غزو الكويت 1990 قضية اجتماعية ونفسية ...؟؟؟

[مطيريه ماركه]

رد: حرب الكويت 1990 قضية اجتماعية ونفسية ...؟؟؟

انا ماذكر هذيج الأيام كنت صغيرة بس كل مايجي تاريخ الغزو اخاف وارتبك واحس بيصير غزو ، وانا خسرت مثل ماخسر غيري شهداء من عايلتي وعمي كان أسير ورد الحمدلله ، وصج هالحرب لها تأثير علينا ذاك اليوم الدكتورة قالت بحط لكم امتحان الفاينل تاريخ 2/8 كلنا قلنا لااااااااا دكتورة نفسيتنا تعبانة بذاك اليوم الدكتورة اندهشت وجنها نست رمز هالتاريخ قلنا الغزو دكتوورة قالت اي واللهصح بنغير التاريخ هاليوم مشؤووم

 

[حمام شاقني فنه]

رد: حرب الكويت 1990 قضية اجتماعية ونفسية ...؟؟؟

يكفي خسرنا احسن شبابنا وبناتنا

ولا غيره مااايهم

الله يرحمهم ومستقبل مشرق ان شالله يااااااكوييت

 

[محبة1]

رد: حرب الكويت 1990 قضية اجتماعية ونفسية ...؟؟؟

والله تفاعلكم شيء مب طبيعي روعة يهبل

تصدقون عااد والله انا اول مرة اسمع كلام جذي صججج كانت ايااام معاناة حق كل كويتي واحنا صجج قلوبنا والله العظيم كانت عندكم 100% وصجج البنات قالوا كلام انا بحياتى ماكنت عارفة جذي بسسسسسسسسس صجج الحمدلله الكويت أرض قووية ودااائما وابدا تبقااء للكويتين ان شاء الله وهم الكويت تحررت بقووة رجالة قبل كل شيء
وانا اشكر كل البنات على الفاعل خصوصا نملة حولة صججج كانت متحمسة واايد حق الموضوع والله يرحم جابر الصباح ويسكنة الجنة اميييييييييييييييين
شكراااا لكم

 

[حنطاااويه]

رد: حرب الكويت 1990 قضية اجتماعية ونفسية ...؟؟؟

كان عمري 5 سنين
اتذكررر اشياء بس مو وايد
بس إلي اذكره انه كانوا يدرون ابووي وعمامي الاثنين
وكنا اتنقل من بيت لي بيت
لين ماصار ابوي في مكان واحنا في مكان
واااااي كانت اياام
الله لا يعودهاا علينا

 

[مطيريه ماركه]

رد: حرب الكويت 1990 قضية اجتماعية ونفسية ...؟؟؟

حبيبتي انا جبتلج سالفة أسير كويتي اللي هو عمي كيف تم أسره

كان يومها تقريبا في بداية الغزو ومازالت القوى العسكرية بالكويت موجودة وبقوة لكن تحركاتها سرية مرت سيارة عسكر وكان من ضمنها عمي وطبعا قبل الغزو كان فيه اشكثر بدون عسكر ومازالوا ماجرح بكل البدون البعض وليس الكل خونوا بالكويت وأهلها ومثل ماقلتلكم كانت تحركات العسكر سرية وهالسيارة مليانة ضباط كويتيين ومروا من طريق الغزالي عمي يروي لنا المشهد يقول من على جسر الغزالي صار انزااااااااال عسكري ماقط شفت له مثيل كان الجيش العراقي عرف بتحركات هالضباط وأسروهم وعمي رجال مو كبير أصغر من البابا بس لو تشوفون شيب راسه تقولون عمره عداا الـ 60 سنة يقول أيام الأسر كانوا يطقونا بصواعق ويحرمونا من الصلاة لين صااا رت انتفاضة بالبصرة ورديناا الكويت:eh_s(1):


اللهم ارحم شهداؤنا الأبـرار

بس تدرين شاللي يحرني بسالفة الغزو انا شعب انظلم لكن العرب خصوصا يرونا ظالمين ، يجرحون فينا على انا ديرتنا انغزت وانطعنا انغدر فينا يا عالم احتلوا وطنا شردوا شعبنا ، وتدافعون عن صدام والأدهىـآ والأمر يقولون كان يدافع عن حق لهضحك عليهم بكلاامه والا كانوا يستمتعون بالكذب وتعودا عليه حبوا التضليل والكذب حنا امة تعشق المخادعين مناهم بتحرير فلسطين عن طريق الكويت شي مضحك.

يوم تحرير العراق انا ماقول اني مع امريكا يوم دشت بس بذااك الوقت كان ودي يطيحون صدام بأي طريقة ، كل العرب وحتى شعوب خليجية حاربت الكويت يقولون ان الكويت فتحت أراضيها لأمريكا ونسوا أكبر قاعدة أمريكية ويـن موجودة واشكثر بلدان خليجية سهلت الحرب بس حنا دايما يدورونا دورة لأنا شعب طيب ومايتأذىـآ بهالدنيا الا اللي عالنية .


اسمحولي انا داشة أفضفض
وكلي أمل الكويت تغير سياستها الخارجية مع كل الدول ولا لإسققاط ديون العراق الجرح بعددده ما اندمل :eh_s(14):

 

[حمام شاقني فنه]

رد: حرب الكويت 1990 قضية اجتماعية ونفسية ...؟؟؟

8
8
8
8

فضفضي وانا اختج ولله صج قهر والي راااحو من شبابنا وااسروهم وعذبووهم

اسقااط القرووض سالفه باطين جبدي فيها اسقطو القرووض عن اهل الديره ياحظي بعديين شوفو العرااااق ولله العضيم حاله

 

[lolocati]

رد: حرب الكويت 1990 قضية اجتماعية ونفسية ...؟؟؟

كان وقتها عمري 5سنوات ووعيت الصبح واشوف البيت خااالي كلهم رايحين بيت عمي الي لاصق يمنا عندهم سرداب شوي ولا اشوف اخوي ياه شالني ووداني عند امي وبيت عمي ماشالله كبييير واغلب اهلنا موجودين وانا ماصدقت خبر مستانس على بنات عمي ووقتها ابوي مو بالكويت كان بمصر يومين نمنا وردينا بيتنا بس كنا عاايشين برهبه وامي بجي وماتنام كله تحاتي اخوي كان بالمقاومه بس الحمدالله مامسه شي.....وكنت واايد اصارخ لمه اسمع صوووت الضرب وكنت اقول حق امي ><<يمااا ليش العراقيين يسون غلط حقنا>......واقرب وضع والي ماانساه طول عمري اول ماطلعنا من الديرة قعدناا يووم على حدود سعوديه مو بسرعه دخلونا واشكال الكويتين وهم نايمين بسياراتهم والي فارش عالارض يعني حتى وانا صغيرة اقول ليش صرنا جذي!!!:eh_s(16):


واشوف السعوديين فديتهم ماقصروا واحنا عالحدود اسعافات واطبا واكل .....وامي بالمرة ماشفت عليهاا ابتساامه ويضيق خلقي...والشي الي فرحنا لمه كنا بالمدينه المنورة وياااانا ابوي فديته.....وكل ساااعه احن عليهم متى ارد
يلا متى نرجع الكويت ولا راح نقعد بالسعودية على طوووول؟؟

ووقت التحرير صراااخ وبجي ولا لمه ولد عمي زووج اختي طلع من الاسر وويانا كان ضابط كسرت خاطري اختي حبيبتي شلون انهارت <<تبجي وتضحك
واخر يووم لنا بالسعوديه زين نمت ليلتهاا من الوناسه>>>كل ساعه باجر بنرد وفجاه اقووم من النووم اقعد امي >>يما باجر بنرد:dddds:

واول ماطبت مطاار الكويت الا صوووت اليباب عاااالي وانا مستانسه اناقز>>>واشوف المباني محترقه ومهدمة والسمااا سووده:cxxxp:

واول ماوصلنا الا بيت يدي قاعدين ابيتنا مستقبليناا لانهم صامدين>>يحليلهم

ولي هاليوم وانا كواابيس الغزو تييني>>>فعلا كان رعب

والسعوديه حكومتها وشعبهاا ماقصروا >>>>يامال الجنه :hjy5jewf:


ويعطيج العافيه حبيبتي..:tek:

 

[مطيريه ماركه]

رد: حرب الكويت 1990 قضية اجتماعية ونفسية ...؟؟؟

lolocati

يابعد عمري والله جسمي يقشعرر وانا اقرا معاناتج مع الغزو ، وعسىـآ الله عز السعودية وأهلها فديتهم ماقصروا فينا

 

[رايقة1980]

رد: حرب الكويت 1990 قضية اجتماعية ونفسية ...؟؟؟

انا بالغزو ماكنت صغيرة واذكر كل شي فيه

الله لايعيدها من ايام


ما اظن بيمر على الانسان هم ولا حزن اكثر من فقده لوطنه , وشعوره بعدم الامان

والدليل

(مَنْ أَصْبَحَ مِنْكُمْ آمِنًا فِي سِرْبِهِ ، مُعَافًى فِي جَسَدِهِ ، عِنْدَهُ قُوتُ يَوْمِهِ ، فَكَأَنَّمَا حِيزَتْ لَهُ الدُّنْيَا)
رواه البخاري

مهما كتبنا ما اظن بتعبر كلماتنا عما في داخلنا
بالغزو فقدنا كثير من شبابنا
منهم اللي فك اسره ومنهم اللي لقوا رفاته ومنهم اللي الى الان في علم الغيب

..

ااااااااااااااه

وين جبتي هالموضوع المؤلم

 

[الهما]

رد: حرب الكويت 1990 قضية اجتماعية ونفسية ...؟؟؟

هلا حبيبتي
و موضووعج آآآآآآه قلبتي المواجع و لو انها ما اندفنت ليمن الحين.... بس حبيبتي عندي علييج عتب ....
عتبي على تسمييج للحالة او الوضع اللي مرت فيه دولتنا الحبيبة ... ((حرب الكويت 1990!!!!) انا ارفض اسميها حرب حرب تكون بين طرفين متنازعيين اهما الاثنين احنا اللي صار فينا اغتصاااااب
على غفلة اللي ما يخافون الله غزونا هذي التسمية الصحيحة عزو و ليس حرب في شهر حرم فيه القتال اللي ما يخافون الله غزوووووووو اسمه الخميس الاسود الغزوووووو
و انا عن نفسي لو بكتب عن الغزو يبيلي ايام و ليالي ...
الكويت بشكل عام الى الان مو مترقعه و مثلها العالم العربي ....من سيء الى اسوء
بالنسبة لي وقت الغزو كنت طفلة اللي اتذكرة اني كنت اشوف امي تمسح دموعها عنا احنا الصغار تخاف علينا نتاثر و اذكر الجنود لمن دخلوا علينا يفتشون شلون كانو متوحشين و طقوو اخوي جدامنا و محد قدر يتكلم عششان ما يذبحوونا ...فابوي اضطر ان يسكت و هو وده يقطعهم بس خاف علينا احنا العيال و امي و الخدامات....
شعورنا ما يوصع رعب رعب رعب خووف من المجهول الجثث كانت معلقة بالشوارع.... مع اني كنت واايد صغيرة بس في صور مطبووعه بذاكرتي مثل الجثث الثلاث اللي لمن وقفنا بالتفتييش طلعونا كلنا من السيارة و احنا طالعين بنرووح بيت يدي ... ثلاث رياييل مو مغطين ويهم و مذبوحين و الدم يخر منهم ....
و الدمار و الضرب اللي يخرع
و طبعا ظليت فترة سنيين كل ليله احلام و رعب و امي تنام معاي و حالتي حاله ...و الكويت راحت ضحية القومية العربية قبل الغزو بشهر قالت لنا امريكا تر عليكم حشوود تبون نجيب جيوشنا تحميكم ... اتصل الامير المرحوم بقادة العرب حسني مبارك بيض الله ويه و الملك حسين (الخائن) و ياسر عرفات (الخائن) ((و لا تلغون هالكلمة يا مشرفات احنا كوتيين و عندنا حرية و نقول اللي نبي))
فقالو لهم ما عليك احنا اتصلنا بالمقبور صدام الله لا يرحمه ... و اكد لنا ان هاذي مجرد مناورات ... و اتطمن الامير ابونا جابر و قلبه كان معورة بس وثق من كلام القادة... و راااح ضحية القومية العربية رفض يجيب اجنبي يحتل المنطقة و يدخل بين العرب ....و صااار الغزو و حاول ان يحلها عربيا حاول و حااول لكن لمن باعوه العرب و صارووا يلعبون و يذبحون باهل الكويت وقف و قال كلمته و قال ابي احرر الكويت باسرع وقت و بسبب الملعون صدام دخلت القوات الاجنبية الدول العربية
اكرهم اكهرم اكرهم الغازيين
ما سسو فينا خيير .... بيت جيرانا ذبحو ولدهم جداااامهم انت متخيله ...
صارت مجاازر و مذابح ..... وقعها على النفس اكثر من المجازر اللي صارت بفلسطين و لبنان تدرين ليش لأن مجازر فلسطين و لبنان مصدرها عدو يهودي... بس احنا مذابحنا صارت على ايد جار عربي و مسلم ....

ذكرتيني بشي واايد يعور القلب بشي مخجل عاار على الامه العربية​

 

[محبة1]

رد: حرب الكويت 1990 قضية اجتماعية ونفسية ...؟؟؟

والله صراحة كلامكم معأناة واايد واايد واايد
انا لو عرفت السااالفة جذي صجججججججججججج ماراح انزل الموضوع هذا كلشششششششششش

بسسسسسسسسس عااد شنو اسوي نصيب لازم يصيب عشان جذي اسفة حق كل بنت كويتية وصجججج احناا نحبكم واايد فى السعودية

واسفة اسفة اسفة بنات كويتيات على الموضوع انا ماكنت عاارفة السااالفة جذي صججججججج لو عرفت جان مانزلتة كلششششششششششششششش خصوصا الحين واايد بجي فى الصفحة هذى وخوف اكو رعب حقيقي فى الصفحة هذي صججججججججج شيء يخوف انا صجججججججج ارجف من الخوف

الله يوفق الكويت الى كل خير ويجعلهاا بلد مطمئن وجميع بلاد الآسلام
شكراا لكم

 

[lolocati]

رد: حرب الكويت 1990 قضية اجتماعية ونفسية ...؟؟؟

lolocati

يابعد عمري والله جسمي يقشعرر وانا اقرا معاناتج مع الغزو ، وعسىـآ الله عز السعودية وأهلها فديتهم ماقصروا فينا

فديتج والله....الكل عاناه

ادعو يابنات عسى الله يامنا بديرتنااا ويحفظهااا...امين
:yaaaaaarb:

 

[محبة1]

اشكر تفاعلكم معى فى الموضوع
شكراا لكم كويتيات

 

[maziona]

انا كان عمري 6 سنين وماكنت حاسه بشي يعني شعور بضيقه ان ماكو احد معانا والشوارع فاضيه والبيوت مكسره فهالشي كان

منظره يكدر ويضيق الخلق .. بس تدرين شنو الموضوع الغريب اني ما تأثرت بوقت الغزو كثر الحيييين .. الاثار النفسيه توها طلعت

يعني في اماكن كنت اروحلها بالغزو مثلا بيت خالتي احسسسسس بضيقه اذا دخلته واقعد استرجع الايام واي موقف كان يصير بالغزو

ويتكرر الحين النفسيه تنعفس مره وحده واتضايق حيل حتى المسلسلات القديمه والمسرحيات اللي قبل الغزو ماقدر اطالعها تخيلي خذيت اشرطه

فيديو مسرحيات قبل ولاشفت شي منهم وبقطهم .. يعني باختصار صج الغزو انتهى بس الاثار النفسيه عمرها ماتروح !! واحنا كنا بعمر حساس

يعني يمكن اللي كانوا اكبر شعورهم غير والصغار كلش هم غير ... هذا غير الامراض العضويه من ارتفاع نسبه السكر والضغط والسرطان

الله يكافينا الشر يارب .. وحسبي الله ونعم الوكيل عليهم .. ومشكوره حبيبتي

ااااااخ قلبتي المواجع

 

[Dalo3a in Texas]

رجعتيني لوراااااااااااا وقلبتي المواجع

 

[great_girl]

انا بالغزو كنت ابطن امي لول

بس امي قالتلي انه خذوو خالي بس الحمد الله رد مشي .. يعني تخيلي من العراق لي الكويت رد مشي على ريوله @@ !

و حتى خالـي الثانـي كان يقط على دبابات العراقيين صخر جان ياخذونه معاهم و طقووه بس اشوه ردوه حق اهله

و الله يحفظ الشعب الكويتي و الخليج و يخلينا على قلب واحد

قولو امين ..

 

[شيوووومه]

انا بنسبة لي كنت توني ابطن امي...


وعليا امي للحين تقولي انتي كنتي اعذب حمل و ولادة بنسبة لها لانه كانت حامل فيني بوقت الغزو و نفسيتها تعبانه وانا تعبتها زياده

وبعدين اهلي راحوا السعوديه ومن السعوديه رحنا امريكا ..لانه ابوي كان يدرس اهناك و و انولدت اهناك

... امآآ الوحووش الي كانوا بالكويت اذكر كانوا يقولون انه العراقين مرضآ نفسيآ و ميانين لانه صدام كان معذبهم قبل لا يعذبونا

كانو ياكلون كريم نيفيا بالخبز ..حسبالهم جبن!!!

وماخلو شي ما باقوا ..تلفزونات و ثلاجات وذهب واشياء ما يعرفون ثمنهم وحتى ملابس كان يبوقونهم ماعندهم!!

كانوا مثل الحيونات( تكرموون) بالظبط!!


والشخص الي خسرته الله يرحمه:

عمي.. يقولون انه اخذ ربعه وراح يجاهد

ولما تحررت الكويت ما لقوا ولا سمعوا عنه خبر

عقب فتره لقوا اسمه مع الاسره.......وتقريبآ قبل سنتين لقوا جثمانه الله يرحمه

وتبين انه توفى برصاصه ابمخه

وعطوا يدتي دشداشته وكانت نفسها قبل 16 سنه .. كان مكتوب عليها اسم الخياط وابوي يذكر هالخياط كانوا يبخيطون عنده دشاديشهم قبل


والله يحفظ لنا الكويت يارب من كل مكروه

وان شاءالله ماتنعاد علينا هالايام السوده يارب

والله يرحم عمي وكل اموات المسلمين يارب

 

[Heaven Light]

شوفي انا كنت صغيرة عمري سنتين بس

4- مااذا خسرتى من الآهل او الاخوان او الزوج وماهى قصتة او طريقت وفاتة ( ( الله يرحم الجميع ))

خسرت مرت خالي ( بنت عمة امي وخالي).. كانت حامل ومريضة وااايد وما كان في ادوية فاولدت ولد معاق بسبب تسمم بدمها .. وماتت الله يرحمها
خالي كان اسير ورجع لما انتفضت البصرة على نظام صدام .. والحمدلله رجع ..
والحين اغلب البيوت الكويتية لازم فيها مريض سرطان بسبب التلوث وحرق الابااار ..

وطبعا احنا كنا من الصامدين لا طلعنا من الديرة ولا شي ..

انا اذكر بس مشهدين ببالي رغم صغر سني .. السما السوده .. والابار المحترقة لما كنا نروح لخالتي نزورها بالاحمدي..
والله لا يعود هالايام علينا ..​

​

 

[رغوة لوكس]

يالله الحرب تخوف الله لايروينا ولايرويكم حرب

 

[(كويتيه عسل)]

كويتيات طبعااا الموضوع هو ((((( حرب الكويت 1990 )))))

حبيبتي اسمه الغزو العراقي الغاشم على دولة الكويت

في فرق بين الحرب والغزو

الحرب: يعني الطرفين يدرون ان فيه قتال والكل يزهب نفسه ويحددون موعد للقتال

الغزو احتلال مثل ماسوو عيال ابليس فهمتي؟!!!!!!!!!!!!!