هل لديكم طفل يعاني من التوحد- خلونا نتجمع

[شيخة الغيد]

و أحلى ما في اللوك الجديد انه سرييييييييييييع يعطيكم الف عافيه.

 

[Emanova]

الصراحة اللوك الجديد عجيييييييييييييييب
خواتي ولدي عمره سنتين و اربعة اشهر فيه عيب خلقي بالقلب و تعبني اول سنه من عمره من مستشفى لي مستشفى و سوله عمليتين
الحين ولدي ما يركز معاي لما اعلمه على شغله او كلمه .. ما يتكلم بس يقول ماما لما يبي شي مني و لا لما ما يبي شغله
ما يلعب مع اليهال وايد اكثر شي مخوفني ما يركز في عيوني بس نظره و يوخر عيونه وديته للطب التطوري
قالتلي الدكتوره انه مو توحد بس فيه صفات توحد و منعي عنه التلفزيون لانه مدمن سبيس توون و توم و جيري
تخيلوا صار لي 3 اياام حارمته من التلفزيون حتى انا ما ابطل التلفزيون يصيح على طول قبل لا ينام و اول ما يصحى
والله خايفه عليه موووت قالتلي الدكتوره علميه على كلمه كلمه حتى لو تاخذ منج عشرة ايام بس ما اشوف تجاوب منه
ابي احد يطمني ابي اعرف شنو ناطره في المستقبل و الله ياجرنا على اللي نسويه

لله يعينج ...التدريب ثم التدريب و قوه الصبر هذا اللي تحتاجينه... و اقري موضوعنا من الاول راح تلقيين اشياء تفيدج ..و اي سؤال كلنا حاضريين

 

[Emanova]

سلام بنات اشلونكم واشلون الحلاو مال القرقيعان ....شنو راح تسوون

 

[سنع ومنع]

هلا حبيبتي .. حلاو القرقيعان اللي طالبته من مركز سلطان للحين ما وصل .. ريلي يقولي يومها خليه على راحته مع اليهال ..
ما يكثر حلاو بس نخليه مع اليهال حاله حالهم .. ادري ان عقب محد راح ياكلها إلا آنا .. عموما احنا يمعة القرقيعان كلها على بعض نص ساعة تقريبا .. بس نتفطر على طول عقبها نبدل اليهال .. ولووووووووووووووووووووووووووووية الله لا يوريكم .. أصلا محد يدري عن أحد .. ما شاء الله يهال واااااااااااااايد .. وخبصة وازعاج .. وما يأذن العشا إلا الكل ماشي .. هذي يمعة بيت حمولتي ..
وباجي البنات شنو نظامكم ..

 

[Emanova]

اخيرا قمت اشارك .....و المنتدى كان مسكر..

اشلونكم و اشلون القرقيعان

 

[ناني سيكرتس]

ماوديت عيالي قرقيعان بيت اهل ابوي لان عيالي مراضى, بس سويت قرقيعان حق كل واحد فيهم للمدرسه..

سلامتكم وتعيشون..

 

[wathoo7a]

قرقيعان وقرقيعان بيت قصير ورميضان الله يخلي عيالكم الله يخلهم لمهم شلونكم عزيزاتي أنا وحده أموت باليهال وأستانس ليمن يقرقعون عند باب البيت ودي قلبي يشيل كل اليهال ,,,,وأحب ليمن أسوي قرقيعان عيالي أشركهم معاي يعفسوني بس عادي وناسه وأشتط حق قرقيعان حمولتي ويبت ذال القرقيعان حق خالتي عجييييييييييييييييب وايد إستانست فيه,,,وسنوعه صح كلام أبوه خليه مع اليهال لاتحسسينه إنه غير تره كل شي رايح إلا طعم الكاكاو والحلاو مانسيناه من يوم إحنا صغار خليه يتمتع بطفولته ومو كل يوم قرقيعان:eh_s(2)::jbdwjbd:وناني عيالج مايشووفون شر إن شاء الله شي بسيط؟وماجوره وعساكم من عواده
قرقيعان وقرقيعان,,,,

 

[سنع ومنع]

حبيبتي ناني ما يشوفون شر اليهال ..
وضوحة كلامج يهبل مت من الضحك وانا اقرا ..
وااااااااي بنات ولدي ذبحني ماااااااااات واهوا ياكل حلاو .. يضحك .. مو مصدق ان كل هالكمية من الحلاو جدامه .. أبييييييه يضحك .. كلا حلاو مال سنة جدام ..
وباجي البنات شلونكم مع القرقيعان

 

[ريحانة_14]

سلاااااااااااااااااااام عليكم بنات

سلامات ناني .. ما يشوفون شر كتاكيتج

سنوعه شلونج وشخبارج .. من ذاك اليوم إللي دزيتلج المسج بشوف يوم أنزل الديرة أزورج للحين لاهيه مع التحضير والدراسه وأوراق العمل ووووووو ... بنياتنا وطالباتي المزايين داوموا

بس لااااااازم أمرج إن شالله

وضوحة شخبارج بعد قلبي .. ياحلوج يا وضوح ذكرتيني بأيام ما كنا نروح بيت جيرانا مع عيال عمامي وعماتي .. وإن عطونا شوية نخي وبيض الصعو من تسكر الباب عيوزتهم صرخنا من وره الباب ( ويص ويص في بيتكم جعاميص ) إي الجعاميص شنو عاد ماندري لووووووووووووووول

وإذا عطونا الماكنتوش بييييييييييييه هذا يوم العيد عندنا .. حده كشخه الماكنتوش أيامها ونتهاوووووووووووووووش ونتخانق عالبنفسجيه .. وذاك اليوم رحت جمعية مشرف والا أشوف هالكاكاوة البنفسجية شكبررررررها والفراره الخضرا بعد .. عز الله ماخلوا شي بخاطرنا هالجمعيات

وطبعا أنا كللللللللللش مو مقتنعه بسالفة القرقيعان المزركش والكراكيش والعرس إللي يسوونه على علب القرقيعان بس مجبورة أسوي جم حبة حق الخاصين شوي

وطبعا مدموزيل سارة ذاك اليوم من الساعة 7 ورة الفطور لي الساعه 12 بالليل وإهيا تاكل بهالحلاو والكاكاو .. وكل حلاوة لازم تييبها لي ماما إقري شنو فيها زينه والا مو زينة ... فديت عيونها حياتي قامت تعرف .. لأني ما أخليها تاكل المنتجات الصينية وإللي فيها ألوان وخرابيط

ولي اليوم وإهي تنقنق بهالحلاو .. معيده بنتي

 

[Emanova]

ناني ...ما يشوفون شر الحلويين الف سلامه عليهم

 

[غيوووم]

شلونكم بنات شخباركم
ولد أخوي فيه توحد بس مشالله عليه من دخلنا المدرسه إلي إهوا فيها وااااااااااااااااايد تغير
صاحبة المدرسه كويتيه وخوش وحده وتخاف من الله بكل شي حتى تكرمون بالحمام في كامره
تقدرين تشوفين ولدج بأي وقت والحمدلله ولد أخوي قام إغسل بروحه وياكل بروحه
كان بالمدرسه برنامج خاص حق كل واحد وإلي عجبني إنه في دكتوره وممرضه وعلاج طبيعي
الله إشافي عيالكم وعيال المسلمين

 

[wathoo7a]

شنو المدرسه العجيبه هاذي؟؟؟؟؟؟؟؟؟؟؟
ريحانه حبيبتي شلونج؟تصدقين خايفه يصير فيني سكر من هلقرقيعان ذبحوننننننننننننننننننااااااااااااااااااا المدارس والأهل والدوام ووووووو
وقرقيعان وقرقيعان بيت قصير ورميضان يالله تخلي وضووووحه يالله تخلها لمها,,,,واييييي يونس القرقيعان تعالوا نقرقع

 

[wathoo7a]

سنوعه بالعاااااااااااااااااافيه على وليدج
إي جذيه خليه يبه خليه يقرقع ويستانس
أيام الطفوله ما تنعاد:0bee2e8d89::krkrkr:

 

[Emanova]

شلونكم بنات شخباركم
ولد أخوي فيه توحد بس مشالله عليه من دخلنا المدرسه إلي إهوا فيها وااااااااااااااااايد تغير
صاحبة المدرسه كويتيه وخوش وحده وتخاف من الله بكل شي حتى تكرمون بالحمام في كامره
تقدرين تشوفين ولدج بأي وقت والحمدلله ولد أخوي قام إغسل بروحه وياكل بروحه
كان بالمدرسه برنامج خاص حق كل واحد وإلي عجبني إنه في دكتوره وممرضه وعلاج طبيعي
الله إشافي عيالكم وعيال المسلمين

شنو اسم المدرسه ؟ و وين مكانهم واللي يعافيج

 

[Emanova]

ناني ...كانت فرصه حلوه اني اشوفج اليوم

 

[سنع ومنع]

ريحانه حياج بأي وقت
غيوم مشكورة على المشاركة حبيبتي ومشكورة على الرد
وضوحة يا حلوج ويا حلو مشاركاتج .. والله انج ملح المنتدى
ايمان ولهاااااااااانة عليج وايد وايد وايد .. شوفي لنا يوم نطلع نشرب قهوة بكافيه حتى لو مكان قريب .. المهم شوفتج ..

 

[ناني سيكرتس]

ناني ...كانت فرصه حلوه اني اشوفج اليوم

بعد عمري ترا وايد استانست لما شفتج, عاد قبل لا تيين كنت قاعده اقول بقلبي ياليت اشوفها اهني, شويه ولا انت بويهي, بس انت ما قعدتي, انا قعدت شوي ويا يسوفي وبعدين رحت, اسم الله عليه حمودي ريال ماشاء الله ما ادري ليش عبالي انه صغيرونو حيل, يا حلوه الله يخليه ويسلمه ويشافيه ويشافي كل عيالنا يارب..

 

[ناني سيكرتس]

حبايبي اشكر كل من سال عن عيالي , الشر ما اييكم ان شاء الله..

تعالوا كلكم وين الانضباط مع دايت اليهال..؟ انا ما خليت يوسف ياكل قرقيعان الا شويه حبه او حبتين بالكثير, حتى المساكين اخوانه ما عطيتهم قرقيعان, العسكريه والنظام لازم يطبق عالكل..


وضوح ياحلوج والله والله والله اتهبلين ترا ودي اشوفج واشوف باجي البنات, ترا ولهت عليكم عاد, نبي غبقه منومستعده تسويها لنا وكل من اييب طبق معاه, ولا بكرامتنا نروح مطعم نغبق فيه..
اذا اتفقتوا بليز بلغوني عن طريق الهاتف فقط..

 

[Emanova]

يالله يبيله طلعه انا حدي لايعه جبدي و مشتهيه اغير جو ....بس نبي مكان مو زحمه

 

[Emanova]

بعد عمري ترا وايد استانست لما شفتج, عاد قبل لا تيين كنت قاعده اقول بقلبي ياليت اشوفها اهني, شويه ولا انت بويهي, بس انت ما قعدتي, انا قعدت شوي ويا يسوفي وبعدين رحت, اسم الله عليه حمودي ريال ماشاء الله ما ادري ليش عبالي انه صغيرونو حيل, يا حلوه الله يخليه ويسلمه ويشافيه ويشافي كل عيالنا يارب..

انا ما قعدت لان حضره جناب حمودي لما شافني انا ويا ابوه داشيين و لبستها يقولي رووح سياره ...الاخ يبي يجز... فقام يبجي اشويه ...فلازم اخليه علشان لا يتعلق فيني ... حمودي ضخم على اخواني

يويو كتكوت يهبل