التجمع الأول للتخلص من السمنة (15-25) كيلو- تشجيع- نصايح- صور....الخ

[الغاليه نونو]

رد: التجمع الأول للتخلص من السمنة (15-25) كيلو

انا تابعتكم وتمنيت اكون من ضمن المجموووعه بس ماعليه خيرها بغيرها انا الحين وزني 78 وابي اصير 60

كل يوم الصبح امشى ساعه وارجع البيت اشرب قهوتي وغداي كل يوم سلطه خضار وقوطي روب خالي الدسم

العصر اذا حكني اليووع كليت لي خياره وبالليل عشاي كوب حليب وجاي وشابوره وحده وبس

هذا رجيمي الخاص مادري صح والاغلط اللي قاعده اسويه بس احس انه ياب نتيجه معاي وراح اعطيكم االااخبار اول باول

 

[صبا]

رد: التجمع الأول للتخلص من السمنة (15-25) كيلو

أنا خاطري اشترك معاكم

ابي انزل 8 كيلوو مابي اصير وايد ضعيفة
وانا من ثلاث اشهر نزلت 15 كيلوو
بس الحين زوني مو راضي ينزل
ونفسيتي تعبت

 

[Maneena Manaana]

رد: التجمع الأول للتخلص من السمنة (15-25) كيلو

بامبينا... لا اتحسفين على انج خربطتي.. بعدين تحترين وتاكلين زيااده .. لما تخربطين اليوم اللي بعده اكلي اناناس ... عجيب يسحك الدهن سحااك

الغالية نونو ... رجيمج اكييد بييب نتيجه .. لان مافيه اكل بس صدقيني بعدين كل اللي نزلتيه بسرعه راح ترديينه... ووين البروتين ؟؟ وين الدياي والا اللحم والا السمج؟؟؟؟؟ انتوا بالكويت عندكم زبيدي ... لو انا منكم كل يوم زبيديه مشويه بالفرن

حدييي مشتهية زبيدي

صبا.. الوزن بالبداايه ينزل حيل بعدين يوقف له فترة ... الشاطر اللي يعدييها
انا دايما اوصل هالمرحله اللي يوقف فيها الوزن وانقثث فاحط حرتي بالاكل ... بس نصييحة لا تشوفين وزنج بهالفتره.. سويي اللي عليج وبعد فتره تلقينج خقييتي وتزحزح الميزان...

اليوم انا تغديت صدر مشوي بالفرن مع كوسا ويزر ... وان شاء الله العشا خفاايف ...

 

[jolie_q8]

رد: التجمع الأول للتخلص من السمنة (15-25) كيلو

صباح الورد والفل والجوري

ادري أمس تأخرت عليكم

بس ما يبعدني عنكم إلا الشديد القوي ... بمعنى ثاني صار عندي ظرف

وما قدرت ادش

بس انا ملتزمه وياكم ومنظبطه 100% بس ناقصتني الرياضه

مع اني أحاول اسوي تمارين بسيطه


عموما ... اليوم راح أعوض لكم كل الأشياء اللي المفروض انزلها أمس :eh_s(17):


​

 

[ii DareeN ii]

رد: التجمع الأول للتخلص من السمنة (15-25) كيلو

ملتزمه والحمدالله ليلحين بالرجيم وبما ان شغلي اعمال شاقه مامارس الرياضه والعشا من الرجيم لاغيته يعني شاطره بس عسى ماخق

 

[الغاليه نونو]

رد: التجمع الأول للتخلص من السمنة (15-25) كيلو

الغالية نونو ... رجيمج اكييد بييب نتيجه .. لان مافيه اكل بس صدقيني بعدين كل اللي نزلتيه بسرعه راح ترديينه... ووين البروتين ؟؟ وين الدياي والا اللحم والا السمج؟؟؟؟؟ انتوا بالكويت عندكم زبيدي ... لو انا منكم كل يوم زبيديه مشويه بالفرن

حدييي مشتهية زبيدي


والله ماحب السمج ولا احب الدياي اللي يشوفني اكل يقول هذى ياهل عمرها 10 سنوات كان وزني القديم قبل سنه تقريبا 125 كيلووووووووو كنت دبه فيله بلوه مصيبه والحين نزلت شوي شوي صرت 78 وابي اوصل 60 وقفت علي الوزن هذا مادري ليشششش اخترب العداد عندي هههههههههههههههههه بس ناويه اسحك هالجم كيلوووو وبشتري لي ميزان يديد لانه اللي عندي قام يخوره عقب ماطاح من فوق الكبت

:eh_s(15):

 

[jolie_q8]

رد: التجمع الأول للتخلص من السمنة (15-25) كيلو

ابي انزل حاليا 25 كيلو
وما اسوي ريجيم
يعني اكل كل شي بس اما مشوي او مسلوق المهم انه مافيه دهون

مع ايزي لكس
وزيادة الحركة بالدوام..

هم طريقة حلوة ... بالنسبه لي هالطريقة ما تنزلني كلش

الا اذا لغيت الحلويات والمعجنات وخففت الخبز

بس اذا انتي قادره تسيطرين على نفسج ..

أميرة السعادة

احنا اكتفينا ب 25 عضوه ...بس تقدرين اتابعين ويانا

وتستفيدين من المعلومات والنصايح اللي نتبعها

وان شاءالله توصلين ويانا للهدف المنشود

وحياج الله


أنا وين ؟؟

نورتي موضوعنا


dl3_wl3

أول شي الإراده تيي من داخل الانسان ...يعني محد يقدر يعطيج الاراده !!

وبما انج قررتي تلتزمين ويانا ... فهذي أول خطوه

اهم شي اختاري نظام يريحج ما يعذبج ويوترج

بمعنى : انتي تحبين الكاكاو (اختاري نظام فيه قطعه كاكاو)

انتي ما تستغنين عن العيش (اختاري نظام فيه شويه عيش)

انتي ما تستغنين عن الهمبرجر والوجبات ..في نظام فيه وجبه

هذا أول شي

وثاني شي

شوفي نفسج بالمنظره وعطي نفسج نسبه عن مدى الرضى عن شكلج !

اذا انتي راضيه عن نفسج 100% عيل خلاص بيباي ... ما ينفع لج ولا نوع رجيم

واذا كنتي راضيه بنسبه 90-80 % يعني يمكن ناقصج شويه تضبيطات

مثل مشي تمارين شد الجسم ..نيو لوك مثلا !!

إذا 50% ونازل <<<< فأفضل شي انج تنضمين ويانا

وتمسكين نفسج شويه ... وترا هالتجمع فرصه .... لا طوفينها كلش

وياليت تعطينا شويه معلومات عن نفسج (موظفه- طالبه- متزوجه -انسه)

علشان اقدر احط لج الرجيم المناسب

وتكلمي بصراحه شنو اللي يخليج تخربطين النظام ؟


على فكره !! سويتي تمرين ال push up ؟؟​

 

[jolie_q8]

رد: التجمع الأول للتخلص من السمنة (15-25) كيلو

حنتوشه

نظامج روعة ... ويارب تنزلين عليه

انا وجدان (من زمااااااااااااااااااااااااااااااااااااااااااااان) كنت انزل معاها

بس بعدين جسمي ما قام يتقبل نظامها كلش كلش


برافوووووووو:eh_s(15):


نوال

والحمد لله ملتزمين بالرجيم وانشاء الله نشوف النتائج الي تسر الخاطر

برافووووووو:eh_s(15):


تفاخيه مبطوطه

شخبارج اليوم وأمس ؟ غالبه الرجيم والا غالبج !!

واشلون الرقص

DaBDoBa

3 برافو ووووووو:eh_s(15): :eh_s(15): :eh_s(15): << وايد أحب الاصرار والعزيمه والتحدي

وأحب الانسان يكون أمين ويفكر بغيره (أقصد البنات اللي بالتجمع)

يعني صج احس اني ملتزمه بالمجموعه ومابي أخرب


مــلاك

ريجيم صحي وايد ابرك عالاقل استمر عليه فتره طويله واخذلي فري يوم باللااسبوع يصير توازن شوي لان اذا حرمتي نفسج وعشتي بتقشف بيي يوم تهدين كل شي تاكلين بس لانج محرومه

هالكلام سليم 100% والرجيم القاسي واللي فيه حرمان ..فاشل

برافوو ملاك :eh_s(15):

النور الهادي

عطينا آخر أخبار الحرب ضد المتن والكسل

كلشي تمام ؟؟


bnt_kwt

فري قود .... وانتي ويانا ومكانج العين

وتابعينا وبنتابعج :eh_s(17):


@ الرسامة @

انا الحمدلله ونفسيه الرجيم اوكي (وايد تعدلت مع هالتجمع)
وبالتوفيق


​

 

[jolie_q8]

رد: التجمع الأول للتخلص من السمنة (15-25) كيلو

رواحل

انا بخير ... انتي اشلون الاراده وياج ؟؟

والنفسيه اهم شي !!

مشكورره جولي على التمرينات وايد حلوه وسهله

العفو ... وفي تمارين يديده بالطريج



الغاليه نونو

صبا

يا هلا ومرحبا ... تابعونا ..وراح تستفيدون ان شاءالله


ii DareeN ii

ملتزمه والحمدالله ليلحين بالرجيم وبما ان شغلي اعمال شاقه مامارس الرياضه والعشا من الرجيم لاغيته يعني شاطره بس عسى ماخق

برافوو:eh_s(15):​

 

[dl3_wl3]

رد: التجمع الأول للتخلص من السمنة (15-25) كيلو

اول شي اطمنج سويت بس لقولج انا شكلي مو قبيح بسمليت من المتن ابي ارد خفيفه وبالنسبه لي انا مهندسه ومتزوجه وعندي عيال2 حمد لله بس ترى مو كبيره بالعشرينيات
لا قاعده احاول التزم عشان التجمعوالله

 

[jolie_q8]

رد: التجمع الأول للتخلص من السمنة (15-25) كيلو

صورة اليوم

طبعا أغلبنا يعرف هذي البنت اللي بالصورة ... وكانت مشتركه في

ذا بيغست لوزن السيزن الأول

واسمها كيلي ماينر

عمرها كان 28 سنه

ووزنها كان 242 pounds << يعني 109.7 كيلو

وصج ابهرتنا بقوتها وارادتها وعزيمتها

وهذي مجموعة صور لها

هذي صورتها أول ما اشتركت بالبرنامح

وهالصوره بعد نهايه البرنامج

وهذي بالفاينل :eh_s(9):

وهالصورة مهمه جدا .. وهي عباره عن مجسم بالحجم الطبيعي لما كانت متينه

الفرق واضح


نسيت اقولكم انها نزلت 79 باوند << تقريبا 36 كيلو بالبرنامج

وحاليا : Kelly has lost 92 pounds << تقريبا 42 كيلو

اشرايكم ؟؟


​

 

[jolie_q8]

رد: التجمع الأول للتخلص من السمنة (15-25) كيلو

dl3_wl3

زين زين ونستيني

برافوووو

بس شنو رجيمج ؟ او نظامج ؟​

 

[jolie_q8]

رد: التجمع الأول للتخلص من السمنة (15-25) كيلو

على فكره في بنات

بس سجلوا ويانا !! بس ما نشوفهم !!

عسى المانع خير !!

(6) (الجوري)
الوزن المراد التخلص منه :15 كيلو
الرجيم المتبع حاليا : ----------------
ملاحظات :-----------------

لا حس ولا خبر . ولا كملتي البيانات !!

(9) sabrena79
الوزن المراد التخلص منه :------------
الرجيم المتبع حاليا :اتكنز - بوعباس
ملاحظات :-----------------

وينج ؟؟؟؟؟؟

(10) NiFeeSHa23
الوزن المراد التخلص منه :------------
الرجيم المتبع حاليا : ----------------
ملاحظات :-----------------

وينج ؟؟؟؟؟ وعطينا بياناتج ؟؟

(18) bayooya
المراد التخلص منه :25 كيلو
الرجيم المتبع حاليا :الكيميائي
ملاحظات :----------------------

شخبارج ؟؟!

(19) سماهر الشرق
المراد التخلص منه :35 كيلو
الرجيم المتبع حاليا : نظام استخدمه من امريكا
ملاحظات :----------------------

شخبارج !!!!! ما ادشين عسى ماشر

(24) q8ia_cutaa
المراد التخلص منه :40 كيلو
الرجيم المتبع حاليا : ومو ريجيم ريجيم.. مخففة اكل
ملاحظات : مشتركة بنادي ... ولما اخلص نادي اروح الممشى...يوميا ماعدا الجمعة فقط

من سجلتي ما دشيتي !! عسى ماشر

(3) dima
الوزن المراد التخلص منه :26.5 كيلو
الرجيم المتبع حاليا :الرجيم الكيميائي (للعضوه مذهله)
ملاحظات : مشي على الجهاز

فاقدينج !!!!! وينج
والبنات اللي كلش ما دشوا ...فرصتهم للسبت ..اذا ما حطوا نتايجهم

راح نلغي اساميهم ونسجل البنات اللي انضموا لنا بالاخير​

 

[jolie_q8]

رد: التجمع الأول للتخلص من السمنة (15-25) كيلو

نوال

(11) نوال
الوزن المراد التخلص منه :15-25 كيلو
الرجيم المتبع حاليا : ----------------
ملاحظات :-----------------

بياناتج ناقصه ...نبي نعرف اي رجيم ماشيه !! واي ملاحظات تحبين تضيفينها !!


bambena

(8) bambena

الوزن المراد التخلص منه :20 كيلو
الرجيم المتبع حاليا : ----------------
ملاحظات :--------------

على اي رجيم ماشيه !!

الحــــــلا كله

(20) الحــــــلا كله
المراد التخلص منه :19 كيلو
الرجيم المتبع حاليا : ---------------
ملاحظات :----------------------

كلش ما بينتي !! عسى ماشر ... والبيانات ناقصه!​

 

[jolie_q8]

رد: التجمع الأول للتخلص من السمنة (15-25) كيلو

8 طرق تساعد المرأة على الوصول إلى جسم صحي ورشيق:

1 ـ نظام الأكل الصحي

قد تخدعنا بعض الأقاويل التي تتردد بأن الأطعمة قليلة الدسم هي الأفضل دائما،
بيد انه يجب أن نفرق بين الأطعمة التي تحتوي على الدهون النافعة
والدهون الضارة.

الدهون النافعة هي التي تحتوي على أوميغا 3 وأوميغا 6، وتساعد الجسم على محاربة الكثير من الأمراض،
بالإضافة إلى التغلب على مشاكل الهرمونات والضغوط النفسية التي تتعرض لها بين فترة وأخرى.
ويمكن الحصول على أوميغا 3 وأوميغا 6 في السمك مثل السلمون والجزر واللوز وحبوب القرع.

2 ـ إقناع الذات

يمكن في بعض الأحيان تغيير نوع الحمية التي تتبعينها ولكن تغيير الرغبة في الأكل صعب للغاية.
إن من أصعب الأمور الامتناع عن الأكل نهائيا، ولكن من الأفضل إقناع النفس
باستبدال بعض الأطعمة بالأخرى
مثل المقلي بالمشوي واللحوم بالأسماك والحلويات بالفواكه والإكثار من السلطات والخضراوات الورقية.

3 ـ اختيار الأطعمة

إن اختيار الأطعمة حتى إن كانت من الفواكه مهم جدا في الحفاظ
على الصحة والرشاقة في آن واحد.

إن أكل خمس تفاحات في اليوم لا يفي بالغرض المطلوب، ولكن
في المقابل من الأفضل أخذ حبة واحدة من كل صنف من اللون الأخضر والأحمر والحمضيات لتنوع الفيتامينات والمعادن بها.

4 ـ السلطات الموسمية

إذا كنت ممن يحبون أكل نوع واحد فقط من السلطات فهذا بالطبع لا يمد الجسم بكل احتياجاته من التغذية المطلوبة،
فالسلطات لا تقتصر على الخس والخيار والطماطم، كما الحال في السلطات الشرقية،
لذا يجب إعداد السلطات في المنزل والتأكد من نظافتها واحتوائها على الكثير من الخضراوات الورقية المختلفة
وبعض الفواكه المجففة وعصير الليمون الذي يحتوي على فيتامين C.

5 ـ السعرات الحرارية

إن الجسم يحتاج إلى سعرات حرارية محسوبة في اليوم الواحد فإذا زادت أعداد السعرات الحرارية
من الأطعمة فان الجسم يخزنها وإذا لم نحرقها بالتمارين الرياضية المنتظمة، فإنها تتراكم على شكل دهون
ومن ثم تؤدي إلى السمنة وبالتالي إلى أمراض القلب والسرطان وأمراض أخرى كثيرة.
لذا يجب تغيير العادات السيئة وتغيير نظام الأكل كليا.

6 ـ الشاي والقهوة

يحتوي كل من الشاي والقهوة على مادة الكافيين والقليل منها لا بأس به والكثير ضار بالصحة،
ويجب استبدال الشاي والقهوة بشاي الأعشاب مع شرب الكثير من الماء الذي يساعد على إدرار البول
لتخليص الجسم من السموم وحماية الجسم من الجفاف.

7 ـ الرياضة

ينصح أخصائيو اللياقة بممارسة رياضة المشي بدلا من استخدام وسائل النقل، وباستخدام السلالم بدلا من المصعد،
فمثل هذه الوسائل المهمة تساعد على حرق الدهون وتحسين الدورة الدموية وتجديد خلايا الجسم
وإعطائه الطاقة واللياقة العالية.

والجسم بحاجة إلى التمدد والاسترخاء فتمارين اليوغا والتمدد هي أفضل وسيلة لشد وتقوية عضلات الجسم.

8 ـ أوقات التمارين الرياضية

يفضل ممارسة التمارين الرياضية ما لا يقل عن ثلاث مرات في الأسبوع مع نظام غذائي
للوصول إلى الهدف المطلوب مع التأكد من عملية الشهيق والزفير، وإعداد الجسم بالأوكسجين بكميات كافية
وزيادة إعطائه حاجته من فيتامين E، C، A، لمنع تلف الخلايا وأفضل أوقات ممارسة التمارين هي في الصباح الباكر أي قبل البدء بالعمل


​

 

[jolie_q8]

رد: التجمع الأول للتخلص من السمنة (15-25) كيلو

تمارين بسيطة


تمرين للفخوذ والارجل

تنامين على جنب مثل الصوره مع ثني الرجل (اللي تحت) ويكون الجذع مع
اليد بشكل مستقيم ... والجل الثانيه مفردوه.. وترفعينها وتنزلينها 15 مره ...على الجانبين ويكرر


تمرين للمعدة

تنامين على الأرض مع ثني الركبه .. واليد خلف الرأس وترفعين شويه عن الارض .. ويكون الراس مرفوه (جنج تطالعين السقف)
تسوين هالتمري 15 مره ويكرر !


تمرين للظهر

تنامين مفروده على البطن مثل الصوره وترفعين الجزء العلوي شويه عن الارض .. و يطون نظرج على الأرض ..تعدين للعشره وتريحين ويكرر 10-15 مره


تمرين للصدر

تمسكين علبه او ثقل وتوقفين وذراعج مفتوحه توازي الكتف وتسكرينها مثل الصوره
وشفطي البطن داخل سوي التمرين 15 مره ويكرر


تمرين للذراع

توقفين والذراع مفروده ومسكي ثقل او علبه (معلبات)

وتجفسين اليد لورا الراس << فاهمين ! ودري فرديها لمثل هذا الوضع

ويكرر حق كل ذراع 15 مره أو اكثر


اتمنى التمارين اعجبتكم وتكون واضحه ..لانه بصراحه ما اعرف اترجم ​

 

[طوق البنفسج]

رد: التجمع الأول للتخلص من السمنة (15-25) كيلو

هلوو ... اشلوونكم يا رشيقات

امس كان تمام ... و الحين صايمه باقيلي باجر ان شاء الله و اخلص

مامشيت و ما اتوقع اني بمشي هالاسبوع اذا شي الاسبوع الياي بس بحاول اسوي التمارين الي حاطتها جولي يزاها الله خير

 

[ii DareeN ii]

رد: التجمع الأول للتخلص من السمنة (15-25) كيلو

يعطيج العافيه جولي على التشجيع وعلى المجهود ويازين الضعف صج الضعف يحلي شزينها يوم نزلت ترا انا مو من تابعين البرنامج واول مره اشوفها يارب تنزلنا على صحه كلنا وانا ليلحين مستمره بالرجيم

 

[jolie_q8]

رد: التجمع الأول للتخلص من السمنة (15-25) كيلو

طوق البنفسج

هلا وغلا

عاد تصدقين الجو يهبل حق المشي صج يشجع

<< بس للأسف ماعندي وقت

بس ناويه ان شاءالله بالمستقبل القريب


ii DareeN ii


شفتي شلون !! يحلي ويصغر ..حتى خشمها صغر

وحسافه البرنامج ما شفتيه !!..حطوا السيزن الاول العام وبرمضان هالسنه عادوا البرنامج كله يميا كانو يحطوله على ام بي سي فور

وناطرين السيزن الثاني والثالث


والفال لنا ..نصير احسن منهم​

 

[Maneena Manaana]

رد: التجمع الأول للتخلص من السمنة (15-25) كيلو

جولي .. يعطيج الف عاافيه على هاللي قاعده تسويينه... صج صج تشجيع مو طبيعي.. من تماارين وصور ونصاايح ...الله ينولج اللي ببالج وتووصلين الوزن المطلوب من غير شر.

انا قاعده اكتب واشرب ماي دافي مع شريحة ليمونه لول يقوولون يسحك الشحم ... نجرب شوراانا

اليوم الغدا بمطعم ... وان شاء الله ما اخربط... الله يستر
و الحين بروح اصور عمري ههههههههههههههههه طريقة الصور اللي بموضوع دموع للمره المتينه وكل شهر شلون تغيرت الصرااحه داافع قوي
واذا ضعفت .. احطلكم صورتي قبل وبعد لول