة شنو مشكلتها ما تنبلع يعنى اذا على الاخطاء مالت النيان حدث ولا حرج

بس اشفيها البلكونة ممكن نلقالها حل:eh_s(10): واشلون باب الحمام يفتح عليها ليش ؟؟؟

 

[sara3]

من خبرتي راح اقولكم على قواعد للتصميم الداخلي:

اختاري الجو العام اولا: يعني ذوقك يميل الى الكلاسيك ام المودرن ...ويكون ظاهر على المبنى من الداخل

والخارج واذاحبيتى تجمعين بين عدة اذواق فيجب ان يكون الموضوع مدروس ومتناغم . يعنى مو مايصير يصير

ابدى بالتسلسل من الخارج للداخل :واختاري ما يعجبك لكل جزء من المنزل بمعنى اختاري مجموعة

مداخل تفضلينها ومن ثم مجموعة صور للمجالس ولغرف الطعام والنوم و الارضيات والاسقف

والستائر..وهكذا كونى البوم خاص لمنزل احلامك .

3- الجزء الاصعب انك تنفذي ما اخترتيه على الواقع وهنا امامك مشكلتين:


اختلاف المساحة : بمعنى انه اذا شفتى صورة واعجبتك لغرفة نوم مثلا وحبيتى اتنفيذينها اذا ما كانت حسب

مقاسات غرفتك ستظهر لك نسخة غير جميلة مثل التصميم الذى اخترتيه فى البداية لان فى الصورة كانت

مساحة الغرفة والفتحات الموجودة بها مناسبة للتصميم لكن غرفتك لها مقاسات واماكن للابواب

والشبابيك مختلفة

ومشكلة ان يتناغم اختيارك لتصميم الغرفة مع باقي المنزل :يعني اتصيرين مثل المايسترو اتسوين من كل الالات الموسيقية المتاحة لحن بس ما يكون نشاز.:eh_s(8):

 

[sara3]

المدخل

رغم بساطة مدخل المنزل من حيث المبدأ، إلا ان دوره يبقى اساسيا كونه اولى علامات فخامة البيت كما أنه يفصح عن هوية وشخصية صاحبه، الا ان الكثير منا يهمل الاعتناء بهذا الركن، رغم ان اهميته لا تقل عن أي غرفة في منزلك. ان مدخل المنزل، وهو المكان الاكثر استعمالا من كافة مساحات المنزل، له قواعد
واصول يجب اتباعها، ليعطي انطباعا ايجابيا لضيوفك وصديقاتك.
إن المنازل سواء أكانت ضمن أبنية خاصة او متداخلة ضمن شقق سكنية تستوجب للوصول اليها مدخلا او عدة مداخل وتهيئ الزائر وتعطيه انطباعا ورؤية معينين. ؟ويلخص المدخل محتوى المنزل بكامله، فإذا أتقنت تجهيزه كان خير عنوان للتصميم الناجح، وإن دل على شيء فهو يلخص الطراز المستعمل في المنزل بأكمله. ؟لهذا فإن مدخل المنزل هو مصدر الاكتئاب للزائر أو يضاف إليه الجمال والحيوية، لذا يجب الاهتمام به وإليك بعض الخطوات البسيطة لتجميل المدخل وجعله حيوياً يشع بالجمال.
نقاط أساسية لدراسة مدخل المنزل؟
* لا بد من مراعاة هذا الجزء في مخططاتنا المعمارية كأن يراعى و جود مساحة مناسبة و كافيه لصنعها و أن تكون مواجهة للضيف حين دخول المسكن كما يتم دراسة أعمال الإنارة والأسقف والأرضيات وغيرها من العناصر الإنشائية للاستفادة منها في إضافة لمسات أخرى من الجمال والحسن على زاوية الاستقبال.
* أن ندرس أفكارنا بأسلوب الاستقبال و نتخيل أثاث ذلك الحيز من المنزل للتأكد من سلامة الفكرة و مناسبة تطبيقها في الواقع.
* يمكن فتح الخيارات أثناء القيام بتأثيث هذا الحيز بقدر الخيارات البديلة داخل سوق الأثاث وطرزها، بشرط ملاءمتها للمساحة والفكرة الرئيسية.
* أن يكون مبدأ التجديد مفتوحاً أي أن تكون ربة المسكن قادرة على تبديل الأجواء بنقل قطع من زاوية لأخرى لإضفاء شئ من التجديد على زوايا وأركان المكان. وبناء على ما سبق سنتمكن من خلق آلاف الأفكار لهذا الجزء من المنزل غالباً ما يعطي مدخل المنزل انطباع أول لبقية أجزاء المسكن لذلك الاهتمام به وبمنظره أمر مطلوب وقد أشتهر العرب منذ القدم بالكرم وحسن الضيافة.
اختيار ديكور المدخل بطراز عربي شرقي خير تعبير عن إكرامك لضيفك وهذه بعض الأفكار
* بفضل أن يكون الباب ذا طراز شرقي و غالباً ما يكون من الخشب المطعم بالنحاس و المتميز بزخارفه الشرقية الغنية.
* وضع ستارة ذات نقوش و ألوان شرقية أو خزانة من الخشب المحفور بطراز شرقي.
* أمامها ترتب جرار أو فخاريات بأحجام مختلفة ذات نقوش إسلامية.
بجوارها يوضع وسائد منثورة بشكل جميل. بينهما طاولة خشبية شرقية الطراز و يرتب عليها مبخرة للعطور الشرقية وقوارير عطور زجاجية.
*أما الإضاءة تكون خافته وغالباً عبارة عن فانوس من النحاس شرقي الطراز.
لمدخل شرقي تقليدي و بطريقة أخرى أكثر بساطة يتم وضع صندوق خشبي مطعم بالنحاس، وفوقه مرآه مزخرفة بذات الزخارف الموجودة على الصندوق.
كيفية الاهتمام بواجهة المنزل من الخارج.
* يجب أن يكون المدخل مريحا للعين، فلا تكثري من قطع الأثاث في الجهة الداخلية من الباب.
* يفضل أن يكون الباب من الخشب الغامق، حيث يعطي أناقة وقيمة عالية للمدخل.
* يمكن أن نضع خارج المنزل عند الباب نباتات زينة، ومن الداخل يمكن وضع تحفتين فخاريتين كبيرتين.
*وضع كونسول ذهبي أنيق أمام الباب بمرآه كبيرة نسبيا حتى تعطى انطباعاً بالسعة.
* لا تنسي وضع سجادة أنيقة صغيرة في المدخل، واحرصي على أن يكون لونها مناسباً للون المدخل.
* ضعي وحدة إضاءة خلف باب المدخل.
* ضعي بعض العُلاقات الأنيقة على الجداران المواجهة للكونسول، لوضع المفاتيح أو تعليق المعاطف.
* من الممكن الاستغناء عن الكونسول ووضع مرآة بمساحة الجدار لإعطاء مساحة واسعة عند المدخل


منقول

 

[ام وهابي]

هلا سرونه الفال لك ولباجي البنات
الحمد الله عدت على خير ثلاث اسنين نراكض ورا العمال ولازم الحين بريك
البنيان اخذ الميزانيه كلها وخاصه المراحل الاخيره من التشطيبات تدفعين فيها الوف من البيزات واللحين البيزات من قلب بح
ابروح افتر على المحلات واخذ فكره عن الديكوراتهم بس بعد لما المدارس تعطل يعني بالعطله الصيفيه ما كو سفر
اثاثي القديم يمكن اخذ الاجهزه الكهربائيه والبلي ستيشن والباقي اعتقد ما قصر راح اتصدق فيه بالللجان الخيريه
مضطره اسكن قريبحتى لو ما خلصت تاثيث
الشقه الي اللحين ساكنه فيها ضيقه حيل والعيال كبروا يبون غرف بروحهم نبي نسوي ربط احزمه نجمع بيزات شوي
على الاقل ناثث الدور الاول وغرف النوم والدور الارضي بس المطبخ والباجي من صالات استقبال بعدين انتكت لهم على كيفنا
واااااااااااي غداي احترق نسيته على النار اخليكم وبعدين السوالف

 

[بدر البدور.]

بدر البدور

هلا فيك اختى ومبروك البيت عاد اللحين اتعب مرحلة التشطيب واللف على المحلات وربى يعينك عاد لاتنسينا مرى وقولى اخر التطورات .

وبالنسبة للواجهة اهو السيجما اخر شى ومتككر فى كال مكان ويختلف حسب شكل البيت ولون السيجما ونقشتها فى اللى اتكون امخططه وفى اللى دوائر وفى ناس اتحط حلية قرميد فانتى اخذى لفة مع ابو العيال وشوفى البيوت.

المطبخ الحين يا انك اتسوين مطبخ فى الملحق ويكون متصل فى البيت عن طريق ممر اذا مساحة البيت اتساعدك

او انك اتسوين مطبخ ديرتى حق الطبخ والنفخ لة باب على الحوش ومطبخ داخلى مفتوح ويكون بين المطبخين باب

الاخت( لوبساج ) فكرتها جدا عملية وهى ان الديرتى كتجن اتخلين فية وحدة والمفتوح مع تكييف السنترال لان داخل البيت .

واذا عندك اسالة لا يردك الا كى بوردك واذا ما لقيتى الاجابة عندى تلقينها عند خواتى ما راح يقصرون معاك


ربى يتمم لك بيتك على خير.

مشكووووووووووو ره حبيبتي


هذا الي انا مسويته بخصوص المطبخ عندي الديرتي حق الشغل والثاني لي انا نظيف وفيه طاولة الطعااااااااام


وعلى الواجهه ماعجبني شي ابيها سيجما بيج والي فيها مثل المظلات الصغيره


بسأل الحين عن نقاط الكهربا بحددها وابي على الدري بحط ليتات شنو تنصحوووني بخصوص النقاط

فديتكم ناطرتكم .​

 

[بدر البدور.]

ام وهابى مشكوره ياعمري تري انا بالخدمه لاى سؤال بالنسبه Askmوالله ماعرفهم بس دايما سالو اللي مجرب الشى
مو اللى سامع عنه
بدر البدور احنا سوينا سيجما لازم تكون مو اقل من 5مم واحنا كنا حابين نحط حجر بس لما حسبناها لقينا وايد غالى والحجر احسن شى يعنى حطيه وانسيه

حبيبتي مشكوووووووره

بس ماني عارفه شلوووون صاير الحجر الي تقصدينه ؟؟؟


وضحيلي واذا عندج صوره حبيبتي حطيها لاني محتاااااااااااااااره حدي


:tek:​

 

[sara3]

بدر البدور77

هلا واللة

النقاط عندك الدرج حطى ليت اللى يصير اوبليك اللى يصير بالطوفة مو بالسقف علشان سهل تغييرة ما يحتاج سلم واذا تبين اللى بالسقف خلى على الاقل واحد مثل ما قلت لك على الجدار علامة اى الكهربائى ويغير اللمبة لان ارتفاعها راح يكون عالى فاهمتنى فى بعضهم ما يرضون يخافون اوكى

البلاكات حطى كل غرفة فيها يم بعض بلاك +تلفون +ستليت+انترنت اذا تبين لان الحين كلة وايرلس

وجدار ثانى يكون فية بلاك


الصالات حسب اثاثك
حطى اوبليكات بالطوفة حسب ما تبين وين بتحطين لوحة وين بتحطين تبسترى عرفتي حق الابجورات بس لازم تتصورين استقبالك وتو زيع الاثاث

الممرات حطى بلاك واحد حق سبحان الله مكنسة اوتبين توصلين درل وخلافة

غرف النوم حطى بلاك حق التلفون والستاليت والتلفون والكهرباء وحطى بلاك يمين ويسار السرير لازم اتعرفين حجم السرير واذا تبين حق لوحة فى الغرفة حطى لها بلاك. وحطى مفتاح يم السرير علشان اتسكرين الليت وما تتطرين تقومين.

الحمامات اشلون اضائتك ليت فوق المرايا ولا تبين اثنين على الجنبين ابكيفك وحطى حق السشوار وخليه مغطى ما ادرى شيسمونة مطرى

اذا تبين اتركبين سماعات فى البيت من الحين قولى للكهربائى


التلفزيون البلازما ياريت اتعرفين وين مكانة علشان يسوى لك مكان البلاك مخفى ورا الجهاز اهو والستلايت


المطبخ
عاد عدى وخربطى حسب الاجهزة اللى بتحطينها وازيادة اثنين . ياريت اتييبين اللى بيصمم المطبخ او تعطينة مخطط المطبخ واتفهمينة شنو تبين بالضبط يعنى اذا جزيرة بتحطين فيها جولة كهرباء لازم تمديد الكهرباء يكون مدفون بالارض واذا تبين فى الجزيرة مغسلة اهم لها تمديد صحى خاص


المغسلة فى المطبخ راح تكون تحت الشباك يبق عند طوفتين وحدى بيكون فيها الطباخ وفوقها الشفاط الكبير حاولى تكون الجهة هذى ما يكون يمها غرف اسهل حق تركيب الشفاط


يا رب اكون افدتك

الحين حطى دفتر وسجلى غرفة غرفة. وديرى بالك من الطبلون لا يرزة بالصالة

لا تنسين الانتركم

فى ناس يحطون مفتاح ينور ليتات البيت الخارجية مع بعض واتطفينهم مع بعض مفتاح واحد


والسيجما حق الواجهة ارخص من الحجر وبين فترة وفترة تصبغينة واللون اللى اخترتية حلو كلش لى توصخ بيغمج

الحجر غالى واذا تقدرين علية مثل ما قالت ام وهابى ركبية وانسية ما يتغير

 

[بدر البدور.]

حياااااااااااااتي مشكوووووووووره

على النصايح ...:tek:

كفيتي ووفيتي

ماقصرتي

ادعووووووووووووووووووووووووولي يخلص بيتي ونسكن فيه انا وزوجي وعيالي يااااااااااااااارب بسلامه وسعاده

فديتكم

سارا حبيبتي اذا تذكرتي شي قوليلي بعد

حتى البنات وام وهابي

الي عندها نصيحه لي قبل التشطيب :tek:

ناطرتكم وبشووووووووووووووووووف الموضوع

اي شي يصير معاي برجع لكم

:tek:​

 

[ام وهابي]

حبيبتي بدر البدور
احسبي حساب اذا بت حطين غساله اتوماتيك في غرفه الغسيل والافضل انك تختارين نوع الغساله الل تبين لان بعض الغسالات لازم يكون لها تمديد ماى حار وبارد والبعض بس بارد اهي تسخن الماى وويكون لها مهرب للبالوعه علشان تصريف الماي وحتي الغسالات العاديه سوي لها جذي افضل يكون الحنفيه فوقها وماى حار وبارد ولها تصريف
وطبعا لازم اتحددين مكانها علشان تحطين لها بلاك للكهربا
وذا تذكرت شئ راح اذكره لك حاضرين للطيبين

 

[sara3]

بدر البدور 77

اشلونك حبيبتى شوفى عندك بلاك الجولة خلى يحطونة ورا الجولة يعنى لايبين
بس يحطلك مفتاح على اليمين اتشبين منة الجولة بدون مايكون الواير ظاهر فهمتى على
طبعا حق الشفاط يحط لك خط يستحمل مو مثل الليت واذا بتحطين وحدة خل يمدد لها من الحين ويحسب احسابة يسوى لها تمديد تصريف داخلى مو خارجى تتنقط بالحوش. ومددى حق غسالة مواعين جلاية يسار المغسلة وسلامتك

 

[بدر البدور.]

حبيبتي بدر البدور
احسبي حساب اذا بت حطين غساله اتوماتيك في غرفه الغسيل والافضل انك تختارين نوع الغساله الل تبين لان بعض الغسالات لازم يكون لها تمديد ماى حار وبارد والبعض بس بارد اهي تسخن الماى وويكون لها مهرب للبالوعه علشان تصريف الماي وحتي الغسالات العاديه سوي لها جذي افضل يكون الحنفيه فوقها وماى حار وبارد ولها تصريف
وطبعا لازم اتحددين مكانها علشان تحطين لها بلاك للكهربا
وذا تذكرت شئ راح اذكره لك حاضرين للطيبين

مشكووووووووووووووووره حبيبتي


ونسيت ابرك لج على البيت
الله يجعله منزل مبااااااااااارك يارب


وعساااااااااااااه دووووووم عامر بأهلى

ياااااااارب

ناطرتج قاعده اسجل الشغلااااااااات الي ذكرتوها


:tek:
ناطرتكم​

 

[DooNy]

مساء الخير

شلونكم بنات ودي أفيدكم بمكان يوفر عليكم الفراره

عندكم بلاتفورم وااااااايد ممتاز كل شي يطري على بالكم من تجهيزات البيت متوفره وبأرخص الأسعار لدرجة إنا أتفقنا مع السيجما على البيت و وقعنا معاهم عى5 ونص المتر يوم شفنا العرض عند بلاتفورم ولا 4 ونص المتر ومن نفس الشركه الي اهي سيجما :eh_s(1):

البيبان الداخلية أشكال وألوان والبيبان الخارجية بعد ،السيراميك ، الأرضيات الخارجية لمواقف السيارات، التمديدات الصحية ، الأدوات الصحية ،المطابخ، الباركيه المتر على 4 دنانير

والله في وايد شغلات ما أقدر أذكرها من كثرها روحو شوفو وإن شاءالله تستفيدون :tek:

هذا سايتهم دخلو شوفوه إن شاءالله يعجبكم

http://www.platformkuwait.com/platform/

 

[nono78]

مشكورين بنات

ومشكوره دوني خوش شي توني ادري عن المكان


وشوفوا هالموقع وايد حلو

http://decor1.jeeran.com/index.html