استفساراتكم عن الحضانات تجدونها هنا - الجزء الأول

[أم ضارى]

حضانة خطوه بخطوه

بنات انا كتبت بموضوع افضل حضانه عن حضانة خطوه بخطوه بس علشان عيون هيونه الحلوه المزيونه وفرحتها ياعمرى عقب رحلة حديقة الحيوان يوم الاربعاء اللى طاف بكتب مره ثانيه عن هالحضانه لانها صج تبرد القلببببببببب

وهم كتبت مره ثانيه لانى دريت ان اهيه مو بس هالحضانه اهمه سلسلة حضانات

1- خطوه بخطوه (اللى مدخله بنتى فيها) بالاندلس وهذا اللى كتبته عنها من قبل

بنات انا ماقريت الموضوع كله ومادرى اذا احد تكلم عن الحضانه اللى بقولكم عنها بس صراحه انا بكلمكم عن تجربه

لانى وحده وسواسيه حيل وطاح حيلى وانا ادور حضانه زينه بالاندلس او قريب منها تكون نظييييييييفه اهم شى والناس اللى فيها زينين ومنهجها يكون اما انجليزى او ثنائية اللغه

الحمدلله على حظ عيالى شهر ثمانيه اللى طاف فتحوا حضانة خطوه بخطوه خلف مكتبة السنافر اللى بمنطقة الاندلس

بس صراحه ممتازه اول شى صاحبها دكتور بالتربيه

ثانى شى اللى يشتغلون فيها يهبلون ونفسهم حلوه
ثالث شى نظيفه وايد وجديده
رابع شى وايد متعاونين ماقط طلبت منهم او نبهتهم عن شغله الا سووها
خامس شى من النوع اللى يتواصلون مع الاهل وعلى طول على اتصال معاى
سادس شى الحضانه كل شهر يسوون رحله حق اليهال بس طبعا فيه رسوم للرحله
سابع شى يسوون حفلات حق اليهال بكل مناسبه ويوزعون هدايا على اليهال والاهالى ساعات
ثامن شى فيه كاميرات مراقبه بالحمامات وغرفة اليهال اللى من سنه واصغر يعنى ممكن باى لحظه تطبين عليهم وتراقبين الموقف(انا شخصيا جم مره ايي ويكونون قاعدين يبدلون حق بنتى حفاضتها واقعد اراقب بدون لحد يدرى لان السكرتيره تكون داخل عندهم )
تاسع شى اذا ولدج مريض وتبين تطمنين عليه يشبكون معاج بالماسنجر ويورونج ولدج علشان تطمنين عليه

وييييييييه تعبت

عاشرا رسومهم معقوله 70 دينار بالشهر

واى استفسار انا حاضره

وفيه حضانه فى مشرف وحضانه في مبارك الكبير بس ناسيه اساميهم خلونى اسألكم واكتبهم بس اساميهم هم فيهم كلمة خطوه وكلهم يدد توهم فاتحين

اعتقد اللى بمشرف اسمها الخطوه الاولى واللى بمبارك الكبير الخطوات الصغيره بس هم اتأكدلكم احسن

بس اللى ساكنين بالاندلس او بالمناطق القريبه ويبون حضانه محترمه ومستوى خل يمرون على حضانة خطوه بخطوه ويشوفون بعيونهم لان باجى الحضانات صراحه تسد النفس يا الابلات مالهم خل اليهال والا غرف الحضانه صغيره والوانها تقمت

وهذا رقمهم بس امانه اذا دخلتوا عيالكم الحضانه واعجبتكم ادعولى

4802163

بالاداره موجوده ابله افراح تهبببببببببببببببببل تهبل هالابله كانت تدرس هيونه قبل لاتصير فى الاداره صج بنت حبوبه وخلوقه وايد احبها انا طيوبه وحنونه على اليهال
وهم ابله بشاير تهبل ...

والله انا مابى اظلم احد كل اللى يدرسون اهناك يهبلون بس مو ذاكره اساميهم كلهم

على فكره الحضانه ثنائية اللغه وابلة الانجليزى وايد ممتازه

اذكر حتى ايام الحج كانوا يعلمونهم مناسك الحج ويعلمونهم يلفون حوالين الكعبه وشقولون ووزعوا عليهم نموذج كعبه صغير ....

والله شغلات وايد مسوين حق اليهال اللى خاطره بحضانه قريبه يروح يشوف بعينه احسن

 

[xxx]

مشاركة: حضانة خطوه بخطوه

هلا ام ضاري

حضانة الخطوة الأولى مدخله فيها عيالي

بس مو بمشرف في بيان وصج روعه وعيالي وايد استانسو وتعلمو منهم

 

[زيـنـه]

مشاركة: حضانة خطوه بخطوه

بنت الكويت .. ممكن تلفونهم او عنوانهم ؟ و ممكن اي عمر يقبلون و شنو انشطتهم و الا شيعلمون اليهال ؟

ام ضاري .. عليها بالعافيه هيونه و الحمدلله الله مطمن قلبج عليها و مشكوره على مشاركتج

 

[أم ضارى]

مشاركة: حضانة خطوه بخطوه

والله اليوم شغل وايد ونسيت اسأل عن اسمها بس لا مو اللى ببيان ^^بنت الكويت^^ اهيه بمشرف لان بنت خالتى مدخلينها فيها اعتقد اسمها الخطوه الصغيره ان شاء الله ما انسى باجر واسأل عن اسمها

 

[أم ضارى]

مشاركة: حضانة خطوه بخطوه

زينه .... الله يعافيج ياعمرى

تدرين بعد الضنا غالى وخصوصا لما يكون البجر مادرى الواحد شيسوى فيه ووين يوديه ههههههههههه

 

[جوريه]

مشاركة: حضانة خطوه بخطوه

زين والله يوم كنت ادور مالقيت

 

[Miss_Tiger79]

مشاركة: حضانة خطوه بخطوه

الى اتقولين عنها الي بمشرف اتصير على الشارع الى يودى الدائري السادس مو حتى اسمها ليتل ستبس مو
صارلى فتره متردده عليها وريلى يقولى خنشوفها وانتى شجعتينى لانها بينها وبينا بس شارع

 

[أم ملاك]

مشاركة: حضانة خطوه بخطوه

أم ضاري ماقصرتي والله يخلي هيونه لج تزفينها عروس ... انا شفت ردج بذاك الموضوع بس الاندلس صعبه علي اللي قلتي عنهم فروع لها وشلون اسعارهم .. واذا كان الياهل يلبس حفاضه .. نبي تفاصيل اكثر ماعليكم امر ؟؟

 

[أم ضارى]

مشاركة: حضانة خطوه بخطوه

Miss_Tiger79 ...... اعتقد هاذى اهيه شوفى انتى روحى وسئليهم عندكم غير هالحضانه اذا قالولج ايه فى مبارك الكبير والاندلس عرفى ان هاذى اهيه

وانا ان شاء الله باجر اتصل على حضانة بنتى آخذ تفاصيل اكثر واكتبها لكم

 

[أم ضارى]

مشاركة: حضانة خطوه بخطوه

أم ملاك .... الله يسلمج ياحبيبتى ماقصرتى

صاجه والله الاندلس بعيده بس شسوى بيت اهل ريلى اهناك

اذا وحده من الحضانات الثانيه قريبه منج مريهم وشوفى بنفسج احسن وانا ان شاء الله باجر اكتبلكم عنوانهم واقام تلفوناتهم

وبالنسبه للحفاضه انا الحين ناويه اخلى هيا تقطها فا راح اتفق معاهم يعلمونها علشان يساعدونى

وانا سألتهم قالتلى احنا كل شويه نسأل اذا احد يبى يروح الحمام هذا غير مرتين يودونهم الحمام باليوم يغيرون حفاضاتهم واذا انتى وصيتيهم غير كل شويه ياخذون ولدج او بنتج للحمام لين تتعلم

واذا عندج اى سؤال ثانى انا حاضره تامرين

 

[أم ملاك]

مشاركة: حضانة خطوه بخطوه

أم ضاري دزيتلج على الخاص

 

[أم ضارى]

مشاركة: حضانة خطوه بخطوه

بنات يبتلكم اسامى وعناوين الحضانات وارقامهم


1- حضانة الاندلس اسمها " خطوة بخطوة "
والعنوان : ق 6 ش 1 منزل 88
والتلفون : 4802163

2- حضانة مشرف اسمها " الخطوات الصغيرة "
والعنوان : ق 5 ش 10 جادة 1 منزل 6
والتلفون : 5375372


3- حضانة مبارك الكبير اسمها " الخطوة الجديدة "
والعنوان : ق 3 ش 8 منزل 47
والتلفون : 5427159\5430182

والخط الساخن : 7424697

 

[أم ملاك]

مشاركة: حضانة خطوه بخطوه

يعني كلهم تابعين بعض ؟؟ نفس الرسوم والنظام ؟؟

 

[أم ضارى]

مشاركة: حضانة خطوه بخطوه

ام ملاك ... رديت عليج جيكى على الخاص

والله يخلى عيالج لج ان شاء الله

 

[أم ضارى]

مشاركة: حضانة خطوه بخطوه

ايه كلهم اداره وحده اهم اسمهم " مجموعة ستيبس قروب " وفاتحين افرع فى اكثر من منطقه

واللى فهمته منهم انهم مبدئيا فاتحين ثلاث حضانات وراح يزيدونهم

 

[خمائل]

مشاركة: حضانة خطوه بخطوه

السلام عليكم

مرحبا بنات

انا قريت اللي موضوعكم وفعلا الكلام هذا لانه رفيجتي بالدوام هناك تقول انه حضانتهم اكثر من

رائعه وقالت انها حضرت حصه مره حق واحد من المستويات ما اذكر اي مستوى بس كانت تقول انه

الحصه تشمل الحركه والحرف والرقم والخبره والمفهوم وتقول انه الواحد يحتار بين مدرستن

المستوى الاول

والثاني اثنينهم ما يتخايرون عن بعض وفيهم الخير والبركه ما يقصرون ويلاحظون مشاكل اللي تمر


فيها الاطفال ويشرحونها حق الامهات ويعطونها حل بكل روح طيبه وتقول انهم بشوشين

ويستقبلون الاطفال بلهفه وحتى اذا غاب الطفل على طول يسالون عنه يعني الاطفال معاهم بامان

وانا اخذت تطبيقات

اللي مسويته وحده من مدرستين المستويات وطبقته على ولدي بالروضه لقيت انه ممتاز

 

[xxx]

مشاركة: حضانة خطوه بخطوه

زينة

حضانة الخطوة الأولى

هذا رقمهم : 5375608

عندهم 4 مواد

تربية اسلامية - رياضيات - انجليزي - عربي

وغير كل اربعاء يكون يوم ترفيهي (رحلات ووناسه)

ياخذون من عمر 6 شهور إلى 4 سنين

 

[أحلى عيون]

مشاركة: حضانة خطوه بخطوه

هلا اختي وشكرا على الموضوع

وفي حضانه جديده بعد ثنائيه اللغه في صباح الناصر توها جديده ماصارها شهور وبصراحه هذي الحضانه عند باب بيتي وقلت انشالله راح ادخل بنتي فيها وتعليمهم كل شي يعني حتى كمبيوتر ورسوم الدخول يبدا من 50 الى 70 دينار والكل يمدحها مع العلم انها جديده

بنت رفيج زوجي مدخل بنته ويقول وايد زينه حتى بنته عمرها 5 سنين تكلم زوجي انجليزي ماشاء الله

واي وحده قريبه من هذي المنتطقه اقدر اعطيكم رقمها

 

[سبائك]

مشاركة: حضانة خطوه بخطوه

بنت الكويت اي صوب في بيان هالحضانه؟؟؟؟؟؟؟

اول مره اسمع فيها!!!!!

 

[زيـنـه]

مشاركة: حضانة خطوه بخطوه

بنت الكويت الظاهر اللي تقولين عنها غير عن اللي تقول عنها ام ضاري في مشرف ..بس جم رسومهم ؟

انشوف الثنتين والله كريم