إ¨°•√♥ ذا أنتي مطلقه شاركينى؟ "تم دمج المواضيع المتشابهه من قبل الاشراف"¨°•√♥

[الدلوعة]

مشاركة: إذا أنتي مطلقه شاركينى؟

انا بعد والله يوم قريت حسيت اني ابي ابجي من القهر بس المووضوع مختلف جدا
بس انا مرتاحة حيل بفراقة ولا افكر بالزواج الي ذابحني انه اهلي يبوني اتزوج وانا ماابييييييييييييييييييييييييييييييييييييييييييي

 

[LaSt WoMeN]

مشاركة: إذا أنتي مطلقه شاركينى؟

دلوووعة نصيحة لا تستسلمين للضغوط ..
اذا انتي من داخلج لي الحين مجروحة و متألمه .. فهذا يعني ان الوقت غير مناسب لمشروع زواج جديد ..
مع الوقت ... بتنسين أو تتناسين اللي صار لج .. و بتكونين مستعدة للزواج في ظروف احسن انشالله ..
كلما كانت الظروف المحيطة باتخاذج لقرار الزواج هادئة و مشجعة .. كان انعكاسها على سعادتج الزوجيه افضل ..
بس هااا ديري بالج تيأسين من رحمة رب العالمين .. لأنه سبحانه الغني الرزاق الوهاب يقدر يرزقج بأحسن الرياييل و لن يعجزه شي و لن ينقص في ملكه شيء ..
فديري بالج من اليأس .. " و لا تيأسوا من روح الله إنه لا ييأس من روح الله الا القوم الكافرون " سورة يوسف

 

[آخر ذكرياتي]

مشاركة: إذا أنتي مطلقه شاركينى؟

الله يعوضكم خير يارب

 

[جوري الكويت]

مشاركة: إذا أنتي مطلقه شاركينى؟

حسبي الله و نعم الوكيل,, في كل واااحد يظلم بنات الناس و يأخذها علشان امه تبييييه يتزوج و تشوووف عياله قبل ما تموت والا هو مو قد الزواج و المسئوووليه ,, و يارب تراوييه في أحد عزيز و غالي على قلبه ,, دام في بالك وحده ليش تأذي بنات الناس ,, صير ريال على أمك و اغصبها تروح تأخذها لك


حسبي الله و نعم الوكيل ,, في كل أم عايشه الدور و صايره خالتي قماشه زمانها ,, و تتدخل في حياة ولدها ,, ولدج ما قلنا شي ,, بس خليه يعيش حياته ,, يعني اللي خذتيه من أمه ما كان عنده أهل ,, و لا كان مقطوووع من شجره,, اذا أحد يا يخطب بناتها أول شي تشرط يسكنون بره بس ولدها و مرته تبيهم يسكنون عندها تحت المراقبه


حسبي الله ونعم الوكيل ,, في كل حماة أخت ريل ,, تتدخل في ما لا يعنيها و تسوي نفسها ام العريف ,, و تتحكم بالأخو ال ......... لأنه لو كان ....... جان ما خلا اخته تتدخل بحياته و تتحكم فيه ,, مو كافي مسويه ريلها سكانه مرته و ملبسته السلطانيه
الله يعطي بناتها انشالله 4 حموات مثلها

قولوا آميييييييييييييين

 

[LaSt WoMeN]

مشاركة: إذا أنتي مطلقه شاركينى؟

اي والله يا جووري ...

و حسبنا الله على كل ظاالم غشااش ..
على هاللي يلعبوون اببنات النااس ... !!
و الله حراام

 

[ملكة زماني]

مشاركة: إذا أنتي مطلقه شاركينى؟

يارب يفرج كربكم واهمومكم
ويرزقكم باللي احسن منهم
والله يهنيكم بحياتكم ويوفقكم

 

[أميرة الورد]

مشاركة: إذا أنتي مطلقه شاركينى؟

أم جوري ايه والله ايه والله ايه والله انا صج افتكيت يوم تطلقت من بلا حاشني وسحر ومرض بس سبحان الله كان خيره من رب العالمين ظلموني وربج طلعها ما خشها الله يسامحهم دنيا وآخره ويعوضنا بالخير يارب

 

[New Mum]

مشاركة: إذا أنتي مطلقه شاركينى؟

ربي يعوض صيركم خير و يرزقكم على قد نياتكم

 

[أميرة الورد]

مشاركة: إذا أنتي مطلقه شاركينى؟

اللهم آمين نيو مام

 

[أم السنع]

مشاركة: إذا أنتي مطلقه شاركينى؟

بنات انا قريت موضوعكم وتأثرت وايد واحس انكم تحتاجون وبقوة الى تغيير نمط حياتكم

وتطوير ذواتكم وشخصياتكم

وهذا اللي راح يخليكم اقوية وما تحنون للماضي ولا تحزنون على الحاضر

ولا تخافون من المستقبل --- شلووووووون؟؟

دخلو هالموضوع

واي وحده تحب تشترك في برنامج رعاية الذات تسجل اسمها في الموضوع وراح تجيج رساله خاصه

فيها التفاصيل

http://www.q8yat.net/showthread.php?t=28545

 

[هااجر]

مشاركة: إذا أنتي مطلقه شاركينى؟

السلام عليكم

الزواج والطلاق قسمة ونصيب

وياما بنات مطلقات تزوجوا وتوفقوا

ومنهم تزوجوا رجال لاول مرة يتزوجون


اهم شي التوفيق من رب العالمين

والصبر مفتاح الفرج

 

[دلوعة زوجي]

مشاركة: إذا أنتي مطلقه شاركينى؟

صراحه قريت قصة بدر البدور والردود عليها وضاق خلقي ماقول الا الله يرزقج بواحد يحبج ويقدرج يالغاليه وفي شي بعلق عليه الوحده اذا درت ريلها تغازل تموت قهر لو شنو يصير ماتقدر تطنش حرام

 

[ام فلانة]

مشاركة: إذا أنتي مطلقه شاركينى؟

بنات انا بقول لكم عن شيء يخصني وبصراحة ميتة من الخوف ومو عارفة شسوي وبخاطري ابتدي من جديد بس خايفة بشكل ما تتصورونة انا انفصلت عن خطيبي وقت الملكة وانفسخ العقد يعني مو طلاق لأ فسخ عقد لان ما صار خلوة شرعية ومن البداية عرفت انه راعي شرب وخرابيط وحريم ف من البداية استخرت ووخرت وطلبت من الله يرزقني باللي احسن منه ............... الحين انا عمري 38 سنة والعمر يركض وكل اللي يتقدمون لي شيااااااااب ولا يبوني بالسر ولا ولا ولا يعني ما هانت علي نفسي اتزوج اي احد لمجرد انهم يقولون فلانة متزوجة اوكي
الحين بعد كل هالسنين شفت واحد من فترة وكان في شغل وبالصدفة دخلت مكتبه وقعد يكلمني وما ادري اشلون طولت معاملتي عنده وتأخرت المهم طلعت من مكتبه بعد ساعة وما قصر وياي خدمني ومشي شغلي بعد ثلاث اربع ايام وفجأة الاقي التلفون يرن شلته ولا يطلع اهو عاد اهو قبل لا اطلع عطاني كرته اذا بغيت اي شيء بس اتصل وهو راح يساعدني عاد انا نسيته وعادي ما صار شيء يستاهل اني اتصل ف ماحطيت في بالي ولما اتصل قال لي انا نطرتك تتصلين طبعا الملف اللي بين ايده كان فيه كل الاشياء والمعلومات اللي تخصني تلفوناتي ومكان شغلي وحتي كان مكتوب اني متزوجة ف اهو حسباله او انا اللي فهمته من كلامه انه يبي علاقة عاد انا قلت له انت فهمت غلط انا مو مالت هالسوالف (للعلم انا متحجبة والبس عباية وحجيت مرة ورحت العمرة مرات كثيرة والحمدلله متواصلة مع ربي ومتكله عليه ولا ابي علاقات وخرابيط ولا لي نية ابدا وحتي زواجي انا متأكدة ان ربي بيرسل لي اللي يستاهلني ان شاء الله ) المهم اهو حاول مني مناك وقال لي انتي حسستيني اني غير وانا من يومها افكر فيك مو عارف شنو صار لي ورسالتك وصلتني وعلشان جذي رديت قلت له اي رسالة قال لي كلامك وحركاتك (انا قعدت على الغنفة وما تحركت الا لما الفراش ياب لي ماي حتي ما طلبت قهوة ولا شيء علشان ما اطول بمكتبه اكثر) المهم اهو لما شافني ما تجاوبت وياه قال لي انا رحت صوب بيتكم كذا يوم سيارتك ما تتحرك وايد وشفت ملفك مكتوب متزوجة بس ما لقيت عقد الزواج قلت له اذا تبي عقد الزواج مو مشكلة ايبه لك وسكت (بصراحة الشغلة اللي انا ياية لها لازم متزوجة تحصل عليها وانا ما مداني اتزوج وانفصلت علشان جذي ما حطيت ورقة الملكة بالنسبة لي انا مو متزوجة لاكن الناس انا منفصلة وقاعدين يعاملوني بطريقة خااااايسة كلا علبالهم اني ...... علشان جذي ممكن اتمادي بعلاقات من غير خوف وانا تنبط جبدي من هالمعاملة واغلب الاحيان انعزل بروحي واوخر عن هالمجموعة من الناس ) المهم سكر الخط لما ما شاف اي تجاوب بع كم يوم اتصل واعتذر وقال لي انه كان قصده زواج وانه شاف ما عندي عقد زواج ف فهم اني مو متزوجة وان في فرصة لي وله وبعدين قلت له ان اذا قصده شريف وناوي الزواج انا ظروفي كيت وكيت واذا تحب تستمر باجراءات الزواج انا ما عندي ما نع وانت تعرف العنوان وتعرف عني كل شيء وانا ما اعرف غير اسمك قال لي خلاص اتفقنا وراح تعرفين كل شيء بوقته وانتهت المكالمة عقبها بكم يوم اتصل وتكلم اشوي ودخل عليه واحد وسكر الخط والكلام هذا له اسبوعين تقريبا وانا انشغلت بالدوام وكنت اتجنب اني اقعد بالكتب علشان ما ارد عليه بصراحة حبيت فكرة الزواج وبخاطري اعيش مثل الناس ورحت صليت واستخرت بس خايفة احس ان اللي صار لي كأنه حلم ولا فلم مو صج عمري ما تصورت ان النصيب يكون بالطريقة هذي وخايفة اقول لحد يمكن اهو يتراجع وما يجدم على الخطوة الاولي وبنفس الوقت انا ما ابي اتكلم وياه علي اساس ان احنا بنرتبط اولا انا احس ان احنا كبار وقرارنا بالارتباط لازم يكون مدروس وثانيا انا ما عندي فكرة عن اي شيء بحياته ولا اعرف اذا كان منفصل او يبي زوجه ثانية او بس يبي يلعب ولما شاف اني ملتزمة وسيجة حب يخليها زواج بس بالسر وبنفس الوقت اهو عاجبني لاكن ما ابي اتصل فيه ابي كل شيء جدام الله صح ما ابي اظلم نفسي وبنفس الوقت اخاف تروح مني الفرصة لاني وايد تعبانه من وضعي وهو صار لي مثل الشمعة اللي بآخر الطريج واحتمال تنور حياتي وياه واحتمال يكذب علي .... ساعدوني بنات شسوي محتاجة الارتباط واللي يتقدمون لي تعابة بمعني الكلمة وهذا مركزه حلو وفوق هذا عاجبني بس ابيه بالحلال شسوي؟؟

 

[جوري الكويت]

مشاركة: إذا أنتي مطلقه شاركينى؟

حبيبتي ام فلانه ,,

انا ما احب احط بذمتي بس لو كان صاج معاج مو هذي الطريقه اللي الواحد يسلكها اذا ناوي على الزواج

المفروض لمن يشوف مكتوب في ملفج متزوجه , ما يفكر فيج , ولو افترضنا ان ما لقى عقد الزواج و حس انج مو متزوجه

المفروض ما دام يعرف كل المعلومات عنج (( الموجوده في ملفج )) عنوانج و اهلك و أرقامكم يسأل عنكم بعييد

و بعدين كلمته اني حسيت انج تبيني و تطالعيني كلش موووووووووو حلوه , لأن الريال اذا حس ان المرأه من النوع اللي تخز و تطالع حتى لو بحسن نيه راح يفكر فيها بطريقه غلط و ماراح يفكر فيها كزواج

و مثل ما قلتي يا اختي ان يمكن تكون هذي فرصتج و خصوصا ان احسن الموجودين من الخطاب ,, اتمنى ان ما تضيعين الفرصه من ايدج لأن الحين كل شي بايدج ,, فاللي عليج انج تعطينه طااااف و ما تردين عليه لن لو صج كنتي بخاطره و يبيج بالحلال , فاعتقد ان هو عنده و بين ايده كل المعلومات الكافيه عنج , لأن (( هو اللي بيخطبج مو انتي اللي بتخطبينه ))
فعلشان جذي مو ضروري تعرفين عنه اي شي عن طريق التلفون لأن راح تعرفين كل شي عنه , بعد ما يتقدم رسميييييييي

و لا ترضين بأي حل ثاني يعطيج اياه , يبيج عنده العنواااان


والله يوفقج يارب و تبشرينا عنج قريب انشالله

 

[ام فلانة]

مشاركة: إذا أنتي مطلقه شاركينى؟

حبيبتي جوري الكويت انا مثلك قلت جذي وحتي قلتها له اهو بالضبط قلته اذا تبي ترتبط وناوي على الزواج انت تعرف عنوان بيتنا وتعرف تلفوناتنا وتعرف حتي اسامي اخواني وخواتي كلهم اذا قررت تفضل وانا بانتظارك عقبها اتصل توه بيتكلم دخل عليه واحد وانا من يومها وخرت عن التلفون بخاطري يكون كلاه صج وبنفس الوقت خايفة ان يلعب معاي بنية الزواج وانا ما بينت له شيء بس كنت رسمية وان اذا في نصيب ربنا يجدم اللي فيه خير وصالح عقبها قام يتضحك واستانس بس ما ادري الموضوع سكت وصار له اسبوعين تقريبا .... ما ادري قمت افكر فيه وايد ما ادري شسوي بخاطري الاستقرار من قلب شبعت من حريم اخواني ومن شماتت هالناس فيني لا صديقات عندي ولا احد اقدر افتح له قلبي غير اني كل يوم ادعي ربي ان كان من نصيبي ييسر امري وياه وان كان شر لي يروح عني ويفكني من شرة .... ادعوا لي بنات محتاجة لكم يمكن وحدة فيكم دعائها مستجاب .... يارب ياميسر كل عسير يسر لي كل عسير فان تيسير العسير عليك يسير

 

[جوري الكويت]

مشاركة: إذا أنتي مطلقه شاركينى؟

الله يسهل عليج امرج حبيبتي و يوفقج ,, ترى ديري بالج رياييل هالأيام يخرعوووون , المتزوج يلعب على بنات الناس اكثر من العزوبي

و هو تلقينه عارف بظروفج كلها و ان انتي هالموضوع حساااس ,, عندج أو عند وحده بعمرج ,, أو أي وحده ما سبق لها الزواج

فحب انه يضرب على الوتر الحساس , و اقولج صدقيييييني تلقينه الحين ناطر اتصالج

و عندي الدليل










لمن قلتي له اذا تبيني حياج الله و كل اللي تبي تعرفه عندك سواء عني او عن اخواني و تبيني تزوجني ,, تهرب بطريقه ذربه و دبلوماسيه من غير ما يعيج رايه بالموضوع ,,

و مثل خووووووش تمثيليه انه دخلوا عليه
و سوا روحه ان أحد دخل عليه , يعني معقوله ريااااااااال طول و عرض , بيخاف من احد يدخل عليه الغرفه (( ولا أقولج ليش لأ يمكن أحد طاح عليه و خذا منه التلفون اسبوعين ))


السالفه واضحه و لأن انتي الموضوع مثل ما قلت لج واايد حساس عندج , فقاعده تفكرين فيه و لنه يمثل بالنسبه لج الاستقرار

لا تخلين واحد مثل هذا يستغل وضعج , خصوصا انج الحمدالله خايفه ربج , و ما تبين الغلط

الله يوفقج و يرزقج بالريال الصالح سواء هو او غيره ,, و يعطيج الذريه الصالحه و موفقه انشالله

 

[ام فلانة]

مشاركة: إذا أنتي مطلقه شاركينى؟

على قولتك ...يالله ان شاء الله ربي يجدم اللي فيه الخير انا توكلت على ربي واستخرته واللي يصير يصير

 

[flfoola]

مشاركة: إذا أنتي مطلقه شاركينى؟

السلام عليكم

اختي ام فلانة

كلام اختي جوري الكويت منطقي ..

ادري انج محتاجة العاطفة والحنان و الاستقرار بس .. لا تخلين هالشي يعطي الذئاب البشرية فرصة انهم يستغلونج باسم الحب و الزواج ..

انسي هالريال .. و اذا صج شاريج بييلج .. اما انتي فلج رب يرزقج و ما يضيعج ان شاء الله

بالتوفيق عزيزتي

 

[ام فلانة]

مشاركة: إذا أنتي مطلقه شاركينى؟

مشكورة حبيبتي

جزاكم الله كل خير حبيباتي

 

[عنايد]

مشاركة: إذا أنتي مطلقه شاركينى؟

أم فلانه الله يرزقج الرزق اللي يبرد جبدج انتي وكل وحده خايفه ربها وتبي الحلال وجميع بنات المسلمين اللهم آمين