اختي توها راده من الدراسة بره..شوفوا اشصار لانها مسلمه

[المرتاحة]

راقيه وطرحج راقي ولي عودة بموضوعج دائما فكرج منور وواسعة الافق ومثقفه​

تعجبني مواضيعج احلى لااايك لج ​

حبيبتي تسلمين

انا ما يهمني بالمواضيع كثر ما يهمني انكم تستفيدون و الناس تستفيد وانا بعد استفيد منكم

حياج حبيبتي :eh_s(7):

صح لازم كل واحد يبحث ويتعمق بامور دينه ويفهم اهو شقاعد يسوي وليش يعتقد بهالامور وشنو المصادر والادله .. مو بس يسمع من الشيوخ ويطبق عمياني لان الشيخ هم انسان وبشر ممكن يصيب وممكن يخطيء وكلامه مو حجه عليج واذا انتي حسيتي كلامه مو منطقي وماستوعبيته لازم تبحثين وتتاكدين بنفسج عشان تتطمنين ..

صاجه اختي

وايد مسلمين يطبقون لان اهو تربى على جذي و اذا قعدتي تحاورينه ما يعرف يرد عليج

والله يا ليت كل الناس تبحث بنفسها و تتعلم

ربنا اول ما نزل على الرسول صلى الله عليه و سلم "اقرأ" مع انه كان أمي ما يعرف القراءة ولا الكتابة
لكنها دعوه من الله له و لنا بالتعلم و القراءة

ومشكوره حبيبتي على المشاركه :eh_s(7):

 

[سكوتي بذوقي]

الواحد يقوي دينه ويعرف عنه كل شي

حتى لو ماراح بعيد

ممكن نصادف أجانب بديريتنا يسئلونا عن دينا

البعض منهم عنده شغف يعرف لأنا احنى

الحمد لله عايشين براحه هم يفتقدونها

الحمد لله الذي جعلنا مسلمين

يعطيكِ العافيه

 

[عادت ذكرياتي]

موضوع جااااد وبالصميم


قواج الله

 

[المرتاحة]

صح كلامج وانا كذلك بديت اشوف الدين بمنظار ثانيً لمن اختلطت باجانب
مع ان اللي اختلطت فيهم مسلمين


تعرفت على امريكيهً مسلمه. سالتني. ليش الحريم يلبسون اسود!!
تقول كل الليً اسالهم يقولون لاننا مسلمين بس الدين ماشرط اسود وتقولي ان في واحد عربي انتقد لون العباءه لان لونها اسود وهاجمتوه ليش؟



تخيلي ... الحمد لله ان فاهمه ديني وعارفه بعلم النفس فرديت عليها الرد اللي اقنعها


قلت لها لمن امر الرسول النساء انهم يتحجبون ماكان عند النساء الا طاقه كبيره وبالصدفه لونها كان اسود ومن بعدها جرت العاده انهم يلبسون اسود

ردت سالتني وقالت الحين الخامات ملونه

قلت لها حاجه نفسيه للشعب وهي حاجه الانتماء لفئه معينه ....

ما شا الله عليج اختي و عسى الله يكثر من امثالج

انا كنت بعد انظر للعبايه السوده على انها من الدين


بس بعدها فهمت ان اهم شي يكون اللبس واسع و شرعي وما يلفت النظر

وتقولي شغلات واجدنقدت على مجتمعنا

تقولي لمن اروح مطعم اشوف. الجرسونً يشكر الناس على زيارتهم وماتردون
وهالشي عندنا عيب

ولمن توقف في طابور يعدونها الرياجيل بحكم انه مره ... وانا بصراحه ماانكر كلامها لاني دايم اتعرض لهالموقف واذا تكلمت شهروا فيني بنت فلان سوت وسوت

وتقولي نادر ماشوف رجل يمسك ايد زوجته ...

سالتني عن شغلات. واجد احرجتني فيها ... العيب والعادات مدخلها شعبنا بقوه بالدين غصب

اي صاجه اختي

اختي قالت لي عن وحده معاهم مدخله ولدها المدرسه.. و الولد وايد شيطان و عاقبته المدرسه وقام الولد طول لسانه على المدرسه معترض ليش تعاقبه مرأه !!!!!!!!

هذا اللي استفدناه من بعض العادات و التقاليد

في اشياء بمجتمعنا مخربه علي الاسلام

اشكرج حبيبتى على مشاركتج :eh_s(7):

 

[Japanese]

صاجه بكلامج صراحه :/

انا خليجيه وادرس بآميركا ووايد تصادفني مواقف جذي

تخيلي مره خذت كلاس عن الانجيل مالهم وهني حسيت بآني صج

ممتنه لررب العالمين اني مسلمه

حمدلله رب العالمين بعد العيشه هني صرت مثقفه اكثر بالدين ،، وصرت اعرف ليش نسوي كذا وكذا

بس الشي الوحيد اللي باقي اسويه اني اناقش حد من دين ثاني!!!

عندنا بالجامعه وايد غروبات نقاش للآديان المختلفه

بس ماقد رحت يعني :/

اممم شنو بعد ،.. اول ايامي هني كانو وايد يسآلوني بس احين لا كلش

العرب مب مخليين لحد مجال هني انه يخش سؤال بقلبه لووووووول

ليش انه وايد شباب هني ومرافجين اميركان ف تحسين صارت عندهم خلفيه

وغير جذي فيه كلاسات عن الحضااره والديانه الاسلاميه ف لا ماحسهم كلش يعني مب فاهمين شالسالفه!!

والله يعطيج العافيه ان شاء الله

 

[dimple]

ايييه والله معاج حق ... لازم نفهم الدين صح مو بس عشان نقدر نحاوب علي تساولات المسيح و غيرهم

شالفايده اذا ما يكون في ايمان بالدين ... يعني احنا الحمدلله انولدنا مسلمات بس هل احنا متعمقين و فاهمين الدين 100٪

مره زميلتي في الدراسه انسالت ليش المسلمات مو كلهم متحجبات اذا دينكم يفرض الحجاب؟؟
مسكينه ما اقدرت اتجاوب شتقول الحجاب قناعه قبل لا يكون فرض و لا شنو

و انا انسالت نفس الشي ليش ما تصافحين الريايل ؟ قتلهم الدين يمنع ان المراه تلمس الريال ... بس زميلاتي عادي يصافحوون فهم يستغربون شالتناقض

كل هذا بسبب جهلنا بالدين

 

[*المــــلكة*]

احب مواضيعج وايد ويعطيج العافية اختي
وصجج احنا هني وااايد خالطين العادات والتقاليد بالدين مه انه الدين حيييل مختلف عن عاداتنا وتقاليدنا !!​

 

[amal ksa]

بالنسبه لي كنت اعطيهم وجه الحين مااسمح لااحد يسولف معي بدين شافوها حلى لاومايقتنعون في اي كلمه اقولها يحاولون يحجرونلي اللي يجيني بيتكلم عن الدين اخليه ينطم واقوله انقلع ريحة راسي منهم صارو يخافون مني بعدين الاجانب مررره فاهمين اننا مظلومات بذات مركزين على السعوديات وكل اللي فاهمينه عننا غلط بغلط وللامانه انا مالي خلقهم قلت مالقت شيء يعيدون نفس السالفه ليه ماتسوقون عاد انا مع انه البنت تسوق فااضطر اقوله شفت اميره من الاميرات تسوق حنا كذا لاننا مثل الاميرات كل وحده معها سواقها مع اني للاسف مو مقتنعه بهل شيء كل الخليجيات يسوقون مافيها شيء وسعوديه قبل البدويات كانو يسوقون بالقرى وفيه جامعه مختلطه وعادي الوحده تتحجب بس هم فاهمين انه لازم نتغطى غصب
قولي لااختك لاتعطيهم وجه بذات البريطانيين مافيه اثقل من دمهم وحسودييين بالنسبه لدين اشوف الدين مره واضح الحمدلله وفيه مشايخ الله يهديهم ترى هم بشر مثلنا يمكن يغلطون بعض احيان
سوري كثرت بالكلام مزكومه وحالتي حاله تحياتي للجميع

 

[المرتاحة]

جزاج الله خير

وانا في فتره دشيت منتديات مسيحيه واشتركت فيه حسيت استغفر الله مساكين حيل وعقولهم هواء وناقشت معاهم بمنطلق العقل بس ناس لازقه فيها فكره وعقيده مو راضين يفجونها ويفكرون بس بيني وبينج حاولت افهم دينهم عشان اتنبأ بالاسئله وادور عليها اجابات حرص للمستقبل اذا صادفت جذي اشكال\



مشكووووره

بس عندج كتب معينه تنصحينا فيها؟

بارك الله فيج اخيتي تعجبيني :rerrerek: ما شا الله عليج

انا احب ارز ويهي بينهم واقعد عاجله و مؤدبه واذا حسيت عندي فرصه اعلق بس بدون ما انرفزهم اعلق واقول

ترى من تجربتي شفت ان اغلب الاجانب بشكل عام سلسين في الحوار و ياخذون و يعطون معاج و هذا اللي يعجبني فيهم

بس ترى فيهم فئه متعصبه وايد وحتى ما يسمعون وجهة نظرج وخصوصا اذا دروا انج مسلمه يقفلون بعد و يمكن يتهجمون عليج و يسبونج

اذا تبين تفهمين اكثر تابعي مناظرات "الشيخ أحمد ديدات" الله يرحمه مع القساوسه

والكتيبين اللي نسيت أذكرهم بالموضوع واستفدت منهم

كتاب:

Is Jesus GOD? The bible says NO!
"هل عيسى إله؟ الإنجيل يجيب لا!"


والكتاب الثاني

Clear your doubts about Islam
معناه على حسب ترجمتي "أزل شكوك عن الإسلام"

تلاقينهم بمكتبة جرير.. انا شفت عندهم ركن كله نفس هالنوعيه من الكتيبات .. ترى كتيبات خفيفه و تقدرين تخلصين قرايتها بيومين

والله يوفقج اخيتي :eh_s(7):

 

[long time]

بصراحة مو بس الأجانب عندهم تساؤلات حتى انا عندي أسأله مالقيت أحد يعطيني الجواب الي اقتنع فيه
بسهووله لاني احب اسمع كلام منطقي يعني مو مجرد مالشيخ يقول شيء اقتنع افكر اول واشوف كلامه مطابق لكلام الرسول والأئمة ولا لا

 

[.:!:. ونس .:!:.]

ولمن توقف في طابور يعدونها الرياجيل بحكم انه مره ... وانا بصراحه ماانكر كلامها لاني دايم اتعرض لهالموقف واذا تكلمت شهروا فيني بنت فلان سوت وسوت

مادري انا اشوف الرياجيل يمشوني قبلهم بالطابور
ماقد مره رجال مشى قبلي

,,
يعطيج العافيه حبيبتي على موضوعج
وصج الواحد لازم يتثقف بدينه ويتعلم اكثر

 

[Emeeta]

رضا الناس غايه لاتدرك واللي يبي يسالك عن دينك باستهزاء خلك باره وجاوبي بدون نرفزه و مثلي لهم بامثله من الحياه ترتبط بالدين عشان تكون الصوره واضحه فيه

الدين علم و تساهل و رحمه و موده

هم طغت العادات. والتقاليد على تفكيرهم و اختلط عندهم معنى الاسلام مع العادات و التقاليد و الافكار اللي توصلهم من الناس و الاعلام


انا بحكم دراستي هنا بدوله اجنبيه فهمت هالشي و تمر علي كثير مواقف والحمدلله قدرت اتعامل معهم بالرغم من اني مو متمكنه مثل اغلبنا بالدين بس الحمدلله اشوف محاظرات دينيه و احاول استفسر عن الاسئله اللي تدور براسي

و بعضهم من ديانات مختلفه كانوا يتوقعون اننا ماناكل الخنزير لاننا نعبده الله يكرمكم لين وضحت لهم الصوره وانهم جاهلين بديينا

والحمدلله احببهم بالدين بس باسلوبي و اوضح لهم ان الدين يسر

احاول اجمع لهم التشابهه بين دينا و حياتنا

البنات عندهم مشكله من ناحية تعدد الازواج شرحت لهم الحكمه من هالشي و الحين اعرف بنات بريطانيات بعد اسلامهم اهلهم تخلو عنهم و ماشاء الله محافظين على الدين اكثر مني

انا محجبه بس هم تعمقو بالدين اكثر و اكثر و الحين يتغطون غطى كامل و مافي شي من جسمهم واضح ماشاء الله

ووحده منهم الحين تزوجت مسلم محافظ

الدين يسر و المسحيين عندهم مشكله مو بدينا مشكلتهم بالتقاليد لان مجتمعاتنا تختلف عنهم و افكارنا بعد والاعلام له دور

و ع بالهم اننا مضطهدين بس اذا دخلتي عقولهم و شرحتي باسلوب مقنع بتتغير حياتهم


و الله يكتب اللي فيه الخير

 

[البارونـه]

هذا التفكير السليم والمواضيع الثقافيه المفيده

نرجع للموضوع
اوافقج 1000%
ودايما اقول ,, ان الاجانب الي يسلمون بعد مايبحثون عن الاسلام احسهم متمسكين فيه اكثر منا احنا الي انولدنا مسلمين ! لان احنا ماتعمقنا ماسئلنا ماعرفنا ,,بس اشياء جدا سطحيه,,هم اكيد قبل مادشوه سوو هاي كله فـ اسلموا مطمنيين وعارفين ان هالدين حق
والانسان لازم يثقف نفسه بكل شي, ويعتـــز بدينه ومذهبه ويؤمن انه على حق
وترا صدقيني احنا ماتعودنا نثقف نفسنا بهالمجالات وماتعودنا نقرا ونسال,, وسواء بالاديان او بالمذاهب فـ كلنا نورثها من اهلنا.. عمرنا مابحثتنا وتاكدنا هل احنا على حق؟
هم يحبون يكتشفون ويسالون والدليل اسئلتهم لنا وانا الصراحه اشوف وايد منهم عندهم قابليه انه يعتنقون الاسلام
وقله قليله من المسلمين فـي هاذي الايام تلقينه معتز بدينه جدام الاجانب وبعضهم يستحي وسلبين ومو واثقين للاسف الشديد

 

[بنت حظوظ]

جزاج الله خير

 

[المرتاحة]

هذا التفكير السليم والمواضيع الثقافيه المفيده

نرجع للموضوع
اوافقج 1000%
ودايما اقول ,, ان الاجانب الي يسلمون بعد مايبحثون عن الاسلام احسهم متمسكين فيه اكثر منا احنا الي انولدنا مسلمين ! لان احنا ماتعمقنا ماسئلنا ماعرفنا ,,بس اشياء جدا سطحيه,,هم اكيد قبل مادشوه سوو هاي كله فـ اسلموا مطمنيين وعارفين ان هالدين حق
والانسان لازم يثقف نفسه بكل شي, ويعتـــز بدينه ومذهبه ويؤمن انه على حق
وترا صدقيني احنا ماتعودنا نثقف نفسنا بهالمجالات وماتعودنا نقرا ونسال,, وسواء بالاديان او بالمذاهب فـ كلنا نورثها من اهلنا.. عمرنا مابحثتنا وتاكدنا هل احنا على حق؟
هم يحبون يكتشفون ويسالون والدليل اسئلتهم لنا وانا الصراحه اشوف وايد منهم عندهم قابليه انه يعتنقون الاسلام
وقله قليله من المسلمين فـي هاذي الايام تلقينه معتز بدينه جدام الاجانب وبعضهم يستحي وسلبين ومو واثقين للاسف الشديد

هلا والله اخيتي

انا والله كنت توني بطلع من المنتدى و قلت ان شا الله باجر بكمل الردود على البنات بس شفت ردج قلت لازم ارد عليج

في وحده اجنبية اسئلتني انتوا يا المسلمين ليش ما تبحثون في الديانات الثانيه وتكتشفونها واحنا المسيحيين نبحث بالديانات الثانيه

طبعا رديت عليها عقب ما فهمت

قلت لها ان احنا المسلمين عقيدتنا سليمه و توافق فطرتنا و توافق العقل والمنطق علشان جذي تلاقينا مستقرين وخاصة ان دينا يجاوبنا على كل تساؤلات العقل..و عندنا خلفيه بسيطه عن الديانات الثانية و نشوفها ما توافق العقل ولا الفطرة علشان جذي ما نتعب نفسنا و نبحث فيها ..

اما انتوا عقيدتكم مو واضحة و غامضة واصلا العقل صعب يتقبلها .. اشلون رب واحد يصير ثلاثه و تبدون تسألون.. اشلون الرب صار جنين ابطن امه وانولد من مكان مو حلو و طهروه بعد ؟ اشلون الرب صار انسان ياكل و يشرب ويطقونه و يعذبونه ويبجي و يقتلونه ويموت...
و ما عرفت تجاوبني

علشان جذي يا اختي تشوفين بعض المسيحيين اللي يتركون العاطفه ويشغلون عقولهم متعطشين يبون احد يقنعهم ولما يلقون الحقيقة يتمسكون فيها لانهم اعرفوها بعد بحث و تعب و قراءة

ترى احنا المسلمين الحمد الله من ناحية العقيدة مرتاحين بس المشكلة ان احنا مو فاهمين بعض الاحكام في الدين

ومشكورة حبيبتي

 

[ذوق الرياض]

بصراحه الطلاب اللي قلتي عليهم ذنبهم على جنبهم خصوصا اذا كانوا سعوديين لأن مايبتعث عندنا أي شخص على حساب الدولة الا اذا حضر لقاء ديني يعلمه عن الأسئلة اللي ممكن تواجهه عن الدين والشبهات والشهوات وفيه أخذ وعطاء يعني أي واحد مو مقتنع يطرح وجهة نظره وتناقش باحترام والحق والباطل واضحين مايقدر أي واحد مسمي نفسه شيخ يضل الناس في عصر الانفتاح العلمي , أما اذا هم راحوا على حسابهم ولاتفقهوا بالدين قبل بعضهم بيضيعون وممكن يضيعون غيرهم , ومهما علمنا عيالنا الهداية بيد رب العالمين مو بيدنا

 

[Unusual]

أنا لو حصلي موقف زي كذا اتوقع ان راح اعطي هالمسيحين والملحدين كتب يقرؤوها .. عن الدين
يمكن يجدوا ضالتهم فيها .. لأني بالعموم ماني اهل اني اجاوب ع بعض الاستفسارات خصوصا اذا كانت عقائدية من الدرجة الأولى ..
والخوض في المعتقدات .. مو من السهل الكلام فيه يحتاج لعلم ودراية بالأديان ..

اما الامور اللي ماتتعلق بالعقيدة ممكن افيد غيري فيها ،، الحمدالله عندي خلفية جيدة وكافية عن ديني ..

والحمدالله الحين كل شي يدل على الاسلام هو الدين الحق حتى في مجال الاعجاز العلمي خير دليل على ذلك ..
ووووووكثير من علمائهم اسلموا بسببها ..

والمسلمين لو كانوا ملتزمين بتعاليم دينهم .. واخلاق رسولهم .. صلى الله عليه وسلم كان رغبوا الأخرين فيه .. واعطوا صورة واضحة وحسنة .. *
عن هذا الدين .. لأن الأفعال لها صوت أعلى من الأقوال ..

طرح مميز اختي المرتاحة ..

والأخت اللي تقول ،، في بعض الامور مالقت لها حواب اقولها لاتكثري التفكيري بأمور العقيدة حتى لاتصلي لمرحلة الوسوسة ..

 

[أحلام مؤجلةة]

مشايخ السلطه حبيبتي خربوا جيل كامل بتحريفهم للدين ذنبنا وذنب عيالنا في رقابهم
وكل كلمه قلتيها انا معك فيها القران والسنه هو المرجع لنا وبالوقت الحالي بالذات لان مافي مشايخ عليهم القيمه

 

[غلا سعود ~]

بوح انام : )
وبرجع ارد ع الموضوع ^^

 

[غلآ نوآف]

اي صادقة اختي لازم نفصل بين امور الدين وبين عاداتنا وتقاليدنا
لان في تقاليد وعادات كثيرة للاسف ماتتماشى مع الدين
في امور عقدناها والحين محللها
وفي امور حللناها استغفرالله بحكم تغير الزمن والحال والدين مشدد عليها
الله يهدينا ويصلح شاننا يارب العالمين
جزاج ربي خير