ابي الحل منكم اتطلق ولا اصبر؟؟

[om al ghaleen]

شوفي حببيتي انا صارلي جم يوم احوس بالقسم هذا وكل يوم
تنكتب نفس قصتج
والردود صبري وطنشيه ومن هالكلام

بس ياحبيبتي انتي مو غلطانه ومن حقج تحافظين على بيتج
لاتنسين اذا سكتي بيصير الشات بيت دعاره باجر
خليج صارمه ودافعي عن بيتج
اهو بالطقاق لانه بيئته اسمحيلي وصخ
واهله بعد

اهله لهم حق فيه انتي لا تنزلين من كرامتج اكثر من جذيه
كلميه بهداووه وشوفي اهو شنو يبي بالضبط
اذا بيستمر ع المستوى اللي فيه هجريه في بيتج
وطنشيه وعطيه اكبر طااااف اهم ماعليج صحتج وعيالج
وصدقيني اذا طلبتي الطلاق ماراح يتغير ولاشي
ماتدرين يمكن اذا باجر كبر يعقل
مع اني اللي اشوفه انه الريال كلما كبر استخف !!!

\\

 

[شقرديه كيوت]

والله ماادري شنو هالاغلاط اللي تسوينها اللي توصل انج اترجين ام زوجج وتبوسين ايدها عشان ترضى ! انتي ادرى بتصرفاتج وشخصيتج- يعني اذا انتي مو قادره اتغيرين من نفسج شلون بتقدرين تغيرين بزوجج وامه ! الله يهديه لج -

 

[Tom ♥ Jerry]

.,،


لا حول و لا قوة الا بالله العلي العظيمـ !
جد الله يعينج !
لا من الريل و لا من آمه


بالنسبه لـ ريلج لأزم يعطيج مصروف حقج و حق عيالج آهوة ملزوم فيكمـ .،
من نآحيه مآديه / قعدي معاه و كلميه قوليله انتا ملزوم تعطيني فلوس كل شهر
انا بذمتك الحين ، مو معقوله اروح حق ابوي أو آمي اقولهم آبي فلوس
اذا مآ رضى دخلي طرف ثالث بالموضوع ، آخوج و لا ابوج خل يكلمونه بهالـ خصوص
من نآحيه معنوية / طنششششششششششششششيه بعض الرياييل
يفيد التطنيش فيهم ينقلبون 180 درجه ! ,، انا اقولج شلون !
مثل مآ آهوة يشبك انتي شبكي بس طبعا بدون لا تسوين سوالفه الـ منحطه (=
اشتري بي بي و ضيفي رفيجآتج و كل البنات الي تحبينهمـ
و قعدي جدآمه و خليه اهوة يشبك يكلم الخمه و آنتي ظحكي بالبيبي و استانسي
صدقيني بمووووووووووووت رآح يغلي يغلي من دآخل
بينييييله انج مو مهتمتله كلش /، بس بنفس الوقت لا تهملين بيتج و عيالج
و نفسج ، كشخي بس لا تبينين له آنج تكشخين عشانه
ظحححكي و لمآ يصير موعد نومج اخذي عيالج و روحي نآمي
يعني بآختصار " جنه مآكو آحد بالبيت " !
صدقيني جي رآح يقول شفيها هاذي :/ ؟ مو متضايقه اني آكلم ؟
و رآح اينننن و يدور مليون سبب و سبب يفسر فيه حآلتج
> آعطي دروس بـ رفع ضغط الناس على قولت ريلي
و آنتي خلج مثلي ، رفعي ضغطه بس بطريقه مو مباشره ،،،
و اذا ييه و قالج شفيج ؟ متغيره ؟ قوليله لا ابد سلامتك مآفيني شي
مو آنتآ لاهي بـ عآلمك و لا جنه وحده موجوده ؟!
خلاص كل وآحد يعيش على كيفه .، و الي يربطني فيك هالـ يهال بس ؛*
صدقيني بآذن الله يتغير معآج ؛** و مع الدعاء ان شاء الله تشوفين نتيجه تعجبج
و طمنيني آول بأول


بالنسبه لـ " خآلتج " ! @@@@@@@@@@
شنو تبط الجبد الحمد لله و الشكر
شوفي هاذي مآ ينفع معآهآ الا التطنيش > الظآهر العايله كلها مآل تطنيش
يعني خلي علاقتج رسميه معاها سلام سلام و قعدي لا تسولفين و لا شي
دآم هاذا الي يآلج منهآ :/ ! كآفي ريلج بعد آمه ! :|
و بيني و بينج لا تطولين القعده معاها ، سلام خالتي شلونج شخبارج ؟
و روحي شقتج قعدي بروحج أو مع عيالج آحسن لج
على قولت المثل " آبعد عن الشر و غنيلو " و الله صج آنتي مو مجبورة
تبوسين ايدهآ و رآسها كل مره عشان تنطرين منهآ كلمه رضا !
يبه خليييييييها اهيه مو آمج عشان لأزم ترضى عليج ! :/

 

[سوسن1980]

لاتنتظرين من ام زوجك ترضى عنك انتي بس سوي الواجب ولاتقعدين تبوسين على راسها كل شوي وزوجك عيدي حساباتك معاه بعد ماتولدين الله يسهل عليك

 

[هيا البرقاوي]

الله يفرج كربتج

 

[ام ثلاث الصقور]

شوفي حبيبتي من ناحية ام الزوج ترى انتي معطتها اكبر من حجمها عنها مارضت بالطقاق
السالفه بينك وبين زوجك اهي شكوووو
واذا على زوجك حقريه وطنشيه وعيشي حياتك لك ولعيالك وهو خليه اخر اهتماماتك شوفي شلون راح يتغير
ترى بالتطنيش يجووون ركض
وبعدين ياختي العزيز اوصيج بالاستغفار
الاستغفار
الاستغفار
يجعل من كل ضيق مخرج ومن كل هم فرج
وصلاة الليل وادعي ربج يسخره ويهديه ويصلحه ويحنن قلبه عليج ويبعد عنه بنات الحرام

والله يعينج ويسخرلج ويقوج بالسلامه

 

[dalo0o3ah_kw]

الف شكر لكم خواتي على نصايحكم وانا لما كتبت الموضوع ما دريت انه نزل بالقسم
بس الي تقول روحي بيتج او مو مجبورة ترضى عنج ام زوجج على فكرة انا ما عندي اي خصوصية في بيت زوجي
ولا عندي حتى شقة خاصة انا قاعدة بغرفة انا وعيالي واكلنا وقعدتنا وياهم وخالتي ام زوجي الكل بالكل بالبيت
وزوجي لما رجعت اشترط اهم شي راحة امه والله ابيها ترضى عشان لا تطق بنتي والله بنتي تخاف منها مع انها جدتها
لما كان عمر بنتي سنتين تقولي بنتج خبيثة وما تحب الخير حق احد وانانية انا انصدمت قلت عمرها سنتين ما تعرف هالأمور
بس عشان ما تخلي احد يلعب بالعابها المشكلة ان كل اليهال جذي بس اهي ما تشوف غير بنتي تتهمني اني اتجسس عليهم
وتتهمني بأمور كبيرة يمكن انا تصرفت بالغلط تصرف خلتها تشك بكل هالأمور ولما رجعت ما خلتني ادخل البيت الا لما احلف على القرآن اني مو مسوية سحر والله ما اتهنى بنوم ولا حتى بلقمة لآن كل شي لها يعني شلون زعلانة مني وانا افتح ثلاجتهم
وآكل على راحتي انا وعيالي والله احس اني راح اغص باللقمة هذا كله غير الكلام الي تقطه علي بالطالعة والنازلة مرة شافت بنتي تبجي بدل لا تقولها اشفيج تبجين تقولها انشاءالله تبجين على امج وكل هذا عشان انا كنت معصبة مرة بغرفتي واسمعتني اقول حق زوجي تعبت وشوف امك شنو تسوي وزوجي الحبيب ما يقصر بس تزاعلنا على طول قال لأهلة خلال عشر ايام ابيكم تخطبون لي انا بتزوج كان وقتها ايام المنحة الي عيالي ما شافوها لي الحين ولا تهنوا بفلس واحد منها عشان كل هذا احس اني مخنوووقة
وراح انفجر

 

[كويتيه مذهله 87]

دخلي اهلج ضروري

 

[الـزين و الجـود]

شكو تذلين نفسج ؟؟
شكووووو ؟ قلعته . شفيكم بنات رفعتوا ضغطي ثاني موضوع اقراه الحرمه مسكينه والرجال ........
ياقلبي عندج عيالج واهوا موجود غصب عنه يفتح لج بيت ويصرف عليج غصب عنه مو طيب ولا صدقه
عيل بس يعرف يخلف ويعلق بنات الناس معاه ..
هذا عيبنا الكويتيات بسرعه نخق ونخاف
ياقلبي القانون معااااااااااج شوفي جم ياهل عندج و رفعي عليه قضيه وقلعته هذا ما يتعاشر
وشكو تحبين ايد امه وراسها !!!!!
يعني هي مو عارفه سوالف ولدها القذره ؟
وري ريلج العين الحمرا عشان يكش منج شوي ويخاف
ترا في رجال يخافون ما يستحون وريلج واااحد منهم خوفيه . قولي له .. انا اتطلق منك وارفع قضيه نفقه وحضانه وابهذلك على سوالف التاااافهه هذه .. وانت نص راتبك لي . والحكومه مو مقصره معاج .. ما دام عيالج معاج حتى بيت تحصلين . واهوا خليه يشبع ببنات النت !!

انا معاها :eh_s(15):
ومع احترامي الشديد لج انتي اللي غلطانه سكتي على خرابيطه وقام يقولج .:eh_s(4):. ومايصرف عليج بعد !!!!!!!!!:eh_s(4):
ليش عايشه معااااااااااااااه !!:eh_s(1):

لو انا مكانج اتطلق :eh_s(9):
وغصبن عنه يصرف على عياله وانا مرتااحه ..

 

[ChocolateFlower]

فكري عدل قبل أي قرار بس بلنسبه لي أرضى يسوي أي شي وأبلعه ألا ان مايحترمني موستحيل أعيش معاه يعني شنو موقعي من الاعراب يكلم بنات

 

[Vaniela]

انتي شنو تبين منه بالضبط ؟؟
و هل بيسويه لج ؟؟
هل اهو يحبج ؟؟
هل بيريحج بحياتج ؟؟
هل يستاهلج ؟؟
هل هو محترمج ؟؟
يصرف عليج ؟؟
يقدرج ؟؟
حاطج على راسه واوامرج مجابه؟؟
هل انتي مرتاحه ببيت امه و تسلطها ؟؟
عيالج بتربون احسن تربيه مع هالابو و في هالبيت ؟؟
فكري بعيالج ولا الريل ينتعوض ..
كرامتج وين ؟؟ شخصيتج وين ؟؟ احترامج لذاتج الانسانيه وين ؟؟
جاوبي على هالاسئله يمكن تقدرين تلاقين لج اجابه ..
والله يسهل لج ولادتج و ايسر امورج ..
لا تعطين الناس اكبر من حجمهاااا و الناس ماتقدرين تغيرينهاااا لانه الله خلقنا مختلفين واشكال واطباع .. في ناس سنعه من الله و في ناس لو ينجلدون ما يتسنعون ..
في مثل يقول عمر ذيل الجلب ما يعتدل ..

 

[Mrs.Q]

حبيبتي من صجج تقعدين وياه هذا جليل اصل وانتي ترفعي وحشمي نفسج عنج جليل الاصل
وامه تشوتينها باكبر فنقر انا لو مكانج قسما بالله ماتفاهم وياه اخلي كل شغلي محاكم ولو تطلقتي هو الخسراااان مو انتي
لاتقعدين وياه ولا يووووم اخذيها مني الخاين تظل خيانته بدمه لو شنو يتعدل سنة سنتين يظل ذيل الجلب عوي
حسبي الله عليه اهو وامه عساهم مايربحون

 

[اكسبلانكا]

نصيحه شيلي فكره الطلاق من راسج سالي مجرب راح تتبهذلين اكثر وعيالج محتاجين ابو والياي بالطريج نفس الشي لاتحرمينهم منه لو مهما كان سيء
عاقبيه وقفيه عند حده دخلي الاهل سويها كبيره بس لاتوصلينها للطلاق راح تندمين
هذي نصيحتي لج فكري الف مره لاني تمنيت احد ينصحني هالنصيحه بس للاسف مالقيت
والحمدلله على كل حال