~¤ô¦¦§¦¦ô¤~ دوانية رشيقات المستقبل ~¤ô¦¦§¦¦ô¤~

[just-me]

عوافي مقدما

وان شاء الله بتشوفين اللي يسرج ...

انا مضطرة اقوم البس و اروح الاجتماع ولو ان ادري ماكو سالفة

و تالي بمر اعادة الهيكلة بتهاوش و بتطاقق معاهم .. تابعو الجرايد لوووووول

و ان شاء الله ارجع والقى البشارة و ان شاء الله البنات يكونون موجودين ... سي يو

 

[عنيّد]

منمن ،، صباح الخيرات ، أنا أشوف ان الأغلبيه بالدوانيه وصلوا المرحلة الأخيره من مسيرة الرجيم ، ألا وهي الحاجه للمتابعه من دكتور تغذيه :tomato2:

جسوت ،، يعافيج ربي ، والله وياج بالاجتماع الي ماوراه سالفه بس اثبات الوجود
جيّد :ggdw:
وشدي حيلج بالهوشه ، وبنتابع الجرايد وياريت يكون السبق الصحفي لمنتدانا بالاول :krkrkr:

 

[mn.mn]

جسوت الله وياج وناطرينج

عنيد اي والله ابي أكمل مو عارفة شلووووووووووووون يوم اوكي ويومين لا مادري شصار فيني ؟

المهم ننطرج اليوم بالبشارة والرجيم اليديد جود اتشجع واسوي الرجيم معاج الاسبوع الياي

 

[عنيّد]

منمن ،، دام بتلصق بلسانج أفعال المستقبل ، لا بالله كدينا خير :dddds:
ماقالت من باجر، قالت الاسبوع الياي، عاد متى من السبت ولا الاحد :eh_s(6):

يااااااابنت الحلال لا تأجلين ، مايلعوز الواحد الا كلمة من باجر من بااااااجر ، ماكو من اليوم :eh_s(1):

 

[زيـنـه]

صباح الخير

شلونكم ؟؟

جسوت .. الله معاج .. وديري بالج من الطق و المطاقق (ما اتخيلج).. صاير ببيزه هالايام بالديره عقب هالصحفي المطقوق

من من .. ليش شمسويه شمهببه ؟
و ابدي من اليوم ليش الاسبوع الياي .

عنيد .. ان شاء الله بالتوفيق عند العبد .. و ناطرينج .. وعن نفسي بحاول محاولات في ريجيماته الموجوده .. جود عل و عسى .

اليوم انا مستشره و باديه عدل .. و بصراحه شنيت الحرب على نفسي عقب ما وزنت عدل اليوم الصبح وما استوعبت الرقم اللي شفته .. 88 !!!!!!!

امس وصيت على القهوه الخضرا ووصلتني للبيت ... بجربها مدة 18 يوم صباحا .
و مريت الحواي و شريت ماي الزعتر .. التركي ب 3 دنانير .. و البحريني ب 1,5 .. اخذت الاثنين و باجرب بعد الغداو العشا .
جود ينفعون .
و ببتدي بواحد من ريجيمات العبد .. و الله الهادي و ان شاء الله انزل .


انتوا شخباركم ؟

 

[mn.mn]

عنيد لووووووووووووول لا من الاثنين ههه ادري يبيلي خيازرين

زيون الله يسلمج لي العصر خوش بنية بس تالي طلعت مع اختي ورديت ميته يوووووووووع كليت معاهم جباتي حبة وحدة وكليت 2 بريك

أواي وبليل كليت صمونة جبن >>> امبيه وايد ادري بس مادري حاشتني مجاعة امس

وبالنسبة للتأجيل الله يسلمكم شوفي الأعذار الواهية اليوم عندي يمعة ببيت اختي وباجر زوارة اهلي ومن اليمعة لي الأحد بروح البحرين

مع ريلي عنده تسجيل بالجامعة هناك وجلبت فيه بروح معاه ماني قاعدة هني بروحي مع الياهال لا اقدر اطلع وبتم معاهم محكورة بالبيت

وبيقلبون راسي بالبيت وما راح آخذ غير الغلقة وضيقة الخلق فقلت اروح معاه احسن وتوته توته خلصت الحدوته

 

[زيـنـه]

من من .. دام جذي اعذارج مقبوله
يا معوده على الاقل خففي .. انا تبربس الكاكاو تالي الليووول اهوا اللي نقز وزني جذي !
عقب رمضان كنت 86 و نص ..وباسبوعين ازيد كيلو و نص زود .

لا جرس الانذااار طق عندي .. و لابد من الحذر .

و ان شاء الله يا ربي اشوف نتايج و ابشركم فيها ..رفيقات الكفاح .

 

[mn.mn]

زيون والله أدري ان هالتبربرس غلط بغلط وودي ارد امسك روحي بس شلون مادري ؟

دقيت على عيادة المطوع عشان اتأكد من موعدي صار 14- 3 بعدج بشهر وسالت عن الأعشاب

فعلا قالت لي الدكتور ما يحبذ عاد قلت لها قصة حياتي واني من سنة تقريبا بديت برجيماته من النت ونزلت لي الحين 16 كيلو

وبالأساس كانوا 21 كيلو بس ظلمني البخت وقلت لها ودي آخذهم عشان لين ايي موعدي أنزل كثر ما أقدر عاد قالت لي اكلم الدكتور

وأرد عليج عاد ان شاء الله الله يهديه ويكمل جميله ويرضى عاد اذا رضى باجر اروح اشتريهم علطول

 

[mn.mn]

وينكم ؟

بطو وينها اليوم ؟

زيون من منو طلبتي القهوة وبجم ؟

 

[mn.mn]

انا الحين بطلع من الدوام بروح المكتبات اشتري وسائل واغراض اشوفكم بعدين

 

[زيـنـه]

من من .. طلبتها من رقم عندي ولهم سايت ..ب 10 مع التوصيل .

 

[بطة رشيقة]

صباح الخير

تونى يايه الدوام


اخصل جم شغله واقرى اللى فاتنى وارد لكم

 

[بطة رشيقة]

قريت ما فاتنى ورديت لكم .. وسويت شغله سريعه وشوى وبكمل ..

شوفواااااا بنات


انا اللى لاحظته ومن خلال ردودنا ومن خلال سوالفنا ومن خلال تحلطمنا ان احنا قاعد ندور فى دائره مغلقه واذا استمرينا جذى صج صج صج ما راح ينولنا الا الحسره والتحسف والندامه يعنى بدال ما تصير دوانيه رشيقات المستقبل يسمونها دوانيه متان وجياكر الحاضر ...

ادرى كلامى مو حلو بس لازم نسمعه اقصد لازم نقراه لازم نعلم روحنا ان احنا قاعد نرجع لى ورى وغيرنا مشالله راح لى جدام

انا كان بس باجيلى 5 كيلو على اللى ابيه والحين باقيلى تقريبا 11 كيلو

جسوت كان باقيلها كيلو والحين الله العالم جم

زيون بدال ما تنزل قاعد تصعد

منمن اللى كانت تشجعنا الحين قاعده تقول باجر بسوى والاسبوع الياى بسوى ...

ام فجور راحت وخلتنا

قاب ولازوردى وروح بحرينيه وشيخه البنات وكل البنات اللى كانوا معانا راحوا وخلونا ليش.. يمكن لان احنا قاعد نظرهم وما نفيدهم ..؟؟؟؟؟؟؟

الا اسم الله عليها وربى يحفظها ويتمم عليها ويارب انشاللخ يحفظها من العين ويبعد عنها الشر ويصلح حالها ويكملها بعقلها عنيد .. مسكت الخيط وكملت وترى اذا تمينا جذى اتوقع اهيا تقول خل اوخر عنهم لانهم يسحبونى لى ورى وما يودونى جدام عنيده حبيبتى اسفه انى اتكمل بلساانج بس يعنى احتمال توصلين لى هالمرحله ..

وين ارادتنا !!!!!

ليش قام اى شى يشوقنا



ليش باى مناسبه نستسهل التخرب .......؟

اول لو شنو لو شنو ما نخرب



الا بالاوووف مالنا انا الحين صار يوم الاوف وراه جم يوم ليش ليش!!!!!!!


اللى يضيق الخلق انى من سنه ونص كنت 79 واليوم نفس الرقم بدال ما اكون 60 لى الحين واقفه بمكانى وعشان شنو

عشان كيكيه

عشان كاكاوو

عشان اشتهيت ما ادرى شنو

عشان مجبوس لحم

عشان وعشان




اذا استمريت جذى بيبنى يوم واشوف الرقم اللى كنت اكره مره ثانيه .... وراى حمال وراى ولاده واكيد بطيش !!!!!!!! اذا ما تلاحقنا روحنا

بنطيح


وبيخترب كل شى




يمكن عصبتوا على ويمكن كلامى ضيق خلقكم ويمكن تقولون شفيها استخفت ... بس هذا الصج ولازم نتلاحق عمرنا .....

امس انا من كثر ما خربطت مع رفيجاتى باللليل ما قدرت انام ..؟ ليش ليش نسوى بروحنا جذى ...؟

اعذرونى اذا كدرتكم بس احس ان احنا محتاجين شى قوى يوقف خربطتنا ويردنا مثل ما كنا ونحرك عجله هالوزن ونوصل للى نبيه لى نهايه السنه .......​

 

[زيـنـه]

بطبط .. كلامج صح .
و انا بديت اليوم .. و ان شاء الله مستمره .. و شريت اشياء مساعده عل و عسى تساعدني و احرك وزني شوي .
المفروض اكون بالسبعينات .. و ارضي نفسي .
بس اللي حاصل كل ما نزلت كيلوين او 3 .. انغريت و رديت للممنوعات و الخرابيط و رديت الكيلوات .
الحين و من اليوم مو عاجبني جسمي .. و حالي من حالج كل ليلة افكر و اقول ليش كل يوم اقول من باجر .. لي متى ؟

ف ان شاء الله انا عزمت .. و الله يعينني على نفسي .

 

[زيـنـه]

وينكم اليوم ؟

 

[عنيّد]

بآآآآآآآآآآآآك من العُبــــــــد

بطوط ،، كلامج عين العقل والله ، الواحد لازم يحط لنفسه حد ، بكل اختصار أقولج ان الشي الوحيد الي يرد شهوتي لما اشوف الأكل اهو سؤال واحد :
لي متى ؟
خو أكلنا ماشالله أشكال وألوان وعلى مدى 24 ساعه باليوم ، يعني هالحلج ماراح يتسكر
وبصراحه خاااااطري ألبسسسسسس ، قبل مادش السوق ، الحين والله أكيّف من أدخل السوق وأتشرى
والي قلتيه بلسااااني مسموووووحه بس لاتظنين بيوم بسويه لا حشى والله بالعكس ، الله يشهد اشكثر شجعتوني ، سواء كنت بالرجيم أو بأيام التخربط ، ماتتصورين والله اشكثر مساعديني :eh_s(7):


المهم ، حبيت أقولكم اني نازله 3.5 كجم الحمدلله ، صح توقعت أكثر بس نعمه الحمدلله
وهووون التفصيل رجيمي مع د.عبدالله المطوع (3)

 

[ام فجور 2008]

افا بطبط انا رحت وخليتكم :0bee2e8d89:
والله الايقو مفصولة وللحين مادفعتها مااقدر اشبك :0bee2e8d89: الا بالدوام ولمن اشبك الصبح مالاقي احد :0bee2e8d89:

 

[بطة رشيقة]

هلا هلا فيكم ..

حبيبتى ام فجوره لا تزعلين منى حبيبتى:eh_s(2):

( بس هذا كان للتخويف فقط وحتى البنات الباجى انا مو قصدى بشى بس عشان اخرع روحى واخرع البنات )

افا عليكى بس افا عليكى .. وهذى حبه على خشمج :hjy5jewf:

بس انا حسيت ان احنا محتاجين هالحجى ان نحطه جدام عيونا وخلاص نقول ستوب لكل خربوووطه .. :eh_s(13):

عنيد حبيبتى انتى الف الف الف مبروك وعليج بالف عافيه يالغاليه وومنها للانزل بصحه وعافيه ..

زيونه الحمدلله انشالله يارب كلنا نمسك روحنا ونقول


لى متى على قوله عنيد ..

وانشالله يارب صج ما ايى شهر 12 الا احنا محققين احلاممنا :nbvppw:​

 

[عنيّد]

بطوط ،، يآآآآآآآآرب الله يسمع منج


اي صج نسيت أقولكم ، سألت الدكتور عن ماي الزعتر ، جان يقولي والله مادري اشسالفته انتي ثالث وحده تسئليني :dddds:
رد علي -بما معناه- يقول من الي قريته ودرسته عنه ، عرفت انه يحرق المعده حرق ويسهل ، يقول مادري شنو سالفة الكويتيين مع المسهلات عسى مانزل شي الا خذوه
يقول صح احنا مرات نوصف المسهلات ولكن مو لأي حاله ولأي وقت ، لأنه هالشي على المدى البعيد يأثر على ...... (نسيت على شنو خخخ بس قالي ونسيتهم والله) ويقول حتى بالمستشفيات نشوف حالات بسبب المسهلات هذي

قالي خلج من كل هذا والتزمي برجيمج

 

[ام فجور 2008]

انا اليوم تريقت صمونة جبن وعصير برتقال
وقبل شوي اكلت كتكات
والغداء مادري شنو لان اليوم عندي جولة ثانية مع المهندسين بطلع بعد فيعني ماراح ارد البيت الا متى

عنيد جان سالتيه عن القهوة الخضرة